Munakuyta, khuyakuytawan rikuchina

1. ¿Imata ruwaytaj atikun uj runa juchallikojtin?

ÑAUPAJ yachaqanapi yachakorqanchej Corinto congregacionpi uj runa jatun juchata ruwajtin, apóstol Pablo imata ruwanankutachus nisqanta. Mana pesachikusqanraykutaj chay juchallikojta congregacionmanta orqhorqanku. Chaywanpis kay yachaqanapaj texto nin jina, atikun uj runata arrepientekunanpaj yanapayta (Rom. 2:4). ¿Imaynatá Jehová ancianosnejta juchallikojta yanapan arrepientekunanpaj?

2, 3. ¿Imatá ruwananchej tiyan uj hermano juchallikusqanta yachaspa, chanta imaraykú chayta ruwananchej tiyan?

² Ichapis yachasunman uj hermano jatun juchata ruwasqanta, chay juchanraykutaj congregacionmanta orqhosqa kayta atisqanta. Jina kajtin, ¿imatá ruwananchej tiyan? Ancianosqa payta yanapanankupaj juchallikusqanta yachanankupuni tiyan. Chayrayku chay juchallikojta ninanchej tiyan ancianoswan parlamunanta, yanapatataj mañakunanta (Isa. 1:18; Hech. 20:28; 1 Ped. 5:2).

³ Chay juchallikoj hermano ancianosman mana willayta munajtinrí, ¿imatá ruwasunman? Ancianos yanaparinankutapuni munasqanchejrayku noqanchej paykunaman willasun. Chaytataj ruwanchej payta munakusqanchejrayku, nitaj payta pierdeyta munasqanchejrayku. Manachus cambianman chayqa Jehovamanta astawan karunchakunman, congregaciontataj mana allinpajchu qhawachinman. Chayrayku mana ruwayta atinapaj jinachu kajtinpis, mana manchikuspa ancianoswan parlananchej tiyan, Jehovatawan chay hermanonchejtawan munakusqanchejrayku (Sal. 27:14).

¿IMAYNATÁ ANCIANOS YANAPANKU JATUN JUCHAPI URMAJKUNATA?

4. ¿Juchallikoj imata ruwananpajtaj ancianos paywan parlanku?

⁴ Uj hermano jatun juchata ruwajtin, tukuynin ancianosmanta kinsa sumaj wakichisqa ancianosta ajllanku, paykuna uj comitetaa ruwanankupaj, chay hermanowantaj parlanankupaj. Chay ajllasqa hermanosqa llampʼu sonqos, kʼumuykukoj sonqos kananku tiyan. Yuyarikunankutaj tiyan chay juchallikojta yanapariyta munajtinkupis, cambiananpaj mana obligayta atisqankuta (Deu. 30:19). Paykunaqa yachanku mana tukuy juchallikojkunachu rey David jina juchankumanta arrepientekunankuta (2 Sam. 12:13). Wakenqa Jehovaj yuyaychaykunasninta mana kasukuyta munallankuchu (Gén. 4:6-8). Jinapis ancianosqa tukuy atisqankuta ruwananku tiyan juchallikojta arrepientekunanpaj yanaparinankupaj. ¿Imatataj ancianos yuyarikunanku tiyan juchallikojwan parlashaspa?

5. Juchallikojwan tantakushaspa, ¿imaynataj ancianos kananku tiyan? (2 Timoteo 2:24-26; dibujotawan qhawariy).

⁵ Ancianosqa juchallikojta Jehovaj chinkasqa ovejitanta jina qhawanku (Luc. 15:4, 6). Chayrayku juchallikojwan parlashaspa, kʼacha simiwanpuni payta parlapayanku, nitaj rimarpankuchu. Chantapis may kʼachaspuni paywan kanku. Nitaj yuyanankuchu tiyan tukuy imata tapuykunallankupaj paywan tantakusqankuta. Astawanpis 2 Timoteo 2:24-26 (leey) nisqanman jina ruwananku tiyan. Paywan parlashaspa kʼachaspuni, llampʼu sonqospuni kananku tiyan, ajinamanta sonqonman chayanankupaj.

6. ¿Imaynatataj ancianos sonqonkuta wakichinku niraj juchallikojwan parlashaspa? (Romanos 2:4).

⁶ Ancianosqa sonqonkuta wakichinanku tiyan. Pabloj nisqanta yuyarikunankupuni tiyan, pay nerqa: “Diosqa kʼacha kasqanrayku arrepientekunaykipaj [yanapashasunki]”, nispa (Romanos 2:4 leey). Chayrayku ancianosqa juchallikojwan Jehová jina kʼachas kanankupaj kallpachakunku. Paykunaqa yuyarikunanku tiyan astawanqa michejkuna kasqankuta, Cristoj kamachiyninpitaj kashasqankuta (Isa. 11:3, 4; Mat. 18:18-20). Niraj juchallikojwan parlashaspa, ancianosqa Jehovamanta yanapata mañakunku juchallikojta arrepientekunanpaj yanaparinankupaj. Chantapis Bibliapi, publicacionesninchejpi yanapata maskʼanku, Jehovamantataj sumaj yuyayta mañakunku juchallikojta, imachus pasasqantapis sumajta entiendenankupaj. Chantapis paykunapura parlarinku imatachus juchallikojta tapunankumanta. Ajinamanta imatachus yuyasqanta, imaraykuchus chay juchaman urmasqantapis reparayta atinankupaj (Pro. 20:5).

7, 8. ¿Imaynatá ancianos Jehová jina pacienciakunkuman juchallikojwan parlashaspa?

⁷ Ancianosqa Jehová jina pacienciayoj kanku. Paykunaqa yuyarikunku imaynatachus Jehová ñaupa tiempopi juchallikojkunata yanapasqanta. Uj kuti, Cainta pacienciawan Jehová tʼukuricherqa, nerqataj watejmanta allinpaj qhawasqa kayta atisqanta, mana cambiajtintaj imachus pasananta (Gén. 4:6, 7). Waj kutipitaj, rey Davidta cheqanchananpaj Jehovaqa profeta Natanta kacharqa, paytaj uj kikinchaywan sonqonman chayarqa (2 Sam. 12:1-7). Chantapis Jehovaqa mana kasukoj Israel nacionman, ‘sapa kuti’ profetasninta kacharqa (Jer. 7:24, 25). Jehovaqa mana kamachisnin arrepientekunankutarajchu suyarqa, chaymantaraj paykunata yanapananpaj. Astawanpis juchata ruwashajtillankuraj arrepientekunankuta nerqa.

⁸ ¿Imaynatá ancianos Jehová jina ruwankuman? 2 Timoteo 4:2 nisqanman jina, “mayta pacienciakuspa” jatun juchapi urmajta yanapananku tiyan. Juchallikoj allin kajta ruwayta munananpajqa, ancianos mana phiñakuyninkuwan atipachikunankuchu tiyan, kʼachallamantataj parlapayananku tiyan. Sichus ancianos phiñakuyninkuwan atipachikunkuman, chayri yanapanankupaj qhasillata kallpachakushasqankuta yuyankuman chayqa, juchallikoj runaqa niña paykunata uyariyta munanmanchu, nitaj arrepientekuytapis munanmanchu.

9, 10. ¿Imaynatá ancianos juchallikojta yuyayninman kutirichinkuman?

⁹ Ancianosqa sumajta qhawaykurinanku tiyan juchallikojta imachus juchaman apasqanta. Kay tapuykunapi piensarinkuman: ¿Juchallikoj Bibliata estudiayta, predicaytapis saqepusqanraykuchu pisimanta pisi llauchhiyaporqa? ¿Niñachu sapa kuti, tukuy sonqotaj Diosmanta mañakorqa? ¿Sajra munaykuna sonqonpi saphichakunantachu saqerqa? ¿Mana allin amigoswanchu purerqa? ¿Mana allin imaswanchu kusirikorqa? ¿Reparakunchu mana allin imasta ruwasqanwan Jehovaj sonqonta nanachisqanta?

¹⁰ Ancianosqa sumajta tʼukurispa juchallikojta wakin imasta tapurinkuman imaschus juchaman apasqanta reparakunanpaj. Chay imastaqa kʼachallamanta tapurinanku tiyan. Imastachus mana yachayta necesitankuchu chay imasta mana tapuspalla, ajinamanta kausayninman mana satʼikunankupaj (Pro. 20:5). Chantapis imaynatachus Natán Davidta yanaparerqa, ajinallatataj uj kikinchaymanta parlarinkuman, imaraykuchus chay ruwasqan mana allinchu kasqanta reparachinankupaj. Ichapis ñaupaj kutipi paywan parlarisqankutawankama sonqon juchachanqa, chayri ichapis arrepientekonqa.

11. ¿Imaynatá Jesús juchallikojkunata qhawaj?

¹¹ Ancianosqa Jesús jina ruwanankupaj kallpachakunku. Jesusqa Tarsomanta Saulota uj kuti taporqa: “Saulo, Saulo, ¿imaraykutaj qhatiykachashawankiri?”, nispa. Chayta sumaj yuyaywan tapurerqa imatachus ruwashasqan mana allinchu kasqanta reparakunanpaj (Hech. 9:3-6). Apocalipsis 2:20, 21 versiculospitaj “Jezabel” sutiyoj warmimanta parlan, paymantataj Jesús nerqa: “Unaytaña suyani pesachikunanta”, nispa.

12, 13. ¿Uj kutillatachu ancianos juchallikojwan parlananku tiyan? (Fotostawan qhawariy).

¹² Jesús jinallataj ancianosqa mana chay ratopachachu ninku juchallikoj mana arrepientekuyta munasqanta. Wakenqa comité de ancianos ñaupaj kutita paywan parlasqankutawankama arrepientekunku, wakintajrí aswan tiempota necesitanku. Chayrayku ancianosqa ichapis necesitanqanku mana uj kutillatachu paywan tantakuyta. Ichapis chay juchallikojqa ancianos ñaupaj kutita paywan parlasqankutawan, imatachus nisqankupi tʼukurenqa, Jehovamantataj kʼumuykukoj sonqowan perdonta mañakonqa (Sal. 32:5; 38:18). Qhepan kutipi paywan parlarejtinkutaj, ichapis juchallikojqa yuyasqanta cambianqaña.

¹³ Sichus ancianos juchallikojta arrepientekunanpaj yanapayta munanku chayqa, imaynachus kashasqanta entiendenanku tiyan, kʼachastaj kananku tiyan. Chantapis Jehovamanta mañakunanku tiyan tukuy kallpachakusqankuta bendecinanta, suyanankutaj tiyan juchallikoj yuyayninman churakunanta, arrepientekunanta ima (2 Tim. 2:25, 26).

14. ¿Pitaj uj runata arrepientekunanpaj yanapan, chanta imaraykú chayta ninchej?

¹⁴ Juchallikoj arrepientekun chayqa, mayta kusikunchej (Luc. 15:7, 10). Chanta, ¿pitaj juchallikojta arrepientekunanpaj yanapan? ¿Ancianoschu? Yuyarikuna imatachus Pablo nisqanta. Pay nerqa: “Ichapis Diosqa arrepientekunankuta saqenqa”, nispa (2 Tim. 2:25). Chayrayku juchallikojpa yuyaynintaqa mana runasllachu cambiachinku, manachayqa Jehová Diosninchej. Payqa juchallikojkunata cambianankupaj yanapan. Chantá Pabloqa nerqa uj runa arrepientekojtin imaschus kasqanta: chay juchallikojqa cheqa kajta aswan allinta rejsin, yuyayninman churakun, Satanaspa trampasninmantataj ayqekun (2 Tim. 2:26).

15. ¿Imaynatá ancianos juchanmanta arrepientekojta yanaparillankumanpuni?

¹⁵ Uj juchallikoj arrepientekojtin, ancianosqa payta waturikullanqankupuni, kay imaspi yanaparinankupaj: creeyninta sinchʼiyachinanpaj, Satanaspa trampasninman mana urmananpaj, allin kajtataj ruwananpaj (Heb. 12:12, 13). Chantapis ancianosqa ni piman willanankuchu tiyan imatachus chay juchallikoj ruwasqanta. Ajinapis, ¿imatataj congregacionman willananku kanman?

“JUCHAPI PUREJKUNATA TUKUYPA ÑAUPAQENPI KʼAMIY”

16. 1 Timoteo 5:20 versiculopi, ¿pikunamantataj Pablo parlasharqa “tukuypa ñaupaqenpi” nispa?

¹⁶ (1 Timoteo 5:20 leey). Timoteoqa ancianollataj karqa, Pablotaj payman nerqa juchallikojkunata “tukuypa ñaupaqenpi kʼamiy” nispa. “Tukuypa ñaupaqenpi” nispa, ¿pikunamantataj parlasharqa? Mana tukuynin congregacionmantapunichu, manachayqa chay juchata yacharqankuña chaykunallamanta. Chaytataj ichapis yacharqanku paykunapuni rikusqankurayku, chayri juchallikoj willasqanrayku. Chayrayku ancianosqa chayta yachajkunallaman willarenqanku chay juchallikojta yanapasqankutaña, cheqanchasqankutañataj.

17. Uj hermanoj juchanta tukuyña yachanku chay, ¿imatataj congregacionman willakonqa, chanta imaraykutaj chayta willakonqa?

¹⁷ Wakin kutisqa uj hermanoj juchanta congregacionmanta ashkhasña yachankuman, chayri aswan qhepaman yachankuman. Ajina kajtenqa, Pablo “tukuypa ñaupaqenpi” nisqanqa, tukuynin congregación kanman. Chayrayku uj anciano tukuy congregacionman willanqa juchallikoj kʼamisqa kasqanta. ¿Imapajtaj willanqa? Pablo nerqa jina, “wajkunapis manchachikunankupaj”, nitaj jatun juchapi urmanankupaj.

18. ¿Imatá ancianos ruwanku uj menor de edad uj jatun juchata ruwajtin? (Fototawan qhawariy).

¹⁸ ¿Imataj kanman 18 watayojmanta uraman kajkuna bautizasqaña kaspa uj jatun juchata ruwajtinku? Tukuynin ancianos tantakuspa iskay ancianosta ajllanqanku chay menor de edadwan cristiano tatasninwan ima parlanankupaj.b Chay ajllasqa ancianostaj tatasninta tapurenqanku imaynamantachus wawankuta yanapashasqankuta cambiananpaj, arrepientekunanpaj ima. Sichus chay menor de edad tatasninwan yanapachikushan, yuyasqantapis ruwasqantapis cambiashan chayqa, chay iskay ancianos ninkuman manaña uj comité ruwakunanchu kasqanta. Yachanchej jina, Diosqa tatasta churan wawasninkuta munakuywan cheqanchanankupaj (Deu. 6:6, 7; Pro. 6:20; 22:6; Efe. 6:2-4). Aswan qhepamantaj ancianosqa maypi jina tatasninta tapurenqanku wawankuta yanapashallasqankutapunichus manachus. Chanta, ¿imataj kanqa sichus chay menor de edad mana arrepientekunmanchu, nitaj cambiayta munanmanchu chay? Jina kajtenqa uj comiteta ruwakonqa, paywan cristiano tatasninwan ima parlanankupaj.

“JEHOVÁ DIOSQA MANCHAY MUNAKUYNIYOJ, KHUYAKUYNIYOJTAJ”

19. ¿Imaynatá ancianos Jehová jina ruwankuman juchallikojta yanapashaspa?

¹⁹ Comités de ancianosqa tukuy imata ruwanku congregación llimphullapuni kananpaj. Jehovaqa chayta ruwanankupaj paykunata churan (1 Cor. 5:7). Chantapis tukuy atisqallankutataj ruwananku tiyan juchallikojta arrepientekunanpaj yanapanankupaj. Chayrayku yanapashaspaqa suyanku juchallikoj cambiananta. Ajinamanta Jehová jina ruwashanku. Payqa “manchay munakuyniyoj, khuyakuyniyojtaj” (Sant. 5:11). Apóstol Juanqa machituña kashaspa munakuywan kayta nerqa: “Wawitasníy, kay imasta qhelqamushaykichej ama uj juchata ruwanaykichejpaj. Sitajchus mayqellanpis uj juchata ruwan chayqa, tiyapuwanchej uj yanapawajninchej, paytaj Tata Dioswan kashan, chayqa Jesucristo, pichus cheqan kajta ruwan chay”, nispa (1 Juan 2:1).

20. ¿Imatataj qhepan yachaqanapi yachakusun?

²⁰ Llakikunapaj jina, wakin kutisqa uj cristiano jatun juchata ruwaspa mana arrepientekuyta munanchu. Ajina kajtenqa congregacionmanta orqhosqa kanan tiyan. ¿Imatá ancianos chay kutispi ruwanku? Chayta qhepan yachaqanapi yachakusun.