Hermanosninchejman qayllaykoyqa may allinpuni noqanchejpaj

1, 2. ¿Imaynatá Jehová munan wajkunawan kausakunanchejta, chanta imata ruwananchejtataj munan?

JEHOVAQA maytapuni munan wajkunawan allinta kausakunanchejta. Jesús yachacherqa runa masinchejta munakunanchej kasqanta noqanchej kikinchejta jina (Mat. 22:37-39). Chayqa niyta munan Jehovata mana yupaychajkunawanpis kʼachas kananchejta. Ajinamanta Tatanchej Jehová jina ruwanchej. “Payqa sajra runaspaj, kʼacha runaspajpis intinta llojsichimun, cheqan runaspaj, mana cheqan runaspajpis parachimun” (Mat. 5:45).

² Jehovaqa tukuy runasta munakuspapis payta kasukojkunata astawan munakun (Juan 14:21). Munantaj pay jina munakuyniyoj kananchejta. Chayrayku niwanchej hermanosninchejta ‘mayta munakunanchejta’, ‘tukuy sonqo munakunanchejta’ (1 Ped. 4:8; Rom. 12:10). Chay munakoyqa aswan qaylla familianchejta, sumaj amigonchejta munakusqanchejman rijchʼakun.

3. ¿Imatataj munakuymanta yuyarikunanchej tiyan?

³ Munakoyqa uj plantita jina, wiñananpajqa qarpana, cuidanataj. Apóstol Pabloqa cristianosta nerqa: “Familia jina munanakullaychejpuni”, nispa (Heb. 13:1). Jehovaqa munan hermanosninchejta astawan munakunanchejta. Kay yachaqanapi yachakusun imaraykuchus hermanosninchejman astawan qayllaykunanchejta, imaynatachus mana saqespa chayta ruwanatapis.

¿IMARAYKÚ HERMANOSMAN ASTAWAN QAYLLAYKUNANCHEJ TIYAN?

4. Salmo 133:1 nisqanman jina, ¿imatá ruwasunman hermanosninchejta munakunallapajpuni? (Fotostawan qhawariy).

⁴ (Salmo 133:1 leey). Salmista jina ninchej “may allinpuni, may sumajpuni” Jehovata munakojkunawan amigos kayqa. Jinapis Jehovaj llajtan ujchasqa kasqan may kʼachitu kasqanta qonqapusunman. Chayqa kayman rijchʼakunman: Uj runa primera vez uj sumaj jatun sachʼata rikuspa mayta tʼukunman, sapa día chay sachʼata rikuspataj manaña tʼukunmanchu. Noqanchejpis hermanosninchejwan semanapi ashkha kutista tinkunchej. Chayrayku, ¿imatá ruwasunman paykunata rejsishaspa munakorqanchej ajinallatapuni munakunapaj? Tiempocharikunanchej tiyan tʼukurinapaj imaraykuchus sapa ujninku noqanchejpaj, congregacionpajpis munasqa kasqankuta.

5. ¿Imaynatá wajkunata yanapanman testigospura munanakusqanchej?

⁵ Wakenqa tantakuykunaman primera vez jamuspa, mayta tʼukunku purajmanta munanakusqanchejta rikuspa. Chaypi reparanku cheqa religionta tarisqankuta. Jesús nerqa: “Qankunachus purajmanta munanakunkichej chayqa, tukuy yachanqanku discipulosniy kasqaykichejta”, nispa (Juan 13:35). Chaithramanta parlarina. Payqa universidadpi estudiashaspa Bibliamanta yachakuyta qallarerqa. Paytaqa jatun tantakuyman rinanpaj invitarerqanku. Ñaupaj día asamblea tukukojtintaj Bibliamanta yachachisharqa chay hermanata nisqa: “Tatasneyqa ni jaykʼaj abrazariwarqankuchu, primer día kay tantakuyniykipitaj 52 kutistaña abrazaykuwanku. Hermanosqa Jehová munakuwasqanta reparachiwanku. Kay familiamanta kayta munani”, nispa. Chaithraqa Bibliata estudiallarqapuni, 2024 watapitaj bautizakorqa. Mosojkunaqa allin imasta ruwasqanchejta, munanakusqanchejtapis reparanku, chayraykutaj ashkhas Jehovata sirviyta qallarinku (Mat. 5:16).

6. ¿Imaynatá hermanosman qayllaykuy yanapawanchej?

⁶ Hermanosman astawan qayllaykoyqa mana allin imasmanta jarkʼallawanchejtaj. Pablo cristianosta nerqa: “Sapa pʼunchay purajmanta kallpachanakullaychejpuni”. “Ajinamanta ni mayqenniykichejpis juchaj atiyninwan engañachikuspa sonqonta rumiyachinanpaj” (Heb. 3:13). Sichus llauchhiyapusunman, cheqan ñanmantataj wistʼuykapushasunman chayqa, Jehová mayqen hermanonejtapis yanapawasunman (Sal. 73:2, 17, 23). Chay yanapa kapuwasqanchejqa may sumajpuni.

7. ¿Imaynatá munakuy yanapawanchej ujchasqa kananchejpaj? (Colosenses 3:13, 14).

⁷ Kay jatun familianchejpeqa tukuy atisqanchejta kallpachakunchej purajmanta munanakunanchejpaj, chayraykutaj may chhika bendicionesta japʼinchej (1 Juan 4:11). Purajmanta munanakusqanchejrayku ‘ujkuna ujkunawan aguantanakullanchejpuni’, chayraykutaj sumaj ujchasqa kanchej (Colosenses 3:13, 14 leey; Efe. 4:2-6). Chaywantaj tantakuykunasninchejpi kʼachata kausakunchej, nitaj ni mayqen grupopis jallpʼantinpi ajina kʼachata kausakunkuchu.

RESPETANAKUNA

8. ¿Imaynatá Jehová yanapawanchej ujchasqa kananchejpaj?

⁸ Pantaj runas kaspapis Jehovaj yanapaynillanwan jallpʼantinmanta hermanos uj familia jina ujchasqa kanchej. Chaytaj uj milagro (1 Cor. 12:25). Biblia nin: “Diosqa purajmanta munanakunaykichejta yachachisorqachej” (1 Tes. 4:9). ¿Imaynamantá Dios chayta ruwan? Palabranpi sutʼita niwanchej imatachus ruwananchejta hermanosninchejman astawan qayllaykunapaj. Noqanchejtaj Jehová yachachiwasqanchejta japʼikunchej niwasqanchejta allinta estudiaspa, chayman jina kausaspa ima (Heb. 4:12; Sant. 1:25). Jehovaj testigosnenqa chayta ruwanapaj maytapuni kallpachakunchej.

9. ¿Imatá Romanos 12:9-13 yachachiwanchej hermanosta respetanamanta?

⁹ ¿Imaynatá Diospa Palabran yanapawasunman hermanosninchejman astawan qayllaykunapaj? Imatachus Pablo Romanos 12:9-13 (leey) versiculospi nisqanta qhawarina. Astawanqa kay nisqanpi tʼukurina: “Wajkunata respetaypi ñaupajpi kaychej”, nispa. ¿Imatá chaywan niyta munasharqa? Sapa ujninchej yuyaychakunanchej kasqanta “familia jina” munanakunapaj, nisunman purajmanta perdonanakunapaj, wajyarinakunapaj, qorikuyta yachanapajpis (Efe. 4:32). Ama suyanachu wajkunaraj noqanchejman qayllaykamunawanchejta. Noqanchej “ñaupajpi” kananchej tiyan wajkunaman qayllaykuspa. Ajinamanta rikusun Jesuspa nisqan juntʼakusqanta: “Aswan kusisqa kanchej wajman qorispa, qorichikunamanta nisqaqa” (Hech. 20:35).

10. ¿Imaynatá kʼuchis kasunman “wajkunata respetaypi”? (Fototawan qhawariy).

¹⁰ Pabloqa wajkunata respetaypi ñaupajpi kananchejta niytawan kayta nillarqataj: “Kʼuchis kaychej, amataj qhellasqa”, nispa. Kʼuchita trabajaj runaqa tukuy sonqo imatapis ruwan, imata ruwananta kamachejtinku chay rato ruwarqon. Proverbios 3:27, 28 yuyaychawanchej: “Atishaspaqa allin kajta ruwapullaypuni pikunachá yanapata necesitanku chaykunapaj”, nispa. Chayrayku pipis yanapata necesitajtenqa tukuy atisqanchejta ruwana yanaparinapaj. Ama ninachu “chanta yanapallasaj” chayri “waj yanapallanqa” nispa (1 Juan 3:17, 18).

11. ¿Imatá ruwananchej tiyan hermanosninchejman astawan qayllaykunapaj?

¹¹ Wajkunata respetallanchejtaj phiñachiwajtinchej chay rato perdonaspa. Efesios 4:26 versiculopi nin: “Ama inti yaykunankama phiñasqallapuni kaychejchu”, nispa. ¿Imajtin? Versículo 27 nin jina, ama “Diabloj munayninman jina” ruwananchejpaj. Jehovaqa Palabranpi kutin kutita niwanchej wajkunata perdonananchej kasqanta. Colosenses 3:13 yuyaychawanchej: “Tukuy sonqotaj perdonanakuychej”, nispa. Hermanosninchejta perdonaypuni astawan yanapawanchej paykunaman astawan qayllaykunapaj. Ajinamanta “ujchasqallapuni” kanchej. “Imaraykuchus espíritu santonejta ajina ujchasqa” kashanchej (Efe. 4:3). Waj parlaypi nisunman mana perdonanakuspaqa manapuni ujchasqa kayta atisunmanchu, nitaj allinta kausaytapis.

12. ¿Imaynatá Jehová wajkunata perdonananchejpaj yanapawanchej?

¹² Pipis sonqonchejta mayta nanachiwarqanchej chayqa, mana perdonayta atillasunmanchu. Jinapis Diospa espiritunpa yanapayninwan perdonayta atisunman. Bibliaqa “familia jina tukuy sonqo munanakuychej”, “kʼuchis kaychej” niytawan, nillantaj: “Espíritu santo sonqoykichejta kʼajarichichun”, nispa. Uj cristianoqa “espíritu santoj yanapayninwan” “sonqo kʼajaywan” allin kajta ruwayta atenqa, nisunman hermanosta familianta jina tukuy sonqo munakonqa, tukuy sonqotaj perdonanqa (Romanos 12:11 versiculomanta iskay kaj nota de estudiota leeriy). Chayrayku Jehovaj yanapayninta tukuy sonqo mañakunchej (Luc. 11:13).

“AMA QANKUNA UKHUPI TʼAQANAKUY KACHUNCHU”

13. ¿Imastaj tʼaqanachiwasunman?

¹³ Congregacionespeqa “tukuy laya runas” kanchej (1 Tim. 2:3, 4). Chayrayku mana kikintachu yuyanchej pʼachallikuymanta, imaynatachus jampichikuymanta, imawanchus kusirikuymantapis, nitaj kikintachu chay imasta ajllanchej. Mana qhawarikojtinchejqa chay imasrayku congregacionpi tʼaqanakus kanman (Rom. 14:4; 1 Cor. 1:10). Diosninchejqa purajmanta munanakunanchejta yachachiwanchej, chayrayku mana nisunmanchu ajllasqanchejpuni aswan sumaj kasqanta (Fili. 2:3).

14. ¿Imata ruwanapajtaj sigue kallpachakunallanchejpuni tiyan, chanta imarayku?

¹⁴ Congregacionpi mana tʼaqanakus kananpajqa tukuy atisqanchejta ruwananchej tiyan wajkunata sonqochanapaj, kallpachanapajpis (1 Tes. 5:11). Tantakuykunaman manaña jamojkunamanta, congregacionmanta orqhosqa kajkunamantapis ashkhas recienllaraj Jehovaman kutinpunku, noqanchejtaj tukuy sonqo paykunata japʼikunchej (2 Cor. 2:8). Uj hermanaqa chunka watastaña mana tantakuykunaman jamusqachu, tantakuykunaman kutimuspataj nisqa: “Tukuypuni kusisqas saludariwarqanku”, nispa (Hech. 3:19). ¿Imaynatá ajinata saludarisqanku yanaparqa? Pay nin: “Repararqani Jehovapuni makiymanta japʼispa pusamushawasqanta, watejmanta kusisqa kanaypaj”, nispa. Kallpacharinapaj tukuy atisqanchejta ruwajtinchejqa, Jesusqa noqanchejmanta valekunman ‘llasa qʼepiyojkunata’ samarichinanpaj (Mat. 11:28, 29).

15. ¿Imaynatá ujchasqa kanapaj yanapakullasunmantaj? (Fototawan qhawariy).

¹⁵ Congregación ujchasqa kananpajqa, parlasqanchejwan yanapakullasunmantaj. Job 12:11 versiculopi nin: “¿Nichu ninreqa reparan runaj parlasqanta, imaynatachus simipis llamirispa mikhunata reparayta yachan ajinata?”, nispa. Sumajta waykʼuyta yachajkunaqa waykʼusqankuwan tukuy miskʼirichikunankupaj, niraj qarashaspaqa llamirinkuraj. Ajinallataj parlasqanchejwanpis. Manaraj parlashaspaqa sumajtaraj piensarinanchej tiyan imatachus parlayta munashasqanchejpi (Sal. 141:3). Chaywanqa sonqochanapaj jinapuni, kallpachanapaj jinapuni, yanapanapaj jinapuni parlasunchej (Efe. 4:29).

16. ¿Pikunataj astawan kallpakunanku tiyan kallpachanankupaj jina parlanankupaj?

¹⁶ ¿Pikunataj astawan kallpakunanku tiyan kallpachanankupaj jina parlanankupaj? Casado qharis, tatas, mamas ima (Col. 3:19, 21; Tito 2:4). Ancianospis Jehovaj ovejitasninta kallpachananku tiyan, sonqochananku tiyan (Isa. 32:1, 2; Gál. 6:1). Uj proverbio yuyarichiwanchej: “Maychus tiemponpi allinta parlayqa may sumaj”, nispa (Pro. 15:23).

“MUNAKUSQANCHEJQA RUWASQASNINCHEJPI SUTʼI YACHAKUCHUN, TUKUY SONQOTAJ KACHUN”

17. ¿Imatá ruwasunman hermanosninchejta tukuy sonqo munakunapaj?

¹⁷ Apóstol Juan nerqa: “Ama simillamantachu munakuna, astawanpis munakusqanchejqa ruwasqasninchejpi sutʼi yachakuchun, tukuy sonqotaj kachun”, nispa (1 Juan 3:18). ¿Imatá ruwasunman ajinata hermanosninchejta munakunapaj? Hermanosninchejwan khuska kanapaj astawan tiempochakojtinchejqa astawan paykunaman qayllaykusun, astawantaj munakusun. Tiempocharikuna tantakuykunapi, predicacionpipis paykunawan khuska kanapaj, waturikamunapajpis tiempocharikunallataj. Chayta ruwasun chayqa, Biblia kayta nisqan noqanchejpi juntʼakonqa: “Diosqa purajmanta munanakunaykichejta yachachisorqachej” (1 Tes. 4:9). Ajinamanta noqanchejpuni rikusun “may allinpuni, may sumajpuni” kasqanta, “hermanospura ujchasqa, khuskataj kausakusqankoqa” (Sal. 133:1).