JOVENESPA TAPUKUYNINKU
¿Imaraykutaj ni pi amigoy kayta munanchu?
Internetpi fotosta qhawashajtiyki, kunallanraj uj fiestata ruwasqankuta rikunki. Chaypeqa tukuynin amiguitosniyki amiguitasniyki kashanku. Qanllamanta qonqapusqanku. Arí, qanlla faltanki. Chantá piensarinki:
“¿Imaraykutaj mana invitawankuchuri?”, nispa.
Qallariypi sonqoyki nanasunki. Chantá rabiakunki, mana valechisusqankutataj yuyanki. Kusiyniykeqa ujllata chinkapun. Ni pi munakususqanta yuyanki, ninkitaj: “¿Imaraykutaj ni pi amigoy kayta munanchu?”, nispa.
¿Imatá niwaj?
Mana sapayakunaykipaj, ¿kaykunamanta mayqentataj ruwawaj?
¿Ashkha amigostachu maskʼakuwaj?
¿Redes sociales nisqapichu sayawaj?
¿Diantintachu celularpi escribispa kawaj?
¿Wajkunatachu yanapawaj?
Tukuy chay imasta ruwajtiykipis ichá sapallayki kasqaykita yuyallankipuni.
Imaraykuchus chayta nisqanchejta qhawarina.
Sapallanchej kanamantawan amigosniyoj kanamantawan
Ashkha amigosniyoj kaspapis, sapallanchej kasqanchejta yuyallasunmanpuni.
Anne nin: “Amiguitasniytaqa mayta munakuni. Jinapis wakin kutis yuyani pisipaj qhawawasqankuta. Ashkha amiguitasniyoj kajtiypis manasina munakuwankuchu, nisina valechiwankupischu. Chaytaj mayta llakichiwan”.
Tukuy tiempo redes socialespi kaspapis, sapallanchej kasqanchejta yuyallasunmanpuni.
Elaine nin: “Wakenqa amigasta figuritasta jina tantanku. Ajina amigosmantaqa ni jaykʼaj munakuyninkuta reparanchejchu. Internetpi ashkha amigosniyoj kayqa qhasilla. Sumaj amigosniyoj kaypuni aswan allin”.
Diantinta celularpi mensajesta apachispapis, mana amigosniyoj kasqanchejta yuyallasunmanpuni.
Serena nin: “Wakin kutisqa sapallay sientekuni, celular qhawarisqallataj kani mensajesta apachimunawankuta suyaspa. Mana ni uj mensaje chayamuwajtintaj astawan sapayakuni”.
Wajkunata yanaparispapis sapayakusunman.
Richard nin: “Noqaqa amigosniyta yanaparinipuni. Paykunataj ni jaykʼaj yanapawankuchu. Yanapareyqa gustawanpuni, pero mana allinchu rijchʼawan noqata ni pi yanapariwasqan”.
Tukuchanapaj: Yuyayninchejpi sapallanchej kasqanchejta piensanchej chayqa, sapallanchejpuni kasun. Jeanette sutiyoj sipas nin: “Sapayakunanchej chayri mana sapayakunanchejqa noqanchejmanta kashan, manataj wajkunamantachu”, nispa.
¿Imatá ruwawaj sapallayki kasqaykita yuyanki chay? Chayrí, ¿ni pi amigonpaj valechisusqanta piensanki chay?
Kaykunata ruwawaj
Ñaupaj kaj: Ama pisipaj qhawakuychu.
Jeanette nin: “Wakin kutisqa pisipaj qhawakusqanchejrayku, sapallanchej kasqanchejta yuyasunman. Mana amigopaj valesqanchejta yuyanchej chayqa, mana amigosta tariyta atisunchu”.
Biblia nin: “Runa masiykita munakunayki tiyan qan kikiykita jina” (Gálatas 5:14). Sumaj amigosniyoj kanapajqa, ñaupajtaqa noqanchej kikinchejta munakunanchej tiyan. Pero mana may kasqanchejta yuyakunanchejchu tiyan (Gálatas 6:3, 4).
Iskay kaj: Ama anchata qanllapi yuyaychu.
Erin nin: “Sapayakoyqa tʼuruman chinkaykuy jina. Tʼurumanta llojsimunapaj astawan kuyuykachaspaqa, astawan chinkaykunchej. Ajinallataj tukuy tiempo sapallanchej kasqanchejta yuyasun chayqa, ni pi noqanchejwan kayta munanqachu. Jinamantataj astawan sapayakusun”.
Biblia nin: “Munakuyniyoj runaqa [...] mana payllapajchu imatapis munan” (1 Corintios 13:4, 5). Noqallanchejpi anchata yuyasun chayqa, mana wajkunapi piensasunchu. Ajina runastataj ni pí munakunchu (2 Corintios 12:15). Kusisqa kanaykipaj wajkuna imatapis ruwanankuta suyanki chayqa, mana allinchu risonqa. Sichus tukuy tiempo ninki “noqataqa ni pi wajyamuwanchu” chayri “noqataqa ni pi invitawanchu” nispa chayqa, kusisqa kanaykipaj wajkunataraj suyashanki. ¿Manacharí ajinata kausayta munawajchu?
Kinsa kaj: Amigosniykita sumajta ajllay.
Brianne nin: “Sapallanku kasqankuta yuyajkunaqa, munasqas kayta munanku. Chayraykutaj wakin kutisqa pitapis amigonkupaj qhawakullanku. Chaytaj mana allinchu. Imaraykuchus wajkunaqa interesraykulla paykunaman kʼaskankuman. Ajina amigosniyoj kajkunaqa astawan sapayakunku”.
Biblia nin: “Allin yachayniyoj runaswan purejqa allin yachayniyojllataj kanqa. Mana yuyayniyojkunawan purejtaj mana allinman chayanqa” (Proverbios 13:20). Yarqhasqa kaspaqa imatapis mikhurpallanchej. Kikillantaj amigosniyoj kaywanpis. Amigosniyoj kaymanta wañurishanchej chayqa, pitapis amigonchejpaj qhawakullasun. Chay amigonchejtaj ichá munasqanta ruwachiwasunman. Jina kajtintaj, nisunman “ajinapunichá amigosniyoj kayqa” nispa.
Tukuychanapaj: Tukuypis maykʼajllapis sapallanchej kasqanchejta yuyasunpuni. Jinapis chayqa wakinta astawan llakichin. Sapitanchej kasqanchej mayta sonqonchejta nanachiwajtinchejpis, kayta yuyarikuna: Sichus mana tukuy tiempochu sapallanchej kashasqanchejta yuyasun chayqa, mana sapayakusunchu.
Chantapis maychus kajllata yuyananchej tiyan. Jeanette, pimantachus parlarqanchejña, jinata nin: “Mana tukuychu sumaj amigosninchej kanqanku. Jinapis kanqankupuni pikunachus munakuwasunchej chaykunaqa. Chaywantaj sonqo juntʼasqa kana tiyan. Wajkunapaj munasqa kasqanchejta mana qonqasunchu chayqa, ni jaykʼaj sapallanchej kasqanchejta yuyasunchu”.
¿Astawan yachakuyta munawajchu? “Manchikuyninchejta atipana” nisqa recuadrota leeriy. Chayrí “Qué puedes hacer para no sentirte tan solo” nisqa hojitasta uraqachikuy.