Ama qonqakunachu wajkunapaj orapuyta

1. ¿Imaynapí yachanchej orakusqanchejta Jehová may allinpaj qhawasqanta?

ORACIONQA manchay sumaj regalopuni. Kaypi piensarina: Jehovaqa angelesman wakin ruwaykunata qon, Wawan Jesusmanpis jatuchej ruwaykunata qon (Sal. 91:11; Mat. 28:18). Jinapis runaspa mañakusqankutaqa paypuni ‘uyarin’, chay ruwaytaqa mana wajmanchu qon (Sal. 65:2). Mañakojtinchej Jehovapuni uyariyta munawanchej.

2. ¿Imatataj apóstol Pablomanta yachakunchej?

² Tukuy llakiyninchejta Jehovaman willakuyta atinchej. Pero wajkunapajpis mañapunallanchejtaj tiyan. Chayta ruwarqa apóstol Pablo. Uj kuti Éfeso congregacionmanta tukuynin cristianosta nerqa: “Noqaqa qankunapaj Diosmanta mañakullanipuni”, nispa (Efe. 1:16). Pero mana tukuynillankupajchu mañapoj, sapa ujninkupajpis mañapullajtaj. Timoteota nerqa: “Diosman agradecekuni […]. Diosmanta tuta pʼunchay mañakuspa qanmanta yuyarikunipuni”, nispa (2 Tim. 1:3). Pablojtaqa ashkha llakiykunasnin karqa, jinapis mana payllapajchu mañakoj, tiempochakorqa wajkunapajpis mañapunanpaj (2 Cor. 11:23; 12:7, 8).

3. ¿Imajtintaj wakin kutis wajkunapaj orapuyta qonqapusunman?

³ Wakin kutisqa ichapis qonqapusunman wajkunapaj Diosmanta mañapuyta. ¿Imajtin? Sabrinaa sutiyoj hermana nin: “Kay tiempoqa tukuypis ocupasqalla kanchej. Problemasnillanchejpi anchata yuyasqanchejrayku necesitasqallanchejta mañakusunman”, nispa. Noqanchejtapis ajina pasashawanchej chayqa, kay yachaqana maytapuni yanapawasun. Kaypi yachakusun imajtinchus wajkunapaj orapunapuni kasqanta. Chantá wakin yuyaychaykunata qhawarisun imaynatachus chayta ruwanamanta.

¿IMAJTINTAJ WAJKUNAPAJ ORAPUNANCHEJPUNI TIYAN?

4, 5. ¿Imajtín wajkunapaj orapusqanchej “manchay atiyniyoj”? (Santiago 5:16).

⁴ Wajkunapaj orapoyqa “manchay atiyniyoj” (Santiago 5:16 leey). ¿Ciertopunichu wajkunapaj mañapusqanchejman jina Jehová ruwanman? Arí. Jesusqa apóstol Pedro tumpamantawan negananta yachaspa, payta nerqa: “Qanpaj sinchʼita Diosmanta mañapuyki ama creesqayki pisiyananpaj”, nispa (Luc. 22:32). Pablopis yachallarqataj mañakoyqa manchay atiyniyoj kasqanta. Chayrayku qhasimanta Romapi presochajtinku Filemonman escriberqa: “Suyashani qankunaman kutimuyta, Diosmanta mañapuwasqaykichejrayku”, nispa (File. 22). Ajinapunitaj karqa. Pisi tiempollanman kachariporqanku, watejmantataj predicayta aterqa.

⁵ Chaywanpis chayqa mana niyta munanchu mañakusqanchejwan Jehovata imatapis ruwananpaj obligayta atisqanchejta. Jinapis payqa imachus llakichiwasqanchejta sumajta qhawamushan, wakin kutistaj orakusqanchejman jina ruwanman. Chayta yachayqa yanapawanchej imallapis llakichiwajtinchej payman tukuy sonqo willakunanchejpaj, chantataj allin kajtapuni ruwananpi atienekunapaj (Sal. 37:5; 2 Corintios 1:11 versiculota, Biblia de estudio nisqapi chay versiculoj sutʼinchaykunasnintawan leeriy).

6. ¿Imaynatá yanapawanchej wajkunapaj orapuy? (1 Pedro 3:8).

⁶ Wajkunapaj orapoyqa “may khuyakuyniyoj” kanapaj yanapawanchej (1 Pedro 3:8 leey). Khuyakoj runaqa wajkunaj llakiyninkuta reparan, yanapariytataj munan (Mar. 1:40, 41). Michael sutiyoj anciano nin: “Wajkunapaj mañapojteyqa astawan entiendeni ima llakiykunapichus rikukushasqankuta. Chayraykutaj paykunata astawan munakuni. Ajinamanta mana yachajtinkupis paykunaman astawan qayllaykuni”, nispa. Richard sutiyoj ancianotaj nin: “Pipajpis Diosmanta mañapojtinchejqa payta astawan yanapariyta munanchej”, nispa. Chantá nillantaj: “Pipajchus oraporqanchej chayta yanaparispaqa, chay orakusqanchejman Jehová kutichinanpaj yanapakushasunmanpis jina”.

7. ¿Imajtintaj wajkunapaj mañapuy mana problemasnillanchejpi yuyanapaj yanapawanchej? (Filipenses 2:3, 4; fotostawan qhawariy).

⁷ Wajkunapaj mañapoyqa llakiyninchejta maychus kajllata qhawanapaj yanapawanchej (Filipenses 2:3, 4 leey). Kay mundoqa Diabloj makinpi kashan, chayrayku tukuypis llakiykunapi rikukunchej (1 Juan 5:19; Apo. 12:12). Wajkunapaj mañapuyman yachasqa kasun chayqa, yuyarikusun ‘mundontinpi tukuy hermanosninchej kikillantataj ñakʼarishasqankuta’ (1 Ped. 5:9). Katherine sutiyoj precursora nin: “Wajkunapaj mañapuspa yuyarikuni mana noqallachu llakiykunapi kashasqayta. Chaytaj yanapawan mana noqallapi anchata yuyanaypaj”, nispa.

¿PIKUNAPAJTAJ MAÑAPUSUNMAN?

8. ¿Pikunapajtaj Diosmanta mañapusunman?

⁸ ¿Pikunapajtaj mañapusunman? Ashkha hermanospaj. Mañapusunman onqosqa kajkunapaj, machituspaj, jovenespajpis, ichapis paykunamantaqa escuelapi burlakushanku chayri imata ruwanankupaj tanqasqa kashanku. Ashkha hermanosmantaj familiasninku churanakunku, wakintataj gobiernos qhatiykachashanku (Mat. 10:18, 36; Hech. 12:5). Wakintaj politicamanta chʼajwas kasqanrayku wasinkuta saqespa waj ladoman ayqekunku. Wakintaj desastres naturalesrayku ñakʼarishanku. Ichapis chay hermanosninchejta mana rejsinchejchu. Jinapis paykunapaj mañapuspaqa Jesús kamachisqanman jina ‘purajmanta munanakushanchej’ (Juan 13:34).

9. ¿Imajtintaj Jehovaj llajtanta ñaupajman apaj hermanospaj, señorasninkupajwan mañapunanchej tiyan?

⁹ Jehovaj llajtanta ñaupajman apaj hermanospajpis mañapullasunmantaj. Diospa Llajtanta Kamachejkunapaj, yanapajkunasninpaj, Sucursalta Kamachejkunapaj, sucursalpi departamentosmanta encargadospaj, congregacionesta waturejkunapaj, ancianospaj, siervos ministerialespajpis. Paykunamanta ashkhasqa problemasnillayojtaj kaspapis yanapanawanchejpaj ashkhata trabajanku (2 Cor. 12:15). Congregacionesta waturej Mark sutiyoj hermano nin: “Aswan jatun llakiyneyqa tatasniymanta karupi kasqay. Paykunaqa machitusña kanku, onqosqataj kashanku. Yachani hermanaywan qosanwan munakuywan paykunata cuidashasqankuta. Jinapis sonqoy nanawan mana tatasniyta astawan yanapayta atisqaymanta”, nispa. Chay hermanospa llakiyninkuta mana tukuyninta yachaspapis allin kanman paykunapaj mañapunanchej (1 Tes. 5:12, 13). Señorasninkupajpis mañapullasunmantaj. Paykunaqa qosankuta tukuy sonqo yanapanku hermanosrayku llankʼanallankupajpuni.

10, 11. ¿Ashkha hermanospaj ujllapi mañapusqanchej Jehovaman gustanchu?

¹⁰ Qhawarinchej jina ashkha kutisqa, ashkha hermanospaj ujllapi mañapunchej. Ichapis Jehovamanta mañakunchej carcelpi kajkunata yanapananta chayri pininku wañupoj hermanosta sonqochananta. Ajinata mañakushaspataj mana uj hermanopipunichu yuyashanchej. Donald sutiyoj anciano nin: “Ashkha hermanos imaymana llakiykunapi rikukushanku, chayrayku wakin kuteqa ujllapi tukuyninkupaj mañapunchej”, nispa.

¹¹ ¿Ajinata mañakusqanchej Jehovaman gustanchu? Arí. Noqanchejqa mana yachanchejchu imaspipunichus wakin hermanos rikukushasqankuta, imatachus sapa ujninku necesitasqankutapis. Chayrayku tukuyninkupaj Jehovamanta ujllapi mañapusqanchejqa allillan (Juan 17:20; Efe. 6:18). Ajinata mañakusqanchejwan rikuchinchej ‘tukuy hermanosta munakusqanchejta’ (1 Ped. 2:17).

SAPA UJPAJ MAÑAPOJTINCHEJ

12. Sumajta reparayta yachasqanchej, ¿imaynatá yanapawanchej sapa hermanopaj mañapunapaj?

¹² Sumajta reparayta yachana. Ashkha hermanospaj ujllapi mañapojtinchejpis, sumaj kanman sapa ujninkupajpis mañapunanchej. ¿Congregacionninchejpi pillapis sinchʼi onqosqachu kashan? ¿Mayqen jovenllapis desanimasqachu kashan compañerosnin imata ruwananpaj tanqashasqankurayku? ¿Mayqen tatallapis, mayqen mamallapis sapallanchu wawanta uywashan “Jehová Dios nisqanman jina cheqanchaspa, yachachispataj”? (Efe. 6:4). Sumajta reparayta yachasun chayqa, paykunapaj sonqoyoj kasun, sonqonchejtaj astawan aysawasun Jehovamanta mañapunapaj (Rom. 12:15).b

13. ¿Jehovamanta mañapuyta atisunmanchu mana rejsisqanchej hermanospaj?

¹³ Sutinkuta oqharispa mañapuna. Chaytaqa ruwasunman mana rejsinchejchu chay hermanospajpis mañapushaspa. Ashkha hermanosninchej carcelpi kashanku Crimeapi, Eritreapi, Rusiapi, Singapurpi ima. Paykunaj sutisninkutataj tarisunman jw.org paginanchejpi.c Congregacionesta waturej Brian sutiyoj hermano nin: “Carcelpi kaj hermanoj sutinta escribejtiy, chaymantataj sutinta jatunmanta oqharejtiy, paymanta yuyarikuyta atillani, mañapuytapis atillani”.

14, 15. ¿Imatá ruwasunman sapa hermanoj llakiyninpaj jina mañapunapaj?

¹⁴ Llakiyninkupaj jina mañapuna. Michaelmanta 6 parrafopi parlarerqanchejña. Paytaj kayta sumajta yuyaychariwanchej: “Jw.org paginanchejpi carcelpi kaj hermanospa experienciasninkuta leerispa, piensariyta yachani noqa lugarninkupi kajtiy imaynachus sientekunayta. Maytachá llakikuyman warmiymanta, yachaytataj munayman imaynachus kashasqanta. Ajinata piensarisqay yanapawan carcelpi casado hermanospaj imatachus mañapunayta yachanaypaj”, nispa (Heb. 13:3).

¹⁵ Carcelpi kaj hermanosninchej imaynachus sapa día kashasqankupi piensarispaqa astawan yuyaychakusun imatachus paykunapaj mañapunanchejta. Ichapis Jehovamanta mañapusunman carcelmanta guardias paykunawan kʼachas kanankuta chayri carcelmanta encargados Diosninchejta yupaychajta saqenallankuta (1 Tim. 2:1, 2). Chantapis mañakullasunmantaj carcelpi kajkunaj kausayninku chay lugarmanta hermanosta kallpachananta, mana testigo kajkunapis chay allin ruwasqankuta reparaspa willayninchejta uyariyta munanallankuta (1 Ped. 2:12). Yachakunchej jina wajkunapaj mañakunapajqa sumajta reparayta yachana, sutisninkuta oqharispa mañapuna, llakiyninkupaj jinataj mañapuna. Chaytataj ruwasunman mana carcelpi kajkunapaj mañapushaspallachu, manachayqa mayqen hermanollapajpis. Ajinamanta rikuchisunchej munakuyninchej ‘ashkhayasqanta’ (1 Tes. 3:12).

ORAKUSQANCHEJMANTA MAYCHUS KAJLLATA YUYANA

16. ¿Imatataj yuyarikunanchej tiyan wajkunapaj mañapushaspa? (Mateo 6:8).

¹⁶ Yachakunchej jina mañakusqanchejqa manchay atiyniyoj, pikunapajchus mañapunchej chaykunatataj mayta yanapanman. Jinapis orakusqanchejmanta maychus kajllata yuyananchej tiyan. Orakuspaqa mana Jehovaman imatachus mana yachasqantachu willashanchej. Nitaj payta yuyaychananchejchu tiyan imaynatachus imatapis allinchananta. Payqa yachanña imatachus kamachisnin necesitasqankuta niraj paykuna kikin cuentata qokushajtinku, chayri niraj noqanchej cuentata qokushajtinchej (Mateo 6:8 leey). Jina kajtin, ¿imajtintaj wajkunapaj mañapunchej? Kay yachaqanapi yachakunchej ashkha imasrayku chayta ruwasqanchejta. Pero mana chayllachu. Wajkunamanta llakikojkunaqa chaytapuni ruwanku. Munakusqanchejrayku paykunapaj mañapunchej. Jehovataj mayta kusikun pay jina munakuyniyoj kanapaj kallpachakojtinchej.

17, 18. Uj kikinchaywan sutʼinchariy Jehovaqa mañakusqanchejta sumajta reparasqanta.

¹⁷ Ichapis wakin kuteqa mana wajkunapaj mañapusqanchejman jinapunichu ruwakunman. Jinapis chaywan rikuchinchej hermanosninchejta munakusqanchejta. Chaytataj Jehovaqa sumajta reparan. Iskay wawitasniyoj tatapi piensarina. Lloqallitonqa camapi onqosqa kashan. Imillitantaj maytapuni rogakuspa tatanta nin: “Papi hermanitoyta yanapay, may onqosqa kashan”, nispa. Tatanqa yachanña imatachus ruwananta. Payqa lloqallitunta mayta munakun, sumajtataj cuidashan. Jinapis manchayta kusikun imillitan hermanitonta mayta munakusqanrayku yanaparinanta mañakusqanmanta.

¹⁸ Kikillantataj Jehová Diosninchejpis munan wajkunamanta llakikunanchejta, paykunapajtaj mañapunanchejta. Chaywan rikuchinchej hermanosninchejmanta llakikusqanchejta, nitaj noqallanchejpichu yuyasqanchejta. Chaytataj Jehovaqa sumajta reparan (2 Tes. 1:3; Heb. 6:10). Chantapis yachakunchej jina wakin kutisqa wajkunapaj mañapusqanchejman jina ruwakunman. Chayrayku amapuni qonqakunachu hermanosninchejpajpis mañapuyta.