¿Imaraykutaj Dios saqerqa ashkha judío runasta wañuchinankuta?

Alemania suyupi, nazis nisqa partido gobiernopi kashajtinku, may chhika judiosta, waj runastawan wañucherqanku. Chayrayku ashkha runas, imaraykuchus Dios chayta qhawakullasqanta yachayta munanku, sonqochakuytataj maskʼanku. Wakintajrí ninku: “Mana creenichu Dios kasqanta. Kanman chayqa, nichá saqenmanchu karqa chay sajra runas, runasta ajinata wañuchinankuta”, nispa.

Diosmanta, ashkha judiosta wañuchisqankumanta ima pantasqa yuyaykuna

Wakin runas ninku: “Mana Diosta tapunachu tiyan, imaraykuchus chay chhika runasta wañuchinankuta saqesqanta”, nispa.

¿Jinapunichu? Mana. Ñaupa tiempopipis Diospa wakin kamachisnenqa, yachayta munarqanku imaraykuchus Dios sajra ruwaykunata qhawakullasqanta. Chay runasmanta ujqa, profeta Habacuc karqa. Payqa Diosta jinata tapukorqa: “¿Imaraykutaj rikuchiwanki chay chhika sajra imastari? ¿Imaraykutaj runasta ñakʼarichisqankuta qhawakullankiri?”, nispa (Habacuc 1:3). Diostajrí mana profeta Habacucpaj phiñakorqachu. Astawanpis noqanchej yachakunanchejpaj tapuykunasninta Bibliapi qhelqacherqa.

Wakin runas ninku: “Diosqa phutiyta sufrejta qhawakullawanchej. Mana sonqonta nanachikunchu”, nispa.

¿Jinapunichu? Mana. Diosqa chejnikun runa masinkuta sufrichejkunata (Proverbios 6:16-19). Bibliaqa nin, Noej tiemponpi kay jallpʼaman sajra ruwaykuna juntʼaykojtin, Diosqa ‘sonqonta mayta nanachikusqanta’ (Génesis 6:5, 6). Chayrayku Alemaniamanta soldados, may chhika runasta mana khuyarikuspa wañuchejtinku, Diosqa maytachá sonqonta nanachikullarqataj (Malaquías 3:6).

Wakin runas ninku: “Dios judiosta castigasqanrayku, chay chhika runas wañorqanku”, nispa.

¿Jinapunichu? Mana. Ñaupa cristianospa tiemponkupi, Diosqa saqellarqa romanos Jerusalenta thuñinankuta (Mateo 23:37–24:2). Jinapis chaymanta qhepamanqa, niña ni mayqen llajtatapis castigarqachu. Paypajqa “judío runapis, mana judío kaj runapis uj rejlla kanku” (Romanos 10:12, Diosmanta Qhelqasqa).

Wakin runas ninku: “Dios tukuy atiyniyoj, munakuyniyojtaj chayqa, nichá saqenmanchu karqa chay chhika runasta wañuchinankuta”, nispa.

¿Jinapunichu? Mana. Diosninchej runasta ni jaykʼaj ñakʼarichinchu chaypis, wakin kutisqa uj tiempo sufrinankuta saqen (Santiago 1:13; 5:11).

¿Imaraykutaj Dios chay chhika runasta wañuchinankuta saqerqa?

Paylla Sumaj Kamachej kasqan sutʼi yachakunanpaj. Diosqa chayraykullataj runas kay chhika unayta ñakʼarinankuta saqen. Bibliaqa nin, kay mundota Satanás kamachishasqanta, manataj Dioschu (Lucas 4:1, 2, 6; Juan 12:31). Chanta, ¿imaraykutaj mana imatapis ruwarqachu chay chhika runasta wañuchishajtinku? Chayta yachanapaj, Bibliapi iskay imasta qhawarina.

1. Diosqa runasta ruwarqa imatachus ruwanankuta ajllayta atinankupaj jina. Diosqa ñaupa tatanchej Adanman, Evaman ima, imatachus ruwanankuta kamacherqa. Jinapis mana paykunata kasukunankupaj obligarqachu. Paykunatajrí Diosta kasukunankumantaqa, sapallankumanta ajllarqanku imachus allin, imatajchus mana allin kasqanta. Mana allin kajta ruwayta ajllasqankuraykutaj, kunankama sufrishallanchejpuni (Génesis 2:17; 3:6; Romanos 5:12). Ashkha runas, paykuna jinallataj mana allin kajta ruwayta ajllanku. Judiospa ujnin libronku nin: “Tukuyninchej imatachus ruwananchejta ajllayta atinapaj jina ruwasqa kanchej. Jinapis ashkha runas, mana allin kajta ruwayta ajllanku. Chayrayku mundo enteropi ashkha llakiykuna kan”, nispa (Statement of Principles of Conservative Judaism). Diosqa payta kasukunanchejpaj obligayta atiwasunman, jinapis mana chayta ruwanchu. Astawanpis munasqanchejman jina kausajta saqewanchej.

2. Diosqa wañusqasta kausarichenqa, llakiykunatapis chinkachenqa. Diosqa niwanchej, may chhika wañupoj runasta kausarichimunanta. Payqa Alemaniamanta soldados wañucherqanku chay runastapis, kausarichimullanqataj. Chay tiempopi mayta sufrej runaspis, tukuy ñakʼarisqankuta qonqaponqanku (Isaías 65:17; Hechos 24:15). Diosninchejqa runasta mayta munakuwanchej. Chayrayku nisqanta juntʼanqapuni (Juan 3:16).

Alemaniamanta soldados may chhika runasta wañuchishajtinku, ashkha runas sufrerqanku. Chaykunamanta wakenqa, kunanqa kusisqas kausakunku, Diospitaj creellankupuni. ¿Imaraykutaj? Paykunaqa imaraykuchus Dios ñakʼarinanchejta saqesqanta entiendenku, tukuy llakiykunata chinkachinantataj yachanku.