¿Imaynatá estudiosta yanapasunman Jehovata sirvinankupaj?

1, 2. 1) ¿Imajtintaj wakin estudiosninchej Jehovaj testigon kayta manchachikunku? 2) ¿Imatá kay yachaqanapi yachakusunchej?

¿YUYARIKUNKICHU Jehovaj testigon kayta munashajtiyki wakin imasta manchachikusqaykita? Ichapis manchachikorqanki trabajomanta compañerosniyki, amigosniyki, familiaresniyki contraykipi churakunankuta. Chayri ichapis yuyarqanki Jehovaj kamachiykunasninta ni jaykʼaj kasukuyta atinaykita. Chay imaspi rikukorqanki chayqa, estudiosniykita entiendeyta atillanki imajtinchus mana ñaupariyta atishasqankuta.

² Jesusqa yacharqa chay imasta manchachikuspa runas mana ñaupariyta atinankuta (Mat. 13:20-22). Jinapis ñauparinankupaj paykunata yanapallarqapuni. Noqanchejpis Jesús jina ruwasunchej chayqa, kay tawa imaspi estudiosninchejta yanapayta atisunchej: 1) imaschus ñauparinankupaj mana saqeshasqanta reparakunankupaj, 2) Jehovata astawan munakunankupaj, 3) Jehovata kausayninkupi ñaupajman churanankupaj, 4) llakiykunata atipanankupaj. Estudiosninchejta Wiñaypaj kusisqa kausakuy librowan estudiachishaspa, ¿imaynatá Jesús jina yanapasunman Jehovaj testigonman tukunankupaj?

ESTUDIOYKITA YANAPAY IMASCHUS ÑAUPARINANPAJ MANA SAQESHASQANTA REPARAKUNANPAJ

3. ¿Imataj Nicodemota ichapis mana saqerqachu Jesuspa discipulonman tukunanta?

³ Nicodemoqa judiospa ujnin kamachejninku karqa. Jesús sojta killata jinallaraj predicashajtin, Nicodemoqa repararqaña Jesús Mesías kasqanta (Juan 3:1, 2). Jinapis ‘judiosta manchachikusqanrayku’ Jesuswan pakayllapi parlarqa (Juan 7:13; 12:42). Ichapis Nicodemoqa manchikorqa puestonta, kapuynintapis pierdenanta.a Chay imas paytaqa mana saqerqachu Jesuspa discipulonman tukunanta.

4. ¿Imaynatá Jesús Nicodemota yanaparqa?

⁴ Nicodemoqa Moisespa Leyninta sumajtaña rejserqa. Jinapis imatachus Jehová ruwananta munasqanta entiendenanpaj yanapata necesitarqa. Jesustaj payta yanapananpaj tiempochakorqa, tutan paywan parlanan kajtinpis. Chantapis sumajsituta sutʼincharqa yachachisqanman tukunanpaj kay imasta ruwananta: juchasninmanta pesachikunanta, yakupi bautizakunanta, Diospa Wawanpi creesqantataj rikuchinanta (Juan 3:5, 14-21).

5. ¿Imaynatataj estudionchejta yanaparisunman ñauparinanpaj?

⁵ Ichapis uj estudionchej Bibliamanta ashkha imastaña yachan. Jinapis Jehovata sirvinanpaj imachus jarkʼashasqanta reparakunanpaj yanapata necesitashanman. Ichapis trabajollaman anchata qokushanman chayri ichapis familian mana munashanmanchu Jehovaj testigonman tukunanta. Jina kajtin Jesús jina tiempocharikuna estudionchejta yanaparinapaj. Ichapis paywan mayllamanpis mikhoj ririsunman chayri puriykacharej ririsunman. Chaypi tranquilo parlarikuspa ichapis willariyta atillawasun imaraykuchus mana ñaupariyta atishasqanta. Noqanchejtaj cambiananpaj yanapariyta atillasun. Chantapis yuyarichisunman Jehovata munakusqanrayku cambianan kasqanta, manataj noqanchejta kusichinawanchejraykuchu.

6. ¿Imaynatataj estudioykita yanapawaj yachakusqanman jina ruwananpaj? (1 Corintios 16:13).

⁶ Sichus estudionchej cambiananpaj Jehová yanapananta reparanqa chayqa, cambiayta atillanqa (1 Corintios 16:13 leey). ¿Imaynatá estudioykita chayta reparananpaj yanapawaj? Kaypi piensariy: Escuelapi kashajtiyki, ¿qanpaj imaynataj uj sumaj profesor karqa? Mayta pacienciakoj profesorchari, atinaykita nisoj profesorchari. Qanpis chay profesor jinallataj kanaykipaj kallpachakuy. Estudioykimanqa ama imatachus Jehová ruwananta munasqallantachu yachachiy, astawanpis cambiananpaj Jehová yanapananta reparachiy. ¿Imatawantaj ruwawaj sumaj yachachej kanaykipaj?

ESTUDIOYKITA YANAPAY JEHOVATA ASTAWAN MUNAKUNANPAJ

7. ¿Imaynatá Jesús runasta yanaparqa Jehovata astawan munakunankupaj?

⁷ Jesusqa yacharqa discipulosnin Diosta munakojtinku, yachakusqankuman jina aswan facilta kausayta atinankuta. Chayrayku Tatanku Jehovata astawan munakunankupaj jina ashkha imasta yachacherqa. Uj kuti Jesusqa Jehovata kikincharqa wawasninman allin imasta qoj tatawan (Mat. 7:9-11). Waj kutitaj manchay khuyakuyniyoj tatawan kikincharqa. Chay tataj ujnin wawanqa mana allinta kausaspa purimusqa. Kutinpojtintaj tatanqa manchay kusiywan japʼikapusqa. Jesusta uyarejkunamanta wakenqa ichapis mana munakoj tatayojchu karqanku. Chayrayku Jehová ajina khuyakuyniyoj Tata kasqanta uyarispa, ¿imaynataj sientekunkuman karqa? Chaywan sutʼitachá entienderqanku Jehová runasta mayta munakusqanta (Luc. 15:20-24).

8. ¿Imaynatá estudioykita yanapawaj Jehovata astawan munakunanpaj?

⁸ ¿Imaynatá estudioykita yanapawaj Jehovata astawan munakunanpaj? Estudiachishaspa entiendechiy imayna kʼacha Dioschus Jehová kasqanta. Sapa estudiopi yanapariypuni Jehová munakuwasqanchejta reparananpaj. Wawanta noqanchejrayku wañunanpaj kachamusqanmanta estudiachishaspataj, reparachiy Jehovaqa sapa ujninchejta munakuwasqanchejta, paytapis munakusqanta, chayrayku Wawanta kachamusqanta (Rom. 5:8; 1 Juan 4:10). Sichus estudioyki Jehová payta munakusqanta entiendenqa chayqa, paypis Jehovata astawan munakullanqataj (Gál. 2:20).

9. ¿Imataj Michaelta kausayninta cambiananpaj yanaparqa?

⁹ Indonesiapi tiyakoj Michaelmanta parlarina. Payqa lloqallitullaraj kashaspa Jehovata rejsispapis mana bautizakusqachu. 18 watasniyoj kashajtintaj, camionwan trabajananpaj waj suyuman ripusqa. Aswan qhepamantaj Indonesiaman kutimuspa casarakusqa, warmi wawitayojtaj kasqa. Jinapis familianta saqespa watejmanta trabajaj ripullasqataj. Chaykamataj señoranwan wawanwan ima Bibliata estudiayta qallarisqanku, cambiasqankutaj. Chantá Michaelqa maman wañupusqanrayku watejmanta kutimusqa tatanta cuidananpaj. Ajinapitaj paypis Bibliata estudiayta qallarillasqataj. Wiñaypaj kusisqa kausakuy libromanta 27 leccionman chayaspataj, “Astawan yachakuna” partepi sutʼisituta entiendesqa imaynatapunichus Jehovaj sonqon nanasqanta Wawanta sufrejta rikuspa. Chaytaj sonqonkamapuni chayasqa, waqarikusqataj. Jehová Wawanta kachamusqanmanta maytapuni agradecekusqanraykutaj cambiasqa, bautizakusqataj.

ESTUDIOYKITA YANAPAY JEHOVATA ÑAUPAJMAN CHURANANPAJ

10. ¿Imaynatá Jesús discipulosninta yanaparqa predicacionta ñaupajman churanankupaj? (Lucas 5:5-11; dibujotawan qhawariy).

¹⁰ Jesuspa ñaupaj discipulosnenqa chay rato repararqanku Jesús Mesiaspuni kasqanta, jinapis predicacionta ñaupajman churananku kasqanta entiendenankuraj karqa. Chayta entiendenankupajtaj yanapata necesitarqanku. Pedrowan Andreswan unaysitutaña Jesuspa discipulon kasqankutawan, Jesús paykunata nerqa tukuy imankuta saqespa qhepanta rinankuta (Mat. 4:18, 19). Paykunaqa Santiagowan Juanwan khuska pescadores karqanku, allintaj chay negocionkupi risharqa (Mar. 1:16-20). Jinapis Pedrowan Andreswanqa “chʼipasninkuta saqerpaspa” Jesuspa qhepanta rerqanku. Chayta ruwanankupajqa allintarajchá piensarikorqanku imaynatachus familiankuta mantienenankuta. ¿Imataj paykunata yanaparqa predicacionta ñaupajman churanankupaj? Lucas willawanchej Jesusqa uj milagrota ruwasqanta. Chaypi repararqanku Jehová paykunaman tukuy ima necesitasqankuta qonantapuni (Lucas 5:5-11 leey).

11. ¿Imaynatá estudionchejta yanapasunman creeynin astawan sinchʼiyananpaj?

¹¹ Noqanchejqa mana Jesús jina milagrosta ruwayta atinchejchu. Jinapis estudionchejman willariyta atisunman, Jehovata kausayninchejpi ñaupajman churajtinchej yanapawasqanchejtapuni. ¿Qan yuyarikunkichu imaynatachus Jehová yanapasusqanta reunionesman riyta qallarishajtiyki? Ichapis trabajomanta jefeykiwan parlanayki karqa, trabajasqayki horasmanta manaña astawan horasta trabajanaykipaj. Ajinamanta reunionesman riyta atinallaykipaj. Estudioykiman willariy chayta ruwashajtiyki imaynatachus Jehová yanapasusqanta, creeyniykitaj astawan sinchʼiyasqanta.

12. 1) ¿Imaraykutaj waj hermanosta estudionchejman pusananchejpuni tiyan? 2) ¿Imaynasmantawán estudioykita yanapawaj Jehovata kausayninpi ñaupajman churananpaj?

¹² Waj hermanospis estudioykita yanapayta atillankumantaj. ¿Imaynamanta? Paykunaman willarinkuman Jehovata kausayninkupi ñaupajman churanankupaj imaynatachus cambiasqankuta. Chayrayku estudioykiman waj hermanosta pusakuypuni, paykunatataj niriy estudioykiman willarinankuta imaynatachus Jehovata rejsisqankuta, Jehovata kausayninkupi ñaupajman churanankupajpis ima cambiostachus ruwasqankuta. Chantapis tiempocharikuypuni Wiñaypaj kusisqa kausakuy libromanta videosta estudioykiwan qhawarinaykipaj. Chay videostaj kashan “Astawan yachakuna” partepi, “Astawan yachakunaykipaj” nisqa partepiwan. Chay libromanta 37 leccionta estudiashaspa, Jehovaqa tukuy ima necesitasqanchejta qowasun nisqa videota qhawariychej. Chay videota qhawaytawantaj, sutʼinchariy Jehovata kausayninpi ñaupajman churajtin pay yanapanantapuni.

ESTUDIOYKITA YANAPAY LLAKIYKUNATA ATIPANANPAJ

13. ¿Imaynatataj Jesús discipulosninta wakicherqa qhatiykachasqa kanankupaj?

¹³ Jesusqa ashkha kutispi discipulosninman nerqa qhatiykachasqa kanankuta, familiaresninkupis qhatiykachanallankutataj (Mat. 5:11; 10:22, 36). Niraj wañupushaspa discipulosninman nillarqataj ichá wañuy patapipis rikukunallankutataj (Mat. 24:9; Juan 15:20; 16:2). Jinapis siga predicanallankupajpuni yuyaycharqa parlanankupaj, ruwanankupajpis sumajta yuyaychakunanku kasqanta, paykunawan churanakojkunawantaj ama discutinankuta.

14. ¿Imaynatá estudionchejta yanapasunman qhatiykachasqa kananpaj? (2 Timoteo 3:12).

¹⁴ Noqanchejpis Jesús jinallataj estudionchejta wakichisunman. Payman sutʼincharisunman ichá trabajomanta wakin compañerosnin, amigosnin, familiaresnin ima churanakunankuta (2 Timoteo 3:12 leey). Ichapis trabajomanta wakin compañerosnenqa, kausayninta cambiasqanmanta burlakonqanku. Chayri ichá wakin runas, wakin familiaresninpis imastachus Bibliamanta yachakusqanta mana allinpajchu qhawanqanku. Chayrayku qallariymantapacha estudioykiman niy ichapis qhatiykachasqa kananta. Ajinamanta qhatiykachasqa kajtin wakichisqaña kanqa imatachus ninanpaj, imatachus ruwananpajpis.

15. Estudionchejman familian churanakojtin, ¿imaynatá yanapasunman?

¹⁵ Estudionchejman familian churanakojtin, reparachina imaraykuchus payman churanakushasqankuta. Ichapis engañashasqanchejta yuyanku, chayri ichapis testigosmanta mana allin imasta parlajta uyarerqanku. Jesustapis ajinallataj pasarqa. Wakin familiaresnenqa locoyapushasqanta yuyarqanku (Mar. 3:21; Juan 7:5). Estudionchejqa yachakunanpuni tiyan pacienciakuyta, allinta yuyaychakuspataj tukuywan parlayta, familiaresninwanpis.

16. ¿Imaynatataj estudionchejta yanaparisunman creenciasninmanta sutʼincharinanpaj?

¹⁶ ¿Imatataj estudioyki ruwanman ujnin familiarnin creenciasninmanta yachayta munajtin? Ama ujllapi tukuy imata sutʼinchaykuchunchu. Chaytachus ruwanman chayqa saykʼuchinman, niñataj astawan yachayta munanmanchu. Estudioykita niy pisisitullata sutʼincharinanta, entiendekunanpaj jinallataj. Ajinamanta familiarnenqa waj kutipi Bibliamanta parlayta munallanqa (Col. 4:6). Chantapis estudionchejqa, familiaresninman jw.org paginanchejta rejsichillanmantaj. Ajinamanta paykunaqa Jehovaj testigosninmanta astawan yachayta munajtinku, chaypi maskʼayta atenqanku.

17. ¿Imaswantaj estudioykita yanapawaj tapojtinku kutichiyta atinanpaj? (Fototawan qhawariy).

¹⁷ Estudioykita familiaresnin, trabajomanta compañerosnin yachakusqanmanta tapojtinku, ¿imaynatá wakichiwaj entiendenankupaj jinalla kutichinanpaj? Jw.org paginanchejpi “¿Imatá tapukunku Jehovaj testigosninmanta?” nisqa partewan yanapachikuwaj (2 Tim. 2:24, 25). Chantapis Wiñaypaj kusisqa kausakuy libromanta “Wakin runas ninku” chay partewanpis yanapachikullawajtaj. Estudioykiwan ensayay palabrasnillanpi kutichinanpaj. Mana allinta sutʼinchayta atej jina kajtintaj yanapariy. Ajinamanta estudioykeqa mana manchikuspa creenciasninmanta sutʼinchayta atillanqa.

18. ¿Imaynatá estudioykita yanapawaj congregacionwan khuska predicayta qallarinanpaj? (Mateo 10:27).

¹⁸ Jesusqa discipulosninman nerqa sumaj willaykunata tukuy runasman willamunankuta (Mateo 10:27 leey). Estudioyki congregacionwan predicayta qallarenqa chayqa, imaynatachus Jehová yanapasqanta reparanqa, yachakonqataj Jehovapi astawan atienekuyta. ¿Imaynatá estudioykita yanapawaj congregacionwan khuska predicaj llojsinanpaj? Uj campaña kananta willakojtin, paywan parlariy publicador kananpaj imatachus ruwananta. Sutʼinchariy campañapi predicayta qallariy aswan fácil kasqanta. Chayri ichapis yanapawaj chaupi semana tantakuykunapi asignacionniyoj kananpaj anotachikunanta. Ajinamanta creenciasninmanta mana manchikuspa sumajta parlayta atillanqa.

ESTUDIOYKIPI ATIENEKUSQAYKITA RIKUCHIY

19. ¿Imaynatá Jesús rikucherqa discipulosninpi atienekusqanta, imaynatá noqanchejpis pay jina ruwasunman?

¹⁹ Jesusqa niraj cieloman ripushaspa, discipulosninman nerqa watejmanta paykunawan kananta. Chayta nishajtin mana entienderqankuchu cieloman rinankumanta parlashasqanta. Jesustaj discipulosnin mana tukuy imatachu entiendejtinkupis, repararqa Jehovata tukuy sonqo kasukuyta munasqankuta (Juan 14:1-5, 8). Payqa yacharqa cieloman ripunankuta entiendenankupaj, waj imastapis entiendenankupaj tiempo pasananta necesitasqankuta (Juan 16:12). Noqanchejpis estudiosninchejman reparachisunman paykunapi atienekusqanchejta, Jehovata sirviyta munasqankutataj yachasqanchejta.

20. ¿Imaynatá Malauimanta hermananchej estudionpi atienekorqa?

²⁰ Estudiosninchej allin kajta ruwayta munasqankupi atienekoyqa may sumajpuni. Malauipi tiyakoj hermananchej Chifundomanta parlarina. Payqa Alinafe sutiyoj sipasta Bibliamanta estudiachiyta qallarerqa. Chay sipasqa católica karqa. Wiñaypaj kusisqa kausakuy libromanta 14 leccionman chayaspataj, Chifundoqa Alinafeta tapurisqa santosta yupaychaymanta imatachus yuyasqanta. Alinafetaj phiñarikuspa nisqa: “Chayqa noqamanta kashan”, nispa. Chayrayku Chifundoqa yuyarqa ichapis Alinafe manaña estudiayta munananta. Jinapis payqa pacienciakuspa Alinafeta estudiachillarqapuni, suyarqataj aswan qhepaman niña santosta yupaychananchu kasqanta entiendenallanta. Uj mashkha killasninman, Chifundoqa Alinafeta tapurerqa 34 leccionpi rikhurej tapuyta. Chaypi nin: “Bibliata estudiasqayki, cheqa Diosmanta yachakusqayki ima, ¿kausayniykipi yanapashasunkichu?”, nispa. Estudion imatachus nisqanmanta Chifundo nin: “Alinafeqa niwarqa Jehovaj testigosnin Bibliaj chejnisqan imasta manapuni ruwasqankuta, waj sumaj imastawan nillawarqataj”, nispa. Pisi tiemponmantaj Alinafeqa manaña santosta yupaycharqachu, bautizakorqataj.

21. ¿Imaynatá estudionchejta yanapasunman Jehovata sirviyta munananpaj?

²¹ Yachanchej Dioslla estudiosta ‘wiñachisqanta’, jinapis paykunata yanapayta atisunman Jehovata sirvinankupaj (1 Cor. 3:7). Chayrayku mana Jehová imatachus ruwanankuta munasqallantachu yachachinchej, manaqa yanaparinchej Jehovata astawan munakunankupaj. Chantapis kallpacharinchej Jehovata kausayninkupi ñaupajman churanankupaj, ajinamanta payta munakusqankuta rikuchinankupaj, yachachinchejtaj llakiykunapi rikukuspa Jehovapipuni atienekunankuta. Sichus estudiosninchejman paykunapi atienekusqanchejta rikuchisunchej chayqa, reparanqanku paykunapis Jehovata tukuy sonqo sirviyta atisqankuta.