1925: Pachaj watasña pasan

SUYAKUSQANKU MANA JUNTʼAKUNCHU

Bibliamanta ashkha Yachaqajkunaqa suyasharqanku 1925 watapi kay jallpʼa uj paraisoman tukunanta. Aswan qhepaman hermano Albert Schroeder, pichus Diospa Llajtanta Kamachejkunamanta ujnin karqa, imaraykuchus chayta suyakusqankumanta kayta sutʼincharqa: “Yuyaj kayku kay jallpʼapi puchoj ajllasqa cristianos chay watapi cieloman ripunankuta, Diospa Gobiernonmanta kanankupaj. Ñaupa tiempomanta Diospa kamachisnintaj, Abrahán, David, wajkuna ima kausarimuspa kay jallpʼapi kamachinankuta”, nispa. Chay suyakusqanku mana juntʼakojtintaj wakin hermanosqa sonqonkupi phutikorqanku (Pro. 13:12).

Suyakusqanku mana juntʼakojtinpis, Bibliamanta ashkha Yachaqajkunaqa tukuy sonqo predicallarqankupuni. Pisimanta pisitaj entienderqanku Jehovamanta willananku aswan importante kasqanta. Qhawarina imaynatachus radionejta willaspa may karu lugaresman chayasqankuta.

WAJ RADIOSTAWAN RUWANKU

1924 watapi, WBBR radiopi willasqankoqa may sumaj rerqa. Chayrayku Bibliamanta Yachaqajkunaqa aswan karuman chayananpaj jina waj radiotawan ruwarqanku Chicago (Illinois) qayllapi, suticharqankutaj WORD nispa. Ingeniero Ralph Lefflerqa chay radiota ruwaysikorqa. Pay nerqa: “Chiri tiempopi runasqa may karupi chay radiota tutasnin uyarej kanku”, nispa. Alaskapi Pilot Station llajtapi uj familia chay radiopi ñaupaj kutispi predicakusqanta uyarisqanku. Paykunaqa chay radiomanta 5.000 kilometrosmanta astawan karupi tiyakusqanku. Uyariytawantaj uj cartata apachisqanku chay radiopi trabajajkunaman, Diosmanta may sumajta yachachimusqankumanta agradecekuspa.

Inglés parlaypi 1 de diciembre de 1925 watamanta Torremanta Qhawaj revistapeqa, WORD nisqa radio may karumanpuni chayasqanmanta nerqa: “Kay radio 5.000 vatios transmisorniyoj kasqanrayku, tukuynin Estados Unidosmanta aswan sumaj radio. Uyariyta atinku mar qocha kantukama, inti llojsimuynin ladomanta inti yaykuynin ladokama, jinallataj Cubapi, Alaskaj norte ladonpi ima. Ashkha runasqa ni jaykʼaj uyarisqankurajchu Diosmanta sumaj willaykunata, kunantaj kay radionejta uyarispa astawan yachakuyta munanku”, nispa.

Chay tiempollapitaj Bibliamanta Yachaqajkunaqa Canadapipis radionejta sumaj willaykunata willayta munarqanku. 1924 watapitaj Saskatoon llajtapi (Saskatchewan), CHUC nisqa radiota ruwarqanku. Chay suyupeqa primera vez chay radiopi Diosmanta willakorqa. 1925 watapitaj chay radiota waj ladoman apayta munarqanku. Chayrayku Sociedad Watch Towerqa, Regent Building nisqa ñaupa teatrota Saskatoon llajtapi ranterqa. Chayta allinchaytawantaj chayman radiota aparqanku.

Chay radionejta willasqankurayku Saskatchewanpa karu ranchitosninpi, ashkha runas primera vez sumaj willaykunata uyarerqanku. Karu ranchitopi tiyakoj Graham sutiyoj señora chay radiopi willakusqanta uyarisqa. Chay sumaj willaykunata uyariytawantaj publicacionesta mañakunanpaj cartata apachisqa. Hermano George Naish chaymanta nerqa: “Qhelqamusqanpi sutʼita repararqayku publicacionesta maytapuni necesitashasqanta. Chayrayku Estudios de las Escrituras nisqata tukuyninta apacherqayku”, nispa. Pisi tiemponman chay señoraqa aswan karu lugarespiña willasharqa.

CREENCIASNINCHEJ ASTAWAN SUTʼINCHAKUN

Inglés parlaypi 1 de marzo de 1925 watamanta Torremanta Qhawaj revistapi, “Nacimiento de la nación” nisqa sumaj yachaqana llojserqa. ¿Imajtintaj sumaj karqa? Bibliamanta Yachaqajkunaqa unayña yacharqanku Satanaspata llajtan tiyapusqanta. Chay llajtanpi kashanku sajra ángeles, llulla religiones, qhatojkuna, políticos ima. Jinapis Diospa Llajtanta Kamachejkunaqa, chay yachaqanapi sutʼincharqanku Jehovajtapis llajtan tiyapullasqantataj. Chay llajtantaj mana Satanaspa llajtan jinachu kasqanta, Satanaspa llajtanpa contranpitaj sayaykusqanta (Mat. 24:45). Chantapis sutʼinchallarqataj 1914 watapi Diospa Gobiernon kamachiyta qallarisqanta, cielopi guerra kasqanraykutaj chay watallataj Satanaswan demoniosninwan kay jallpʼaman wijchʼuchikamusqankuta (Apo. 12:7-9).

Wakin Bibliamanta Yachaqajkunaqa mana chay mosoj sutʼinchayta japʼikuyta atillarqankuchu. Chayrayku chay yachaqanallapitaj nerqa: “Kay yachaqanapi sutʼinchakusqanwan wakin mana de acuerdochu kashankichej chayqa pacienciakullaychej, Señorpi atienekuychej, tukuy sonqotaj payta sirvillaychejpuni”, nispa.

Tom Eyre, Gran Bretañapi precursor karqa (ñaupajtaqa colportor nikoj). Bibliamanta Yachaqajkunamanta ashkhas chay yachaqanata leespa imaynachus kashasqankumanta, payqa kayta willarqa: “Apocalipsis 12 capitulomanta sutʼinchakusqanta hermanosqa kusiywan japʼikorqanku. Diospa Gobiernon cielopi sayachisqaña kasqanta entiendeytawan, tukuy sonqo wajkunaman chayta willamorqayku. Chayrayku astawan predicamorqayku, repararqaykutaj Jehovaqa aswan sumaj imastaraj qhepaman ruwananta”, nispa.

JEHOVAMANTA WILLANANKUPUNI KASQANTA ENTIENDENKU

Kay tiempopi Jehovaj testigosnenqa sumajtaña rejsinchej Isaías 43:10 versiculopi nisqanta. Chaypi nin: “Jehová Diosqa nin: ‘Qankuna testigosniy kankichej, ajllakusqay kamachiy’”, nispa. Jinapis 1925 wata ñaupajtaqa, publicacionesninchejpi may pisillata chay versiculomanta parlakoj. 1925 watapitaj Isaías 43:10, 12 versiculosmanta, 11 Torremanta Qhawaj revistaspipuni inglés parlaypi sutʼinchakorqa.

1925 watapi agosto tukukuyta, Bibliamanta Yachaqajkunaqa Indianapolispi (Indiana) uj asambleata ruwarqanku. Chay asambleapaj programapitaj hermano Rutherfordpa nisqanta churasqanku. Chaypi nisharqa: “Kay asambleaman jamunchej Señormanta kallpata japʼinapaj. Chay kallpawan kutispataj willallasunpuni, Señorpa testigosnin jina”, nispa. Chay asambleaqa 8 diasta karqa. Chaypi kajkunatataj kallpacharqanku mayllapipis kashaspa Jehovamanta parlanankupaj.

Sábado 29 de agosto pʼunchaypi, hermano Rutherford “Una llamada a la acción” nisqa discursota qorqa, predicanankupuni kasqantataj nerqa. Pay nerqa: “Jehová Diosqa nin: ‘Qankuna testigosniy kankichej, noqataj Dios kani’. Chaymantataj nin: ‘Runaspaj uj señalta churaychej’, nispa” (Isa. 43:12; 62:10). Chantá sutʼincharqa: “Mana pipis kay jallpʼapi señalta chayri banderata churayta atinmanchu llajtas rikunankupaj jina. Chaytaqa kamachisnillan ruwayta atinkuman. Paykunawan Señorpa espiritun kashan, chayraykutaj testigosnin kanku”, nispa.

Discursonta tukuytawan, hermano Rutherfordqa “Mensaje de esperanza” nisqa tituloyoj documentota leerqa. Chaypitaj nisharqa Diospa Gobiernollan sumaj bendicionesta apamunanta, chaypachataj sumajta, mana onqospa, mana wañuspa kausakunata, mana esclavos jinachu kanata, wiñaypajtaj kusisqa kanata. Tukuy chaypi kajkunataj chay documentopi nisqanwan de acuerdo kasharqanku. Aswan qhepamantaj chay documentota ashkha parlaykunaman traducikorqa, predicacionpi runasman jaywanankupajtaj imprimikorqa. 40 millonesta jinataj runasman jaywarqanku.

Bibliamanta Yachaqajkunaqa aswan qhepamanraj Jehovaj testigosnin sutiwan rejsisqa karqanku. Jinapis aswan sutʼitaña repararqanku Jehovamanta willamunankupuni kasqanta.

REVISITASTA RUWAYTA QALLARINKU

Bibliamanta Yachaqajkuna mundo enteropi yapakusqankuman jina, Diospa llajtanqa nerqa Bibliamanta yachakuyta munaj runasman watejmanta kutinankuta. “Mensaje de esperanza” nisqa documentowan campañata ruwasqankutawan, Bulletina nisqa folletopi kayta nerqa: “Chay documentota saqerqankichej chay runasman kutinaykichejpaj kallpachakuychej, manaraj ni mayqen publicacionta saqerqankichejchu chaypis”, nispa.

Enero de 1925 watamanta Bulletin folletopi, Plano (Texas) nisqa llajtamanta Bibliamanta Yachaqaj nerqa: “Mayta tʼukuyku ashkha kutistaña predicayku chay lugarespi aswan sumaj riwasqaykumanta. Primera vez predicayku chaypitaj mana chaykama allinchu riwayku. Uj ranchitopi chunka watasta, phishqa kutita jinaña predicarqayku. Kunallanraj hermana Hendrixwan mamaywan chayman predicaj kutisqanku, ni jaykʼaj jinataj may chhika librosta saqesqanku”.

Panamamanta colportortaj qhelqarqa: “Ashkha runasqa punkuwan wisqʼawarqanku. Qhepan kutispi kutejtiytaj uyarillawarqankuña. Chayrayku kay wataqa astawan tiempota orqhoshani revisitasta ruwanaypaj, wakinwantaj sumaj rishawan”.

ASHKHARAJ RUWANANKU KARQA

Colportoresman sapa wata apachisqan cartapi hermano Rutherford, 1925 watapi imastachus ruwasqankumanta, qhepan wata imastachus ruwanankumantawan parlarqa. Chaypi nerqa: “Qayna wataqa ashkha llakisqa runasta sonqocharqankichej. Chaytaj mayta kusichisorqachej. […] Kay watataj Jehovaj testigosnin jina, Gobiernonpa testigosnin jina ashkha imastawanraj ruwaspa kusikunkichej, llajtaspa rikunankutataj señalta churankichej. […] Khuska Diosninchejta, Reyninchejta jatunchanallapuni”, nispa.

1925 wata tukukuyta hermanosqa Brooklyn (Nueva York) Betelta astawan jatunyachinankupaj wakichikusharqanku. 1926 watapitaj Diospa llajtanqa ni jaykʼaj jina aswan jatun construccionta qallarinan karqa.