¿Imajtintaj runas mayta chejninakunku?

Kay mundoqa chejninakuywan juntʼa kashan. ¿Imajtin? Chayta yachanapajqa entiendenanchej tiyan imachus chejnikuy kasqanta, imaraykuchus chejninakusqanchejta, imaynapichus wajkunapis chejnikuyta qallarisqankuta.

¿Imaynataj chejnikoj runa?

Chejnikoj runaqa wajkunata pisipaj qhawan chayri qhesachan. Piskunatachus chejnikun chaykunataqa mana rikullaytapis atinchu.

¿IMARAYKUTAJ RUNAS CHEJNINAKUNKU?

Runasqa ashkha imasrayku chejninakunku. Astawanqa wajkunata chejnikunku mana sajrata ruwasqankuraykuchu, manaqa waj llajtamanta kasqankurayku. Paykunaqa ichapis ninku: “Kay runasqa sajras kanku, hasta runastapis wañuchillankuman, paykunanejta kay chhika problemas tiyan. Paykunaqa ni imapaj valenkuchu”, nispa. Wakin runasqa wajkunata chejnikunku paykunata maqasqankurayku, chayri mana justiciata ruwapusqankurayku, manachayrí ima sajratapis contranpi ruwasqankurayku.

¿IMAYNATÁ CHEJNINAKUY TUKUYNEJMAN CHAYAN?

Wakin kutispi runasqa mana rejsisqanku runasta chejninku. ¿Imajtin? Imajtinchus ichá amigonku chayri respetasqanku runa uj grupo runasta pisipaj qhawanku. Pisimanta pisitaj amigonku jina chay runasta mana allinpajchu qhawayta qallarinkuman. Comunidadnintinpi ajinata yuyayta qallarinkuman chaytaj, tukuyninku chay runasta chejnikunkuman.

Chejninakuy tukuynejman usqhayllata chayasqanta yachaspaqa, sutʼita reparanchej imajtinchus ashkhas wajkunata chejnikusqankuta. Jinapis manaña chejninakuy kananpaj, yachananchej tiyan imaynatachus chejninakuy rikhurisqanta. Chaytataj Biblia willawanchej.

BIBLIAQA WILLAWANCHEJ IMAYNAPICHUS CHEJNINAKUY RIKHURISQANTA

Iskay flechas muyitupi jina rikuchiwanchej imasraykuchus chejninakuy kasqanta. 1. Llulla willaykuna kan runas parlasqankupi, redes socialespi, telepi, radiopi ima. 2. Mana allinta yachankuchu uj culturamanta, maymantachus kasqankumanta, religionninkumanta ima. 3. Manchachikunku kausayninku cambiananta, imatapis qhechunankuta, imachus qhepaman kanantapis. 4. Chejninakunku, pisipaj qhawanku, kʼumuykachachinku, maqanakunkutaj.

MANA RUNASCHU CHEJNINAKUYTA QALLARERQANCHEJ. Chejnikoyqa cielopi qallarerqa, uj ángel Diospa contranta oqharikusqanwan. Chay angeltaqa kay sutiswan rejsinchej Satanás chayri Diablo. Payqa Diospa contranta oqharikusqantawan runa wañuchiman tukorqa. Satanasqa “llulla, llullakuypa tatantaj”, chayrayku chejninakuyta, maqanakuyta rikhurichishallanpuni (Juan 8:44; 1 Juan 3:11, 12). Bibliaqa nin Satanás mana khuyakuyniyoj kasqanta, may sajra, manchay phiñasqataj kashasqanta (Job 2:7; Apocalipsis 12:9, 12, 17).

CHEJNINAKUYTA HERENCIATA JINA JAPʼINCHEJ. Ñaupa tatanchej Adanqa Satanás jina ruwasqanrayku tukuyninchejman juchata herenciata jina saqewarqanchej (Romanos 5:12). Adanpa kuraj wawan Cainqa, hermanon Abelta chejnikusqanrayku wañurparicherqa (1 Juan 3:12). Runasqa wajkunata munakuyta, khuyakuyta atinchej. Jinapis juchata herenciata jina japʼisqanchejrayku, ashkhasqa paykunallapi yuyanku, wajkunamanta envidiakunku, jatunchakunku ima. Chaykunataj wajkunata chejnikunankupaj tanqan (2 Timoteo 3:1-5).

SAJRA RUWAYKUNAQA CHEJNINAKUYMAN TANQAWANCHEJ. Mundontinpi rikukun sajra ruwaykuna, chaykunataj wajkunata chejnikunankupaj tanqan. Mundontin Satanaspa makinpi kasqanrayku runasqa diamanta día manaña aguantanakunkuchu, insultanakunku, maqanakunku, waj llajtayoj kasqankuraykutaj chejninakunku (1 Juan 5:19).

Bibliaqa mana imaynatachus chejninakuy rikhurisqallantachu willawanchej. Willallawanchejtaj imatachus ruwanata mana chejninakunapaj.