Jesús 40 diasllatawanña kay jallpʼapi kasqanmanta yachakuna

1, 2. Jesuspa iskay discipulosnin Emausman rishajtinku, ¿imataj pasarqa?

33 WATAMANTA 16 de nisanpi, Jesuspa discipulosnenqa manchay llakisqas, may mancharisqastaj kasharqanku. Iskay discipulosqa Jerusalenmanta Emausman risharqanku. Chay ranchoqa kasharqa 11 kilometrospi jina. Paykunaqa manchay llakisqaspuni kasharqanku Señorninku Jesús wañuchisqa kasqanmanta. Paykunaqa Mesías judiosrayku ashkha imasta ruwananta suyakusharqanku, wañupojtintaj yuyarqanku niña chay imasta ruwananta. Chayllapitaj mana yuyasqankuman jina wakin imas pasarqa.

² Uj mana rejsisqa runa qayllaykuspa paykunawan khuska rerqa. Discipulostaj Jesús wañuchisqa kasqanmanta may llakisqa kashasqankuta chay runaman willarerqanku. Chay runataj paykunaman wakin imasta nerqa, chay nisqantataj ni jaykʼaj qonqakorqankuchu. ¿Imatá nerqa? “Moisespa qhelqasqanmanta qallarispa, jinallataj tukuy Profetaspa qhelqasqankumantawan” parlaspa, paykunaman sutʼincharqa imaraykuchus Mesías sufrisqanta, wañusqanta ima. Emausman chayaspañataj chay iskay discipulosqa repararqanku chay runaqa kausarichisqa Jesús kasqanta. Paykunaqa maytachá kusikorqanku Mesías kausashasqanta yachaspa (Luc. 24:13-35).

3, 4. 1) ¿Imaynataj discípulos kasharqanku Jesús paykunaman rikhurisqanrayku? (Hechos 1:3). 2) ¿Imastataj kay yachaqanapi yachakusunchej?

³ Jesusqa kausarichisqa kasqanmanta 40 diastawanraj kay jallpʼapi kashaspa, ashkha kutista discipulosninman rikhurerqa (Hechos 1:3 leey). Payqa discipulosninta kallpacharqa. Chayrayku paykunaqa manaña llakisqaschu kasharqanku, nitaj mancharisqaschu. Astawanpis kusisqas kasharqanku, mana manchachikuspataj Diospa Gobiernonmanta willarqanku, yachacherqanku ima.a

⁴ 40 diastawan Jesús kay jallpʼapi kasqanmantaqa maytapuni yachakusunman. Kay yachaqanapi yachakusunchej Jesusqa chay 40 pʼunchaykunapi 1) discipulosninta kallpachasqanta, 2) Diosmanta Qhelqasqata aswan sumajta entiendenankupaj yanapasqanta, 3) aswan jatun ruwaykunata japʼinankupajtaj wakichisqanta. Chaykunamanta parlarishaspa imaynatachus Jesús jina ruwayta atisqanchejta yachakusun.

¿IMAYNATÁ WAJKUNATA KALLPACHASUNMAN?

5. ¿Imajtintaj Jesuspa discipulosnin kallpachasqa kayta necesitarqanku?

⁵ Jesuspa discipulosnenqa kallpachasqa kayta necesitarqanku. ¿Imarayku? Wakinninkoqa saqerqanku wasisninkuta, familiasninkuta, negociosninkuta ima, Jesuswan khuska purinankupaj (Mat. 19:27). Wakintaj Jesuspa discipulosninman tukusqankurayku chejnisqas karqanku (Juan 9:22). Paykunaqa tukuy sonqo chayta ruwarqanku Jesusqa Mesiaspuni kasqanpi creesqankurayku (Mat. 16:16). Jesús wañuchisqa kajtintaj, yuyarqanku imastachus suyakusqanku niña juntʼakunanta, chayraykutaj may llakisqas kasharqanku.

6. Jesús kausarichisqa kaytawan, ¿imatá ruwarqa?

⁶ Jesusqa yacharqa discipulosnin pay wañupusqanrayku may llakisqas kashasqankuta, yachallarqataj mana creeyninku pisiyasqanraykuchu llakisqa kashasqankuta. Chayrayku kausarichisqa karqa chay pʼunchaypacha amigosninta kallpacharqa. Jesusqa María Magdalenaman rikhurerqa sepulturanpi waqashajtin (Juan 20:11, 16). Kay yachaqanaj qallariyninpi parlarqanchej chay iskay discipulosninmanpis rikhurillarqataj. Chantapis apóstol Pedroman rikhurillarqataj (Luc. 24:34). ¿Imatataj Jesusmanta yachakusunman? Ñaupajtaqa María Magdalenaman rikhurisqanmanta parlarina.

7. ¿Imatataj Jesús qhawasharqa, chayrayku imatataj ruwarqa? (Juan 20:11-16; dibujotawan qhawariy).

⁷ (Juan 20:11-16 leey). 16 de nisán pʼunchaypi, wakin warmis sutʼiyamuyta Jesuspa sepulturanman rerqanku (Luc. 24:1, 10). Paykunamanta ujnenqa María Magdalena karqa. Payqa Jesuspa sepulturan chʼusajlla kashasqanta rikuspa usqhayllata correrqa chayta Pedroman, Juanmanwan willaj. Paykunataj correspa Jesuspa sepulturanta qhawaj rerqanku, Mariataj qhepankuta rillarqataj. Pedrowan Juanwanqa sepulturan chʼusajpuni kashasqanta rikuspa, wasinkuman kutiporqanku, Mariataj mana wasinman kutiporqachu. Chayllapi waqaspa qhepakorqa, nitaj yacharqachu Jesús payta qhawashasqanta. Jesusqa Mariata waqajta rikuspa, mayta sonqonta nanachikorqa. Chayrayku payman rikhurispa parlapayarqa, nerqataj kausarimusqanta hermanosninman willaj rinanta. Jesús chayta ruwasqanqa maytapuni Mariata kallpacharqa (Juan 20:17, 18).

8. ¿Imaynatá Jesús jina ruwasunman?

⁸ ¿Imaynatá Jesús jina ruwasunman? Hermanosta Jehovata sirvinallankupajpuni kallpachaspa. Chaypajqa waturina ima llakiykunapichus rikukushasqankuta. Chantapis paykunata entiendenapaj kallpachakuna, kʼachamantataj parlapayana. Jocelyn sutiyoj hermanamanta parlarina. Hermananqa accidentakuspa wañuporqa. Jocelyn nin: “May chhika killasta manchay llakisqapuni karqani”, nispa. Uj qhariwarmitaj payta wasinkuman invitarqanku, imaynachus kashasqanta sumajta uyarerqanku, yuyaricherqankutaj Jehovapaj may valorniyoj kasqanta. Pay nin: “Chay kutikamaqa ni imata ruwayta atispa kasharqani. Sinchʼi wayrapi mar qocha chaupipipis kashayman jina kasharqani. Augakunaypaj jinañapuni kasharqani. Jehovataj chay hermanosta kachamuwarqa salvanawankupaj. Paykunaqa Jehovata siga sirvinaypaj yanapawarqanku”, nispa. Sichus wajkunata kallpachayta munanchej chayqa, waturina imaynachus kashasqankuta, willariwasqanchejtataj sumajta uyarina. Ajinamanta paykunata sonqochayta atisun, kallpachasuntaj Jehovata siga sirvinallankupajpuni (Rom. 12:15).

WAJKUNATA YANAPANA DIOSPA PALABRANTA ASWAN SUMAJTA ENTIENDENANKUPAJ

9. ¿Imatataj discípulos manaraj allintachu entienderqanku, chanta imaynatá Jesús paykunata yanaparqa?

⁹ Jesuspa discipulosnenqa Diospa Palabranpi creej kanku, kallpachakojtaj kanku chayman jina ruwanankupaj (Juan 17:6). Chaywanpis mana entiendeyta aterqankuchu imaraykuchus Jesusta uj suwata jina wañuchisqankuta. Jesusqa yacharqa discipulosnin allin sonqoyoj kajtinkupis, Diospa Palabranmanta wakin imasta manaraj allintachu entiendesqankuta (Luc. 9:44, 45; Juan 20:9). Chayrayku leesqankuta entiendenankupaj yanaparqa. Emausman risharqanku chay iskay discipulosta imaynatachus yanapasqanmanta parlarina.

10. ¿Imatataj Jesús ruwarqa Mesiaspuni kasqanta discipulosnin entiendenankupaj? (Lucas 24:18-27).

¹⁰ (Lucas 24:18-27 leey). Jesusqa iskaynin discipulosninman qayllaykuspa mana chay ratopachachu willarqa pichus kasqanta, manachayqa tapurerqaraj. ¿Imajtin? Ichapis imatachus yuyasqankuta, imaynachus kashasqankuta willarinankupaj. Paykunataj chaytapuni ruwarqanku. Paykunaqa nerqanku Jesús Romanosmanta Israelta kacharichinanta suyakushasqankuta. Chayta willajtinkuraj Jesusqa paykunata Diospa Palabranwan entiendecherqa ashkha profecías juntʼakusqanta.b Chay chʼisitaj Jesusqa waj discipulosninman rikhurillarqataj. Paykunamanpis sutʼinchallarqataj imatachus chay profecías niyta munasqanta (Luc. 24:33-48). ¿Imatá chaymanta yachakunchej?

11, 12. 1) ¿Imatá yachakunchej Jesús Diospa Palabranta sumajta sutʼinchasqanmanta? (Fotostawan qhawariy). 2) Bibliamanta yachachej hermano, ¿imaynatataj Norteyta yanaparqa?

¹¹ ¿Imaynatá Jesús jina ruwasunman? Bibliamanta yachachishaspaqa, sumajta piensarispa estudionchejta tapurina imatachus yuyasqanta, imaynachus kashasqanta yachanapaj (Pro. 20:5). Chayta yachaspañataj, payta yanapananpaj jina textosta maskʼayta yachachina. Qallunchejta khaniykukuna ama ninapaj “kayta ruway” nispa. Astawanpis imaynatachus chay textosman jina ruwananpi tʼukurinanpaj waj tapuykunatawan ruwasunman. Ghana suyumanta Nortey sutiyoj hermanomanta parlarina.

¹² Norteyqa 16 watasniyoj kashaspa Bibliata estudiayta qallarerqa. Pisi tiemponmantaj familian payman churanakorqa. Chanta, ¿imataj yanaparqa siga Bibliamanta yachakunallanpajpuni? Bibliamanta yachachej hermanoqa, Mateo 10 capitulota rikuchispa sutʼinchasqa cheqa cristianosqa qhatiykachasqas kananku kasqanta. Nortey nin: “Familiay churanakuwajtin sutʼita repararqani cheqa kajta tarisqayta”, nispa. Bibliamanta yachachej hermanoqa Mateo 10:16 versiculota rikuchillasqataj. Chaypeqa nin sumaj yuyayniyoj kanata. Chantá tʼukurichisqa imaynatachus familiaresninman creenciasninmanta sutʼinchashaspa chayman jina ruwananta. Norteyqa bautizakuytawan precursor kayta munarqa, tatantajrí universidadman rinanta munarqa. Bibliamanta yachachej hermanoqa mana nerqachu imatachus ruwananta, astawanpis wakin tapuykunata ruwarqa Bibliaj yuyaychaykunasninpi tʼukurinanpaj, chayman jinataj allinta ajllananpaj. Chanta, ¿imatataj Nortey ruwarqa? Precursor regular kayta qallarerqa, chayraykutaj tatan wasinmanta wijchʼorqa. Chaymanta parlaspa Nortey nin: “Sutʼita yachani allintapuni ajllasqayta”, nispa. Bibliaj nisqanta aswan sumajta entiendenankupaj wajkunata yanapaspaqa, paykunata yanapashanchej wiñay tukusqa cristianosman tukunankupaj (Efe. 3:16-19).

HERMANOSTA WAKICHINA ‘REGALOS JINA’ KANANKUPAJ

13. ¿Imatataj Jesús ruwarqa cieloman ripusqantawan siga willakunallanpajpuni? (Efesios 4:8).

¹³ Jesusqa kay jallpʼapi kashaspa Tatan qorqa chay ruwanata sumajta ruwarqa (Juan 17:4). Jinapis ni jaykʼaj yuyarqachu: “Imapis allin llojsinanpajqa noqapuni ruwanay tiyan”, nispa. Astawanpis kay jallpʼapi kinsa wata khuskanniyojta willashaspa wajkunata wakicherqa. Jesusqa discipulosninpi confiarqa. Chayrayku paykunaman sumaj ruwaykunata qorqa. Paykunaman nerqa sumaj willaykunata willamunankuta, yachachimunankuta ima. Chantapis Jehovaj munasqa ovejitasninta cuidanankuta nerqa. Chaypachataj discipulosninmanta wakenqa niraj treintayojpischu karqanku (Efesios 4:8 leey). Jesuspa discipulosnenqa paywan khuska maytaña llankʼarqanku. Ajinapis Jesusqa manaraj cieloman ripushaspa paykunata astawanraj wakicherqa, wajkunapaj uj sumaj ‘regalo jina” kanankupaj. Imaynatachus chayta ruwasqanta qhawarina.

14. 40 diasllatawanña kay jallpʼapi kashaspa, ¿imaynatataj Jesús discipulosninta yanaparqa? (Dibujotawan qhawariy).

¹⁴ Jesusqa imatapis discipulosninman sutʼimanta yuyaycharej. Jinapis chaytaqa munakuywan ruwaj. Payqa repararqa wakin discipulosnin kausarimusqanpi mana creeyta atillasqankuta. Chayraykutaj nerqa amaña chaymanta iskayrayanankuta (Luc. 24:25-27; Juan 20:27). Paykunata nerqa Diospa kamachisninta yanapaypi yuyayninkuta churanankuta, manataj qolqeta maskʼaypichu (Juan 21:15). Chantapis discipulosninta nillarqataj Jehovata yupaychaypi imastachus ruwasqankuta ama kikinchanankuta wajkunaj ruwasqankuwan (Juan 21:20-22). Diospa Gobiernonmanta pantasqa imasta yuyasqankuraykutaj paykunata cheqancharqa, yanaparqataj willayta ñaupajman churanankupaj (Hech. 1:6-8). ¿Imatataj ancianos Jesusmanta yachakunkuman?

15, 16. 1) ¿Imaynasmantá ancianos Jesús jina ruwankuman? 2) Ancianospa yuyaychasqanku, ¿imaynatá Patrickta yanaparqa?

¹⁵ ¿Imaynatá ancianos Jesús jina ruwankuman? Hermanosta wakichispa, yanapaspa ima. Chaytaj niyta munan jovenestapis yanapanankuta aswan jatun ruwaykunata japʼinankupaj.c Ancianosqa mana suyankuchu hermanos ni imapi pantanankuta. Astawanpis jovenesta munakuywan yuyaychananku tiyan, ajinamanta kʼumuykukoj sonqo kayta, atienekunapaj jina kayta, wajkunamanta llakikuyta ima yachakunankupaj (1 Tim. 3:1; 2 Tim. 2:2; 1 Ped. 5:5).

¹⁶ Patrick sutiyoj hermanomanta parlarina. Payqa jovenllaraj kashaspa mana wajkunawan kʼacha kayta atillajchu, ni hermanaswanpis, wajkunaj sonqonkuta nanachinanpaj jinataj parlaj. Uj ancianotaj chayta repararqa. Chayrayku sutʼinta, munakuywantaj yuyaycharerqa. Patrick nin: “Mayta agradecekuni chay hermano yuyaychariwasqanmanta. Waj hermanos astawan ruwaykunata japʼisqankuta rikuspa mal sientekoj kani, noqapis chayta japʼiyta munasqayrayku. Anciano yuyaychawasqanqa yanapawarqa kʼumuykukoj sonqowan hermanosta sirvinaypaj, manataj congregacionpi ruwaykunata japʼiyta munanallaypajchu”, nispa. Chay yuyaychayta japʼikusqanrayku Patrickqa 23 watasniyoj kashaspa anciano karqa (Pro. 27:9).

17. Jesús discipulosninpi atienekusqanrayku, ¿imatá ruwarqa?

¹⁷ Jesusqa discipulosninman mana willamunallankutachu kamacherqa, manaqa yachachimunankutawan (Biblia de estudio nisqapi Mateo 28:20 versiculoj sutʼinchayninta leeriy, “Enséñenles” nisqata). Ichapis discipulosqa yuyarqanku mana chay llankʼayta juntʼayta atinankuta. Jesustaj chayta juntʼanankupi atienekorqa, munarqataj paykuna chayta yachanankuta. Chayrayku paykunaman nerqa: “Imaynatachus Tatay kachamuwarqa, ajinallatataj qankunatapis kachashaykichej”, nispa (Juan 20:21).

18. ¿Imaynatá ancianos Jesús jina ruwankuman?

¹⁸ ¿Imaynatá ancianos Jesús jina ruwankuman? Yachayniyoj ancianosqa waj hermanosman ruwaykunata qonku, yachachinkutaj imaynatachus chayta ruwanankuta (Fili. 2:19-22). Ichapis joven hermanosta ninkuman Tantakuna Wasita llimphuchaypi, chayri mantenimientota ruwaypi yanapakunankuta. Paykunapi atienekusqankuraykutaj imaynatachus chayta ruwanata yachachinku, nitaj iskayrayankuchu chayta sumajta ruwanankumanta. Matthew sutiyoj hermanomanta parlarina. Payqa mosoj anciano, maytataj agradecekun aswan unaytaña ancianos kajkuna congregacionpi ruwanasta ruwayta yachachisqankumanta, chayta allinta ruwananpitaj atienekusqankumanta. Pay nin: “Imapipis pantaykuni chayqa, paykuna reparachiwanku imatachus chay pantaykusqaymanta yachakuyta atisqayta, ajinamanta qhepanpi aswan sumajta ruwanaypaj”, nispa.d

19. ¿Imata ruwanapajtaj kallpachakuna tiyan?

¹⁹ Jesusqa 40 diasllatawanña kay jallpʼapi kashaspa wajkunata kallpacharqa, yachacherqa, wakicherqataj. Noqanchejpis Jesús jina ruwanapaj kallpachakuna (1 Ped. 2:21). Paytaj yanapawasunchej, imajtinchus pay nerqa: “Qankunawan tuta pʼunchay kasaj, kay mundoj imasnin tukukunankama”, nispa (Mat. 28:20).