Sumajta kausakoyqa sapa ujmanta kashan

Jehová Diosqa 3.500 watas ñaupajta jinaña payta yupaychajkunata nerqa imatachus ruwanankuta sumajta kausakunankupaj. Pay nerqa: “Ñaupaqeykichejman churani kausayta wañuytawan, chantá bendicionta maldiciontawan chaykunamanta ajllakunaykichejpaj. Kausayta ajllakuychej, ajinamanta qankunapis, wawasniykichejpis kausanaykichejpaj”, nispa (Deuteronomio 30:19).

Israelitas sumajta kausakunankupajqa allinta ajllananku karqa. Noqanchejpis allin kajta ajllananchej tiyan. Allin kajta ajllanapajqa Biblia niwanchej ‘Jehová Diosta munakunanchejta, nisqasnintataj kasukunanchejta’ (Deuteronomio 30:20).

¿IMATÁ RUWASUNMAN JEHOVÁ DIOSTA MUNAKUNAPAJ NISQASNINTATAJ KASUKUNAPAJ?

IMATACHUS BIBLIA NISQANTA YACHAKUNA. Jehovata munakunapajqa imatachus Biblia paymanta nisqanta yachananchej tiyan. Jehovata astawan rejsispa reparasun mayta munakuwasqanchejta, allinninchejtataj munasqanta. Chantapis Jehovaqa munan paymanta mañakunanchejta, imaraykuchus payqa noqanchejmanta llakikun (1 Pedro 5:7). Bibliaqa nin Jehová Diosta rejsinapaj kallpachakojtinchej, pay qayllaykamunawanchejta (Santiago 4:8).

YACHAKUSQANCHEJMAN JINA KAUSAKUNA. Jehová Diospa nisqasnenqa Bibliapi kashan. Chay nisqasninta kasukoyqa may allinpuni. Bibliaj nisqanman jina kausakusun chayqa ‘tukuy imapi allin riwasun, sumaj yuyaywantaj tukuy imata ruwasun’ (Josué 1:8).