“Ajllakuychej pitachus sirvinaykichejta”

1. Kusisqaspuni kanapaj, ¿imatá ruwananchej tiyan, chanta imajtin? (Isaías 48:17, 18).

TATANCHEJ Jehovaqa maytapuni munakuwanchej, munantaj kunan, aswan qhepamanpis kusisqas kausakunanchejta (Ecl. 3:12, 13). Payqa tukuy laya habilidadniyojta ruwawarqanchej. Chaywanpis mana noqanchejpura kamachinakunanchejpajchu ruwawarqanchej, nitaj noqallanchejmanta imachus allin, imachus mana allin kasqanta niyta atinanchejpajchu (Ecl. 8:9; Jer. 10:23). Payqa yachan kusisqaspuni kananchejpajqa payta sirvinanchej, kasukunanchej kasqanta (Isaías 48:17, 18 leey).

2. ¿Imatá Satanás creechiyta munawanchej, chanta imatá Jehová ruwarqa llulla kasqanta rikuchinanpaj?

² Satanasqa creechiyta munawanchej mana Jehovallawan kusisqa kayta atisqanchejta, noqanchejpurataj kamachinakuyta atisqanchejta (Gén. 3:4, 5). Satanás llulla kasqanta rikuchinanpaj, Jehovaqa saqerqa runaspuralla uj tiempota kamachinakunankuta. Chaywanpis sutʼita rikunchej runas kamachisqankoqa mana allinchu kasqanta. Bibliataj Jehovata sirvispa kusisqa kausakoj qharismanta, warmismanta parlan, ujnintaj Jesucristo karqa. Payqa Jehovata sirvisqanrayku pimanta nisqapis aswan kusisqa karqa. Ñaupajtaqa qhawarisun imaraykuchus Jesús Jehovata sirviyta ajllakusqanta, chaymantataj qhawarisun imaraykuchus Tatanchej Jehovallata yupaychananchej kasqanta. Qhawarillasuntaj imaraykuchus noqanchej Jehovata sirviyta ajllakusqanchejta.

¿IMARAYKÚ JESÚS JEHOVATA SIRVIYTA AJLLAKORQA?

3. ¿Imatá Satanás Jesusman qoyta munarqa, chanta imatá Jesús ruwarqa?

³ Kay jallpʼapi kashajtin Jesusqa ajllakorqa pitachus sirvinanta. Bautizakusqanmanta pisi tiempollanman, Satanasqa “jallpʼantinmanta tukuy nacionesta” qoyta munarqa, sichus uj kutillatapis qonqoriykukuspa yupaychajtin. Jesustaj kuticherqa: “¡Riy kaymanta Satanás! Qhelqasqa kashan: ‘Jehová Diosniykita yupaychanayki tiyan, pay sapallantataj sirvinayki tiyan’, nispa” (Mat. 4:8-10). ¿Imaraykú Jesús chayta ruwarqa? Chayta qhawarina.

4, 5. ¿Imaraykutaj Jesús Jehovata sirviyta ajllakullarqataj?

⁴ Jesusqa Tatan Jehovatapuni sirviyta ajllakorqa tukuy sonqo munakusqanrayku, munakuynin jatun kasqanrayku (Juan 14:31). Chantapis Jesusqa Jehovata sirvin chayta ruway allinpuni kasqanta yachasqanrayku (Juan 8:28, 29; Apo. 4:11). Payqa yachan Jehová kausayta qowasqanchejta, mana michʼakuspa ashkha imasta qowasqanchejta, paypitaj atienekuyta atisqanchejta (Sal. 33:4; 36:9; Sant. 1:17). Jehovaqa ni jaykʼaj Jesusta llullakorqachu, Jesustaj tukuy ima kapusqanta Jehovamanta japʼerqa (Juan 1:14). Satanastajrí manapuni Jehová jinachu. Payqa wañuyllata runasman apamuwanchej, chantapis llulla, envidioso, payllapajtaj imatapis munan (Juan 8:44). Jesusqa Jehovata, Satanastapis sumajta rejsisqanrayku, nipuni yuyallarqapischu Satanás jina Jehovaj contranta oqharikuyta (Fili. 2:5-8).

⁵ ¿Imajtintaj Jesús Jehovata sirviyta ajllakullarqataj? Yacharqa Jehovata tukuy sonqo kasukojtin sumaj imas kananta (Heb. 12:2). Tukuy sonqo kasukojtin Tatanpa sutin jatunchasqa kananta yacharqa, juchapis wañuypis chinkachisqa kananta.

¿IMAJTÍN JEHOVALLATA YUPAYCHANANCHEJ TIYAN?

6, 7. 1) ¿Imajtintaj ashkha runas Jehovata mana sirvinkuchu? 2) ¿Imajtintaj Jehovallata yupaychananchej tiyan?

⁶ Kay tiempopi ashkha runasqa Jehovata mana yupaychankuchu mana rejsisqankurayku. Mana yachankuchu kʼacha kaykunasniyoj kasqanta, paykunarayku ashkha imasta ruwasqantapis. Apóstol Pablo Atenaspi predicarqa chay runaspis mana Jehovata rejserqankuchu (Hech. 17:19, 20, 30, 34).

⁷ Chayrayku Pabloqa paykunata nerqa: “Diosqa tukuy runasman kausayta qon, samayta, tukuy imastawan”, nispa. Chantá nillarqataj: “Paynejta kausanchej, kuyunchej, kanchejtaj”. “Payqa uj runallamanta tukuy laya runasta miracherqa”, nispa. Dios Ruwawajninchej kasqanrayku payllata yupaychananchej tiyan (Hech. 17:25, 26, 28).

8. ¿Imatataj Jehová ni jaykʼaj ruwanmanchu?

⁸ Jehovaqa Ruwawajninchej kasqanrayku, Tukuyta Kamachej kasqanrayku, munaspaqa runasta obligawasunman payta sirvinanchejpaj. Jinapis ni jaykʼaj chayta ruwanmanchu. Payqa munan atikojtenqa tukuy runas wiñaypaj amigosnin kanankuta (1 Tim. 2:3, 4). Chayrayku Jehovaqa sumajta wakichiwanchej, ajinamanta runa masisman yachachinanchejpaj Diosqa sumaj imasta ruwapunawanchejta, imaynatachus chayta ruwanantapis (Mat. 10:11-13; 28:19, 20). Chantapis congregacionesta churapuwanchej chaypi payta yupaychananchejpaj, munakuyniyoj ancianosninchejtaj yanapanawanchejpaj (Hech. 20:28).

9. ¿Imaynatá Jehová tukuyman munakuyninta rikuchin?

⁹ Jehovaqa paypi mana creejkunatapis munakullantaj, paykunaman sumaj imasta qospa. Unaymantapachaña may chhika runas munasqankuman jinalla kausanku. Jehovataj manchay kʼachapuni kasqanrayku paykunamanpis tukuy imata qon kusisqas kausakunankupaj (Mat. 5:44, 45; Hech. 14:16, 17). Jehovanejta familiayoj kayta atinku, wawasniyoj, amigosniyojtaj, trabajaspapis kusikuyta atinku (Sal. 127:3; Ecl. 2:24). Cheqamanta Tatanchej Jehovaqa tukuy runastapuni munakuwanchej (Éxo. 34:6). Kunantaj qhawarisun imaraykuchus noqanchej Jehovata sirviyta ajllakusqanchejta, imaynatachus pay bendeciwasqanchejtapis.

¿IMARAYKUTAJ JEHOVATA SIRVIKUYTA AJLLANCHEJ?

10. 1) ¿Imaraykutaj Jehovata sirvinchej? (Mateo 22:37). 2) ¿Imaynatá Jehovaj paciencian qanta yanapasunki? (Salmo 103:13, 14).

¹⁰ Jesús jinallataj Jehovata sirvinchej tukuy sonqo munakusqanchejrayku (Mateo 22:37 leey). Jehovata astawan rejsejtinchej, kʼacha kasqanta reparaspa payman astawan qayllaykuyta munanchej. Payqa noqanchejwan mayta pacienciakun. Israelitas mana kasukojtinku Jehovaqa rogakuspa nej: “Ama jina kaspa kutinpuychej chay sajra ñanniykichejmanta”, nispa (Jer. 18:11). Payqa yuyarikun jallpʼalla kasqanchejta (Salmo 103:13, 14 leey). Jehová manchay pacienciayoj kasqanpi, waj kʼacha kaykunasninpipis tʼukurispa, ¿nichu payta wiñaypaj sirviyta munanki?

11. ¿Imaraykutaj Tatanchej Jehovata sirviyta ajllakunchej?

¹¹ Jehovata sirvinanchejpaj sonqonchej aysallawanchejtaj chayta ruway aswan allinpuni kasqanta yachasqanchejrayku (Mat. 4:10). Chantapis yachallanchejtaj Diosta tukuy sonqo kasukojtinchejqa sutinta jatunchasqanchejta, Satanás llulla kasqanta rikuchisqanchejta, Tatanchej Jehovaj sonqontataj kusichisqanchejta. Kunanchus Jehovata sirviyta ajllakusun chayqa, wiñay wiñaypaj payta sirviyta atisun (Juan 17:3).

12, 13. ¿Imatá yachakunchej Janemanta, Pammantawan?

¹² Juchʼuymantapacha Jehovata tukuy sonqo munakusunman. Chay munakuytaj watas pasajtinpis nipuni chiriyapunmanchu. Ajina karqa Janewan, Pamwanpis.a Paykunaqa hermanitas kanku. Bibliata estudiayta qallarishajtinku, Janeqa 11 watasniyoj karqa, Pamtaj 10 watasniyoj. Tatasninku Bibliata mana estudiayta munajtinkupis, Jehovaj testigosninwan estudianankuta saqellarqanku. Chaywanpis nerqanku semana tukukuyta familiankuwan khuska iglesiankuman rinankutapuni. Jane nin: “Jehovaj testigosnin Bibliamanta yachachiwasqankoqa yanapawarqa compañerosniy drogakunayta chayri piwanpis puñuykunayta niwajtinku mana kasunaypaj”, nispa.

¹³ Sipasitasña kashaspa iskayninku publicadoras kayta qallarerqanku. Watasninmantaj precursoras kaspa machitu tatasninkuta cuidarqanku. Jehová paykunata yanapasqanta yuyarikuspa Jane nin: “Kikin ñawisniywan rikorqani Jehovaqa amigosninta cuidasqantapuni. 2 Timoteo 2:19 nin jina, ‘Jehová Diosqa paypata kajkunata rejsin’”, nispa. Arí, Jehová Diosninchejqa payta munakojkunata, payta sirvejkunata cuidanpuni.

14. ¿Imatá ruwasunman Jehovamanta llullasta parlajtinku? (Fotostawan qhawariy).

¹⁴ Jehovaj sutin llimphuchasqa kananpaj yanapakuyta munanchej. Kaypi piensariy: Uj sumaj amigoyki kanman. Payqa kʼacha, tukuyta yanaparin, khuyakuntaj. Jinallapitaj uj runa ninman chay amigoykeqa sajra, llulla kasqanta. ¿Imatá ruwawaj? ¿Chʼinllachu kawaj? Mana, ¿icharí? Ajinallatataj pipis Jehovamanta llullasta parlajtin, chay rato ninchej mana ajinachu kasqanta, tukuy atisqanchejta ruwanchej payta defiendenapaj (Sal. 34:1; Isa. 43:10). Parlasqanchejpi, ruwasqanchejpi sutʼi rikukun Jehovata tukuy sonqo sirviyta munasqanchej.

15. ¿Ima bendicionestataj Pablo japʼerqa kausayninta cambiasqanrayku? (Filipenses 3:7, 8).

¹⁵ Jehovata kusichinapaj, paypajtaj astawan llankʼanapaj kausayninchejpi imatapis cambiananchej kajtin, tukuy sonqo chayta ruwanchej. Apóstol Pablopis chayta ruwarqa. Payqa judiospa religionninkupi may sumajpaj qhawasqa kananmantaqa Cristoj discipulonman tukorqa, Jehovatataj sirverqa (Gál. 1:14). Chayta ruwasqanrayku kusisqa kausakorqa, Cristowan khuska cielomantapacha kamachimunanpajtaj ajllasqa karqa. Pabloqa ni jaykʼaj arrepientekorqachu Jehovata sirviyta ajllakusqanmanta, noqanchejpis nillataj arrepientekusunchu (Filipenses 3:7, 8 leey).

16. ¿Imatá Juliaj kausaynin yachachiwanchej? (Fotostawan qhawariy).

¹⁶ Jehovata sirviyta kausayninchejpi ñaupajmanpuni churasun chayqa, kunanpis aswan qhepamanpis ashkha bendicionesta japʼisun. Hermananchej Juliamanta parlarina. Imillitallaraj kashaspa iglesianpi coropi takej. Sumajta takisqantataj operata takej runa uyarisqa, takiyta yachachinantataj nisqa. Pisi tiemponman Juliaqa sumaj rejsisqaña karqa, jatuchej conciertospitaj takej. Musicamanta sumaj rejsisqa escuelapi kashajtintaj, ujnin compañeronqa Diosmanta parlarisqa, sutʼincharisqataj Diospa sutin Jehová kasqanta. Niraj imapi Juliaqa Bibliata estudiasharqaña, semanapi iskay kutita. Tiempowantaj operapi takinanpaj estudiashasqanta saqeporqa, Jehovata sirvinanpajtaj tiempochakorqa. Chayta ruwaytaj mana facilchu paypaj karqa. Pay nin: “Ashkha runas niwarqanku sumaj takidora kasqayta mana aprovechashasqayta. Noqatajrí tukuy atisqayta Jehovata sirviyta munarqani”, nispa. Chaymantapacha 30 watas kurajña pasan. ¿Imatá kunan Julia nin? “Manchay kusisqa kashani, yachani Jehovaqa aswan qhepaman sonqoypi tukuy ima munasqayta qonawanta” (Sal. 145:16).

JEHOVATA SIRVILLAYPUNI

17. Tukukuy pʼunchay qayllitapiña kashasqan, ¿imatá reparachiwanchej?

¹⁷ Tukukuy pʼunchayqa qayllitapiña kashan. Apóstol Pablo qhelqarqa: “‘Tumpitamantawan’, ‘pichus jamushan chayqa chayamonqa, manataj qheparikonqachu’”, nispa (Heb. 10:37). ¿Imatá chay reparachiwanchej? Runas Jehovata sirviyta ajllakunankupaj aswan pisi tiempollaña kasqanta (1 Cor. 7:29). Diosta sirvishanchejña chaytaj, yachanchej ashkha pruebaspi rikukunanchej kajtinpis, pisi tiempollapaj kananta.

18. ¿Imata ruwananchejtataj Jehovawan Jesuswan munanku?

¹⁸ Jesusqa runasta kallpacharqa discipulosnin kanankupaj, qhepantataj rinallankupajpuni (Mat. 16:24). Chayrayku ashkha watastaña Jehovata sirvishanchej chayqa, ama saykʼunachu. Jehovata siga sirvinapajqa kallpachakunallanchejpuni tiyan, chaytaj mana as atikullanchu. Chaywanpis Jehovata sirvisqanchejrayku kunanña kusisqa kanchej, ashkha bendicionestapis japʼinchej (Sal. 35:27).

19. ¿Imatataj Genepa kausayninmanta yachakunchej?

¹⁹ Wakenqa yuyanku Jehovata sirviy ancha sacrificio kasqanta. Joven, ¿yuyankichu Diosta sirvejtiyki watasqa jina kanaykita? Gene sutiyoj joven nin: “Jehovaj testigosninta ni imata ruwajta saqewasqanchejta yuyaj kani. Noqamantaqa waj jóvenes mayta kusirikoj kanku fiestasman rispa, imillaswan purispa, maqanakusmanta videojuegosta pujllaspa ima. Noqataj tantakuykunallaman, predicacionllaman rispa mana kusisqachu kasqayta yuyaj kani”. ¿Imataj Genewan karqa ajinata yuyasqanrayku? Pay nin: “Pakayllamanta chay jóvenes jina purerqani, chaywantaj uj tiempota noqamantaqa kusisqa karqani. Chaywanpis mana kusisqapunichu karqani. Chayrayku yuyarikorqani Bibliamanta ima kamachiykunatachus mana kasukushasqayta, tʼukurerqanitaj chayta kasukojtiy imaynatachus yanapanawanta. Ajinapitaj Jehovata tukuy sonqo sirvinayta nikorqani. Chay kutimantapacha reparani Jehovaqa tukuy mañakusqasniyta uyariwasqanta”, nispa.

20. ¿Imatataj tukuypis ruwayta munanchej?

²⁰ Uj salmista Jehovaman takerqa: “Kusisqamin runaqa patiosniykipi tiyakunanpaj qan ajllajtiyki, qanmantaj qayllaykojta saqejtiyki”, nispa (Sal. 65:4). Josué jinallataj mana iskayrayaspa nina: “Noqawan familiaywantajrí, Jehová Diostapuni sirvikusqayku”, nispa (Jos. 24:15).