Jesuspa ropanta llankharispa sanoyapun

Jesusqa Decapolismanta ichapis Capernaum llajtaman kutiporqa. Capernaum qayllapi tiyakoj judiostaj chayta uyarerqankuchá. Chantapis chay judiosqa ichá uyarerqanku Jesús sinchʼi wayrata thañichisqanta, iskay runasmanta supaykunata qharqosqanta ima. Chayraykutaj “ashkha runas” qocha kantupi Jesusta suyarqanku (Marcos 5:21). Paykunaqa Jesús botemanta uraykusqantawan, qhepanta rerqanku. Paykunapurataj ichapis ninakorqanku: “Jaku qhawamuna imatachá Jesús ruwanqa”, nispa.

Chay runasmanta ujnenqa Jairo karqa. Payqa sinagogapi kamachejkunamanta ujnin karqa, Jesuswantaj tinkuytapuni munarqa. Imajtinchus 12 watitayoj kʼata imillitan onqosqa kasharqa. Jesuswan tinkuspataj ñaupaqenman qonqoriykukorqa. Chantá Jesusmanta kutin kutita mañakorqa: “Imillitay wañorqapushanña. Jamuriy ari, makisniykita payman churaykuripuwanki, sanoyapuspa kausananpaj”, nispa (Marcos 5:23). Jesustaj Jairoj munasqa imillitanta yanapariyta munarqa (Lucas 8:42).

Chayrayku payqa Jairoj wasinman purirerqa. Paywan khuskataj ashkha runas rerqanku. Chay runasqa ichapis yuyasharqanku: “Kunanqa uj milagrota ruwajta rikusunpunichari”, nispa. Chay runas ukhupitaj uj sinchʼi onqosqa warmi kashallarqataj.

Chay warmeqa Judea jallpʼamanta karqa, 12 watastañataj yawar apaywan onqosqa kasharqa. Chay warmeqa ashkha doctoreswan jampichikuspa tukuy qolqenta tukuchisqa. Jinapis mana “sanoyasqachu, astawantaj onqoykusqa” (Marcos 5:26).

Chay onqosqa warmeqa pisi kallpayoj kasharqa. Runastaj ichá pʼenqaypi rikhurichej kanku. Pillapis ajina kaspaqa mana wajkunaman onqoyninmanta willariyta atillanmanchu. Diospa Leynin nisqanman jinaqa yawar apaywan onqosqa warmista chʼichipaj qhawaj kanku. Pillapis ajina onqosqa warmej ropanta llankharejqa mayllakunan karqa, chʼisiyaykunankamataj chʼichipaj qhawasqa kanan karqa (Levítico 15:25-27).

Chay warmeqa ‘Jesusmanta parlajta uyarispa’ payta maskʼamorqa. Chʼichipaj qhawasqa kaspapis ashkha runas kasharqanku chayman yaykorqa. Chay warmeqa sonqonpi nerqa: “Ropallantapis llankharisaj chayqa, sanoyapusaj”, nispa. Jesuspa ropanta llankharejtintaj, chay ratopacha yawar apaynin chʼakiporqa. Reparakorqataj sanoyapusqanta (Marcos 5:27-29).

Chantá Jesús nerqa: “¿Pitaj llankhaykuwanri?”, nispa. Chay warmitaj, chayta uyarispa mancharisqachá kasharqa. Jinallapitaj Pedroqa Jesusta nerqa: “Yachachejníy, runasqa tukuynejmanta kʼiskikamuspa ñitʼishasunku”, nispa. Jesustajrí nerqa: “Pipunichá llankhaykuwan, reparani atiyniy llojsisqanta”, nispa (Lucas 8:45, 46).

Onqosqa karqa chay warmitaj manaña pakakuyta atispa, Jesusman kharkatitispa qayllaykorqa. Ñaupaqenman qonqoriykukuspataj, tukuy runaspa ñaupaqenpi willarqa onqoyninmanta, chay ratopacha sanoyapusqantapis. Jesustaj nerqa: “Wawáy, creesqaykirayku sanoyasqaña kanki. Kunanqa sonqo tiyaykusqa ripuy”, nispa (Marcos 5:34).

Jehová Diosqa Jesusta ajllarqa kay jallpʼata kamachinanpaj. Jesusqa kʼacha, khuyakoj, runasta yanapananpajtaj atiyniyoj.