“Noqawan Paraisopi kanki”

1. ¿Imatataj Jesús niraj wañupushaspa nerqa ladonpi kaj suwaman? (Lucas 23:39-43).

JESUSPIS ladonpi kasharqanku chay iskay suwaspis, mayta sufrispa wañunankupajña kasharqanku (Luc. 23:32, 33). Chay iskay suwasqa Jesusmanta burlakusharqanku. Chaytaj sutʼita rikuchin mana discipulosninchu kasqankuta (Mat. 27:44; Mar. 15:32). Jinapis ujnenqa, pantashasqanta reparakuspa nerqa: “‘Jesús, Gobiernoykiman yaykuspa noqamanta yuyarikunki ari’, nispa. Jesustaj kuticherqa: ‘Cheqatapuni kunan niyki: Noqawan Paraisopi kanki’, nispa” (Lucas 23:39-43 leey). Mana imapis rikuchinchu, chay runaqa ‘cielopi kaj Gobierno qayllapiña kashan’ nisqa willayta japʼikusqanta, mayqenmantachus Jesús predicashaspa parlaj. Jesustaj mana jaykʼajpis nerqachu, chay runa Diospa Gobiernonman yaykunanta (Mat. 4:17). Jesusqa aswan qhepaman kay jallpʼapi uj paraíso kananmanta parlasharqa. ¿Imaynapí chayta yachanchej?

2. ¿Imataj reparachiwanchej arrepientekoj suwa, judío kasqanta?

² Arrepientekorqa chay suwaqa ichapis judío karqa. Payqa chay ujnin suwata nerqa: “Kay runa jinallataj castigasqa kashaspapis, ¿manapunichu Diostaqa manchachikunki?”, nispa (Luc. 23:40). Judiosqa uj Diosllata yupaychaj kanku, waj nacionesmanta runastaj ashkha diosespi creej kanku (Éxo. 20:2, 3; 1 Cor. 8:5, 6). Sichus chay suwas mana judioschu kankuman karqa chayqa, ichapis payqa kay jinata ninman karqa: “¿Manapunichu diosestaqa manchachikunki?”, nispa. Chantapis Diosqa Jesusta kachamorqa ‘Israel nacionmanta chinkasqa ovejasman’, manataj waj nacionesmanta runasmanchu (Mat. 15:24). Diosqa israelitasman nisqaña wañusqasta kausarichimunanta. Arrepientekorqa chay suwataj ichapis chayta yacharqa. Imatachus nisqanpitaj reparanchej, Jehovaqa Jesusta Gobiernonpi kamachinanpaj kausarichimunanta yachasqanta. Chay runaqa paytapis Dios kausarichimunantasina suyakusharqa.

3. Jesús paraisomanta parlajtin, ¿imatataj arrepientekoj suwa reparanman karqa? (Génesis 2:15).

³ Chay arrepientekoj suwa, judío karqa chayqa, yacharqa Jehová Adantawan Evatawan uj paraisoman churasqanta. Chayrayku repararqachá Jesús parlarqa chay paraisoqa, kay jallpʼapi uj kʼachitu huerta kananta (Génesis 2:15 leey).

4. Jesús imatachus suwaman nisqanta yachaspa, ¿imapitaj piensarinanchej kanman?

⁴ Imatachus Jesús chay suwaman nisqanta yachaspa, piensarinanchej kanman imaynachus paraisopi kausay kananpi. Chaypajtaj yuyarikusunman Salomón kamachishajtin uj tiempota allinta kausakusqankuta. Biblia nin Jesusqa “Salomonmanta nisqaqa, aswan kuraj” kasqanta. Chayrayku mana iskayrayanchejchu Jesuswan, paywan khuska kamachenqanku chaykunawanqa, kay jallpʼanchejta uj kʼachitu lugarman tukuchinankuta (Mat. 12:42). ‘Waj ovejasmanta’ kajkunataj, chay paraisopi wiñaypaj kausakunankupaj imatachus ruwananku kasqanta yachakunankupuni tiyan (Juan 10:16).

¿IMAYNATAJ PARAISOPI KAUSAY KANQA?

5. ¿Paraisopi imayna kausay kanantataj yuyanki?

⁵ ¿Paraisopi imayna kausay kanantataj yuyanki? Ichapis yuyanki Edén huerta jina kʼachitu jardín kananta (Gén. 2:7-9). Chayri ichapis yuyarikunki Miqueaspa profecianta. Payqa Diospa kamachisninmanta kayta nerqa: “Sapa ujpis chukurikonqa uva sachʼan urapi, higo sachʼan urapi”, nispa (Miq. 4:3, 4). Ichá yuyarikullankitaj ashkha versiculospi may chhika mikhuna kananta nisqanta (Sal. 72:16; Isa. 65:21, 22). Chayrayku ichá yuyanki uj kʼachitu jardinpi kashasqaykita, may chhika miskʼi mikhunastaj mesa juntʼa karishasqanta. Chayri ichapis yuyanki plantaspa, tʼikaspa qʼapayninta muskhirishasqaykita, amigosniykej, familiaresniykej asirisqankuta uyarishasqaykita, khuskataj kusisqa karikushasqaykichejta. Paykunamanta wakenqa kausarimorqanku. Tukuy chayqa mana uj mosqoyllachu. Kay jallpʼanchej paraíso kajtin tukuy chayta rikusunchej. Chantapis paraisopi trabajaspa mayta kusikusunchej.

6. ¿Imatá paraisopi ruwasunchej? (Dibujota qhawariy).

⁶ Jehovaqa trabajonchejwan kusikunanchejpaj jina ruwawarqanchej (Ecl. 2:24). Cristo waranqa watasta kamachishajtenqa ashkha ruwana kanqa. Manchay ñakʼariymanta kausashaj llojsejkunapis, may chhika waranqa runas kausarimojkunapis ropata, mikhunata, wasita ima necesitanqanku. Chaypajqa mayta trabajananchej kanqa, jinapis mayta kusichiwasun. Imaynatachus Adanwan Evawan Edén huertata cuidananku karqa, ajinallatataj noqanchejpis kay jallpʼanchejta uj kʼachitu paraisoman tukuchinanchej kanqa. Chantapis may chhika kausarimojkunamanta ashkhasqa Jehovamanta, munayninmantapis pisillata yachaspa wañuporqanku. Paykunaman yachachispataj maytachá kusikullasuntaj. Chantapis Diosta kasukoj kamachisninmanta ashkhasqa, Jesús niraj kay jallpʼaman jamushajtinña wañuporqanku. Paykunamanpis wañupusqankumanta qhepaman imaschus kasqanta willananchej kanqa.

7. ¿Imamantataj mana iskayrayanchejchu, chanta imaraykutaj?

⁷ Paraisopiña kausakushajtinchejqa sumajta kausakusun, tukuy ima necesitasqanchej kapuwasun, tukuy imataj maychus kananpi kanqa. Chaymantaqa mana iskayrayanchejchu. ¿Imarayku? Jehovaqa Salomonpa kamachiyninmanta Bibliapi willawasqanchejwan, rikuchiwarqanchejña Wawan kamachimushajtin imaynachus paraisopi kausay kananta.

SALOMONPA KAMACHIYNIN RIKUCHIN IMAYNACHUS PARAISOPI KAUSAY KANANTA

8. ¿Imaynatataj Salmo 37:10, 11, 29 versículos ñaupa tiempopi juntʼakorqa? (Kay revistapi “Leejkunaj tapuyninku” nisqata leeriy).

⁸ Jehovaqa Davidta yuyaycharqa Diosta kasukoj uj yachayniyoj rey kamachishajtin, imaynachus kausay kananta qhelqananpaj (Salmo 37:10, 11, 29 leey). Runasman paraisomanta willarishaspaqa, ashkha kutispi Salmo 37:11 versiculota leeripuyta yachanchej, chaytaj may sumaj. Jesuspis Orqopi Yachachishaspa chay versiculollamantataj parlarqa. Chaywantaj rikucherqa chay versiculoqa qhepamanpis juntʼakunallantataj (Mat. 5:5). Jinapis rey Davidpa qhelqasqanqa, imaynachus Salomonpa tiemponpi kausay kanantapis rikuchillarqataj. Salomonpa tiemponpi Israel nacionqa allinta kausakorqanku, tukuy ima patapitaj. Jallpʼankupeqa “lechewan miskʼiwan jinantin” karqa. Diosqa paykunata nisqa: ‘Sichus leyesniyman jina kausakunkichej chayqa, chay jallpʼapi allin kausayta qosqaykichej, ni pita manchachikuspataj puñukunkichej’, nispa (Lev. 20:24; 26:3, 6). Chay nisqantaj Salomón kamachishajtin juntʼakorqa (1 Cró. 22:9; 29:26-28). Chantapis Jehovaqa paykunaman nerqa sajra runas ‘niña kanankuta’ (Sal. 37:10). Chayrayku nisunman Salmo 37:10, 11, 29 versiculosqa, ñaupa tiempopiña juntʼakusqanta, qhepamanpis juntʼakunallantataj.

9. ¿Imatataj Sabamanta reina nerqa Salomonpa kamachiyninmanta?

⁹ Salomón kamachishajtin israelitas allinta, tukuy ima patapitaj kausakushasqankuta Sabamanta reinaman willarqanku. Paytaj may karumanta Jerusalenman viajarqa, paypuni tukuy chayta rikumunanpaj (1 Rey. 10:1). Imaynachus Salomonpa kamachiynin kasqanta qhawaykuytawantaj, reyman nerqa: “Ni kantuntapis willawasqankuchu”. “Ima kusisqachus kanku qanwan kashanku chay runasqa, jinallataj kamachisniykipis. Paykunaqa ñaupaqeykipi kashanku sapa día sumaj yachaywan parlasqaykita uyarispa”, nispa (1 Rey. 10:6-8). Salomón kamachishajtin imaynachus kausay kasqanqa, imatachus Jehová Wawan Jesús kay jallpʼata kamachishajtin runasrayku ruwananta rikucherqa. Jinapis chayqa aswan sumajraj kanqa.

10. ¿Imajtintaj Jesús Salomonmanta aswan kuraj?

¹⁰ Jesusqa tukuy imapi Salomonmanta aswan kuraj. Salomonqa pantaj runa kasqanrayku jatun juchaspi urmarqa. Chaytaj tiemponmanqa Diospa llajtanta llakiypi rikhuricherqa. Kamachejninchej Jesustajrí ni jaykʼaj pantanchu (Luc. 1:32; Heb. 4:14, 15). Chantapis payqa Satanás mana atipay atina pruebasman churajtin, Jehovata kasukullarqapuni. Cristoqa rikucherqaña ni jaykʼaj juchallikunanta, nitaj kamachiyninpi kajkunata llakiypi rikhurichinanta. ¿May sumajpunicharí pay Reyninchej kananqa?

11. ¿Pikunataj Jesusta yanapanqanku?

¹¹ Jesustaqa 144.000 reyes yanapanqanku. Khuskataj runasta cuidawasunchej, imatachus Jehová kay jallpʼapaj munasqantapis juntʼanqanku (Apo. 14:1-3). Chay reyesqa kay jallpʼapi kausakushaspa ashkha pruebasta aguantarqanku. Chayrayku sumajta entiendeyta atiwasunchej. ¿Imatataj paykuna ruwanqanku?

¿IMATATAJ AJLLASQA CRISTIANOS RUWANQANKU?

12. ¿Ima ruwaytataj Jehová 144.000 ajllasqasman qonqa?

¹² Salomonmanta nisqaqa, Jesuswan 144.000 ajllasqaswan may chhika ruwanasniyoj kanku. Rey Salomonqa uj nacionllapi kamacherqa, uj mashkha waranqa runasllatataj. Diospa Gobiernonpi kamachejkunataj, may chhika waranqa waranqa runasta jallpʼantinpi kamachenqanku. Jehová 144.000 ajllasqasman chay ruwayta qosqanqa, paykunapaj may sumajpuni.

13. ¿Ima sumaj ruwaytataj ruwanqanku Jesuswan khuska kamachimojkuna?

¹³ Chay 144.000 ajllasqasqa, Jesús jinallataj reyestaj sacerdotestaj kanqanku (Apo. 5:10). Moisespa Leyninpi kashajtinku, sacerdotesqa israelitasta yanapananku karqa mana onqonankupaj, Jehovamantapis mana karunchakunankupaj. Chay ruwayninku aswan importante karqa. Chay Leytaj “jamunan kashan chay sumaj imaspa llanthullan” karqa. Chayrayku Jesuswan khuska kamachenqanku chaykunapis, chay sumaj ruwayllatataj ruwanqanku: Diospa llajtanta yanapanqanku sanitos kanankupaj, Diospa qayllallanpipunitaj kanankupaj (Heb. 10:1). Manaraj yachanchejchu imaynatachus paykuna Diospa Gobiernon kamachishajtin kay jallpʼapi kausakojkunawan parlanankuta. Imayna kananta Jehová nejtinpis, yachanchej paraisopi kausakojkunata Jehová yanapanantapuni (Apo. 21:3, 4).

¿IMATÁ ‘WAJ OVEJASMANTA’ KAJKUNA RUWANANKU TIYAN PARAISOPI KAUSAKUNANKUPAJ?

14. ¿Imajtintaj nisunman ‘waj ovejasmanta’ kajkunawan ‘juchʼuy tropa ovejasmanta’ kajkunawan uj tropalla kasqankuta?

¹⁴ Jesusqa paywan khuska kamachimonqanku chaykunata “juchʼuy tropa ovejasníy” nispa nerqa (Luc. 12:32). Chantapis Jesusqa waj grupo runasmanta parlallarqataj. Nerqataj paykunaqa ‘waj ovejasnin’ kasqankuta. Chay iskay grupostaj uj tropalla kanku (Juan 10:16). Paykunaqa kunanña khuska trabajashanku. Kay jallpʼa paraíso kajtintaj khuska trabajallanqankupuni. Chaypacha ‘juchʼuy tropa ovejasmanta’ kajkunaqa cielopiña kanqanku, ‘waj ovejasmanta’ kajkunataj kay jallpʼapi wiñaypaj kausakuyta suyakonqanku. Jinapis ‘waj ovejasmanta’ kajkunaqa, kunanña wakin imasta ruwashananku tiyan paraisopi kausakuyta atinankupaj.

15. 1) ‘Waj ovejasmanta’ kajkuna, ¿imaynatá Cristoj hermanosninta yanapanchej? 2) ¿Imaynatá qanpis fotopi kashan chay hermanito jina ruwawaj?

¹⁵ Arrepientekorqa chay suwaqa, imatachus Jesús payrayku ruwasqanmanta agradecekusqanta mana rikuchiyta aterqachu. Waj ovejasmanta kajkunatajrí, ashkha imaynasmanta agradecekusqanchejta rikuchiyta atinchej. Jesusta munakusqanchejta rikuchisunman ajllasqa hermanosninta imaynatachus yanapasqanchejwan. Jesusqa nerqa chayman jina ninanta pikunachus ovejaswan ninakusqankuta (Mat. 25:31-40). Cristoj hermanosnintaqa yanapanchej tukuy sonqo predicaspa, runastapis Jesuspa discipulosninman tukuchispa (Mat. 28:18-20). Chayrayku paykuna imastachus Bibliamanta yachachinapaj wakichipuwanchej chaykunata sumajta apaykachana. Ujnenqa kashan Wiñaypaj kusisqa kausakuy libro. Manaraj pimanpis Bibliamanta yachachishanchejchu chayqa, allin kanman Bibliamanta yachakuyta munajkunata maskʼanapaj tukuy atisqanchejta kallpachakunanchej.

16. ¿Imaynatá kunanmantapachaña wakichikushasunman paraisopi kausakunapaj?

¹⁶ Imayna runastachus Jehová paraisopi kausakunankuta munan chay jina runas kanapajqa, mana paraisokamachu suyananchej tiyan. Kunanmantapachaña kallpachakusunman honrados kanapaj, mana llullakunapaj, munayninchejwan mana atipachikunapajpis. Chantapis Jehovata, qosanchejta chayri warminchejta, hermanosninchejtapis mana wasanchanachu. Sichus kay sajra mundopi kausakushaspaña Diospa kamachiykunasninta kasukunapaj tukuy atisqanchejta kallpachakusun chayqa, paraisopeqa aswan facilta kasukuyta atisun. Chantapis kallpachakusunman wakin imasta ruwayta yachakunapajña, aswan kʼacha cristianos kanapajpis. Chaytaj rikuchenqa paraisopi kausakunapaj wakichikushasqanchejtaña. Kay revistapi “¿Wakichisqachu kashanki ‘kay jallpʼata herenciata jina japʼinaykipaj’?” nisqa yachaqanata leeriy.

17. ¿Imajtintaj mana saqenanchejchu tiyan ñaupa juchasninchejmanta sonqonchej juchachanallawanchejtapuni?

¹⁷ Ñaupajta jatun juchasta ruwarqanchej chaypis, kallpachakuna amaña chaymanta sonqonchej juchachanawanchejpaj. Chaywanqa mana nishanchejchu, “Jesús kausayninta qosqanrayku Dios perdonallawanqa” nispa ‘yachashaspa juchallikunallanchejta’ (Heb. 10:26-31). Jinapis sichus jatun juchata ruwasqanchejmanta tukuy sonqo arrepientekorqanchej, Jehovaj yanapayninta, ancianospa yanapaynintapis maskʼarqanchej, cambiarqanchejtaj chayqa, ama iskayrayanachu, Jehovaqa perdonawanchejña (Isa. 55:7; Hech. 3:19). Yuyarikuna imatachus Jesús fariseosman nisqanta. Pay nerqa: “Noqaqa mana cheqan runastachu wajyaj jamuni, manachayqa juchasapasta”, nispa (Mat. 9:13). Jesús kausayninta qosqanrayku tukuy juchasninchejmanta perdonasqa kayta atinchej.

PARAISOPI WIÑAYPAJ KAUSAKUYTA ATISUN

18. ¿Imatá tapuriyta munawaj Jesuspa ladonpi wañorqa chay suwata?

¹⁸ Jesuswan parlarqa chay suwa runawan paraisopi parlashasqaykipi tʼukuriy. Qanpis paypis maytachá agradecekunkichej Cristo kausayninta qosqanmanta. Ichapis ninki willarisunanta imaynachus Jesús kashasqanta wañupunan ñaupaj horasta. Chantapis ichá tapurinki “noqawan Paraisopi kanki” nispa Jesús nejtin pay imaynachus kashasqanta. Paytaj ichapis tapurisonqa Satanaspa mundon niraj tukukushajtin imaynachus kausay kasqanta. May sumajpuni kanqa chay jina runasman Diospa Palabranmanta yachachiy (Efe. 4:22-24).

19. ¿Imaraykutaj paraisopi kausakuspa ni jaykʼaj aburrikusunchu? (Tapapi kaj dibujota qhawariy).

¹⁹ Paraisopeqa ni jaykʼaj aburrikusunchu. Tukuy laya runas kanqapuni tʼukuna imasta willarinawanchejpaj, kusichinawanchejpaj jina trabajopis kapuwasunpuni. Chantapis Tatanchej Jehovata sapa día astawan rejsillasunpuni, bendicionesnintapis japʼillasunpuni. Chaytaj imamantapis aswan sumaj kanqa. Ni jaykʼaj tukusunchu paymanta, ruwasqasninmantapis mosoj imasta yachakuyta. Diamanta día astawan Diosta munakusun. Maytapuni agradecekunchej Jehovawan Jesuswan paraisopi wiñaypaj kausakunanchejta niwasqanchejmanta.