Surasak Suwanmake/Moment via Getty Images
¡RIJCHʼARISQALLAPUNI KAY!
2023 watapi calor anchapuni kashan | ¿Imatá Biblia nin?
Jallpʼantinpi ni jaykʼaj jina sinchʼi calor kashan, nisunman anchatapuni qʼoñimushan. Chaytaj imaymana llakiykunata mundontinpi rikhurichishan. Wakin noticiasta qhawarina:
“Uj grupo runasqa sapa wata may jinatapunichus kay jallpʼapi qʼoñimusqanta qhawarinku, anotankutaj. Chaytataj 174 watasta jinaña ruwanku. Paykuna qhawarisqankuman jinataj, kay watamanta junio killapi ni jaykʼaj jina astawan calor ruwarqa” (Oficina Nacional de Administración Oceánica y Atmosférica, Departamento de Comercio de Estados Unidos, 13 de julio de 2023).
“Kunitanqa Italiapi, Españapi, Franciapi, Alemaniapi, Poloniapiwan ni jaykʼaj jina qʼoñimushan. Yachajkunataj ninku Sicilia, Cerdeña nisqa islaspi, calorqa 48ºC nisqaman chayanankama yapakunanta. Enteron Europapi ni jaykʼaj chay jinata ruphamojchu” (Agencia Espacial Europea, 13 de julio de 2023).
“Jallpʼanchej astawan qʼoñiyasqanrayku, astawan sinchʼita paramonqa, sapa kutitaj. Anchata paramusqanraykutaj yakoqa ashkha lugaresta pʼampaykonqa” (Stefan Uhlenbrook, director de la Sección de Hidrología, Recursos Hídricos y Criosfera de la Organización Meteorológica Mundial, 17 de julio de 2023).
Ichá qanpis chay jina willaykunata uyarispa sinchʼita llakikunki. Jina kajtin, imatachus Biblia chaymanta nisqanta leeriy.
¿Biblia parlanchu calor sinchʼita yapakunanmanta?
Arí, unayña nerqa kay tiemponchej mana allinman tukunanta. Chayrayku wakin lugarespi sinchʼita qʼoñimun chayri anchatañataj qhasamun, manachayrí anchata paramun chayri niñataj paramunchu. Jesuspuni nerqa “mancharina imasta” rikunanchejta (Lucas 21:11). Ashkha runasqa calor chay jinatapuni yapakushasqanmanta mancharikunku, piensankutaj runas jallpʼanchejta tukuchinankuta.
¿Jallpʼanchej niñachu tiyakunapaj jina kanqa?
Mana. Diosqa kay jallpʼata ruwarqa chaypi wiñaypaj kausakunanchejpaj, nitaj saqenqachu runas jallpʼanchejta thuñinankuta (Salmo 115:16; Eclesiastés 1:4). Chayrayku Bibliapi nin, kay ‘jallpʼata pierdechejkunata tukuchinanta’ (Apocalipsis 11:18).
Bibliaqa nin, Diosqa jallpʼanchejta jarkʼananta mana chinkachisqa kananpaj, chaytataj ruwanqapuni.
“Diosqa chay sinchʼi wayrata chʼinyachin, marpi qhollchoqeyaj yakustaj tiyaykunku” (Salmo 107:29). Diosqa wayrata, parata, intitapis kamachiyta atin. Payqa yachan anchata qʼoñimusqanrayku, sinchʼita parasqanrayku, chayri anchata wayrasqanrayku runas sufrisqankuta. Chayrayku tukuy chaykunata chinkachenqa.
“Qanmin jallpʼata sumajta cuidanki. Sumaj jallpʼaman tukuchinki, sumajta poqochinki” (Salmo 65:9). Diosqa kay jallpʼanchejta uj kʼachitu paraisoman tukuchenqa.
Rikunchej jina, Bibliaqa nin kay jallpʼanchej watejmanta mosojyananta. Astawan yachakunaykipaj, “¿Quién salvará el planeta?” nisqa yachaqanata leeriy.