Chinkasqa qhari wawa kutinpun

Jesusqa ichapis Jordán mayu chimpapi, Pereapi kashaspa chinkasqa ovejamanta, chinkasqa qolqemantawan parlarqa. Chay parlasqanmantataj yachakunchej, juchallikoj runa sonqomantapacha pesachikojtin, Diosmantaj kutinpojtin mayta kusikuna kasqanta. Jesuspis juchallikoj runas Diosman kutinpojtinku kusikoj. Fariseoswan leymanta yachachejkunawantaj, chayta mana allinpajchu qhawaj kanku. Paykunaqa mana entienderqankuchu Jesuspa yachachisqanta. Nillataj entienderqankuchu Jehová Diosninchej uj runa juchanmanta pesachikojtin kusikusqanta. Chayrayku Jesusqa waj kikinchaymantañataj parlarqa.

Jesusqa iskay qhari wawasniyoj tatamanta parlaspa, imachus sullkʼa wawawan kasqanmanta astawan parlarqa. Chay yachachisqantaqa fariseos, leymanta yachachejkuna, waj runas ima uyarerqanku. Paykunataj imachus sullkʼa kaj wawata qhatirisqanmanta yachakunanku karqa. Noqanchejtaj imatachus tatan ruwasqanmanta, imatachus kuraj hermanon ruwasqanmantapis yachakusunman. Chayrayku kay capitulota leerishaspa chay kinsa runasmanta imatachus yachakuyta atisqanchejpi tʼukurina.

Jesús nerqa: “Uj runa iskay qhari wawasniyoj kasqa. Sullkʼa kajtaj tatanta nisqa: ‘Tatáy, noqaman chayawaj herenciata qopuway’, nispa. Tatankutaj sapa ujman herenciankuta qopusqa”, nispa (Lucas 15:11, 12). Jesús nerqa jina, chay wawaqa mana tatan wañupusqanraykuchu herencianta mañakaporqa. Astawanpis sapallanmantaña munasqanman jina kausayta munasqanrayku. Chanta, ¿herencianta mañakapuytawan imatataj ruwarqa?

Jesús nerqa: “Pisi pʼunchayninmantaj, sullkʼa wawanqa tukuy imasninta tantaykuspa karu llajtaman ripusqa. Chaypitaj kapuyninta tukuchisqa mana allinta kausaspa”, nispa (Lucas 15:13). Chay wawaqa, tatan tukuy imata mana faltachispa qoshajtinpis, wasinmanta karu llajtaman ripusqa. Millay kausaypi purispataj, tukuy kapuyninta tukuchisqa. Payqa llakiy, wayra bolsillotaj kasharqa.

Jesús nillarqapuni: “Tukuy qolqenta tukuchisqantawantaj, manchay yarqhay kasqa chay karu llajtapi, paytaj pisichikuyta qallarisqa. Chayrayku chay llajtamanta uj runaman kʼaskakusqa, chay runataj jallpʼasninman kachasqa khuchisninta michinanpaj. Paytaj sajsakuyta munasqa khuchi mikhuna thaqoswan, manataj pipis ni imata jaywarisqachu”, nispa (Lucas 15:14-16).

Diospa Leynin nisqanman jinaqa, khuchita chʼichipaj qhawananku karqa. Jinapis chay jovenqa, manchay yarqhay kasqanrayku khuchista michispa trabajasqa. Chantá manaña imapis mikhunanpaj kajtenqa, khuchi mikhunata mikhuyta munasqa. Ajina llakiypi kaspa, “yuyayninman churakuspataj nisqa: ‘Tataypa peonesnenqa ashkha mikhunayoj kanku, noqatajrí kaypi yarqhaymanta wañushaniña. Sayariytawan tataypaman kutipusaj, nisajtaj: “Tatáy, Diospa contranta, qanpa contraykitawan juchallikuni. Manaña ‘wawáy’ ninawaykipaj jinachu kani. Ujnin peonniykita jinallaña japʼikapuway ari”, nispa’. Chantá sayariytawan tatanpaman kutipusqa” (Lucas 15:17-20).

Tatan payta rikuspa, ¿imatataj ruwarqa? ¿Phiñakuspachu payta kʼamirparerqa? Chayri, ¿kusiywanchu payta japʼikaporqa? Qanpa wawayki ajinata purispa kutinpojtin, ¿imatá ruwawaj? Imatachus chay tata ruwasqanta qhawarina.

CHINKASQA QHARI WAWA KUTINPUN

Wasinmanta ripoj joven kutipojtin, ¿imatataj tatan ruwarqa? Jesús nerqa: “Karullapiraj kashajtintaj, tatanpa sonqon wawayasqa payta rikuspa, usqhayllata taripamuspataj abrazaykusqa, muchʼaykusqataj”, nispa (Lucas 15:20). Chay tataqa wawan millay kausaypi purisqanta yachaspapis, payta chunka makiwan japʼikapusqa. Fariseoswan leymanta yachachejkunawanqa Jehová Diosta rejsisqankuta, paytataj yupaychasqankuta nej kanku. Jinapis mana reparayta atillarqankuchu uj runa juchanmanta pesachikojtin, Diosninchej kusikusqanta. Nillataj reparayta aterqankuchu Tatan jinallataj Jesús ruwashasqanta.

Jesuspa kikinchayninmanta tataqa, wawanta llakisqata rikuspa, ichapis repararqaña wawan juchanmanta pesachikusqanta. Jinapis payqa wawanta taripamuytawan abrazaykusqa. Chayrayku wawanqa, payman juchasninta willakuyta atillarqa. Chantá Jesús nillarqapuni: “Wawantaj nisqa: ‘Tatáy, Diospa contranta, qanpa contraykitawan juchallikuni. Manaña “wawáy” ninawaykipaj jinachu kani. Ujnin peonniykita jinallaña japʼikapuway ari’, nispa” (Lucas 15:21).

“Tatantajrí kamachisninta nisqa: ‘¡Usqhayta! Aswan sumaj jatun ropata orqhomuspa churaykuychej. Anillotapis makinman churaychej, jukʼutastataj chakisninman. Wira torillotapis apamuspa ñakʼaychej, chantá mikhunachej, kusikunachejtaj. Kay wawayqa wañusqa kasharqa kausarimuntaj, chinkasqa kasharqa kutinpuntaj’, nispa nisqa tataqa. Chantá mayta kusikuyta qallarisqanku” (Lucas 15:22-24).

“Kuraj wawantaj chajrapi kashasqa, kutinpuspataj wasiman qayllamushaspa uyarisqa tocashasqankuta, tusushasqankutawan. Ujnin kamachita wajyaspataj tapusqa imachus kashasqanta. Kamachitaj kutichisqa: ‘Hermanoyki chayanpun, tataykitaj wira torillota ñakʼachipun, allillan kutinpusqanrayku’, nispa. Kuraj wawantaj phiñakuspa, mana yaykuyta munasqachu. Tatantaj llojsimuspa mayta nisqa yaykurinallanta. Paytaj tatanta nisqa: ‘Watastaña qanta sirviyki, tukuy imata kasukuspa, nitaj jaykʼajpis uj cabritallatapis qowarqankichu, amigosniywan mikhuspa kusirikunaypaj. Chay lloqallaykeqa, khuchi warmiswan purispa kapuyniykita tukuchimun, qantaj chayamusqantawan wira torillota ñakʼachipunki’, nispa” (Lucas 15:25-30).

¿Pikunataj chay kuraj wawa jina phiñakoj kanku Jesús juchasapasmanta khuyakusqanta rikuspa? Leymanta yachachejkunawan fariseoswan phiñakoj kanku. Chayrayku Jesusqa chay kikinchayta paykunaman willarqa. Sichus pillapis Diosninchej wajkunamanta khuyakusqanta rikuspa phiñakun chayqa, allin kanman kay kikinchaypi piensarinan.

Chantá Jesusqa imatachus tata ruwasqanmanta parlaspa kikinchayninta tukucharqa. Jesús nisqanman jina, tataqa kuraj wawanta nisqa: “Wawáy, qanqa noqawanpuni kashanki, tukuy imasniypis qanpata. Kay hermanoykeqa wañusqa kasharqa kausarimuntaj, chinkasqa kasharqa kutinpuntaj, ¿manachu kusikunanchej kanman?”, nispa (Lucas 15:31, 32).

Jesusqa mana willarqachu imachus chay kuraj wawawan kasqanta. Jinapis payta uyarisharqanku chay runasqa ichapis entienderqanku imatachus Jesús kikinchayninwan yachachishasqanta. ¿Imaraykutaj chayta ninchej? Imaraykuchus Jesús wañuchisqa kasqanmanta, kausarimusqanmanta qhepamanqa, ‘ashkha sacerdotes’ Jesuspi creerqanku (Hechos 6:7). Arí, chay runaspis yuyayninkuman churakorqanku, juchasninkumanta pesachikorqanku, Diosmantaj kutirikorqanku.

Jesuspa kikinchayninmantaqa, yachachisqasninpis yachakuyta atillarqankutaj. Noqanchejrí, ¿imatataj chay kikinchaymanta yachakusunman? Diospa llajtanmanta mana karunchakunachu kasqanta. Tatanchej Jehovaqa llajtanpi sumajta qhawawanchej, imastachus necesitasqanchejtataj qowanchej. Chayrayku manapuni allinchu kanman, munasqanchejman jina kausayta munaspa kay mundoman kutirinanchej. Chayta ruwaspaqa wasinmanta ripoj joven jina “karu llajtaman” ripushasunman.

¿Imastawantaj Jesuspa kikinchayninmanta yachakusunman? Sichus imaynapi Diosmanta karunchakusunman chayqa, kʼumuykukoj sonqo kana tiyan, Diosman kutinpuna tiyan, paymantaj astawan qayllaykuna tiyan.

Jesuspa kikinchayninpi, tataqa wasinmanta ripoj wawanta tukuy sonqo japʼikaporqa, perdonarqataj. Jinapis kuraj wawanqa mana tatan jinachu ruwarqa, phiñasqataj kasharqa. Noqanchejpis chay tata jina japʼikapunanchej tiyan Diosmanta karunchakojkuna pesachikojtinku, Diosmantaj kutinpojtinku. Noqanchejqa kusikunanchej tiyan hermanonchej kutinpusqanmanta, payqa “wañusqa kasharqa kausarimuntaj, chinkasqa kasharqa kutinpuntaj”.