“Diospa palabranta kasukojkuna kaychej”

1, 2. ¿Imaraykú Jehovaj kamachisnin may kusisqa kanchej? (Santiago 1:22-25).

JEHOVAWAN Wawan Jesuswanqa kusisqa kananchejta munanku. Salmo 119:2 versiculota qhelqajqa nerqa: “Kusisqamin kanku yuyarichisqasninta kasukojkuna, Diosta tukuy sonqo maskʼajkuna”, nispa. Jesuspis nillarqataj: “Diospa palabranta uyarispa kasukojkunamin kusisqaqa kanku”, nispa (Luc. 11:28).

² Jehovaj kamachisnenqa may kusisqas kanchej. ¿Imarayku? Ashkha imasrayku. Chaykunamanta ujnenqa Diospa Palabranta sapa día leesqanchejrayku, chayman jinataj ruwananchejpaj kallpachakusqanchejrayku (Santiago 1:22-25 leey).

3. ¿Imaynatá yanapawanchej Diospa Palabranta kasukuy?

³ ¿Imaynatá yanapawanchej “Diospa palabranta kasukojkuna” kay? Kasukuspaqa Jehová Diosninchejta kusichinchej, chayta yachaytaj mayta kusichiwanchej (Ecl. 12:13). Astawanpis Diospa Palabranta kasukoyqa yanapawanchej familianchejwan aswan allinta apanakunapaj, congregacionmanta hermanosninchejwanpis aswan sumaj amigos kanapaj. Ichapis chaytaqa kausayninchejpi repararqanchejña. Chantapis Jehovaj kamachiykunasninta kasukuspaqa, ashkha llakiykunamanta librakunchej. Rey Davidqa uj takiypi parlarqa Jehovaj leyninmanta, kamachisqasninmanta, juiciopi nisqasninmantawan. Chaykunamanta parlaytawantaj nerqa: “Chayta kasukoyqa jatun bendicionta apamun”, nispa (Sal. 19:7-11).

4. ¿Imaraykutaj mana atillasunmanchu Diospa Palabranman jina ruwayta?

⁴ Jina kajtinpis mana facilpunichu Diospa Palabranman jina ruwayqa. Pero ashkha ruwanasniyoj kaspapis, tiempochakunanchej tiyan Bibliata leenapaj, estudianapaj, ajinamanta imatachus Jehová ruwananchejta munasqanta entiendenapaj. Chayrayku kay yachaqanapi wakin yuyaychaykunata qhawarisun, chaytaj yanapawasun Bibliata sapa día leenapaj. Chantapis qhawarillasuntaj imachus yanapanawanchejta leesqanchejpi tʼukurinapaj, imaynatachus chayman jina ruwanatapis.

DIOSPA PALABRANTA LEENAPAJ TIEMPOCHAKUNA

5. ¿Imaraykutaj Bibliata leenapaj mana tiemponchej kallanmanchu?

⁵ Jehovaj kamachisnenqa ashkha ruwanasniyoj kanchej. Bibliaqa ashkha imasta ruwanata kamachiwanchej, chaykunata ruwanapajtaj tiempo necesitakun. Ashkhasqa noqanchejpaj, familianchejpajpis trabajakunanchej tiyan (1 Tim. 5:8). Ashkha hermanosqa machitu chayri onqosqa familiaresninkuta cuidananku tiyan. Tukuytaj tiempochakunanchej tiyan saludninchejta cuidanapaj. Mana chayllachu, congregacionpipis ashkha ruwanasniyoj kanchej, ujtaj kashan tukuy atisqanchejta predicay. Chay chhika ruwanasniyoj kaspa, ichapis tapukusunman: “¿Imaynatá tiempochakuyman Bibliata sapa día leenaypaj, leesqaypi tʼukurinaypaj, chayman jinataj ruwanaypaj?”, nispa.

6. ¿Imatá ruwasunman Bibliata sapa día leenapaj? (Fototawan qhawariy).

⁶ Cristianospajqa Bibliata leey ‘aswan allin imasmanta’ ujnin kashan, chayrayku chayta ruwanapaj mayta kallpachakunanchej tiyan (Fili. 1:10). Kusisqa runamanta parlaspa Salmos libroqa qallariyninpi nin: “Jehová Diospa leyninta mayta munakun. Tuta pʼunchay Diospa leyninta leerispa tʼukurin”, nispa (Sal. 1:1, 2). Tiempochakunanchejpuni tiyan Bibliata leenapaj. ¿Ima horataj Bibliata leenapaj aswan sumaj kanman? Chayqa sapa ujmantaña kashan. Chaywanpis ajllakunanchej tiyan ima horatachus sapa día leeyta atisunman chay horata. Víctor sutiyoj hermano nin: “Paqarinpi Bibliata leey mayta gustawan. Mana tutamanta rijchʼariy gustawasqanraykuchu chayta ruwani, manaqa chay horasta mana chʼajwas kasqanrayku. Chay horastaqa imatapis aswan allinta entiendeyta atini, nitaj waj imaspichu yuyashani”, nispa. Ichá qanpis Víctor jinallataj ruwanki. Kayta tapurikuy: “¿Ima horastataj Bibliata sapa día leeyta atiyman?”, nispa.

LEESQANCHEJPI TʼUKURINA

7, 8. Bibliata leespa, ¿imatataj sumajta qhawarikunanchej tiyan? Uj kikinchaywan sutʼinchariy.

⁷ Ima horatachus Bibliata leenanchejta yachaspaña, mana leenallanchejchu tiyan, manachayqa leeshasqanchejmanta yachakunanchej tiyan. Sapa día ashkha imasta leenchej, chay leesqanchejmantataj wakin kuteqa casi ni imata yuyarikunchejchu. Bibliata leejtinchej chay pasawasunman chayqa, manapuni allinchu kanman. Ichapis nikunchej sapa día mashkha capitulostachus leenanchejta. Chayta nikoyqa sumaj, chayta ruwanapaj kallpachakuypis sumajllataj (1 Cor. 9:26). Jinapis mana Bibliata leeyllachu. Leesqanchejwan yanapachikuyta munanchej chayqa, uj imatawan ruwananchej tiyan.

⁸ Uj kikinchaypi tʼukurina. Plantitasqa paratapuni necesitanku, chaywanpis pisi tiempollapi anchatañataj paranman chayqa, jallpʼaqa qʼetayarpanman. Chayrayku anchatañataj parajtenqa mana plantitasta yanapanchu. Aswan sumajqa chhulla parita, ajinamanta yakoqa jallpʼaman sumajta pasaykun, plantitaspis sumajta wiñanku. Kikillantaj Bibliata leeywanpis. Ancha ashkhata ujllapi leeykojtinchej ichapis ni imata yachakusunchu, imatachus leesqanchejta mana yuyarikusunchu, nitaj chayman jina ruwayta atisunchu (Sant. 1:24).

9. ¿Imatá ruwasunman Bibliata ancha usqhayllata leeshanchej chay?

⁹ Bibliata leeshaspa ichapis ancha usqhayllata leerpasqanchejta reparakunchej. Jina kajtin, ¿imatá ruwasunman? Aswan calmallawan leenapaj kallpachakuna, leeshasqanchejpi tʼukurinapaj jina leena, chayri leeytawan tʼukurinapaj tiempochakuna. Ichapis yuyasunman leesqanchejpi tʼukureyqa mana atikullasqanta, jinapis chayqa atikullan. Imatachus leesqallanchejpi tumpata piensarinanchej tiyan. Ichapis Bibliata estudianapaj tiempota tumpitatawan yaparisunman, ajinamanta tiemponchej tʼukurinapajwan kananpaj. Chayri pisi versiculosllata leesunman, ajinamanta tʼukurinapajwan tiemponchej alcanzanawanchejpaj. Víctor nillantaj: “Mana ancha ashkha versiculostachu leeni, ancha kaspa uj capitulollata leeni. Paqarinpi leesqayrayku, diantinta tʼukuriyta atini imatachus leesqaypi”, nispa. Mana ashkhata leeychu aswan sumaj, aswan sumajqa leesqanchejwan yanapachikuy. Chayrayku leesqanchejpi tʼukurinapaj jinalla leena (Sal. 119:97; “Tʼukurinapaj tapuykuna” nisqa recuadrota qhawariy).

10. ¿Imatá ruwawaj Bibliata leesqaykiman jina ruwanaykipaj? Sutʼinchariy (1 Tesalonicenses 5:17, 18).

¹⁰ Tʼukurinanchejpuni tiyan imaynatachus Bibliata leesqanchejman jina ruwaypi, Bibliata ima horasta leespapis chayri mashkha unayta leespapis. Bibliata leeshaspa kayta tapurikuna: “¿Imaynatá kay leesqayman jina ruwayman, kunan chayri aswan qhepaman?”, nispa. 1 Tesalonicenses 5:17, 18 (leey) versiculosta leesqanchejpi tʼukurina. Leeytawanqa tumpata piensarina mañakuykunasninchejpi. ¿Tukuy sonqochu Diosmanta mañakunchej? ¿Mashkha kutitataj Jehovamanta mañakunchej? ¿Imasmantataj Jehovaman agradecekuyta munanchej? Piensarispa ichapis kinsa imasmanta agradecekuyta munasunman. Chay imaspi uj chhikanta tʼukurisunchej chayqa, uj mashkha minutitosllapis kachun, mana Diospa Palabranta uyarishallanchejchu, manachayqa chayman jina ruwayta qallarishanchej. Chaytachus Bibliata leesqanchejwan sapa día ruwasun chayqa, pisimanta pisi aswan sumaj cristianosman tukusun. Ashkha imaspi cambiananchejta reparakunchej chayrí, ¿imatá ruwasunman?

ATISQANCHEJ IMASLLATA RUWAYTA MUNANA

11. ¿Imaraykutaj wakin kutis Bibliata leespa desanimakusunman? Sutʼinchariy.

¹¹ Bibliata leeshaspa, ashkha imaspi cambiananchejta reparakojtinchej ichapis wakin kutis desanimakusunman. Kaypi tʼukurina: Uj día Bibliapi wakin versiculosta leerisunman, chaytaj parlashanman mana wakillantachu allinpaj qhawanamanta (Sant. 2:1-8). Reparakusunmantaj wakillanta allinpaj qhawashasqanchejta, chayrayku cambianata nikusunman. Chayqa may allin. Qʼayantintaj waj textotañataj leerisunman, chaytaj parlashanman qallunchejta wataykukunamanta (Sant. 3:1-12). Chayta leespataj reparakusunman wakin kutis mana allin imasta nisqanchejta, nitaj kʼacha simiwanchu parlasqanchejta. Chayrayku nikusunman allin imasmanta parlananchejta, kʼacha simiwantaj parlananchejta. Qʼayantintaj leesunman mana kay mundo runaswan masichakunamanta (Sant. 4:4-12). Reparakusunmantaj ima peliculatachus, chayri ima musicatachus uyarishasqanchejta sumajta qhawarikunata. Qʼayantintaj ichapis desanimakusunman tukuy chay imaspi cambiananchej kasqanrayku.

12. ¿Imaraykutaj mana desanimakunanchejchu tiyan Bibliata leeshaspa wakin imaspi cambiananchejta reparakunchej chay? (Sutʼinchayniytawan qhawariy).

¹² Wakin imaspi cambiananchejta reparakunchej chayqa ama desanimakunachu. Chayqa rikuchin Bibliata allin sonqowan, kʼumuykukoj sonqowantaj leeshasqanchejta, allin kajtataj ruwayta munasqanchejta.a Yuyarikunallataj “mosoj kausaywan” pʼachallikunapajqa, sapa kuti kallpachakunanchej kasqanta (Col. 3:10). ¿Imataj yanapawasunman Diospa Palabranman jinapuni ruwananchejpaj?

13. ¿Ima yuyaychaytaj yanapasunkiman? (Fotostawan qhawariy).

¹³ Mana ujllapi tukuy imata ruwayta munanachu, astawanqa kallpachakuna pisimanta pisi leesqanchejman jina ruwanapaj (Pro. 11:2). Kayta ruwasunman: Imaspichus kallpachakunanchej kasqanmanta uj listata ruwakusunman. Chaykunamanta ujta chayri iskayta ajllakusunman, chaytaraj ñaupajta ruwanapaj, chay ujkunatataj aswan qhepaman ruwasunman. ¿Imaynatá ajllasunman mayqentarajchus ñaupajta ruwanata?

14. ¿Imasta ruwanapajtaj ñaupajta kallpachakusunman?

¹⁴ Chay listanchejmanta ñaupajta ajllasunman aswan fácil kajta, chayri mayqenpichus astawan kallpachakunanchej kasqanta. Mayqenmantachus qallarinanchejta ajllanchejña chayqa, publicacionesninchejpi yachaqanasta maskʼasunman. Ichapis maskʼasunman Índice de las publicaciones Watch Tower nisqapi chayri Jehovaj testigosnin yachaqanasta maskʼanankupaj nisqapi. Jehovamanta mañakuna ‘kallpachanawanchejta ruwayta munananchejpaj, ruwayta atinanchejpajtaj’ (Fili. 2:13). Chantá yachakusqanchejman jina ruwana. Imatachus ruwanata nikusqanchejta ruwasqanchejman jina, waj imaspiwan kallpachakuyta munasun. Imaspichus cambiasqanchejqa, anotakusqanchej listamanta waj imaspiwan cambianapaj yanapawasunman.

DIOSPA PALABRANWAN YANAPACHIKUNA

15. ¿Imapitaj Jehovaj kamachisnin mana kikinchu kanchej Bibliata leej waj runaswan? (1 Tesalonicenses 2:13).

¹⁵ Wakin runasqa ninku Bibliata ashkha kutistaña leesqankuta. Jinapis, ¿Bibliapi creenkuchu? ¿Leesqankuman jinachu kausakunku? Ashkhasqa mana. Jehovaj kamachisnintajrí mana paykuna jinachu kanchej. Ñaupa tiempomanta cristianos jinallataj, “Diospa Palabranta jinapuni” Bibliata japʼikunchej. Chayrayku kallpachakunchej chayman jina kausakunapaj (1 Tesalonicenses 2:13 leey).

16. ¿Imataj yanapawasunchej Diospa Palabranman jinapuni ruwanapaj?

¹⁶ Diospa Palabranta leeypis, chayman jinataj ruwaypis mana facilpunichu. Ichapis mana tiempochakuyta atillasunmanchu leenapaj. Ichapis usqhayllata leerpayta yachanchej, nitaj ni imatapis yachakunchejchu. Chayri ichapis desanimakunchej ashkha imaspi cambiananchej kasqanrayku. Imayna kajtinpis Jehová yanapawasun, noqanchejtaj chay yanapanta japʼikuna. Ama Diospa Palabranta uyarejkunallachu kana, nitaj leesqanchejta qonqarpanallachu, astawanqa chayman jina ruwana. Sichus Bibliata astawan leesun chayqa, chayman jinataj kausakusun chayqa, aswan kusisqas kasunchej (Sant. 1:25).