Joven, Marcos jina Timoteo jina ruway

1, 2. ¿Imataj Timoteota Marcostawan jarkʼanman karqa Jehovapaj astawan llankʼanankupaj?

JOVEN kanki chayqa munankichá Jehovapaj astawan llankʼayta, congregacionpipis astawan yanapakuyta. Mayta kusikunchej may chhika joven hermanos wajkunata sirviyta munasqankuta rikuspa (Sal. 110:3). Chaywanpis chayta ruwayqa mana atikullanchu. Ichapis Jehovapaj astawan llankʼayta manchachikuwaj, imaynachus risunanta mana yachasqaykirayku, maymanchus kachasunankuta mana yachasqaykirayku. Ichapis mana wakichisqarajchu kasqaykita yuyasqaykirayku, uj ruwayta mana japʼikorqankichu. Ama llakikuychu, mana qanllachu ajinapi rikukunki.

² Marcoswan, Timoteowanqa ajinallapitaj rikukorqanku. Kausayninku imaynatachus cambiananta mana yachaspapis, mana chay ruwaypaj jinachu kasqankuta yuyaspapis, Jehovapaj astawan llankʼayta munarqanku. Apóstol Pablowan Bernabewan misioneros jina ñaupaj kaj viajenkuta ruwashajtinku, Marcosta pusarqanku. Chaypachas Marcosqa ichapis mamanwan tiyakusharqa uj sumaj wasipi (Hech. 12:12, 13, 25). Jinapis Marcosqa wasinta saqellarqa Jehovapaj astawan llankʼayta munasqanrayku. Ñaupajtaqa Antioquiaman rerqa, chaymantataj Pablowan Bernabewan waj lugaresman viajarqanku (Hech. 13:1-5). Ichá Timoteopis tatasninwanraj tiyakusharqa Pablo paywan khuska predicananpaj pusayta munashajtin. Ichapis Timoteoqa yuyanman karqa chayta ruwananpaj ancha jovenllaraj kasqanta chayri manaraj allintachu yachasqanta (1 Corintios 16:10, 11 versiculoswan, chantá 1 Timoteo 4:12 versiculowan ima kikinchay). Jinapis Pablowan rerqa, ashkha bendicionestataj japʼerqa (Hech. 16:3-5).

3. 1) ¿Imaynatá yachanchej Marcoswan Timoteowan Pablopaj may munasqa kasqankuta? (2 Timoteo 4:6, 9, 11; dibujostawan qhawariy). 2) ¿Ima tapuykunasmantaj kay yachaqanapi kutichisun?

³ Marcoswan, Timoteowanqa jovenllaraj kashaspa congregacionpi ashkha ruwaykunata ruwayta yachakorqanku. Pablopaj iskayninku may munasqa karqanku, chayrayku wañupunanpajña kashajtin paykunawan khuska kayta munarqa (2 Timoteo 4:6, 9, 11 leey). ¿Imajtintaj Pablo Marcostawan Timoteotawan ajinata munakorqa? ¿Imaynatá joven hermanos paykuna jina ruwankuman? ¿Imaynatá Pabloj yuyaychaykunasnin paykunata yanapanman?

MARCOS JINA KALLPACHAKUY WAJKUNATA SIRVINAYKIPAJ

4, 5. ¿Imaynatá Marcos rikucherqa wajkunata sirviyta munasqanta?

⁴ Uj libro nisqanman jina wajkunata sirveyqa niyta munan “mana saqespa kʼuchi kʼuchita” yanapay. Chaytapunitaj Marcos ruwarqa. Pablo misionero jina iskay kaj viajenman mana Marcosta pusayta munajtin, ichapis Marcosqa llakikorqa, sonqontaj nanarqa (Hech. 15:37, 38). Chayrayku, ¿desanimakorqachu, manañachu hermanostapis sirverqa? Mana, mana ajinachu karqa.

⁵ Marcosqa primon Bernabewan waj ladoman sirvej rerqa. 11 watasninman Pablo Romapi preso kashajtin, Marcosqa wajkunawan khuska payta yanaparqa (File. 23, 24). Pabloqa Marcos yanapasqanmanta mayta agradecekorqa, nerqataj ‘mayta sonqochasqanta’ (Col. 4:10, 11).

6. ¿Imaynatá Marcosta yanaparqa wiñay tukusqa cristianoswan sirvisqan? (Sutʼinchaynintawan qhawariy).

⁶ Marcostaqa mayta yanaparqa wiñay tukusqa cristianoswan sirvisqan. Romapi Pablowan kasqantawan, Babiloniamanñataj rerqa Pedrowan khuska sirvej. Pedrowan sumaj amigos ruwakusqankurayku Pedro nerqa “waway Marcospis” nispa (1 Ped. 5:13). Khuska kashajtinku ichapis Pedroqa Jesuspa kausayninmanta, willasqanmantapis ashkha tʼukuna imasta willarerqa. Tiemponmantaj Marcosqa chay willasqanta Evangelionpi qhelqarqa.a

7. ¿Imaynatá Marcos jina uj joven hermano ruwarqa? (Fototawan qhawariy).

⁷ Marcosqa tukuy tiemponta churarqa wiñay tukusqa cristianoswan khuska Jehovata sirvinanpaj. ¿Imaynatá Marcos jina ruwawaj? Sichus congregacionpi uj ruwayta japʼiyta munanki chayqa, manarajtaj chay ruwayta japʼishankichu chayqa, pacienciarikullay, kallpachakuytaj Jehovata, hermanostapis waj jinasmanta sirvinaykipaj. Seung-Woo jina ruwawaj, payqa ancianoña. Jinapis jovenllaraj kashaspa edadninmanta hermanoswan kikinchakoj. Chay hermanosmanta wakenqa congregacionpi wakin ruwaykunasta japʼerqanku, paytaj mana. Chayrayku Seung-Woo yuyaj payta mana valechishasqankuta. Imaynachus kashasqanmanta ancianoswan parlarerqa. Ujnin ancianotaj nerqa wajkunata yanapananpaj kallpachakunanta, chay ruwasqanta wakin kuti ni pi reparajtinpis. Chayrayku yanapaj churakorqa machitu hermanosta, jinallataj tantakuyman pusamunata necesitajkunatapis. Chay tiemposta yuyarikuspa pay nin: “Yachakorqani imachus wajkunata sirviy kasqanta. Hermanosta necesitasqanku imaspi yanapareyqa mayta kusichiwasqanta repararqani”.

TIMOTEO JINA WAJKUNAMANTA LLAKIKUY

8. ¿Imaraykú Pablo munarqa viajesninman Timoteo acompañananta? (Filipenses 2:19-22).

⁸ Pabloqa qhatiykachasqa karqa chay lugaresman kutejtin mana manchachikoj hermanosta necesitarqa paywan khuska rinankupaj. Ñaupajtaqa Silasta ajllarqa. Payqa ashkha watastaña Diosta sirvisharqa (Hech. 15:22, 40). Chaymantataj Timoteota ajllarqa. ¿Imajtin? Ñaupajtaqa hermanos paymanta allinta parlasqankurayku (Hech. 16:1, 2). Chantapis Pablo yacharqa Timoteo hermanosmanta maytapuni llakikusqanta (Filipenses 2:19-22 leey).

9. ¿Imaynatá Timoteo hermanosmanta maytapuni llakikusqanta rikucherqa?

⁹ Pablowan khuska sirviyta qallarisqanmantapacha, Timoteoqa paymanta nisqa wajkunamanta astawan llakikoj. Chayrayku Pabloqa Bereamanta ripushajtin sutʼita yacharqa Timoteo mosoj discipulosta kallpachananta (Hech. 17:13, 14). Chaypacha Silasqa chay llajtallapitaj quedakorqa. Timoteotaj ashkha imastachá paymanta yachakorqa. Tiemponman Pabloqa Timoteota sapallanta Tesalonicaman kacharqa, chaypi congregacionta kallpachananpaj (1 Tes. 3:2). Qhepan 15 wataspitaj Timoteoqa hermanosta astawan munakorqa, wakin kutitaj ‘waqajkunawan waqarqa’ (Rom. 12:15; 2 Tim. 1:4). ¿Imaynatá jóvenes Timoteo jina ruwankuman?

10. ¿Imaynatá uj hermano wajkunamanta llakikuyta yachakorqa?

¹⁰ Woo Jae sutiyoj hermano yachakorqa wajkunamanta astawan llakikunan kasqanta. Jovenllaraj kashajtin mana atillajchu machitu hermanoswan parlariyta. Chayrayku reunionespeqa paykunata saludarispa pasapullaj. Uj ancianotaj yuyaycharerqa parlarikuyta atinanpaj hermanosta felicitayta yachakunanta. Chantapis yuyaycharillarqataj hermanosman gustasqan imaspi piensarinanta. Woo Jae chayta ruwarqa. Payqa ancianoña, nintaj: “Kunanqa runaswan parlarikuyta atillani ima edadniyoj kajtinkupis. Kusisqa kani wajkunaj problemasninkuta aswan sumajta entiendeyta atisqayrayku. Ajinamanta hermanosta necesitasqankupi yanapariyta atini”.

11. ¿Imaynatá jóvenes yachakunkuman hermanosmanta astawan llakikuyta? (Fototawan qhawariy).

¹¹ Joven, qanpis yachakuyta atiwaj wajkunamanta llakikuyta. Reunionespeqa tukuywan parlarikuy, machituswanpis joveneswanpis. Tapuriy imaynachus kashasqankuta, willarisusqankutataj sumajta uyariy, ajinamanta reparayta atinki imaynatachus yanaparinaykita. Ichapis qhariwarmi machitu hermanos necesitashankuman JW Library^® aplicacionwan yanaparinata, chayri predicaj llojsinankupaj ni pi pusarej kanmanchu. ¿Atiwajchu chay aplicacionta apaykachanankupaj yanapariyta, chayri paykunawan predicayta? Wajkunata yanaparinaykipaj tukuy atisqaykita kallpachakunki chayqa, congregacionpaj sumaj ejemplo kanki.

PABLOJ YUYAYCHAYKUNASNIN YANAPASUNKIMAN

12. Pablo Timoteoman yuyaychasqanwan, ¿imaynatá jóvenes yanapachikunkuman?

¹² Pabloqa Timoteota wawanta jina munakorqa, chayrayku kausayninpi, willayninpipis allin rinanpaj sumajta yuyaycharerqa (1 Tim. 1:18; 2 Tim. 4:5). Chay yuyaychaykunasnin qantapis yanapasunanpaj, ¿imatá ruwawaj? Timoteoman qhelqasqan iskaynin cartasta leeriy, qanpajpis kanman jina. Imaynatachus chay yuyaychaykunasninman jina ruwanaykipi piensariy. Wakinta qhawarina.

13. ¿Imataj yanapasonqa Diosta tukuy sonqo yupaychanaykipaj?

¹³ “Tukuy atisqaykita kallpachakuy, Diosta tukuy sonqo yupaychanaykipaj” (1 Tim. 4:7). Chaywanqa Pablo Timoteota nisharqa Jehovata tukuy sonqo kasukunan kasqanta, kusichisqan imastataj ruwanan kasqanta. Mana chayta ruwayta yachaspañachu nacekunchej, kallpachakunanchej tiyan chayta ruwanapaj. Chayrayku Pablo nerqa “tukuy atisqaykita kallpachakuy” nispa. Griegopi chay palabrata oqharikoj atipanakupaj sinchʼita wakichikunamanta parlanapaj. Atipanakuman yaykuyta munajkunaqa atipanankupi yuyaspa sumajta wakichikunanku karqa, nitaj saqenankuchu karqa ni ima pantachinanta. Noqanchejpis allin imasta ruwayman yachasqas kananchej tiyan, nitaj saqenanchejchu tiyan ni ima pantachinawanchejta. Ajinamanta Jehovaman astawan qayllaykusun.

14. ¿Imaraykutaj Bibliata leenchej? Sutʼinchariy.

¹⁴ Yachasqa kanayki tiyan Bibliata sapa día leeyman. Bibliataqa leenayki tiyan Jehovaman astawan qayllaykuyta munaspa. Kaypi piensariy: ¿Imatá yachakuwaj Jesús qhapaj joven kamachejwan parlasqanmanta? (Mar. 10:17-22). Chay jovenqa Jesús Mesías kasqanta creerqa, jinapis creeynenqa mana discipulon kananpaj jinachu karqa. Chaywanpis Biblia nin payta Jesús ‘munakuywan qhawarisqanta’. ¿Nichu sonqoykita kuyurichin Jesús chay joventa chay jina munakuywan parlapayarisqan? ¿Imatá Jehovamanta yachachisunki? Chay joventa Jehová mayta munakusqanta, imaraykuchus Jesusqa Tatan jinapuni karqa (Juan 14:9). Chay jovenpi, kausayniykipipis piensarispa kayta tapurikuwaj: “¿Imatá ruwayman Jehovaman astawan qayllaykunaypaj, wajkunatapis astawan yanapanaypaj?”.

15. ¿Imaraykú jóvenes kallpachakunanku tiyan sumaj ejemplos kanankupaj? (1 Timoteo 4:12, 13).

¹⁵ “Diosta tukuy sonqo sirvejkunata yachachiy” (1 Timoteo 4:12, 13 leey). Pabloqa Timoteota nerqa mana sumajta leeyllatachu, nitaj sumajta yachachiyllatachu yachanan kasqanta, manachayqa munakuyta, creeyta, llimphu kausayniyoj kaytapis yachakunallantaj kasqanta. ¿Imajtin? Mana parlasqanchejchu aswan atiyniyoj, manachayqa ruwasqanchej. Kaypi piensariy: Ichapis nisunkuman discursoykipi astawan predicanamanta parlanaykita. Sichus predicanaykipaj astawan kallpachakushanki chayqa, mana manchachikuspa parlariyta atillanki. Uyarejkunataj discursoykiman jina ruwayta munanqanku chayta ruwashasqaykita rikuspa (1 Tim. 3:13).

16. 1) ¿Ima phishqa imaspitaj jóvenes sumaj ejemplo kankuman? 2) ¿Imatá uj joven ruwanman parlasqanwan sumaj ejemplo kananpaj?

¹⁶ Pabloqa 1 Timoteo 4:12 versiculopi jóvenes phishqa imaspi sumaj ejemplos kayta atisqankumanta parlan. Sapallaykipi Bibliata estudiashaspa, ¿nichu chayta astawan estudiariwaj? Ichapis munawaj “parlasqaykiwan” wajkunata astawan kallpachariyta. Piensariy imatachus parlanaykipi. Tatasniykiwanraj tiyakushanki chayqa, ¿atiwajchu astawan agradecekuyta imastachus qanrayku ruwasqankumanta? ¿Reunionespi atiwajchu parlasqaykiman jinalla kutichiyta? Reunión tukukojtin, ¿atiwajchu uj hermanota “discursoykimanta kaysitu gustawan” niyta? Sichus parlasqaykiwan sumaj ejemplo kanki chayqa, wajkuna reparanqanku sumajta ñauparishasqaykita (1 Tim. 4:15).

17. ¿Imataj uj joventa yanapanqa Jehovapaj astawan llankʼananpaj? (2 Timoteo 2:22).

¹⁷ “Imastachus jóvenes munapayanku chaykunamanta ayqey. Astawanqa cheqan kajta ruway” (2 Timoteo 2:22 leey). Pabloqa Timoteota nerqa wakin imasmanta ayqenan kasqanta, ajinamanta Jehovapaj astawan llankʼananpaj, astawantaj payman qayllaykunanpaj. Ichapis wakin imasta ruwasqaykeqa allillan kajtinpis, tiempoykita anchata qhechushasunkiman, nitaj saqeshasunkimanchu Jehovapaj astawan ruwayta. Piensariy: ¿Mashkha horatataj pelotawan pujllayta yachanki? ¿Mashkha horatataj internetta qhawaspa, videojuegosta pujllaspa kayta yachanki? ¿Nichu astawan tiempochakuwaj Jehovapaj, hermanospajpis? Ichapis ancianosman niwaj salonniykipi mantenimientota ruwaspa yanapakuyta munasqaykita, chayri carritoswan predicayta munasqaykita. Chayta ruwajtiykeqa sumaj amigosta tarinki, paykunataj yanapasonqanku Jehovapaj astawan llankʼanaykipaj, ruwasaj nikusqaykitapis juntʼanaykipaj.

WAJKUNATA SIRVISPA ASHKHA BENDICIONESTA JAPʼINKI

18. ¿Imaraykú nisunman Marcoswan Timoteowan kusisqas kasqankuta?

¹⁸ Marcoswan Timoteowanqa wajkunata sirvinankupaj ashkha imasta saqerqanku, chayraykutaj kusisqas karqanku, sumaj imastataj ruwarqanku (Hech. 20:35). Marcosqa willasqanrayku ashkha lugaresman chayarqa. Chantapis Jesuspa kausayninmanta ashkha sumaj imasta qhelqarqa. Timoteotaj Pablota yanaparqa congregacionesta sayarichiyta, hermanostapis kallpachariyta. Jehovaqa mayta kusikorqa Marcoswan Timoteowan payta sirvinankupaj tukuy imata ruwasqankumanta.

19. ¿Imaraykú jóvenes Pabloj yuyaychaykunasninta ruwananku tiyan, imataj chayta ruwajtinku kanqa?

¹⁹ ¿Imatá reparachiwanchej Pablo Timoteoman cartasta qhelqasqan? Pablopaj joven amigonqa may munasqa kasqanta. Chantapis Jehovaqa Pablowan chay cartasta qhelqacherqa mayta munakususqanta reparanaykipaj. Payqa allin risunanta munan, kusisqa kanaykitapis. Chayrayku Pabloj yuyaychaykunasninta ruwaypuni, tukuy atisqaykitataj kallpachakuy hermanosta astawan sirvinaykipaj. Chayta ruwanki chayqa, kunanña kusisqa kausakunki, aswan qhepamantaj “cheqa kaj kausayta” japʼinki (1 Tim. 6:18, 19).