Qallariy yachachiykunamanta mosoj imasta yachakunallapuni

1. ¿Imaynataj kasharqanki Bibliamanta wakin imasta yachakuspa?

BIBLIAMANTA qallariy yachachiykunaqa kausayninchejta cambiarqa. Diosninchejpa sutin Jehová kasqanta yachakuspa payman astawan qayllaykorqanchej (Isa. 42:8). Yachakullarqanchejtaj wañusqas ni imata sientesqankuta, nitaj ni maypi sufrishasqankuta. Chayta yachaytaj mayta sonqochawarqanchej (Ecl. 9:10). Diosninchej kay jallpʼata kʼachitu paraisoman tukuchinanta yachaspataj, manaña llakikorqanchejchu imachus qhepaman kananmanta. Kunanqa yachanchejña mana 70 chayri 80 watasllatachu kausakunanchejta, manachayqa wiñaypaj (Sal. 37:29; 90:10).

2. ¿Imajtintaj Pedro Jehovata unaytaña sirvej cristianosman qallariy yachachiykunata yuyaricherqa? (2 Pedro 1:12, 13).

² Unayña testigos kajtinchejpis Bibliaj qallariy yachachiykunasninmanta sumaj imasta yachakullasunmanpuni. ¿Pikunamantaj apóstol Pedro iskay kaj cartanta qhelqarqa? Pikunachus ‘cheqa kajta yachasqankupi sinchʼi sayasqaña’ karqanku chay cristianosman (2 Pedro 1:12, 13 leey). Chay congregacionpeqa llulla yachachejkuna, waj sajra runaspiwan karqanku. Pedrotaj paykunamanta cuidakunankupaj chay cartanta qhelqarqa (2 Ped. 2:1-3). Chayrayku imastachus yacharqankuña chay yachachiykunamanta wakinta yuyaricherqa, Jehovata tukuy sonqo sirvinallankupajpuni.

3. ¿Imajtintaj tukuyninchej qallariy yachachiykunapi tʼukurinallanchejpuni tiyan? Kikinchariy.

³ Unayña testigos kajtinchejpis, Bibliaj qallariy yachachiykunasninmanta mosoj imasta yachakullasunmanpuni. Sumajtaña waykʼuyta yachajpiwan, waykʼuyta yachakushajpiwan piensarina. Iskayninkojta waykʼunankupaj kikin imas kanman. Jinapis sumajtaña waykʼuyta yachajqa, chay imaswan imaymana mikhunitasta waykʼurinman, waykʼuyta yachakushajtajrí yachasqallanta waykʼunman. Kikillantaj kanman noqanchejwanpis. Sichus unaytaña Jehovata sirvishanchej chayqa, uj textomanta ashkha imasta yachakusunman, recienllaraj Bibliata estudiashajkunatajrí chay kikin textomanta wakin imasllataraj yachakunkuman. Unayña bautizakorqanchej chayqa kausayninchej maytaña cambian, Jehovatapis ashkha imaynasmantaña sirvinchej. Kausayninchej ajinata cambiasqanraykutaj, qallariy yachachiykunapi piensarispa waj imastawan yachakuyta atinchej. Kay yachaqanapeqa kinsa qallariy yachachiykunata yachakusun, qhawarisuntaj unayña bautizasqa kajkuna imatachus chaymanta yachakuyta atisqanchejta.

JEHOVÁ RUWAWAJNINCHEJ

4. ¿Imaynatá kausayninchejpi yanapawarqanchej Jehová Ruwawajninchej kasqanta yachay?

⁴ Hebreos 3:4 nin: “Tukuy imata ruwajtajrí Diospuni”, nispa. Yachanchej jallpʼanchejta, chaypi tukuy ima kajtawan Diosninchej ruwasqanta, paytaj manchay yachayniyoj, may atiyniyojtaj. Pay ruwawasqanchejraykutaj allinta rejsiwanchej, chantapis payqa munakuwanchej, yachantaj imachus noqanchejpaj aswan allin kasqanta. Jehová ruwawasqanchejta yachasqanchejqa yanapawarqanchej kausayninchejta cambiananchejpaj, kusisqataj kausakunanchejpaj.

5. ¿Imata yachaytaj kʼumuykukoj sonqos kanapaj yanapawanchej? (Isaías 45:9-12).

⁵ Jehová Ruwawajninchej kasqanta yachayqa, kʼumuykukoj sonqos kanapaj yanapallawanchejtaj. Jobmanta parlarina: Uj tiempota Jobqa pantasqata Jehovamanta parlarqa. Chayta ruwarqa payllapi anchata yuyasqanrayku, payllataj allinpaj qhawachikuyta munasqanrayku. Jinapis Jehovaqa yuyaricherqa, paymin Tukuy Atiyniyoj Dios kasqanta (Job 38:1-4). Chaywan Jobqa repararqa Jehovaqa kʼachapuni kasqanta, cheqan kajtapunitaj ruwasqanta. Aswan qhepaman profeta Isaías nerqa: “¿Tʼuroqa Manka Llutʼata ninmanchu ‘¿imata ruwashanki?’ nispa?” (Isaías 45:9-12 leey).

6. ¿Imajtintaj Jehová may atiyniyoj kasqanpi tʼukurinanchej tiyan? (Fotostawan qhawariy).

⁶ Unayña testigos kajkunaqa, ichapis yuyasqallankupi anchata atienekunkuman, niñataj Jehovaj yanapayninta, nitaj Palabranpa yanapaynintapis maskʼankumanñachu (Job 37:23, 24). Mana ajina kananpajqa Ruwawajninchej Jehovapi tʼukurinanku tiyan, imayna yachayniyojchus kasqanpi, imayna atiyniyojchus kasqanpi (Isa. 40:22; 55:8, 9). Chaytaj paykunata yanapanqa kʼumuykukoj sonqollapuni kanankupaj, Jehovaj yuyasqantaj yuyasqankumanta aswan patapi kasqanta yuyarikunankupaj.

7. ¿Imataj Rahelata yanaparqa uj cambiota tukuy sonqo japʼikunanpaj?

⁷ Jehová Ruwawajninchej kasqanpi piensareyqa, Esloveniamanta Rahela sutiyoj hermanata yanaparqa Diospa llajtanpi cambiosta tukuy sonqo japʼikunanpaj. Rahela nin: “Diospa llajtanta ñaupajman apajkunaj kamachisqankuta mana kasukuyta atillajchu kani. 2023 Diospa Llajtanta Kamachejkunamanta 8 kaj willayninta qhawarqaniñapis. Jinapis barbayoj hermanota discursota qoshajta rikoyqa mana allinchu rijchʼawarqa. Chayrayku Jehovamanta mañakorqani chay cambiota tukuy sonqo japʼikunaypaj”, nispa. Rahelaqa reparakorqa Diosninchej cielotawan jallpʼatawan ruwasqanrayku, llajtanta allinta pusayta atisqanta. Sichus qanpis uj mosoj sutʼinchayta chayri mosoj kamachiyta mana japʼikuyta atillankichu chayqa, tʼukuriy Ruwawajninchej Jehovaqa manchay yachayniyoj, may atiyniyojtaj kasqanpi (Rom. 11:33-36).

¿IMAJTÍN DIOSNINCHEJ LLAKIYKUNA KANANTA SAQEN?

8. Llakiykunata mana Jehovachu rikhurichisqanta yachay, ¿imaynatá yanapawanchej?

⁸ ¿Imajtín Diosninchej llakiykuna kananta saqen? Wakin runasqa mana chayta entiendeyta atispa Jehovapaj phiñakunku, niñataj paymanta yachayta munankuchu (Pro. 19:3). Noqanchejtaj yachakunchej mana Jehovachu llakiykunata rikhurichisqanta, manachayqa jucharayku, pantaj runas kasqanchejrayku llakiykuna kasqanta. Chantapis yachakullanchejtaj Jehová pacienciakusqanrayku may chhika runasraj payta rejsishasqankuta. Yachakullanchejtaj imaynatachus Diosninchej tukuy llakiykunata chinkasqata chinkachinanta (2 Ped. 3:9, 15). Chayta yachaspa mayta sonqochakunchej, Diosninchejmantaj astawan qayllaykunchej.

9. ¿Ima kutispitaj piensarinanchej tiyan imajtinchus Jehová llakiykuna kananta saqeshasqanta?

⁹ Jehová tukuy llakiykunata chinkachinankama pacienciakunanchej tiyan. Jinapis wakin kuteqa problemasniyoj kasunman, pillapis qhasimanta ñakʼarichiwasunman chayri familianchejta chay imas pasanman, manachayrí familianchejmanta pillapis wañupunman. Chay imaspi rikukuspataj ichapis yachayta munasunman imaraykuchus Jehová manaraj llakiykunata tukuchishasqanta (Hab. 1:2, 3). Chay kutispi allin kanman piensarinanchej imaraykuchus Jehová cheqan runasta llakiykuna qhatirinanta saqeshasqanta (Sal. 34:19).a Chantapis piensarillasunmantaj Jehová tukuy llakiykunata wiñaypaj chinkachinantapuni.

10. ¿Imataj Anneta yanaparqa llakiyninta aguantananpaj?

¹⁰ Imajtinchus Diosninchej llakiykuna kananta saqeshasqanta yachayqa, llakiykunata aguantanapaj yanapawanchej. Annemanta parlarina. Payqa océano Indicopi, Mayotte islapi tiyakun. Pay nin: “Mamay wañupojtin maytapuni waqarqani. Wañupusqanmanta uj mashkha watasña kajtinpis llakikullanipuni. Jinapis yuyarikunipuni mana Jehovachu llakiykunata rikhurichisqanta. Payqa mayta munashan tukuy llakiykunata chinkachiyta, wañusqastapis kausarichimuyta. Chay imaspi piensarejtiy tʼukunapaj jinapuni sonqoy phaj nirin”, nispa.

11. ¿Imajtintaj predicallaytapuni munanchej?

¹¹ Imajtinchus Diosninchej llakiykuna kananta saqesqanta yachayqa, siga predicanallapajpuni yanapallawanchejtaj. Pedroqa sutʼincharqa Jehová pacienciakusqanrayku pikunachus arrepientekojkuna salvakuyta atisqankuta. Chayta sutʼinchaytawantaj nerqa: “Imayna runaschus kanaykichejpi tʼukuriychej. Qankunaqa llimphu kausayniyoj runas kanaykichej tiyan. Diosta tukuy sonqo yupaychasqaykichejtataj ruwasqasniykichejwan rikuchinaykichej tiyan”, nispa (2 Ped. 3:11). Chay ‘ruwasqasninchejmanta’ ujnintaj predicay kashan. Tatanchej Jehová jinallataj runasta munakunchej, munanchejtaj paykunapis paraisopi kausakunankuta. Jehová pacienciakusqanrayku ashkha runasraj payta rejsiyta atinku. Noqanchejtaj chay sumaj llankʼaypi Jehovawan khuska llankʼayta atinchej. Niraj tukukuy pʼunchay chayamushajtintaj ashkha runastaraj yanapayta atinchej payta rejsinankupaj (1 Cor. 3:9).

‘QHEPA PʼUNCHAYKUNAPI’ KAUSAKUSHANCHEJ

12. ¿Imatataj sutʼita reparanchej ‘qhepa pʼunchaykunamanta’ profecía juntʼakushasqanrayku?

¹² Bibliaqa sutʼita willan kay ‘qhepa pʼunchaykunapi’ imaynachus runas kanankuta (2 Tim. 3:1-5). Chay profeciataj maychus kajsitupuni kay tiempopi juntʼakushan. Runasqa astawan astawan sajrayashanku. Chaypitaj sutʼita reparanchej Diospa Palabranqa atienekunapaj jinapuni kasqanta (2 Tim. 3:13-15).

13. ¿Ima tapuykunapitaj piensarisunman? (Lucas 12:15-21).

¹³ Qhepa pʼunchaykunapi kausashasqanchejta yachasqanchejqa, tiemponchejta mana usuchinapaj yanapallawanchejtaj. Jesusqa uj kikinchaywan yachacherqa tiemponchejta allinta apaykachana kasqanta (Lucas 12:15-21 leey). Chay kikinchayninpeqa qhapaj runamanta parlarqa. ¿Imajtintaj nerqa chay runa “mana yuyayniyoj” kasqanta? Mana qhapaj kasqanraykuchu, manachayqa tiemponta qhasi manakaj imaspi usuchishasqanrayku. Chay runaqa tukuy imata ‘payllapaj tantasharqa, Diospa ñaupaqenpitaj mana qhapajchu karqa’. Diostajrí payta nerqa: “Kunan chʼisi wañuchisonqanku”, nispa. Chayrayku qhasi manakaj imasllapi tiemponta usuchisharqa. ¿Imatá yachakusunman? Tukukuy pʼunchayqa qayllitapiña kashan. Chayrayku kay tapuykunapi piensarisunman: “Imastachus kausayniypi ruwayta munasqaywan, ¿rikuchishanichu Diosta ñaupajman churasqayta? Tata kani chay, ¿imata ruwanankupajtaj wawasniyta tanqashani? ¿Imata ruwanaypajtaj kallpayta, tiempoyta, qolqeytapis churani? ¿Noqapaj tantanallaypajchu chayri valorniyoj imasta cielopi tantanaypachu?”.

14. ¿Imajtintaj qhepa pʼunchaykunapi kausakushasqanchejpi piensarinanchejpuni tiyan? Mikimanta parlariy.

¹⁴ Wakin imas sutʼita rikuchiwanchej qhepa pʼunchaykunapipuni kausakushasqanchejta. Chaypi tʼukurisqanchejraykutaj kausayninchejpi allintapuni ajllanchej. Ajina karqa Miki sutiyoj hermanawan. Pay nin: “Colegiota tukuytawan animalesmanta estudianaypaj maytapuni universidadman yaykuyta munarqani. Jinapis munallarqanitaj precursora regular kayta, waj lugarmantaj yanapakoj ripuyta. Wiñay tukusqa hermanostaj niwarqanku: ‘¿Atiwajchu chay iskayninta ujllapi ruwayta? Allinta piensariy’, nispa. Yuyarichiwarqankutaj Satanaspa mundon tukukapunanpajña kashasqanta, paraisopitaj tukuy animalesmanta estudianaypaj ashkha tiempo kanallanta. Chayrayku pisi tiempollapi uj oficiota yachakorqani. Chaymantataj precursora regular kanaypaj jina trabajota tarikorqani. Tiemponmantaj predicacionpi yanapakunaypaj Ecuadorman riporqani”, nispa. Kunantaj Mikiwan qosanwanqa chay suyupi congregacionesta waturispa yanapakushanku.

15. ¿Imatá Santiagoj kausaynin yachachiwanchej? (Fotostawan qhawariy).

¹⁵ Predicacionpi runas mana uyariwajtinchej amapuni desanimakunachu. Tukuy runas cambiayta atinku. Jesuspa hermanastron Santiagopi piensarina. Payqa Jesusta wiñajta rikorqa, Mesiasman tukusqanta, ni pi jinataj sumajta yachachisqanta. Ni chaywanpis Jesuspi creerqarajpunichu. Jesús kausarimojtinraj discipulonman tukorqa, sumaj cristianotaj karqa (Juan 7:5; Gál. 2:9).b Ajinallataj kanman familiaresninchejwan, pikunamanchus predicanchej chay runaswanpis. Wakin familiaresninchej manaraj Diosmanta yachakuyta munajtinkupis ama saykʼupunachu, predicacionpi runas mana uyariwajtinchejpis kutinallapuni. Amapuni qonqakunachu qhepa pʼunchaykunapi kausakushasqanchejta, chayrayku mana saykʼuspa predicanallapuni. Kunan willashasqanchejqa ichapis aswan qhepamanraj paykunata yanapanqa, ichapis manchay ñakʼariy tiempo qallarisqantawanraj.c

DIOSPA YUYARICHISQASNINMANTA AGRADECEKUNALLAPUNI

16. ¿Imaynatataj Jehovaj yuyarichisqasnin yanapasunki? (“Wajkunata yanapariy” nisqa recuadrotawan qhawariy).

¹⁶ Diospa llajtan wakin yachachiykunata qowasqanchejqa mana testigo kajkunapaj wakichisqa kashan. Chaykunamanta wakintaj kanku semana tukukuymanta tukuypaj discursos, jw.org paginanchejmanta wakin yachaqanas, wakin videos, predicanapaj revistas ima. Tukuy chaykunapi Jehovaj yuyarichisqasnin kashan. Chaykuna mana testigospaj kajtinpis tukuyta yanapawanchej Jehovata astawan munakunapaj, Palabranpi astawan atienekunapaj, Bibliamantataj aswan sumajta yachachinapaj (Sal. 19:7).

17. ¿Imaspitaj Bibliaj qallariy yachachiykunasnin yanapawasunman?

¹⁷ Unaytaña Jehovata sirvishanchej chayqa, maytapuni kusikunchej mosoj sutʼinchaykuna chayamuwajtinchej. Jinapis mayta agradecekullanchejtaj Jehovata rejsishaspa imastachus yachakusqanchejmanta. Kay yachaqanapi yachakunchej jina, chay qallariy yachachiykunamantaqa mosoj imasta yachakullasunmanpuni. Ichapis yuyasqallanchejpi anchata atienekusqanchejrayku chayri wakin imasta sumajtaña ruwayta yachasqanchejrayku, mana atillasunmanchu uj mosoj kamachiy chayamojtin tukuy sonqo japʼikuyta. Jina kajtenqa kʼumuykukoj sonqos kana, yuyarikunataj Ruwawajninchej Jehová llajtanta pusashasqanta. Payqa manchay yachayniyoj, may atiyniyojtaj. Problemaspi tarikojtinchej chayri familianchej problemaspi tarikojtin pacienciarikuna, tʼukurinataj imajtinchus Jehová llakiykuna kananta saqeshasqanta. Chantapis amapuni qonqakunachu qhepa pʼunchaykunapi kashasqanchejta, tukukuy pʼunchaytaj qayllitapiña kashasqanta. Ajinamanta ni tiemponchejtapis, ni kapuyninchejtapis qhasi manakaj imaspi usuchisunchu. Imastachus Jehová yuyarichiwasqanchejwan yanapachikunallapuni. Ajinamanta kausayninchejpi allintapuni ajllasun, paytataj tukuy sonqo kasukullasunpuni.