Nínive llajtapeqa chhikachachaj edificios, monumentos ima tiyarqa.
¿Yacharqankichu?
¿Jonaspa tiemponmanta aswan qhepaman Nínive llajta kallarqapunichu?
KAY 670 wata chaynejta Jesús niraj jamushajtin, ashkha suyus Asiriaj atiyninpi kasharqanku. Internetpi Museo Británico nisqamanta parlaj paginapi nin: “Asiriaj atiyninpeqa Chipre suyumanta Irán suyukama kasharqanku. Chipreqa inti yaykuy ladopi kasharqa, Irantaj inti llojsimuy ladopi. Uj tiempotataj Egiptopis atiynillanpitaj kasharqa”, nispa. Nínive llajtaqa Asiriaj capitalnin karqa, mundontinmanta llajtasmantataj aswan jatun karqa. Chantapis may chhikachachaj monumentosniyoj, may jatuchaj jardinesniyoj, jatuchaj palaciosniyoj, jatuchaj bibliotecasniyoj ima karqa. Chay llajtaj perqasninpeqa rey Asurbanipalpa, waj reyespatawan qhelqasqasninkuta tarisqanku. Chay reyesqa “mundontinmanta rey” kasqankuta yuyakusqanku, chaytataj perqasman qhelqasqanku. Chay tiempopeqa Asiriawan Ninivewan manchay atiyniyoj karqanku, ni pi atipananpaj jinapuni.
Chay tiempopeqa ashkha llajtas Asiriaj atiyninpi kasharqanku.
Asiria ajina atiyniyoj kashajtin, profeta Sofoniasqa nerqa Jehová imatachus chay llajtawan ruwananmanta. Nerqa: ‘Payqa, Asiriata tukuchenqa. Ninivetaqa chʼinpachata saqerparenqa, chʼaki pampata jina tʼajrapachata saqenqa’, nispa. Profeta Nahumpis nillarqataj: ‘Qolqe metalninta suwaychej, qorinta suwaychej. Chay llajtaqa kashan chʼusajpacha, chʼinpacha, thuñisqataj. Pillapis rikusojqa qanmanta ayqekonqa, nenqataj: Niniveta thuñirpasqanku’, nispa (Sof. 2:13; Nah. 2:9, 10; 3:7). Runasqa chay profetaspa nisqankuta uyarispa ichá nerqanku: “¿Jinapunichu kanman? ¿Pillapis Asiriata chinkachiyta atinmanchu?”, nispa. Imajtinchus paykuna yuyasqankuman jinaqa nipuni chinkachisqa kananpaj jinachu karqa.
Nínive llajtaqa chʼinpacha, tʼajrapachataj kashan.
Jinapis chinkachisqapuni karqa. Imajtinchus 600 wata chaynejta Jesús niraj jamushajtin, babilonioswan medoswanqa Asiriata japʼikapusqankuña. Tiemponmantaj Ninivepeqa mana pipis tiyakorqachu, nitaj pipis chay llajtamanta yuyarikorqachu. Internetpi Museo de Arte Metropolitano de Nueva York nisqamanta parlaj paginapi nin: “Nínive llajtaqa pʼampaykusqa karqa, runastaj Bibliata leespallaña chay llajta kasqanmanta yacharqanku”, nispa. Chantapis Internetpi waj paginapi nisqanman jina 1800 wata qallariytaqa, “ni pi yacharqachu Nínive llajta kasqantapuni” (Biblical Archaeology Society Online Archive). Jinapis 1845 watapi Austen Henry Layard sutiyoj runaqa, maypichus chay llajta pʼampasqa kasharqa chaynejta allaspa, Nínive llajtata tarisqa. Chay runaj tarisqanqa rikucherqa Nínive llajta jatunpuni kasqanta.
Nínive llajta chinkachisqa kananmanta profeciasqa juntʼakorqapuni. Chaytaj mayta kallpachawanchej Dios kay tiempomanta atiyniyoj gobiernosta chinkachinanta nisqanpi atienekunapaj (Dan. 2:44; Apo. 19:15, 19-21).