¿Imaraykutaj Jehovaj testigosnin wakin yachachiykunasninkuta cambianku?

Jehovaj testigosnenqa tukuy imatapis Bibliaj nisqanman jinapuni yachachiyku. Chayrayku Bibliata aswan sumajta entiendesqaykuman jina, wakin yachachiykunata cambiayku Biblia nisqanman jinapuni kananpaj.a

Proverbios 4:18 versiculopi sutʼita nin imajtinchus wakin yachachiykuna cambiakunan kasqanta chayri uj jinamanta sutʼinchakunan kasqanta. Chaypi nin: “Cheqan runaspa ñanninkoqa sutʼiyamuyta intej kʼanchaynin jina. Chaytaj astawan astawan kʼancharimun sutʼi pʼunchay kanankama”, nispa. Imaynatachus sutʼiyayta inti llojsimusqanman jina tukuy imapis aswan sutʼi rikukun, ajinallatataj Diosninchejpis pisimanta pisi kamachisninman Bibliaj nisqasninta maychus tiemponpi sutʼinchan (1 Pedro 1:10-12). Chantapis Bibliapi ñaupajmantaña nerqa ‘tukukuy tiempopi’ ashkha imas astawan sutʼinchakunanta (Daniel 12:4).

Chay jina cambios ruwakusqanqa mana tʼukunapajchu. Imajtinchus ñaupa tiempopipis ajina cambios karqaña. Jaqay tiempopi Diospa kamachisnenqa wakin imasta waj jinamanta entienderqanku, pantasqatataj yuyarqanku, chayrayku imaynatachus entiendesqankuta cambiananku karqa.

• Moisés israelitasta egipciospa makinkumanta kacharichiyta munashajtenqa, manaraj Diospa munasqan tiempochu karqa. Chayrayku cuarenta watastaraj suyakunan karqa (Hechos 7:23-25, 30, 35).

• Bibliaqa ñaupajmantaña nerqa Mesías wañuchisqataj kausarichisqataj kananta. Chaytataj apóstoles mana entienderqankuchu (Isaías 53:8-12; Mateo 16:21-23).

• Ñaupa tiempomanta wakin cristianosqa pantasqata entienderqanku maykʼajchus “Jehová Diospa pʼunchaynin” chayamunanmanta (2 Tesalonicenses 2:1, 2).

Diosninchejqa tiempo pasasqanman jina, kamachisninman sutʼincharqa imastachus mana allintachu entiendesharqanku chayta. Kunanpis ajinata sutʼinchanallawaykutapuni munayku (Santiago 1:5).