1 | Diosmanta mañakuy: ‘Tukuy llakiyniykita Diospa makinman saqepuy’

BIBLIA NIN: “Diosqa qankunamanta llakikun, chayrayku tukuy llakiyniykichejta makinman saqepuychej” (1 PEDRO 5:7).

¿Imaynatá chayta ruwasunman?

Jehová Diosqa niwanchej, ima llakiyninchejtapis chayri ima problemanchejtapis payman willakunanchejta (Salmo 55:22). Llakisqa kashajtinchejqa paypis llakikullantaj. Chayrayku problemanchej juchʼuypis jatunpis kachun, Diosqa uyariytapuni munawanchej. Sonqonchej tiyaykunanpajqa, Jehová Diosman llakiyninchejta willakunapuni (Filipenses 4:6, 7).

¿Imaynatá Biblia yanapawanchej?

Sinchʼi llakisqa kashaspaqa ichapis sapallanchej kashasqanchejta yuyanchej. Imaraykuchus wajkunaqa mana entiendeyta atinkuchu imaynapunichus kashasqanchejta (Proverbios 14:10). Jinapis Diosqa sumajta entiendewanchej, khuyakuywantaj uyariwanchej. Chayrayku mana manchachikuspa payman willakuyta atisunman imaynachus kashasqanchejta. Jehová Diosqa sonqonchejta allinta rejsin, llakiyninchejta, imaynachus kashasqanchejtapis yachan. Chayrayku payqa imallapis llakichiwajtinchej payman willakunanchejta munan (2 Crónicas 6:29, 30).

Jehovaman orakuspaqa, pay noqanchejmanta llakikusqanta astawan creenchej. Chayrayku unay tiempomanta Diospa ujnin kamachin jina nisunman: “Qanmin rikunki imayna llakisqachus kashasqayta. Qanmin yachanki sinchʼi phutisqa kashasqayta”, nispa (Salmo 31:7). Jehová Dios noqanchejmanta llakikusqanta yachayqa, ñaupajman rinallapajpuni kallpachawanchej. Chantapis payqa mana qhawakullawanchejchu. Llakiyninchejta sumajta yachasqanrayku Bibliawan sonqochawanchej, kallpachawanchejtaj (Salmo 55:22).

Julianqa Bibliawan yanapachikorqa

Anchata llakikuni

“Sapa día anchata llakikuni, mana allin yuyaykunataj jamuwan. Allillan kashaspa ujllata sinchʼita llakikuyta qallarini. Wajkunawan kashajtiypunitaj chay pasawan. ‘Imatachus noqamanta nenqankupis’ nispa llakikuni.

”Rejsiwajkunaqa tukuy imata ruwanku yanaparinawankupaj. Jinapis wakin kutisqa mana munasqayman jinapunichu imatapis niwanku. Chaywanpis allillan kanaypaj yanapayta munawasqankumanta mayta agradecekuni.

”Wakin kutisqa anchata llakikusqayrayku, mana allin yuyaykuna jamuwasqanrayku ima, ni orakuytapis atinichu. Jinapis mayta kallpachakuni mana waj imaspi yuyaspa Jehová Dioswan parlarikunaypaj. Imajtinchus ujllata tukuy imapi piensayta qallarini. Yuyay chinkasqa kashaspataj, mana Jehovaman willakuyta atinichu imapunichus sonqoypi kashasqanta, imaynachus kashasqaytapis”.

Biblia yanapawan

“Bibliapi yachakorqani, Jehová Dios mañakusqayta uyarinawanpajqa mana ashkhatapunichu parlanay kasqanta, nitaj may sumaj palabrastapunichu oqharinay kasqanta. Sinchʼi llakisqa kasqayrayku ni imata niyta atispaqa, kayllata Diosman nini: ‘Jehová Diosníy, yanapariway ari’, nispa. Chayllata nejtiypis reparani Jehová entiendewasqanta, yanapawasqantataj. Jinapis mana orakullanichu, doctormanpis rillanitaj. Chay iskay imasta ruwasqayrayku kunanqa kusisqalla kani. Yachani Tatay Jehová munakuwasqanta, yanapaytataj munawasqanta. Chayrayku payman qayllaykunaypaj mayta kallpachakuni”.