Leejkunaj tapuyninku

¿Pikunataj kay jallpʼapi kausarimonqanku, chanta imayna kausarimuytaj paykunapaj kanqa?

Qhawarina imatachus Biblia nisqanta.

Hechos 24:15 nin “cheqan runasta, mana cheqan runastapis Dios kausarichimunanta”. Cheqan runasqa niraj wañupushaspa Diosta kasukorqanku chaykuna kanku. Chayrayku sutisninkoqa kausay libropi qhelqasqa kashan (Mal. 3:16). Mana cheqan runastaj niraj wañupushaspa mana Jehovata rejsiyta aterqankuchu chaykuna kanku. Chayrayku sutisninkoqa mana kausay libropi qhelqasqachu kashan.

Juan 5:28, 29 versiculosqa, Hechos 24:15 versiculospi parlan chay iskay grupo runasllamantataj parlashan. Jesusqa nerqa “allin imasta ruwajkunaqa wiñay kausayta japʼinankupaj” kausarimunankuta, “sajra imasta ruwajkunataj juzgasqa kanankupaj” kausarimunankuta. Cheqan runasqa niraj wañupushaspa allin imasta ruwarqanku. Paykunaqa kausayta japʼinankupaj kausarimonqanku, sutisninku kausay libropi qhelqasqallapuni kasqanrayku. Mana cheqan runastajrí, niraj wañupushaspa sajra imasta ruwarqanku. Paykunaqa juzgasqa kanankupaj kausarimonqanku. Sutisninkoqa manaraj kausay libropi qhelqasqachu kashan. Imastachus paykuna ruwanqanku chaytaj, uj tiempota sumaj qhawaykusqaraj kanan kanqa. Chay tiempopitaj Jehovata rejsiyta atenqanku, sutisninkupis kausay libropi qhelqasqa kayta atenqa.

Apocalipsis 20:12, 13 versiculosqa sutʼinchan tukuy kausarimojkunaqa “kʼuyuna librospi qhelqasqa kasqanman” jina kausakunanku kasqanta, nisunman mosoj jallpʼapi mosoj leyes kanqa chayman jina kausakunanku kasqanta. Mana kasukojkunatataj Jehová chinkarparichenqa (Isa. 65:20).

Daniel 12:2 versiculoqa nin puñojkunamanta wakenqa rijchʼarimunankuta “wiñaypaj kausanankupaj, wakintaj wiñaypaj kʼumuykachachisqa, chejnisqastaj kanankupaj”. Kay versiculoqa parlashan kausarimusqankumanta qhepaman imachus kausarimojkunawan kananmanta. Wakenqa ‘wiñaypaj kausanqanku’, wakintaj ‘wiñaypaj chejnisqa’ kanqanku. Chayrayku waranqa watas tukukuyta wakenqa wiñay kausayta japʼenqanku, wakintaj wiñaypaj chinkachisqa kanqanku (Apo. 20:15; 21:3, 4).

Kausarimojkunamanta chay iskay grupostaqa kikinchasunman waj suyupi tiyakuyta munaj runaswan. Wakin forastero runasqa, uj suyupi tiyakunankupaj chayri trabajanankupaj papelesniyoj kanku. Cheqan runastaqa paykunawan kikinchasunman. Wakin forasterostaj uj suyupi uj tiempitollata qhepakunankupaj chayri turistas jina kanankupaj papelesniyoj kanku. Mana cheqan runastaqa paykunawan kikinchasunman. Uj tiempollapaj papelesniyoj forasterosqa, chay suyupi tiyakunallankupajpuni chay suyumanta leyesta kasukunanku tiyan. Ajinallatataj mana cheqan runasqa, paraisopi kausakunallankupajpuni Jehovaj leyesninta kasukunanku kanqa, rikuchinankutaj kanqa cheqan runas kasqankuta. Uj tiempollapaj chayri unayta tiyakunankupaj papelesniyoj kaspapis, tiempowanqa wakin forasteros qhepakuyta atenqanku, wakintaj qharqosqa kanqanku. Chayqa imaynatachus paykuna chay suyupi kausakusqankumanta kanqa. Tukuy kausarimojkunawanpis ajinallataj kanqa. Imachus paykunawan kananqa Diosta mana wasanchanankumanta, mosoj jallpʼapi imaynatachus kausakunankumantawan kanqa.

Jehovaqa mana khuyakoj Diosllachu, payqa “cheqanmin, cheqan kajtapunitaj ruwan” (Deu. 32:4; Sal. 33:5). Payqa munakuyninta rikuchenqa cheqan runastapis mana cheqan runastapis kausarichispa. Jinapis suyanqa imachus allin, imatajchus mana allin kasqanmanta kamachiykunasninta tukuy respetanankuta. Pikunachus payta munakojkunalla, kamachiykunasnintapis kasukojkunalla siga mosoj jallpʼapi kausakuyta atenqanku.