¿Imachus kapuwasqanchejwan contentakunchejchu?

1. ¿Ima niytá munan kapuwasqanchej imaswan sonqo juntʼasqa kay, chanta imataj mana niyta munanchu?

¿KAUSAYNIYKIWAN sonqo juntʼasqachu kashanki? Ima allin imaschus kapuwasqanchejwan contentakusqanchejrayku sonqo juntʼasqa kanchej, kusisqataj kanchej, wakin imas mana kapuwasqanchejmantataj mana phiñakunchejchu, nitaj rabiakunchejchu. Jinapis kausayninchejwan sonqo juntʼasqa kayqa, mana ninayanchu waj imasta ruwanapaj niña kallpachakunanchejchu kasqanta. Sonqo juntʼasqa kaspapis kallpachakunallanchejpuni tiyan Diosta imaymanasmanta astawan sirvinapaj (Rom. 12:1; 1 Tim. 3:1). Munasqanchej ruwaykunata mana japʼispapis ama llakikunachu, sonqo juntʼasqallapuni kana.

2. ¿Imataj pasanman kapuwasqanchej imaswan mana contentakojtinchej?

² Kapuwasqanchej imaswan mana contentakuspaqa maytapuni pantaykusunman. Wakin hermanosqa may chhika horasta trabajanku mana necesitasqanku imasta rantinankupaj. Wakintaj llakikunapaj jina qolqeta, sonqonkoj munapayasqan imastawan suwakorqanku. Ichapis kay jinata yuyasqankurayku chay juchasta ruwarqanku: “Kaytaqa noqapuni japʼinay tiyan”, “¿Maykʼajkamataj suyakusajri?”, “Kay qolqetaqa kutichipullasaj”, nispa. Jinapis chayqa suwakuypuni. Jehovataj suwakuyta chejnikun sutinta pisipaj qhawachisqanrayku (Pro. 30:9). Wakin hermanostaj Diospa llajtanpi wakin ruwaykunata mana japʼispa sienterpakapunku, Jehovamantataj karunchakunku (Gál. 6:9). ¿Imaynatataj Jehovata rejsishaspa chay imasta ruwankumanri? Ichapis pisimanta pisi niña kapusqanku imaswan contentakorqankuchu.

3. ¿Imatá yachachiwanchej Filipenses 4:11, 12?

³ Tukuypis kapuwasqanchejwan contentakuyta atisunman. Apóstol Pablo nerqa: “Noqaqa yachasqa kani, imayna kaspapis imachus tiyapuwasqanwan sonqo juntʼasqa kayta”, nispa (Filipenses 4:11, 12 leey). Chayta qhelqashajtin carcelpi kaspapis kusisqallapuni karqa. Payqa yachakusqa kapusqanwan sonqo juntʼasqa kayta. Pabloj kausaynenqa reparachiwanchej kapuwasqanchej imaswan sonqo juntʼasqas kayta atisqanchejta, chaypajtaj kallpachakunanchej kasqanta. Mana jinallamantachu sonqo juntʼasqa kayta atisunchej, manaqa yachakunanchej tiyan. ¿Imaynamanta? Kay yachaqanapi yachakusun kinsa imasta ruwananchej kasqanta.

AGRADECEKUYTA YACHANA

4. ¿Imaynatá agradecekuyta yachay sonqo juntʼasqa kanapaj yanapawanchej? (1 Tesalonicenses 5:18).

⁴ Agradecekuyta yachasunchej chayqa, aswan sonqo juntʼasqa kayta atisunchej (1 Tesalonicenses 5:18 leey). Sichus necesitasqanchej imas kapuwasqanchejmanta tukuy sonqo agradecekusunchej chayqa, mana anchata yuyasunchu mana kapuwasqanchej imaspi. Sichus Jehovapaj imatachus kunan ruwashasqanchejmanta agradecekusunchej chayqa, chay ruwayninchejta sumajta ruwasunchej, nitaj waj ruwaykunata japʼiyllapichu yuyasunchej. Chayrayku Biblia niwanchej orakushaspa Jehovaman agradecekunatapuni. Sichus agradecekuyta yachasunchej chayqa, ‘Diosqa sonqo tiyaykuyta qowasunchej’, “mayqentachus runas mana entiendeyta atinkuchu chayta” (Fili. 4:6, 7).

5. ¿Imasmantataj israelitas agradecekuyta atinkuman karqa? (Dibujotawan qhawariy).

⁵ Israelitaspi piensarina. Paykunaqa Egiptomanta mikhunasta faltachasqankurayku, ashkha kutista Jehovaj ñaupaqenpi thutorqanku (Núm. 11:4-6). Chʼin jallpʼapi pureyqa paykunapaj nichá facilchu karqa. Jinapis sichus Jehová tukuy imata paykunarayku ruwasqanmanta agradecekunkuman karqa chayqa, aswan sonqo juntʼasqa kayta atinkuman karqa. Egiptopeqa esclavos karqanku, egipciosqa maqaspa mayta ñakʼarichej kanku. Chayrayku yuyarikunanku karqa imaynatachus Jehová chunka ñakʼariykunata apachimuspa chaymanta kacharichisqanta. Kacharichisqa kashajtinkutaj, “Egiptotaqa chʼusajpachata saqerparerqanku”, egipciospa ashkha qolqenkuta, oronkuta, ropasninkutapis apakapuspa (Éxo. 12:35, 36). Chantapis Jehovaqa atiyninwan puka mar qochata iskayman parterqa, chayninta israelitas faraonpa ejercitonmanta ayqekunankupaj. Chʼin jallpʼapi purishajtinkutaj, Jehovaqa sapa día maná nisqa tʼantata paykunaman qorqa. Ni tukuy chaywanpis israelitasqa contentakorqankuchu. ¿Imajtin? Mana mikhunanku pisisqanraykuchu, manaqa kapusqanku imasmanta mana agradecekusqankurayku.

6. ¿Imastaj agradecekuyta yachanapaj yanapawasun?

⁶ ¿Imataj yanapawasunman agradecekuyta yachanapaj? Uj, sapa día piensarinanchej tiyan ima allin imaschus kapuwasqanchejpi. Ichapis anotakusunman imasmantachus agradecekuyta atisqanchejta (Lam. 3:22, 23). Iskay, sapa día wajkunata agradecekuna imastachus ruwapuwasqanchejmanta, astawanqa Jehovata agradecekuna (Sal. 75:1). Kinsa, agradecekuyta yachaj amigosta maskʼakuna, ajina amigosniyoj kajtinchejqa noqanchejpis agradecekuyta yachasun. Ni imawan contentakoj amigosniyoj kajtinchejtaj, noqanchejpis kikillantaj kasun (Deu. 1:26-28; 2 Tim. 3:1, 2, 5). Agradecekuyta yachasun chayqa, mana anchata yuyasunchu mana kapuwasqanchej imasllapi.

7. ¿Imataj Acita yanaparqa aswan sonqo juntʼasqa kananpaj?

⁷ Indonesiamanta Aci sutiyoj hermananchejmanta parlarina. Pay nin: “Coronavirus onqoy kashajtin kausayniyta waj hermanospa kausayninkuwan kikincharqani. Chayraykutaj manaña sonqo juntʼasqachu karqani”, nispa (Gál. 6:4). ¿Imataj payta yanaparqa? Pay nillantaj: “Piensarerqani ima bendicionestachus sapa día japʼisqaypi, Diospa llajtanpi kasqayraykutaj ima allin imaschus kapuwasqanpi. Chaymanta Jehovaman agradecekusqayraykutaj aswan kusisqa karqani”, nispa. Sichus noqanchejpis imapi rikukusqanchejrayku mana kusisqaschu kashanchej chayqa, Aci jina agradecekuyta yachana.

KʼUMUYKUKOJ SONQOS KANA

8. ¿Imataj Barucwan karqa?

⁸ Profeta Jeremiaspa secretarion Barucmanta parlarina. Payqa wakin imaspi rikukusqanrayku uj tiempota mana kusisqañachu karqa. Barucqa Jeremiasta yanapanan karqa israelitasman uj willayta apaspa. Israelitasman willanan karqa Jehovata mana kasukusqankurayku wañuchisqa kanankuta. Chayrayku Barucqa manaña Jehová imatachus ruwananta munasqanpichu yuyasharqa, manaqa payllapiña, imatachus ruwayta munasqanpiwan. Jehovataj profeta Jeremiasnejta nerqa: “Jatuchaj imasta qanpaj maskʼashallankipuni. Amaña chay imasta maskʼaychu”, nispa (Jer. 45:3-5). Chaywanqa kaytapis nishanman jina karqa: “Imachus kapususqanwan contentakuy”, nispa. Chayta allin sonqowan japʼikusqanrayku, Barucqa Jehovaj ñaupaqenpi allinpaj qhawasqallapuni karqa.

9. ¿Imatá yachachiwanchej 1 Corintios 4:6, 7 versículos? (Fotostawan qhawariy).

⁹ Wakin kutisqa ichapis uj hermano yuyanman uj ruwayta paypuni japʼinan kasqanta. Ichapis payqa wakin imasta sumajta ruwayta yachan, sumajta llankʼan, chayri ashkha watastaña Jehovata sirvishan, manachayrí ichapis chay kinsantin imasta ruwashan. Jinapis japʼiyta munasqan ruwayta waj hermanosraj japʼejtinku, ¿imataj yanapanman mana phiñakunanpaj? Imatachus apóstol Pablo 1 Corintios 4:6, 7 (leey) versiculospi nisqanpi tʼukurinman. Imatapis sumajta ruwayta yachasqanchej, ima ruwaytapis japʼisqanchejqa Jehovamantapuni jamun, mana noqallanchejmantachu. Chaytataj qowanchej mana wajkunamanta aswan sumaj kasqanchejraykuchu, manachayqa jatun khuyakuyninrayku (Rom. 12:3, 6; Efe. 2:8, 9).

10. ¿Imataj yanapawasunman kʼumuykukoj sonqos kanapaj?

¹⁰ Jesuspa kausayninpi tʼukureyqa kʼumuykukoj sonqos kanapaj yanapawanchej. Payqa Diospa Wawan kashaspa, may atiyniyoj kashaspa apostolesninpa chakisninta mayllarqa. Apóstol Juan nerqa: “Jesusqa yacharqa Tata Dios tukuy imasta makisninman churasqanta. Yachallarqataj Diosmanta jamusqanta, Diospamantaj kutipunanta”. Jinapis “discipulosninpa chakisninta mayllayta qallarerqa” (Juan 13:3-5). Jesusqa atinman karqa payraj discipulosninwan chakisninta mayllachikuyta. Jinapis ni jaykʼaj yuyarqachu Diospa Wawan kasqanrayku sumaj wasiyoj kananta, ashkha qolqeyoj kananta, tukuy ima patapitaj kausakunan kasqanta (Luc. 9:58). Payqa kʼumuykukoj sonqo kasqanrayku imachus kapusqanwan contentakorqa. Chayrayku Jesusmanta maytapuni yachakusunman (Juan 13:15).

11. ¿Imataj Dennista yanaparqa kusisqa kananpaj?

¹¹ Países Bajospi tiyakoj hermanonchej Dennismanta parlarina. Payqa Jesús jina kʼumuykukoj sonqo kananpaj mayta kallpachakun. Jinapis wakin kutis mana atillanchu. Pay nin: “Noqa japʼiyta munarqani chay ruwayta waj hermano japʼejtin, wakin kuteqa uj jinayayta yachani, reparakunitaj sonqoypi jatunchakushasqayta. Chayta reparakuspataj kʼumuykukoj sonqo kaymanta estudiaj churakuni. JW Library^® aplicacionpi chaymanta parlaj textos etiquetasqa kapuwanña. Ajinamanta chay textosta chay rato tarispa watejmanta leeriyta atini. Chantapis celularniypi chaymanta parlaj discursos descargasqaña kashan, chaytataj sapa kuti uyarini.a Kunankamaqa yachakuni tukuy imata ruwasqanchejqa Jehovata jatunchananpaj kasqanta, manataj jatunchakunanchejpajchu. Jehová saqewasqanchejraykulla llajtanpi imaynitamantapis yanapakuyta atinchej”, nispa. Sichus noqanchejpis chay hermano jina mana kusisqachu kashanchej chayqa, kallpachakuna aswan kʼumuykukoj sonqos kanapaj. Ajinamanta Jehovaman astawan qayllaykusunchej, aswan kusisqastaj kasunchej (Sant. 4:6, 8).

SUYAKUYNINCHEJPI TʼUKURINA

12. ¿Imapi tʼukurispataj kapuwasqanchejwan contentakuyta atisunchej? (Isaías 65:21-25).

¹² Jehovaqa niwanchej tumpamantawan sumaj kausayta apamunanta. Chaypi tʼukurispataj kapuwasqanchejwan contentakuyta atisunchej. Isaías libropi willawanchej Jehovaqa llakiykuna chaupipi kausakushasqanchejta yachasqanta, tukuy llakiyninchejtataj chinkachinanta (Isaías 65:21-25 leey). Paraisopeqa tukuypata kapuwasunchej sumaj kʼachitu wasis, sumaj trabajo, sumaj miskʼi mikhunas ima. Ni jaykʼaj manchachikusunñachu imapis pasanawanchejmanta, chayri wawasninchejta imapis pasananmanta (Isa. 32:17, 18; Eze. 34:25). Chay sumaj kausayqa kanqapuni, mana cuentollachu.

13. ¿Ima kutispitaj astawanraj suyakuyninchejpi tʼukurinanchej tiyan?

¹³ ¿Imajtintaj kunan tiempo astawanraj suyakuyninchejpi piensarinanchej tiyan? ‘Qhepa pʼunchaykunapi’ kausakushasqanchejrayku. Kausay ‘mayta sajrayashasqanraykutaj’ tukuypis problemasniyoj kanchej (2 Tim. 3:1). Jehovataj sapa día aguantanapaj yuyaychaykunata qowanchej, kallpachawanchej, yanapawanchejtaj (Sal. 145:14). Chantapis sumaj suyakuyta qowasqanchejqa llakiykunapi kajtinchej yanapawanchej. Kay tiempopi ichapis jumpʼi suruyta trabajanchej familianchejta mantienenapaj. Jinapis yachanchej mana wiñaypajchu ajinata trabajananchejta. Jehovaqa niwanchej necesitasqanchejmantapis astawanraj paraisopi qonawanchejta (Sal. 9:18; 72:12-14). Chantapis kay tiempo ichapis sufrishallanchejtaj sinchʼi onqoyniyoj kasqanchejrayku, tukuy imanchej nanawasqanchejrayku, chayri depresión onqoyniyoj kasqanchejrayku. Pero kausayninchej mana wiñaypajchu ajina kanqa. Diosninchejqa niwanchej paraisopi manaña onqoykuna, nitaj wañuypis kananta (Apo. 21:3, 4). Chay sumaj suyakuyta qowasqanchejqa yanapawanchej llakiykunapi kashaspa mana rabiakunapaj, nitaj phiñakunapaj. Chayrayku mana justicia kajtinpis, onqosqa kajtinchejpis, pininchej wañupojtinpis, chayri waj llakiypi tarikojtinchejpis kusisqa kayta atinchej. Kay tiempopi ima llakiypi rikukojtinchejpis, yachanchej ñakʼarisqanchejqa uj tiempollapaj kasqanta, paraisopitaj llakiykuna wiñaypaj chinkananta (2 Cor. 4:17, 18).

14. ¿Imatataj ruwasunman suyakuyninchejmanta mana iskayrayanapaj?

¹⁴ Suyakuyninchejqa yanapawanchej kapuwasqanchejwan contentakunapaj. Chayrayku, ¿imataj yanapawasunman chay suyakuyninchejmanta mana iskayrayanapaj? Suyakuyninchejqa lentes jina. Lentesqa yanapawanchej aswan sutʼita rikunapaj. Kikillantataj suyakuyninchejpis yanapawanchej paraisopiñapis kashasunman jina aswan sutʼita yuyanapaj. Sichus qolqe pisiwasqanchejrayku llakisqa kashanchej chayqa, tʼukurina paraisopi imayna sumajchus kausayninchej kananpi. Chaypeqa manaña qolqeta necesitasunchu, manaña ni piman debesunchu, ni wajchayaypis kanqañachu. Sichus Diospa llajtanpi uj ruwayta manaraj japʼisqanchejrayku llakisqa kashanchej chayqa, tʼukurina paraisopi chay imas niña imapischu kananpi. Chaypeqa manaña pantaj runaschu kasun, may chhika watastataj Jehovata sirviyta atisun (1 Tim. 6:19). Ichá kay tiempo may chhika problemaspi rikukuspa mana paraisopi piensariyta atillasunmanchu. Jinapis paraisopi piensarinapaj kallpachakusun chayqa, manaña llakiykunasnillanchejpichu yuyasun.

15. ¿Imatá Christamanta yachakunchej?

¹⁵ Dennismanta 11 parrafopi parlarerqanchejña. Kunantaj señoran Christamanta parlarina. Christa nin: “Onqoyniyrayku llauchhipachalla kani. Mana puriyta atisqayrayku silla de ruedasllapiña purikuni, astawantaj camallapi kani, tukuy imaytaj nanawan. Kunallanraj doctor niwarqa niña allinyapunayta. Chayta niwajtinkamataj yuyarqani: ‘Payqa mana noqa jinachu paraisota suyakushan’, nispa. Suyakuyniypi yuyasqayrayku mana anchata llakikunichu. Kay tiempopeqa aguantakunallayña tiyan, paraisopitaj may sumajta kausakusaj”.

“PAYTA MANCHACHIKOJKUNATAQA NI IMAPIS FALTANCHU”

16. ¿Imaraykutaj David nerqa “payta manchachikojkunataqa ni imapis faltanchu” nispa?

¹⁶ Kausayninchejwan sonqo juntʼasqa kajtinchejpis problemasqa kanqapuni. Rey Davidmanta parlarina. Paypataqa kinsa wawasnin wañorqanku, chantapis qhasimanta tumparqanku, wasancharqanku, wañuchinankupajtaj watasta qhatiykacharqanku. Jinapis Davidqa kusisqallapuni karqa. Jehovamanta parlaspataj nerqa: “Payta manchachikojkunataqa ni imapis faltanchu”, nispa (Sal. 34:9, 10). ¿Imajtín chayta nerqa? Imajtinchus payqa yacharqa Jehová problemasmanta mana librawajtinchejpis, necesitasqanchej imasta qonawanchejtapuni (Sal. 145:16). Noqanchejpis sutʼita yachanchej ima kajtinpis Jehová yanapanawanchejtapuni. Chayrayku David jinallataj kusisqa kanchej.

17. ¿Imajtintaj qan sonqo juntʼasqa kayta munanki?

¹⁷ Jehovaqa munan imapi rikukuspapis kusisqa kananchejta (Sal. 131:1, 2). Chayrayku kallpachakuna kapuwasqanchejwan contentakunapaj. Chaypajtaj agradecekuyta yachana, kʼumuykukoj sonqo kana, suyakuyninchejpitaj tʼukurina. Ajinamanta nisun: “Sonqo juntʼasqa kashani”, nispa (Sal. 16:5, 6).