Creesqanchejman jinapuni kausakuna

1. ¿Imaraykutaj Pablo sonqo juntʼasqa kasharqa kausayninpi piensarispa?

APÓSTOL Pabloqa yacharqa wañuchinankupajña kashasqankuta, chaywanpis kausayninpi piensarispa imastachus ruwasqanmanta sonqo juntʼasqa kasharqa. ¿Imajtin? Pay nerqa: “Atipanakupi correytapis tukuniña, creeypitaj sinchʼita sayani”, nispa (2 Tim. 4:6-8). Pabloqa Jehovata sirviyta atinanpaj jina allin imasta kausayninpi ajllarqa, yacharqataj chaywan Jehovata kusichisqanta. Pablo jina noqanchejpis allintapuni ajllayta munanchej Jehovaj ñaupaqenpi allinpaj qhawasqa kananchejpaj. ¿Imatá chaypaj ruwasunman?

2. ¿Ima niytá munan creesqanchejman jina kausakuy?

² Pabloqa pay kikinmanta, waj cristianosmantapis nerqa: “Creesqanchejman jina kausanchej, manataj rikusqanchejman jinachu”, nispa (2 Cor. 5:7). ¿Imatataj niyta munasharqa? Diospi mana creej runasqa rikusqankuman jinalla purinku, nisunman imatapis ajllanku rikusqankuman jinalla, uyarisqankuman jinalla, sonqonkupi yuyasqankuman jinalla. Creesqanman jina kausaj runataj, imatachus Jehová ruwananta munan chayman jinapuni ajllan. Ruwasqasninpi sutʼi yachakun Jehová bendecinanmanta mana iskayrayasqanta, kamachiykunasninta kasukuytaj allinninpajpuni kasqanmanta (Sal. 119:66; Heb. 11:6).

3. ¿Imastá japʼisun creesqanchejman jina kausakuspa? (2 Corintios 4:18).

³ Wakin imastaqa rikusqanchejman jina, uyarisqanchejman jina, sonqonchej niwasqanchejman jina ajllayta yachanchej. Chaywanpis mana allinchu riwasunman chayman jinalla jatuchaj imastapis ajllajtinchej. ¿Imajtin? Imatachus rikusqanchej, imatachus uyarisqanchejqa mana atienekunapaj jinapunichu. Chantapis rikusqanchejman jinalla ruwaspaqa mana Jehovaj munayninta ruwashasunmanchu chayri yuyaychaykunasninta mana uyarishasunmanchu (Ecl. 11:9; Mat. 24:37-39). Creesqanchejman jina kausajtinchejtaj, “Señorta kusichisqanta” ajllayta atisun (Efe. 5:10). Dios yuyaychawasqanchejman jina ruwaspataj, sonqo tiyasqa kasun, kusisqastaj kausakusun (Sal. 16:8, 9; Isa. 48:17, 18). Sichus creesqanchejman jinallapuni kausasun chayqa, wiñaypaj kausakuyta atisun (2 Corintios 4:18 leey).

4. ¿Imaynatá yachasunman creesqanchejman jinachus chayri rikusqanchejman jinachus kausashasqanchejta?

⁴ ¿Imaynatá yachasunman creesqanchejman jinachus, rikusqanchejman jinachus kausashasqanchejta? Kay tapuykunapi piensarispa: “Imatapis ajllanay kajtin, ¿imapitaj atienekuni, rikusqay imasllapichu, Jehovaj yuyaychaykunasninpichu?”. Kay yachaqanapi yachakusun imaynamantachus creesqanchejman jinallapuni kausakunanchejta kay kinsa imaspi: trabajota ajllashaspa, piwanchus casarakunata ajllashaspa, chantá Diospa llajtan kamachiykunata qowajtinchej. Chaykunata ukhuncharishaspa imaspirajchus tʼukurinanchej kasqanta yachakusun, ajinamanta allinta ajllananchejpaj.

TRABAJOTA AJLLASHASPA

5. Trabajota maskʼakushaspa, ¿sueldollapichu piensarinanchej kanman?

⁵ Tukuypis necesitasqanchej imaspaj, familianchejpajpis qolqeta necesitanchej, chaypaj jinataj trabajota tariyta munanchej (Ecl. 7:12; 1 Tim. 5:8). Wakin trabajospeqa sumajta paganku, chaytaj alcanzakullan sapa día gastospaj, jallchʼakunapajpis. Wakin trabajospitaj pisillata paganku, chay sueldotaj familiata uywanallapaj alcanzakun. Chayrayku niraj uj trabajoman yaykushaspaqa piensarinchejpuni mashkhatachus ganakunanchejta. Chaywanpis chay imaspi piensarispalla trabajota ajllakusunman chayqa, rikusqanchejman jinalla ruwashasunman.

6. Trabajota ajllashaspa, ¿imaynatá rikuchisunman creesqanchejman jina kausasqanchejta? (Hebreos 13:5).

⁶ Sichus creesqanchejman jina kausasun chayqa, piensarillasuntaj chay trabajo ama Jehovamanta karunchanawanchejpaj jinachu kananta. Kayta tapurikuna: “Kay trabajoman yaykojtiy, ¿Jehovaj chejnisqan imastachu ruwachiyta munawanqanku? (Pro. 6:16-19). ¿Reunionesman faltakusajchu? ¿Predicanaypaj, Bibliata estudianaypaj, familiaypajpis tiempoy kallanqachu?”, nispa (Fili. 1:10). Chay trabajo chay imaspi perjudicanawanchejta reparanchej chayqa, aswan allin kanman mana chay trabajoman yaykunanchej trabajota tariy mana atikullajtinpis. Creesqanchejman jina kausasqanchejrayku allintapuni ajllasun, nipunitaj iskayrayasunchu Jehová tukuy ima necesitasqanchejta qonawanchejmanta (Mat. 6:33; Hebreos 13:5 leey).

7, 8. ¿Imaynatá Sudamericamanta uj hermano creesqanman jina kausakusqanta rikucherqa? (Fototawan qhawariy).

⁷ Sudamericamanta Javiera sutiyoj hermano, creesqanman jinapuni kausakunan kasqanta yuyarikorqa. Pay nin: “Empresaypi may sumaj cargoyoj kanaypaj uj puesto rikhurerqa. Chay puestoman yaykuspaqa iskay jinastawan ganayman karqa, may kusisqataj kayman karqa. Chayrayku chay puestota mañakorqani”, nispa. Chaywanpis Javierqa maytapuni munarqa precursor kayta. Pay nillantaj: “Gerente nacional entrevistanawanta niwarqanku. Niraj entrevistaman yaykushaspa Jehovamanta mañakorqani. Sutʼita yacharqani Jehovalla yachasqanta imachus noqapaj aswan allin kasqanta. Munasharqanipuni aswan sumaj cargoman yaykuyta, astawan ganaytapis. Jinapis mana chay puestoman yaykullaymanchu karqa manachus Jehovapaj astawan llankʼajta saqewanman karqa chayqa”, nispa.

⁸ Javier nillantaj: “Entrevistapi gerente niwarqa aswan ashkha horasta trabajanay kasqanta, nitaj wakin kutillachu. Noqataj kʼachallamanta nerqani mana chayta ruwayta atinayta Jehovapaj llankʼasqay ñaupajpi kanan kasqanrayku”, nispa. Javierqa mana chay trabajota japʼikorqachu, iskay semanasninmantaj precursor kayta qallarerqa. Uj mashkha killasninmantaj waj trabajota tarikorqa, chaypitaj khuskan tiempollata trabajanan karqa. Pay nin: “Jehová mañakusqayta uyariwarqa, precursor kanaypaj jinataj uj trabajota tarichiwarqa. Maytapuni kusikuni chay trabajopi kaspa Jehovapaj, hermanosniypajpis astawan tiempoy kasqanmanta”, nispa.

9. ¿Imatá Tresormanta yachakunki?

⁹ Ichapis trabajonchejqa mana saqeshawanchejchu creesqanchejman jina kausayta. Chayta reparaspa, ¿imatá ruwasunman? Congomanta Trésor sutiyoj hermanomanta parlarina. Pay nin: “Munasqay trabajota tarikorqani. Chaypitaj ñaupajta ganasqaymanta kinsa jinastawanraj ganaj kani, may respetasqataj karqani”, nispa. Jinapis Tresorqa reunionesman sapa kuti faltakoj aswan ashkha horasta trabajasqanrayku. Chantapis compañero masisnenqa llullakunanta nej kanku, ajinamanta empresapi mana allin imasta ruwakusqanta runas mana reparanankupaj. Chay trabajomanta llojsipuyta munarqa, jinapis llakikoj mana waj trabajota tarinanmanta. ¿Imataj yanaparqa? Pay nin: “Habacuc 3:17-19 entiendechiwarqa chay trabajomanta llojsipojtiy pisillataña ganajtiypis Jehová cuidanawanta. Chayrayku chay trabajomanta llojsiporqani”, nispa. Pay nin: “Ashkha jefesqa yuyanku uj sumaj pagasqa trabajoman yaykunankupaj runasqa imatapis ruwanallankuta. Familiankupaj, religionninkupaj manaña tiemponku kananta yachaspapis, chay trabajota japʼikunallankuta. Maytapuni kusikuni Jehovata, familiaytapis mana chay trabajorayku saqesqaymanta. Watanmantaj Jehová uj sumaj trabajota tarichiwarqa. Chaypi ganakusqaytaj alcanzallawan, Jehovata sirvinaypajpis tiempoy kallan. Jehovata ñaupajman churajtinchejqa ichapis wakin kutis qolqenchej pisilla kanqa. Jinapis pay cuidawasunpuni”. Arí, sichus Jehovaj yuyaychaykunasninpi, nisqasninpi atienekusun chayqa, creesqanchejman jinallapuni kausasun, paytaj bendeciwasun.

PIWANCHUS CASARAKUNANCHEJTA AJLLASHASPA

10. Rikusqankuman jinalla ruwajkuna, ¿imasllatá qhawanku piwanchus casarakunankuta ajllashaspa?

¹⁰ Casado kausayqa Jehovaj regalon, chayrayku tukuypis casarakuyta munanchejpuni. Sichus uj hermana casarakuyta munan chayqa, ichapis uj hermanota qhawakunman, piensarinmantaj imaynachus chay hermano kasqanpi, rijchʼayninpi, wajkuna allinpajchus manachus qhawasqankupi, imaynatachus qolqeta apaykachasqanpi, familianmanta paychus cargoyoj kasqanpi, payta kusichisqanpichus manachus.b Chay imaspi piensarinanpuni kajtinpis sichus chay imasllata qhawanqa chayqa, rikusqanman jinalla ruwashanman.

11. ¿Imaynatá creesqanchejman jina kausasqanchejta rikuchisunman piwanchus casarakunanchejta ajllashaspa? (1 Corintios 7:39).

¹¹ Jehovaqa maytapuni kusikun hermanosninchej, hermanasninchej, piwanchus casarakunankuta yuyaychaykunasninman jinapuni ajllajtinku. Bibliaqa jovenesta yuyaychan “tʼika jina joven” kayninkuta pasasparaj noviayta qallarinankuta (1 Cor. 7:36). Jehovaqa niwanchej imaynachus uj sumaj qosa, imaynachus uj sumaj warmi kanan kasqanta. Casarakuyta munajkunataj chay nisqanta kasukuspa piwanchus casarakunankuta maskʼanku (Pro. 31:10-13, 26-28; Efe. 5:33; 1 Tim. 5:8). Mana testigo runa uj hermanawan casarayta munajtintaj, 1 Corintios 7:39 (leey) versiculopi yuyaychasqanta kasukun. Chaypi nin “Señorllapi” casarananku kasqanta. Solterosqa yachanku imaynachus sonqonkupi kashasqankuta Jehová yachasqanta, yanapanantataj. Chayrayku yuyaychaykunasninman jinapuni ruwanku (Sal. 55:22).

12. ¿Imatá Rosamanta yachakunki?

¹² Rosa sutiyoj hermananchejmanta parlarina. Payqa Colombiapi precursora jina sirvin. Trabajonpeqa uj mana testigo runata rejsisqa, chay runataj payta qhawakushasqa, Rosamanpis chay compañeronqa gustarqa. Rosa nin: “Allin runalla kaspa jinarqa. Llajtanpi wakin imasta ruwaspa yanapakoj, nitaj ima viciomanpis qokojchu. Chantapis payqa noqawan kʼachapuni kaj. Ajina runawanpuni casarakuyta munasharqani, pero mana testigochu karqa chaylla”, nispa. Pay nillantaj: “Mana atillarqanichu mana niyta. Sonqoyqa payllaman aysashawarqa. Chay kuteqa sapallay sientekusharqani, casarakuytataj munarqani, nitaj noqapaj jina uj hermano karqachu”, nispa. Chaywanpis Rosaqa mana rikusqallanpichu yuyarqa, sumajta piensarerqa chayta ruwajtin Jehovamanta karunchakuyta atisqanta. Chayrayku Rosaqa chay runamanta karunchasqata karunchakaporqa, Jehovapajtaj astawan llankʼarqa. Pisi tiemponmantaj Diospa Gobiernonmanta Willajkunapaj Escuelaman invitarqanku. Kunantaj precursora especial. Rosa nin: “Jehovaqa ashkha bendicionesta qowan, chayraykutaj may kusisqa kausakuni”, nispa. Sonqonchejta suwachikuspañaqa mana atillasunmanchu creesqanchejman jina ruwayta. Chaywanpis Jehovaj nisqanman jina ruwayqa allinninchejpajpuni.

DIOSPA LLAJTAN KAMACHIYKUNATA QOWAJTINCHEJ

13. Diospa llajtan kamachiykunata qowajtinchej, ¿imaynatá rikuchisunman mana rikusqanchejman jinallachu kausasqanchejta?

¹³ Ashkha kutispeqa Diospa llajtan kamachiykunata qowanchej ancianosnejta, congregacionesta waturejkunanejta, sucursalnejta chayri Diospa Llajtanta Kamachejkunanejta. Chay kamachiykunataj Jehovata sirvinapaj yanapawanchej. Chaywanpis wakin kuteqa ichapis mana entiendeyta atillasunmanchu imaraykuchus wakin imasta kamachiwasqanchejta. Chay kutispi, ¿imatá ruwasun? ¿Imachus mana allin rijchʼawasqallanchejpichu yuyasun? ¿Pikunachus chay kamachiykunata qowanchej chay hermanospa pantasqasnillankutachu qhawasun? Chaytachus ruwasunman chayqa rikusqanchejman jinalla ruwashasunman.

14. Diospa llajtan kamachiykunata qowajtinchej, ¿imataj yanapawasun kasukunapaj? (Hebreos 13:17).

¹⁴ Creesqanchejman jina kausaspaqa mana iskayrayanchejchu Jehovapuni llajtanta yuyaychashasqanmanta, imatachus necesitasqanchejtataj yachasqanmanta. Chayrayku tukuy sonqo kasukunchejpacha (Hebreos 13:17 leey). Yachanchej kasukojtinchejqa congregacionta aswan ujchasqa kananpaj yanapakushasqanchejta (Efe. 4:2, 3). Chantapis manapuni qonqakunchejchu kamachiykunata qowanchej chay hermanos pantaj runas kajtinkupis, Jehovaqa kasukojtinchej bendecinawanchejtapuni (1 Sam. 15:22). Sichus Jehová imatapis allinchanan kasqanta reparanqa chayqa, maychus tiemponpi allinchallanqa (Miq. 7:7).

15, 16. ¿Imataj Kevinta yanaparqa creesqanman jina yuyananpaj? (Fototawan qhawariy).

¹⁵ Creesqanchejman jinapuni ruwasqanchej mayta yanapawasqanchejta qhawarina. Perupi castellanota parlajtinkupis ashkha campo runasqa waj parlaykunata parlallankutaj. Chaykunamanta ujnintaj quechua. Ashkha watastaña quechua congregacionesmanta hermanosqa predicacionpi quechuata parlajkunata maskʼaj kanku. Jinapis chay suyoj leyesninta kasukunankupaj manaña ajinatachu ruwanankuta nikorqa (Rom. 13:1). Chayrayku wakin hermanosqa “¿imaynatá kunan quechua parlajkunata tarisunri?” nispa yuyarqanku. Jinapis hermanosqa chay nikusqanta kasukorqanku, Jehovataj ashkha quechua parlajkunata tarinankupaj yanaparqa.

¹⁶ Kevinqa quechua congregacionmanta ujnin anciano. Paypis llakikushallarqataj chay nikusqanmanta. Pay nin: “‘¿Imaynatá kunan quechua parlajkunata tarisunri?’ nispa yuyarqani”. ¿Imatá Kevin ruwarqa? Pay nillantaj: “Proverbios 3:5 versiculoj nisqanpi tʼukurerqani. Chantapis Moisespi piensarerqani. Jehovaqa Moisesta nerqa israelitasta Egiptomanta orqhospa puka mar qochaman pusananta. Chaypiña kashajtinkutaj mana egipciosmanta ayqeyta atinankupaj jinachu karqanku. Chaywanpis Moisesqa kasukullarqa. Jehovataj uj tʼukuna milagrota ruwaspa bendicerqa” (Éxo. 14:1, 2, 9-11, 21, 22). Kevinqa manaña ñaupajta jinachu predicanankuta nikusqanta tukuy sonqo kasukullarqa. ¿Imataj chayrayku karqa? Pay nin: “Tʼukunapaj jinapuni Jehová bendeciwarqayku. Ñaupajtaqa karusta purinayku karqa, wakin kutitaj uj iskay quechuasllata tarej kayku. Kunantaj maypichus ashkha quechuas tiyan chayman predicaj riyku, aswan ashkha runaswan parlariyta atiyku, revisitasniykupis estudiosniykupis astawan yapakun. Chantapis aswan ashkha runas tantakuykunaman jamushanku”, nispa. Reparanchej jina Jehovaqa creesqanchejman jina ruwajtinchej bendeciwanchejpuni.

17. ¿Imatá kay yachaqanapi yachakunki?

¹⁷ Kinsa imaspi creesqanchejman jina kausakunata qhawarinchej. Chaywanpis waj imaspipis creesqanchejman jinapuni kausananchej tiyan: imawanchus kusirikunata ajllashaspa, profesionalchus manachus kanata ajllashaspa, wawasta uywanapajpis. Kausayninchejpi imata ajllashaspapis ama rikusqanchejman jinallachu chayta ruwana. Piensarinapuni Jehovaj amigosnin kasqanchejpi, yuyaychaykunasninpi, cuidanawanchejta niwasqanchejpipis. Ajinamanta “Jehová Diosninchejpa sutinpi purisunchej wiñaypaj wiñaynintinpaj” (Miq. 4:5).