¿Yacharqankichu?

¿Israelitaspaj música importantechu karqa?

ÑAUPA tiempo israelitaspajqa música may importante karqa. Biblia nisqanman jina, ashkha runas tocayta chayri takiyta yachaj kanku. Chantapis Bibliapeqa ashkha takiykuna tiyan. Salmos libro, El Cantar de los Cantares libro, Lamentaciones libropis takiykuna kanku. Ñaupa tiempomanta parlaj uj libro nisqanman jina, Bibliaqa “sutʼita rikuchin israelitasqa imata ruwanankupajpis takejpuni, tocajpuni” kasqankuta.

Musicawanpuni imatapis ruwaj kanku. Israelitasqa imaynachus kashasqankumanta parlaspa takej chayri tocaj kanku (Isa. 30:29). Israelitas uj mosoj reyta churashajtinku, Diosta yupaychanapaj fiestasta ruwashajtinku, soldados maqanakupi atipajtinku ima warmisqa kusiywan takej kanku, tusoj kanku, panderetastapis tocaj kanku (Jue. 11:34; 1 Sam. 18:6, 7; 1 Rey. 1:39, 40). Pipis wañupojtin may llakisqa kashaspataj, llakiy takiykunata takej kanku (2 Cró. 35:25). Uj libro nisqanman jina, “israelitasqa imatapis takiykunawanpuni ruwaj kanku”.

Kamachina wasipi música kajpuni. Israelmanta reyesmanqa música mayta gustaj. Rey Saulqa Davidta wasinman pusacherqa arpata tocapunanpaj (1 Sam. 16:18, 23). Davidpis reyña kaspa ashkha tocanasta rikhuricherqa, kʼachitu takiykunata qhelqarqa, tocajkunatataj Jehovaj templonpi tocanankupaj churarqa (2 Cró. 7:6; Amós 6:5). Rey Salomontaj qharista, warmista churarqa kamachina wasipi takinankupaj (Ecl. 2:8).

Jehovata musicawanpuni yupaychaj kanku. Jerusalén templopeqa, tocanasta sumajta tocayta yachaj runas 4.000 karqanku (1 Cró. 23:5). Paykunaqa tocaj kanku platillosta, cuerdasniyoj tocanasta, arpasta, cornetasta ima (2 Cró. 5:12). Chaywanpis mana paykunallachu takiykunawan Jehovata yupaychaj kanku. Ashkha israelitasqa Jerusalenman fiestasninkuta ruwaj rishaspa, Llajtaman Wicharinapaj Takiykunata takej kanku (Sal. 120–134). Judiospa wakin librosnin nisqanman jinataj, israelitasqa Hallela nisqa takiyta takej kanku Pascua mikhunata mikhushaspa.

Kay tiempopipis musicaqa Diospa llajtanpaj may importantellataj (Sant. 5:13). Jehovata alabanapaj takiykunata takinchej (Efe. 5:19). Takiykunasninchejqa hermanosninchejman ujchawanchej, llakiykunata aguantanapajtaj kallpata qowanchej (Hech. 16:25; Col. 3:16). May kʼachitu takiykunanejta Jehovapi creesqanchejta, maytataj munakusqanchejta rikuchinchej.