‘Cheqa kajpi purinallapuni’

1. ¿Imajtintaj allin imaynamantachus Jehovaj testigonman tukusqanchejmanta hermanosninchejwan parlarikuy?

“¿IMAYNAMANTATAJ testigoman tukorqanki?” Ashkha kutispichá chay tapuyman kuticherqanchej. Waj hermanosta rejsispa chayta tapunakuyta yachanchej. Mayta kusikunchej hermanosninchej imaynatachus Jehovata rejsisqankuta, munakusqankuta willariwasqanchejta uyarispa. Noqanchejpis kusiywan willarinchej imajtinchus cheqa kajta munakusqanchejta (Rom. 1:11). Ajinata willanarikuspa yuyarikunchej Jehovaj testigosnin kayqa may sumajpuni kasqanta. Chantapis astawan munanchej ‘cheqa kajpi purillaytapuni’, nisunman Jehovata kusichinapaj jina, bendecinawanchejpaj jina kausakullaytapuni (3 Juan 4).

2. ¿Imatá kay yachaqanapi qhawarisun?

² Kay yachaqanapi yuyarikusun imajtinchus cheqa kajta munakusqanchejta. Chantá qhawarisun imaynatachus rikuchillasunmanpuni cheqa kajta munakusqanchejta. Chaykunata yachakuspaqa astawan agradecekusun Jehová cheqa kajta yachachiwasqanchejmanta (Juan 6:44). Astawantaj sonqonchej aysawasun wajkunaman Bibliamanta cheqa kajta yachachinapaj.

¿IMAJTINTAJ ‘CHEQA KAJTA’ MUNAKUNCHEJ?

3. ¿Imajtintaj cheqa kajta astawan munakunchej?

³ Cheqa kajtaqa ashkha imasrayku munakunchej. Astawanqa Jehovata munakusqanchejrayku, cheqa kajqa paymanta jamun. Palabran Biblianejta yachakunchej Diosqa tukuy atiyniyoj kasqanta, cielotapis jallpʼatapis pay ruwasqanta. Chantapis yachakunchej Tatanchej kasqanta, munakuwasqanchejta, noqanchejmantapis llakikusqanta (1 Ped. 5:7). Yachanchej Jehovaqa ‘khuyakoj Dios kasqanta, kʼacha sonqoyoj, pacienciayoj, may jina munakuyniyoj, nisqantapis juntʼasqantapuni’ (Éxo. 34:6). Payqa justiciata munakun (Isa. 61:8). Jehovaj sonqonqa mayta nanan sufrisqanchejta rikuspa, maytataj munashan churasqan tiempopi sufrimientota tukuchiyta (Jer. 29:11). Mayta munashanchej chay día chayamunallantaña. Chayrayku Jehovata mayta munakunchej.

4, 5. ¿Imaraykutaj apóstol Pablo nerqa suyakuyninchej barco sayachina gancho jina kasqanta?

⁴ ¿Imajtintaj cheqa kajta munakullanchejtaj? Kausayninchejpi mayta yanapawasqanchejrayku. Bibliaj yachachiykunasninmanta ujnenqa kashan aswan qhepapaj uj suyakuyta qowasqanchej. Apóstol Pabloqa chay suyakuyninchej may sumajpuni kasqanta reparananchejpaj, kay jinata qhelqarqa: “Chay suyakoyqa kausayninchejpaj barco sayachina gancho jina, mana iskayrayaspa sinchʼita sayanapaj yanapawanchej”, nispa (Heb. 6:19). Imaynatachus barco sayachina gancho barcota sumajta sayachin, ajinallatataj suyakuyninchejpis sumajta sayachiwanchej, llakiykunapi kajtinchejtaj sonqo tiyasqa kanapaj yanapawanchej.

⁵ Pabloqa chayta nispa, ajllasqa cristianos cieloman ripuyta suyakusqankumanta parlasharqa. Jinapis chay nisqanqa kay jallpʼapi paraisopi wiñaypaj kausakuyta suyakoj cristianospajpis kallanmantaj (Juan 3:16). Wiñaypaj kausakuyta suyakushasqanchejrayku, yachanchej kausayninchejqa mana qhasipajchu kasqanta.

6, 7. ¿Imaynatataj Yvonneta yanaparqa imachus qhepaman kananmanta Bibliapi yachakusqan?

⁶ Yvonne sutiyoj hermanamanta parlarina. Payqa mana wawitamantapachachu Jehovaj testigon karqa, imillita kashaspataj wañuyta manchachikoj. Yuyarikuntaj uj libropi kayta leesqanta, “uj diaqa niña kausay kanqachu” nisqanta. Pay nin: ‘Chay palabraspi yuyaspa mana puñuytapis atejchu kani. Yuyaj kani “mana kayllachu kausay kanman, ¿imapajtaj kausani?” nispa. Mana wañuyta munarqanichu’, nispa.

⁷ Yvonneqa sipasña kaspa Jehovaj testigosninta rejserqa. Pay nin: ‘Jallpʼapi uj paraisopi wiñaypaj kausakunaypi creeyta qallarerqani’, nispa. Bibliamanta cheqa kajta yachakusqanqa mayta yanaparqa. Pay nillantaj: ‘Niña ñaupajta jinachu sutʼiyani imachus qhepaman kananmanta chayri wañuymanta llakikuspa’, nispa. Chayrayku Yvonneqa Bibliaj cheqa yachachiyninta mayta munakun, maytataj kusikun suyakuyninmanta wajkunaman willarispa (1 Tim. 4:16).

8, 9. 1) Jesuspa rijchʼanachinanmanta runa, ¿imatataj ruwarqa tarisqan qorita may valorniyojpaj qhawasqanrayku? 2) ¿Imaynatataj Bibliaj cheqa yachachiyninta qhawanki?

⁸ Diospa Gobiernonmanta sumaj willaykunapis, Bibliaj ujnin cheqa yachachiynillantaj. Jesusqa Diospa Gobiernonmanta cheqa yachachiyta pʼampasqa qoriwan kikincharqa. Pay nerqa: “Cielopi kaj Gobiernoqa, uj jallpʼapi pʼampasqa qoriman rijchʼakun. Uj runaqa chayta tarispa watejmanta pʼampaykapusqa. Kusisqataj tukuy imasninta vendemusqa. Chantá chay jallpʼata rantikapusqa”, nispa (Mat. 13:44). Reparanchej jina, chay runaqa mana pʼampasqa qorita maskʼaspachu purisharqa. Jinapis tariytawanqa chay pʼampasqa qorirayku tukuy imasninta vendemorqa. Chanta, ¿imajtintaj chayta ruwarqa? Chay qori may chhika valorniyoj kasqanta yachasqanrayku. Payqa yacharqa ni imapis chay jina valorniyoj kasqanta.

⁹ Qanpis maytachá cheqa kajta munakullankitaj. Kunan Jehovata kusisqa sirvisqanchejwan, Diospa Gobiernon kamachishajtin wiñaypaj kausakuyta suyakusqanchejwanpis, kay mundomanta ni ima kikinchakunmanchu. Jehovaj amigosnin kananchejrayku imata saqesqanchejpis mana qhasichu. Jehovaj amigosnin kayqa may sumajpuni. Jehovata tukuy imapi ‘kusichispalla’ kusisqa kausakuyta atinchej (Col. 1:10).

10, 11. ¿Imataj Michaelta yanaparqa kausayninta cambiananpaj?

¹⁰ Ashkha cristianosqa Jehovata kusichinankupaj mana saqey atina imasta saqeporqanku. Wakenqa profesionninkuta saqeporqanku. Wakintaj niña qhapaj kayta maskʼarqankuchu. Wakintajrí Jehovata rejsisqankurayku waj jinamanta kausakuyta qallarerqanku. Chayta ruwarqa Michael sutiyoj hermano, payqa mana wawamantapachachu Jehovaj testigon karqa. Joven kashaspa karatista kayta yachakorqa. Pay nin: “Sumaj kallpayoj kasqaymanta mayta kusikoj kani. Wakin kuteqa ni pi atipanawanta yuyaj kani”, nispa. Jinapis Bibliata estudiayta qallarerqa, yachakorqataj imatachus Jehová maqanakuymanta yuyasqanta (Sal. 11:5). Paytaqa uj qhariwarmi hermanos Bibliamanta yachacherqanku. Paykunamanta yuyarikuspataj nin: “Mana jaykʼajpis niwarqankuchu karatista kayta saqepunayta. Paykunaqa cheqa kajllata yachachiwarqanku”, nispa.

¹¹ Michaelqa Jehovamanta astawan yachakuspa, astawan payta munakorqa. Dios kamachisninta khuyakusqanta yachay sonqonta astawan kuyuricherqa. Michaelqa reparakorqa kausayninta cambianan kasqanta. Pay nin: “Yacharqani karatista kayta saqeytaqa mana atinallayta, jinapis yachallarqanitaj chayta ruwaspaqa Jehovata kusichinayta. Chantapis yacharqani Jehovata sirveyqa imata saqepuymantapis aswan sumaj kasqanta”, nispa. Michaelqa cheqa kajta yachakusqanta may valorniyojpaj qhawarqa. Chayrayku kausayninta cambiayta aterqa (Sant. 1:25).

12, 13. ¿Imaynatá Maylita Bibliaj cheqa yachachiynin yanaparqa?

¹² Bibliaqa cheqa kajta laqhapi kʼanchaj lamparawan kikinchan, may valorniyoj kasqanta rikuchinanpaj (Sal. 119:105; Efe. 5:8). Azerbaiyanmanta hermananchej Mayli maytapuni agradecekun, Diospa Palabran ñanninpaj uj kʼanchay jina kasqanmanta. Familianpeqa iskay religionniyoj karqanku. Tatanqa musulmán karqa, mamantaj judía. Mayli nin: “Yacharqani Dios kasqantapuni, jinapis wakin imasta mana entiendejchu kani. Tapukoj kani: ‘¿Imapajtaj Dios ruwawarqanchej? ¿Imajtintaj uj runa tukuy kausayninpi sufrishaspaña infiernopipis sufrillanmantajri?’, nispa. Runasqa ninku tukuy imapis Diospa munayninrayku pasasqanta. Chayrayku yuyaj kani ‘¿Dioschu runasta munasqanta ruwachinman, chantataj sufrisqankuta rikuspa kusikunman?’”, nispa.

¹³ Mayliqa chay tapuykunaj kutichiyninta maskʼallarqapuni. Aswan qhepamantaj Bibliata estudiayta qallarerqa, Jehovaj testigonmantaj tukorqa. Pay nin: “Biblia maychus kajtapuni yachachisqanrayku, kausaymanta manaña ñaupajta jinachu yuyani, sonqo tiyasqataj kausakuni”, nispa. Tukuy Jehovata sirvejkunapis Mayli jinallataj payta jatunchanchej, “laqhamanta sumaj kʼanchayninman” wajyawasqanchejrayku (1 Ped. 2:9).

14. ¿Imatá ruwasunman cheqa kajta astawan munakunapaj? (“Waj kikinchaykuna” nisqa recuadrota leeriy).

¹⁴ Ñaupaj parrafosmanta kikinchaykunaqa sutʼita rikuchiwanchej cheqa kajqa may valorniyojpuni kasqanta. ¿Yuyarikunchejchu cheqa kajta waj imaswanpis kikinchakusqanta? Cheqa kajta astawan munakunapajqa, allin kanman astawan ukhunchananchej. Astawan munakuspataj, chayman jina kausakunapaj astawan kallpachakusun.

¿IMAYNATÁ RIKUCHINCHEJ CHEQA KAJTA MUNAKUSQANCHEJTA?

15. ¿Imaynatá cheqa kajta munakusqanchejta rikuchisunman?

¹⁵ Cheqa kajta munakusqanchejta rikuchisunman Bibliata, publicacionesninchejtapis estudiaspallapuni. Unayña testigos kajtinchejpis manapis, mosoj imasta yachakullanchejpuni. Inglés parlaypi ñaupaj kaj Torremanta Qhawaj revistapi nerqa: “Cheqa kajqa chʼin jallpʼapi uj juchʼuy tʼikita jina. Pantaytaj qhora jina muyuyninpi manchayta wiñaspa pʼampaykushanña. Chay tʼikitata tarinaykipajqa sumajta maskʼanayki tiyan. Qanpata kananpajtaj kʼumuykukuspa pʼiterqonayki tiyan. Ama uj tʼikitallawanqa contentakuychu, pallallaypuni, maskʼallaypuni”, nispa. Estudianapajqa mayta kallpachakunanchej tiyan, chaytaj mana qhasichu kanqa.

16. ¿Imaynasmantataj Bibliata estudiayta yachanki sumajta yanapasunanpaj? (Proverbios 2:4-6).

¹⁶ Leeypis estudiaypis mana tukuymanchu gustawanchej. Jinapis Jehovaqa niwanchej yachayninta ‘maskʼanallanchejtapuni’, ajinamanta cheqa kajta aswan sumajta entiendenanchejpaj (Proverbios 2:4-6 leey). Tukuy atisqanchejta chayta ruwayqa mayta yanapawasun. Corey sutiyoj hermanoqa Bibliata leeshaspa uj versiculota sumajta ukhunchan. Pay nin: “Chay versiculoj sutʼinchaykunasninta leeni, referencias marginalesta maskʼani, chay versiculomanta waj imastawan maskʼani. Ajinamanta ashkha imasta yachakuni”, nispa. Chay hermano jina estudiaspapis chayri waj jinamanta estudiaspapis, Bibliata estudianapaj tiempochakusun, kallpachakusuntaj chayqa, cheqa kajta may valorniyojpaj qhawasqanchejta rikuchisun (Sal. 1:1-3).

17. ¿Ima niytá munan cheqa kajman jina kausakuy? (Santiago 1:25).

¹⁷ Cheqa kajtaqa mana estudianallanchejchu tiyan. Chaywan sumajta yanapachikunapajqa cheqa kajman jina kausakunanchej tiyan, nisunman yachakusqanchejman jina ruwananchej tiyan. Ajinallamanta cheqa kajqa yanapawasun kusisqa kausakunapaj (Santiago 1:25 leey). ¿Imatá ruwasunman cheqa kajman jinachus manachus kausakushasqanchejta yachanapaj? Uj hermano nin allinta qhawarikunanchej kasqanta imapichus allinta ruwashasqanchejta, imapitajchus mejorananchej kasqanta. Apóstol Pablo nerqa: “Maykamachus ñauparerqanchej, chayman jinallapuni maychus kajta purinachej”, nispa (Fili. 3:16).

18. ¿Imaraykutaj tukuy atisqanchejta kallpachakunchej “cheqa kajpi” purinallapajpuni?

¹⁸ ‘Cheqa kajpi purinallapajpuni’ tukuy atisqanchejta kallpachakusqanchejqa, mayta yanapawanchej. Mana kausaynillanchejchu allinyan, manaqa Jehová Diosta kusichinchej, hermanosninchejtapis (Pro. 27:11; 3 Juan 4). Chayrayku cheqa kajta munakunchej, chayman jinataj kausakunchej.