¿Imaraykutaj Jehovaj testigosnin mana diachakusta ruwankuchu?

¿Imaraykutaj Jehovaj testigosnin mana diachakusta ruwaykuchu? Imaraykuchus Jehová Diosqa mana munanchu chay fiestata ruwanaykuta. ¿Bibliapi ninchu diachakusta mana ruwana kasqanta? Mana. Jinapis Bibliapeqa ashkha yuyaychaykunata tarinchej, imaynatachus chay fiestasta Jehová Diosninchej qhawasqanmanta. Chaypaj tawa imasta qhawarisunchej.

1. Diachakusta ruwayqa llulla creenciasmanta jamun. Diachakusta ruway imaynatachus rikhurisqanmanta parlaspa uj diccionario nin: “Diachakusta ruwajkunaqa sajra supaykuna mana imanananpaj amigosninwan khuska fiestachakunan kasqanta yuyanku, ajinamanta chay supaykunamanta jarkʼakunankupaj”, nispa (Funk & Wagnalls Standard Dictionary of Folklore, Mythology, and Legend). Waj libro nin: “Ñaupa tiempopeqa, ima diachus sapa runa nacekusqanmanta uj listata ruwaj kanku. Chaywantaj yanapachikoj kanku horóscopo nisqata ruwanankupaj. Chaytataj ruwaj kanku layqerio ruwaykunaman jina”, nispa. Chay libro nillantaj: “Ashkha runasqa yuyanku diachakupi velas kʼanchasqanqa, diachakoj imatachus mañakusqanta japʼinanpaj kasqanta”, nispa (The Lore of Birthdays).

   Jehová Diosqa chejnikun magiata ruwajkunata, adivinosta, yatirista, layqerio imasta ruwajkunata, “chayman rijchʼakoj” waj imasta ruwajkunatapis (Deuteronomio 18:14; Gálatas 5:19-21). Jehová Diosqa chay imasta ruwasqankurayku, ñaupa Babilonia llajtapi tiyakoj runasta castigarqa (Isaías 47:11-15). Chayrayku Jehovaj testigosnenqa allinta qhawariyku maymantachus uj fiesta chayri uj costumbre jamusqanta. Chayman jinataj wakin fiestasta qhesachayku. Imaraykuchus sut’ita yachayku layqerioswan chhapusqa costumbresta Jehová Dios chejnikusqanta.

2. Ñaupa tiempomanta cristianosqa mana diachakusta ruwajchu kanku. Uj libro nin: “Ñaupa tiempomanta cristianosqa creej kanku diachakusta ruwayqa llulla religionmanta jamusqanta”, nispa (The World Book Encyclopedia). Bibliapi willawanchej Jesuspa apostolesninpis, paymanta yachakoj runaspis, diachakusta mana ruwasqankuta. Kay tiempopipis paykuna jinallataj Jehovaj testigosnenqa mana diachakusta ruwankuchu (2 Tesalonicenses 3:6).

3. Jesusqa cristianosman kamacherqa wañupusqan diata yuyarikunankuta, manataj nacekusqan diatachu (Lucas 22:17-20). Chayrayku Biblia nin: “Wañupuna pʼunchaypis aswan allin nacekuna pʼunchaymanta nisqaqa”, nispa (Eclesiastés 7:1). Jesusqa wañupunankama tukun sonqo Jehová Diosta sirverqa. Chayta ruwasqanraykutaj Diosqa, may allinpaj qhawarqa. Chayrayku nacekuna diata yuyarikunamantaqa, wañupusqan diata yuyarikuna tiyan (Hebreos 1:4).

4. Bibliapeqa ni maypi ninchu Diospa kamachisnin cumpleañosta ruwasqankuta. Chayrayku, ¿nisunmanchu Bibliata qhelqajkuna Diospa kamachisnin diachakusqankumanta qhelqayta qonqapusqankuta? Mana. Bibliapeqa parlan Diosta mana yupaychaj iskay runas diachakunkuta ruwasqankuta. Chay diachakusqanku diapitaj sajra ruwaykuna ruwakusqanta (Génesis 40:20-22; Marcos 6:21-29).

¿Jehovaj testigosninpa wawasninku cumpleañosta mana ruwasqankumanta llakisqachu kashanku?

Mana. Tukuy tatas jinallataj, Jehovaj testigosnenqa wawitasninkuta mayta munakunku. Chayrayku watapi ima diallapis kusisqa kanankupaj regalitosta qorinku, amigosninkuwan khuska kanankupajpis waj imitasta wakichipunku. Jehovaj testigosnenqa Dios jina imatapis ruwayta munanku. Diosqa kamachisninman ima ratopis allin imasta qonpuni (Mateo 7:11). Chayrayku Jehovaj testigosninpa wawasnenqa cumpleañosta mana ruwasqankumanta mana llakikunkuchu. Wakin wawas imatachus nisqankuta qhawarina.

• 12 watasniyoj Tammy sutiyoj imillita nin: “Tatasniy, mana suyashajtillay regalitosta qoriwasqankoqa mayta kusichiwan”, nispa.

• 11 watasniyoj Gregory sutiyoj yoqallitu nin: “Tatasneyqa mana nacekusqay diaypichu imatapis qowanku, paykunaqa ima pʼunchaypis regalosta qollawanku. Chaytaj mayta gustawan”, nispa.

• 6 watitasniyoj Eric nin: “Diachakuspi uj ratolla tortata mikhusqanku, takisqanku ima mana gustawanchu. Wasiypi imastachus wakichikusqanqa astawan gustawan, aswan sumajtaj”, nispa.