Orakuyta atisqanchejta jatunpaj qhawana

1. ¿Imaynatá qhawananchej tiyan Jehovamanta mañakuyta atisqanchejta?

JALLPʼATAWAN cielotawan Ruwaj Diosninchejmanta mañakuyta atisqanchejqa sumaj regalopuni. Jehová Diosninchejmanqa ima ratollapis, ima parlayllapipis imaschus sonqonchejpi kasqanta willakuyta atinchej. Paywan parlanapajqa mana turnotarajchu orqhonanchej tiyan. Hospitalpi kashaspapis carcelpi kashaspapis munakuyniyoj Tatanchejmanta mañakuyta atinchej, paytaj uyariwanchejpuni. Jehovamanta mañakuyta atisqanchejmanta maytapuni agradecekuna.

2. ¿Imaynatataj rey David rikucherqa orakuyta may jatunpaj qhawasqanta?

² Rey Davidqa orakuyta atisqanta may jatunpaj qhawarqa. Payqa Jehovata uj takiypi nerqa: “Mañakususqayqa ñaupaqeykipi sumaj wakichisqa incienso jina kachun”, nispa (Sal. 141:1, 2). Davidpa tiemponpeqa, santo inciensota sacerdotes Diosman jaywanankupaj sumajsituta wakichej kanku (Éxo. 30:34, 35). Davidqa inciensomanta parlaspa ichapis nisharqa mañakunanpaj imatachus ninanpi sumajtaraj piensariyta munasqanta. Noqanchejpis chayllatataj ruwayta munanchej, mañakusqanchej Jehovapaj sumaj qʼapashaj incienso jina kananpaj.

3. ¿Imaynatá Jehovamanta mañakunanchej tiyan, chanta imaraykutaj?

³ Jehovamanta mañakushaspaqa ama mitanchejwan jinachu parlana, manaqa respetowanpuni. Imatachus Isaías, Ezequiel, Daniel, Juan ima rikusqankupi piensarina. Mana kikin imastachu rikojtinkupis, chay rikusqankoqa uj imapi rijchʼakunku. Paykunaqa Jehovata may atiyniyoj Reyta jina rikorqanku. Isaiasqa ‘Jehová Diosta rikorqa kamachina tiyananpi tiyasqata, manchay patapi, altopi’ (Isa. 6:1-3). Ezequielqa Jehovata rikorqa carretanpi tiyasqata, payqa kʼanchaywan muyurisqa kasharqa, ‘chay kʼanchayqa kʼuychi jina karqa’ (Eze. 1:26-28). Danielqa ‘Ashkha Watasniyoj Machituta’ rikorqa, yuraj ropayojta, kamachina tiyananmantataj nina lauray jina llojsimusharqa (Dan. 7:9, 10). Juanpis Jehovata kamachina tiyananpi tiyasqata rikorqa, chay kamachina tiyanantaqa uj kʼuychi muyuykusharqa, esmeralda rumiman jina rijchʼakoj (Apo. 4:2-4). Jehová ajina may atiyniyoj kasqanpi piensarispa, mayta agradecekunchej paymanta mañakuyta atisqanchejmanta, may respetowantaj chayta ruwayta munanchej. Jina kajtin, ¿imastá orakuspa mañakusunman?

“KAY JINATA DIOSMANTA MAÑAKUYCHEJ”

4. ¿Imatá yachakunchej Jesús imastachus ñaupajta mañakunata yachachisqanmanta? (Mateo 6:9, 10).

⁴ (Mateo 6:9, 10 leey). Jesusqa Orqopi Yachachishaspa, discipulosninman yachacherqa imaynatachus Diosta kusichinapaj jina mañakunankuta. Jesusqa ‘kay jinata Diosmanta mañakuychej’ niytawan, kay imasta ñaupajta mañakunata nerqa: Diospa sutin jatunchasqa kananta, Gobiernon jamunanta, mayqenchus Diospa tukuynin enemigosninta tukuchenqa chayta, kay jallpʼapi tiyakoj runaspajtaj bendicionesta apamunanta. Chay imasmanta mañakuspaqa, rikuchinchej Diospa munaynin juntʼakunan noqanchejpaj may importante kasqanta.

5. ¿Jehovamanta imatapis noqanchejpaj mañakuyta atinchejchu?

⁵ Chayta yachachiytawan Jesusqa nillarqataj noqanchejpajpis mañakuyta atillasqanchejtataj. Jehovamanta mañakuyta atinchej sapa pʼunchaypaj mikhunata qonawanchejta, juchasninchejmanta perdonanawanchejta, ama juchaman urmajta saqenawanchejta, Diablomantapis libranawanchejta (Mat. 6:11-13). Chay imasta Jehovamanta mañakuspaqa rikuchinchej yanapayninta necesitasqanchejta, kusichiytataj munasqanchejta.

6. ¿Jesuspa yachachisqan imasllatachu mañakunanchej tiyan? Sutʼinchay.

⁶ Jesusqa mana munarqachu discipulosnin mañakushaspa chay kikin palabrastapuni oqharinankuta. Jesusqa waj kutispi waj imasmantapis mañakullarqataj: Imaschus chaypachas llakichisharqa chaykunasmanta (Mat. 26:39, 42; Juan 17:1-26). Noqanchejpis imaschus llakichiwasqanchejmanta mañakullasunmantaj. Imatapis kausayninchejpi ruwananchej kajtin yachayta, yuyayta mañakusunman (Sal. 119:33, 34). Diospa llajtanpi uj ruwayta japʼejtinchej, nitaj atinapaj jinallachu kajtin, Jehovamanta mañakuna yachayta, yuyaytawan qonawanchejpaj (Pro. 2:6). Tatasqa mañapunkuman wawasninkupaj, wawastaj tatasninkupaj. Tukuyninchejtaj mañapunanchejpuni tiyan estudiosninchejpaj, predicanchej chay runaspajpis. Jinapis orakuspaqa mana yanapanallawanchejtachu mañakunanchej tiyan.

7. ¿Imaraykutaj orakushaspa Jehovata jatunchananchej tiyan?

⁷ Orakushaspaqa Jehová Diosninchejta jatunchananchejpuni tiyan. Paylla jatunchanapaj jina. Diosninchejqa ‘kʼacha, perdonanapajpis wakichisqa’ kashan. Chantapis payqa ‘khuyakoj Dios, kʼacha sonqoyojtaj, pacienciayoj, may jina munakuyniyoj, atienekunapaj jinataj’ (Sal. 86:5, 15). Jehová Diosninchej ajina kasqanrayku, imastachus ruwasqanrayku jatunchanapaj jinapuni.

8. ¿Imasmantataj Jehovaman agradecekusunman? (Salmo 104:12-15, 24).

⁸ Orakushaspaqa mana Jehovata jatunchanallanchejchu tiyan, agradecekunallanchejtaj tiyan chay jina tukuy ima sumaj imasta qowasqanchejmantapis. Agradecekusunman tʼikaspi may kʼachitu coloresta rikusqanchejmanta, may chhika miskʼi mikhunas kapuwasqanchejmanta, sumaj amigosniyoj kasqanchejmantapis. Munakuyniyoj Tatanchejqa tukuy chay imasta, waj imastapis qollawanchejtaj kusisqa kananchejta munasqanrayku (Salmo 104:12-15, 24 leey). Jehovaman astawanraj agradecekunchej, sumaj yachachiykunata mikhunata jina qowasqanchejrayku, sumaj suyakuytapis qowasqanchejrayku.

9. ¿Imatá ruwasunman Jehovaman agradecekuyta mana qonqakunapaj? (1 Tesalonicenses 5:17, 18).

⁹ Ichapis qonqakusunman Jehovaman agradecekuyta imastachus noqanchejpaj ruwapuwasqanchejmanta. ¿Imataj yanapawasunman Jehovaman agradecekuyta mana qonqakunanchejpaj? Uj listapi anotakusunman imastachus Jehovamanta mañakusqanchejta, sapa kutitaj chay listanchejta qhawaykusunman imaynatachus Jehová kutichiwasqanchejta reparanapaj. Chaymantataj Jehovaman agradecekusunman yanapawasqanchejmanta (1 Tesalonicenses 5:17, 18). Wajkuna agradecekuwajtinchejqa kusikunchej, munasqastaj sientekunchej. Ajinallatataj Jehovaman agradecekuyta mana qonqakuspaqa, sonqonta kusichinchej (Col. 3:15). ¿Imamantawantaj Jehovaman agradecekusunman?

JEHOVAMAN AGRADECEKUNA MUNASQA WAWANTA KACHAMUSQANMANTA

10. ¿Imaraykutaj Jehovaman agradecekunanchej tiyan Wawanta kachamusqanmanta? (1 Pedro 2:21).

¹⁰ (1 Pedro 2:21 leey). Jehovaman agradecekuna munasqa Wawanta yachachinawanchejpaj kachamusqanmanta. Jesuspa kausayninmanta estudiaspaqa ashkha imasta yachakunchej Jehovamanta, imaynatachus payta kusichinamantapis. Cristo noqanchejrayku wañusqanpi creespaqa, Jehová Diosninchejwan allinpi kayta atinchej, sumaj amigosnin kaytapis (Rom. 5:1).

11. ¿Imajtintaj Jesuspa sutinpi mañakunchej?

¹¹ Jehovaman agradecekullanchejtaj Wawannejta paymanta mañakuyta atisqanchejmanta. Jehovaqa Jesusnejta mañakusqanchejta uyariwanchej, kutichiwanchejpis. Chayrayku Jesuspa sutinpi mañakunanchej tiyan. Jesús nerqa: “Sutiypi imallatapis mañakojtiykichejqa, chayta qosqaykichej Tatay noqanejta jatunchasqa kananpaj”, nispa (Juan 14:13, 14).

12. ¿Imaraykutaj Jehovaman Wawanta kachamusqanmanta agradecekullanchejtaj?

¹² Jehovaqa juchasninchejta perdonawanchej Jesús wañusqanrayku. Bibliaqa nin Jesusqa ‘kuraj kaj sacerdotenchej’ kasqanta, ‘payqa cielopi Diospa kamachina tiyananpa pañanpi tiyaykukusqanta’ (Heb. 8:1). Jesusqa “yanapawajninchej, paytaj Tata Dioswan kashan” (1 Juan 2:1). Mayta Jehovaman agradecekunchej Jesusta Kuraj kaj Sacerdotenchejta jina churapuwasqanchejmanta. Jesusqa khuyakuwanchej, sumajta entiendewanchej, ‘noqanchejpajtaj mañapuwanchej’ (Rom. 8:34; Heb. 4:15). Sichus Jesús mana noqanchejrayku wañunmanchu karqa chayqa, pantaj runas kasqanchejrayku, mana Jehovamanta mañakuyta atisunmanchu karqa. Jehovamanqa ni jaykʼaj agradecekuyta tukusunmanchu, munasqa Wawanta noqanchejrayku kachamusqanmanta.

HERMANOSNINCHEJPAJ MAÑAPUNA

13. ¿Imaynatá Jesús wañupunan ñaupaj chʼisita discipulosninta munakusqanta rikucherqa?

¹³ Jesusqa wañupunan chʼisi ñaupajta unayta Discipulosninpaj mañaporqa, Tatan paykunata ‘Diablomanta jarkʼananpaj’ (Juan 17:15). Chaytaj rikucherqa Jesús mayta paykunata munakusqanta. Payqa tumpamantawan sinchʼita ñakʼarinanta yachaspapis, discipulosninmanta llakikullarqapuni.

14. ¿Imaynatataj hermanosninchejta munakusqanchejta rikuchisunman?

¹⁴ Noqanchejpis Jesús jinallataj mana imatachus necesitasqallanchejpichu yuyanchej, manaqa hermanosninchejpajpis mañapunchejpuni. Chayta ruwaspaqa Jesús purajmanta munanakunanchejta kamachisqanta kasukushanchej, Jehovamantaj rikuchishanchej hermanosninchejta mayta munakusqanchejta (Juan 13:34). Hermanosninchejpaj mañapusqanchejqa mana qhasichu. Bibliaqa nin “cheqan runaj mañakuynenqa manchay atiyniyoj” kasqanta (Sant. 5:16).

15. ¿Imajtintaj hermanosninchej mañapunanchejta necesitanku?

¹⁵ Hermanosninchejqa imaymana llakiykunata aguantanku. Chayrayku necesitanku paykunapaj mañapunanchejta. Jehovamanta mañapusunman paykunata yanapananta onqoykojtinku, qhatiykachasqa kajtinku, guerra kajtin, sinchʼi para, terremotos, waj llakiykunas kajtinpis. Wakin hermanosninchejqa wajkunata yanapanankupaj mayta llankʼanku, paykunapajpis mañapullasunmantaj. Ichapis ajina llakiypi kaj hermanosta rejsinchej. Paykunapajpis sutisninkuta oqharispa mañapusunman. Jehová paykunata yanapananta mañakuspaqa, mayta munakusqanchejta rikuchinchej.

16. ¿Imaraykutaj congregacionta ñaupajman apajkunapaj mañapunanchej tiyan?

¹⁶ Congregacionta ñaupajman apajkunaqa, mayta agradecekunku paykunapaj mañapusqanchejmanta. Chay mañakusqanchejqa paykunata mayta yanapan. Apóstol Pablopis yacharqa wajkuna paypaj mañapunankuta necesitasqanta. Chayrayku nerqa: “Noqapajpis Diosmanta mañapullawaychejtaj. Ajinamanta simiyta kicharejtiy, Diospa pakasqa yachayninmanta sumaj willaykunata mana manchachikuspa willayta atinaypaj”, nispa (Efe. 6:19). Kunanpis ashkha hermanos congregacionpi sinchʼita llankʼanku. Paykunata yanapananpaj Jehovamanta mañakuspaqa, paykunata munakusqanchejta rikuchinchej.

WAJKUNAJ ÑAUPAQENKUPI ORASHASPA

17, 18. 1) ¿Maykʼajtaj wajkunaj ñaupaqenkupi orananchej kanman? 2) ¿Imatataj yuyarikunanchej tiyan wajkunaj ñaupaqenkupi orashaspa?

¹⁷ Wakin kuteqa ichapis wajkunaj ñaupaqenkupi orananchej kanqa. Ichá uj hermanaqa estudionman waj hermanawan rispa, chay hermanata oracionwan qallarinanta ninman. Hermanataj yachakojta manaraj allinta rejsisqanrayku, ninman estudiayta tukuytawan oracionta ruwananta. Ajinamanta yachanqaña imatachus yachakojpaj mañapunanta.

¹⁸ Ichapis uj hermanota ninkuman predicacionman llojsinapaj tantakuypi, chayri congregacionmanta tantakuypi oracionta ruwananta. Oracionta ruwaj hermanosqa, yuyarikunanku tiyan imapajchus chay tantakuykuna kasqanta. Oracionta ruwayqa mana wajkunata yuyaychanapajchu, nitaj imata willanapajchu. Casi tukuy tantakuykunapeqa, phishqa minutosta tʼaqakun takinapaj, oracionta ruwanapajwan. Chayrayku oracionta ruwaj hermanoqa ama ‘ashkhata parlananchu’ tiyan, astawanraj tantakuy qallarikunanpaj oracionta ruwashaspa (Mat. 6:7).

MANA SAYKʼUSPA ORAKUNA

19. ¿Imatá ruwananchej tiyan Jehovaj juicio pʼunchayninta wakichisqa suyananchejpaj?

¹⁹ Jehovaj juicio pʼunchaynenqa qayllitapiña kashan. Chayrayku astawanraj orakunanchej tiyan. Jesús nerqa: “Rijchʼarisqallapuni kaychej, tukuy tiempo Diosmanta mañakuspa, chay tukuy jamoj imasmanta lluspʼinaykichejpaj”, nispa (Luc. 21:36). Mana saykʼuspa orakusun chayqa sinchʼi creeyniyoj kasun, wakichisqastaj kasun Diospa juicio pʼunchayninpaj.

20. ¿Imatá ruwasunman orakusqanchej inciensoj qʼapaynin jina kananpaj?

²⁰ ¿Imatá yachakunchej? Orakuyta atisqanchejmanta mayta agradecekunchej. Ñaupajtaqa mañakunanchej tiyan Diospa sutin jatunchasqa kananta, Gobiernon jamunanta, runaspajtaj bendicionesta apamunanta. Chantapis orakushaspaqa mayta agradecekunchej Diosninchej Wawanta kachamusqanmanta, Gobiernonmantapis. Hermanosninchejpajpis mañapullanchejtaj. Mañakuyta atillanchejtaj kausananchejpaj imatachus necesitasqanchejta, creeyninchej sinchʼi kananpajpis. Orakunapaj imatachus ninanchejpi allinta piensarispaqa, orakuyta may sumajpaj qhawasqanchejta rikuchinchej. Ajinamanta orakusqanchejqa inciensoj qʼapaynin jina Jehovapaj kanqa, ‘sonqonta kusichenqa’ (Pro. 15:8).