Jehovaj testigosninpa tantakuykunasninku, ¿yanapawanmanchu?

Jehovaj testigosnenqa, sapa semana iskay kutita Tantakuna Wasispi tantakunku. ¿Imastataj chay reunionespi ruwanku? Chay tantakuykuna, ¿yanapasunkimanchu?

• ¿Imastataj Jehovaj testigosnin tantakuspa ruwanku?

• ¿Imaspitaj yanapasunkiman?

• Wakin jóvenes jinata ninku

¿Imastataj Jehovaj testigosnin tantakuspa ruwanku?

Bibliamanta yachakunku. Jehovaj testigosninpa reunionesninkuman rispaqa, qanpis ashkha imasta yachakuwaj.

• Diosmanta cheqa kajta yachakuwaj.

• Imaraykuchus kay mundopi llakiykuna yapakushasqanta yachakuwaj.

• Aswan allin runa kayta yachakuwaj.

• Sumaj amigosta tariwaj.

¿Yacharqankichu? Jehovaj testigosninpa tantakuykunasninkupeqa, Diospa Gobiernonmanta astawan parlakun (Mateo 6:9, 10; 24:14; Lucas 4:43).

¿Imaspitaj yanapasunkiman?

Jehovaj testigosninpa reunionesninkoqa kausayniykipi yanapasunkiman. Chaypeqa Bibliamanta yachakunki. Chaytaj ‘sumaj yachayniyojman’ tukuchisonqa (Proverbios 4:5). Bibliaj yachachiykunasnenqa, kausayniykipi imatapis allintapuni ruwanaykipaj yanapasonqa. Chantapis kay tapuykunaj kutichiyninta yachakuwaj:

• ¿Imapajtaj kausanchej?

• ¿Dioschu castigashawanchej kay jinata sufrinapaj?

• ¿Wañuspa waj vidamanchu yaykunchej?

Semana tukukuypeqa, kay jina yachachiykunamanta parlakun.

• ¿Imaraykutaj Bibliawan yuyaychachikunanchej tiyan?

• Sinchʼi llakiypi, ¿pimantataj yanapata mañakusunman?

• ¿Imatataj Diospa Reinon noqanchejrayku ruwashan?

Brenda nin: “Colegiopi kashajtiy, ujnin compañeroy salonman jamorqa. Payqa familiaywan khuska tiyakorqa. Noqaykutaj Bibliaykuta, revistasniykuta ima mañarerqayku. Reunión tukukusqantawan compañeroyqa niwarqa: ‘Kaypeqa tukuypis sumajta parlarinku, tapuykunamanpis sumajta kutichinku. Iglesiaypeqa mana kay jina sumaj libros kapuwaykuchu’, nispa”.

¿Yacharqankichu? Jehovaj testigosninpa reunionesninkupeqa, mana pimantapis qolqeta mañakunchu, nitaj chayman yaykunapaj paganachu tiyan.

Tantakuypi kajkunaqa kallpachasonqanku. Bibliaqa nin, cristianosqa tantakuspa “purajmanta” kallpachanakusqankuta (Hebreos 10:24, 25). Kay sajra mundopeqa, casi tukuy runas paykunallamanta llakikunku. Jinapis Jehovaj testigosninpa tantakuyninkuman rejkunaqa, Diosta ñaupajman churanku, wajkunamantapis llakikunku.

Elisa nin: “Wakin diasqa ruwanasniyrayku llakisqalla, saykʼusqalla kani. Jinapis reunionespi hermanoswan hermanaswan parlarispaqa, llakiyniytapis saykʼusqa kasqaytapis qonqani. Chantá watejmanta kallpayoj kani, wasiymanpis may kusisqa kutipuni”.

¿Yacharqankichu? Mundontinpi Jehovaj testigosnenqa, 120 mil kuraj congregacionespi ujchasqa kashanku, 60 mil kuraj Tantakuna Wasistaj tiyapuwayku. Astawan yapakusqaykuraykutaj, sapa wata 1.500 Tantakuna Wasis jina ruwakun.a