¿Qanpis ajinallatatajchu yuyanki? Ichá leeyta munarqanki, chayllapitaj saqeporqanki. Ashkha runasqa Bibliata leeyta qhellakunku. ¿Kikillantatajchu yuyawaj Bibliapi nisqan kusisqa kanaykipaj yanapasunanta, imapajchus kausasqaykitataj nishasqanta yachaspa? Bibliata leey gustasunanpaj yanapas kasqanta yachaspa, ¿munawajchu leeyta imatachus Biblia yachachisqanta yachanaykipaj?

Ashkha runas Bibliata leespa, ¿imatá nerqanku, chantá imaynatá leesqanku yanaparqa?

Ezekiel 20 wata kurajniyoj, nin: “Ñaupajtaqa chinkasqa jina kasharqani, jinapis Bibliata leeytawanqa imapajchus kausashasqayta entienderqani. Sapa día sumajta kausakunapajtaj yuyaychaykuna tiyan”, nispa.

Frieda 20 watayoj jina, nillantaj: “Imamantapis phiñarpakullaj kani, jinapis Bibliata leesqay yanapashawan niña usqhayta phiñakunaypaj. Manaña ñaupaj jinachu kani, ashkha amigosniyojtaj kani”, nispa.

Eunice sutiyoj warmi, payqa 50 wata kurajniyoj, nin: “Bibliata leesqay yanapashawan allin kausayniyoj kanaypaj. Chantapis mana allin costumbresniyta saqenaypaj”, nispa.

Bibliata leeyqa aswan kusisqa kausakunaykipaj yanapasunkiman, imaynatachus ashkha runasta yanapashan ajinata (Isaías 48:17, 18). Yanapasunkiman imatapis allinta ajllanaykipaj, sumaj amigosniyoj kanaykipaj, mana anchata llakikunaykipaj, astawanqa Diosmanta cheqa kajta yachakunaykipaj. Bibliapi yuyaychaykuna kasqanqa Diosmanta jamun, chayrayku chay yuyaychaykunaman jina ruwaspaqa mana pantasunchu. Diosqa allinninchejpajpuni yuyaychawanchej.

Chayrayku Bibliata leeyta qallarina. Qhepan yachaqanaspi Bibliata leenapaj sumaj yuyaychaykuna tiyan, ajinamanta leesqayki astawan gustasunanpaj.

¿Imaynatá Bibliata leeriwaj yanapasunanpaj jina? Kay phishqa yuyaychaykuna ashkha runasta yanaparqa.

Chʼinnejpi leey. Maypichus mana chʼajwa kanchu, chaypi leeriwaj. Chay lugar mana puñuyta chʼutunapaj jinachu kajtin, sumaj kʼanchayniyojtaj kajtin, leeshasqaykita sumajta entiendenki.

Bibliata tukuy sonqo leey. Bibliaqa Tata Diosninchejmanta uj regalo. Leesqayki yanapasunanpajqa, wawita jina kanayki tiyan, wawitaqa tatanmanta mayta yachakuyta munan. Chayrayku ama yuyaychu pantasqa yachachiykunallapi, astawanqa Dios yachachisunanta saqey (Salmo 25:4).

Ñaupajtaqa Diosmanta mañakuy. Bibliaqa Diospa yuyaychasqan, chayrayku entiendenapajqa yanapayninta necesitanchej. Payqa mañakojtinchej atiyninwan yanapanawanchejta niwanchej (Lucas 11:13). Chay atiytaj yanapasonqa imatachus Dios yuyasqanta entiendenaykipaj. Tiempo pasasqanman jinataj “taripay mana atina Diospa yachaynintapis” astawan entiendenki (1 Corintios 2:10).

Entiendeyta munaspa leey. Ama usqhay usqhayllata leeychu. Leesqaykipi tʼukuriy. Tapurikuytaj: “¿Imatá yachakuyman kay versiculospi parlasqan runamanta? ¿Imaynatá yachakusqayman jina kausakuyman?”, nispa.

Imaraykuchus leeyta munasqaykita sutʼita yachay. Bibliata leesqayki kausayniykipi yanapasunanpajqa, imallatapis yachakunaykipaj kallpachakuy. Ichá leewaj Diosta astawan rejsinaykipaj, aswan allin runaman tukunaykipaj, sumaj qosa chayri sumaj warmi kanaykipaj. Chaypajtaj yanapasonqa Bibliapi wakin cheqasta leenaykipaj ajllasqayki.a

Kay phishqa yuyaychaykuna Bibliata leeyta qallarinaykipaj yanapasonqa, ¿imaynatá leewaj astawan gustasunanpaj jina? Qhepan yachaqana chaymanta astawan yuyaychashan.

Bibliata leespa mana saykʼuna, gustachikunataj noqallanchejmanta kashan. Chaypajtaj imastachus ruwanata qhawarina.

Entiendenapaj jina allin tijrachisqa Bibliata ajllay. Leeshaspa mana rejsisqa palabrasta chayri manaña kay tiempopi parlakusqan palabrasta tarispaqa leeshaspa saykʼupuwaj. Chayrayku entiendenaykipaj jina Bibliata ajllakuy, leesqayki sonqoykiman chayananpaj. Chantapis chay Bibliaqa atienekunapaj jina kanan tiyan.a

Imaschus rikhurimusqanwan yanapachikuy. Bibliaqa Internetpipis kallantaj. Chaymantapacha leeyta atikun chayri uraqachikunman computadorapi, tabletapi chayri celularpi. Internetpi kaj wakin Bibliasqa sumaj yanapasniyoj kikin versiculota waj Bibliaspiwan leenapaj chayri kikinchanapaj. Wakin parlaykunapeqa grabasqata uyarinapajpis kallantaj. Wakin runasqa uyariyta yachanku trabajonkuman rishaspa, ropata tʼajsashaspa chayri waj imasta ruwashaspa. Qanpis imaynatachus leeyta munasqaykita ajllakuwaj.

Estudianapaj kaj yanapaswan yanapachikuy. Bibliata estudianapaj kaj yanapasqa yanapasonqa leesqaykita aswan sumajta entiendenaykipaj. Leeshaspa ima lugaresmantachus parlashasqanta rejsinaykipaj mapas tiyan, imaschus chay lugarpi pasasqanpipis tʼukurinaykipaj. Chantapis kay revistapi wakin yachaqanas, Internetpitaj jw.org nisqapi “Bibliaj yachachiykunasnin” nisqa Bibliaj wakin versiculosninta astawan entiendenaykipaj yanapasonqa.

Mana qallariymantapachapunichu leey. Bibliata qallariymantapacha tukukuykama leeyta qhellakuspaqa, mayqen partechá astawan gustasunki chaytaraj leewaj. Ichá ñaupa tiempo runasmanta mayqellanmantapis yachayta munasqaykita leeriwaj. Imamantachus yachayta munasqaykita leenaykipaj, “Bibliamanta astawan yachakuy ñaupa tiempo runasmanta leespa” nisqa recuadro yanapasunkiman. Chayri imamantachus yachayta munasqaykimanta leeriwaj chayri maychus qhelqakusqanman jina. Chay yuyaychaykunaman jina leeriwaj.

Bibliaqa mana waj libros jinachu. Bibliapeqa Diospa yuyaychasqan kashan (2 Timoteo 3:16). Chaypi nisqanqa mayta yanapawasunman. Chayrayku Bibliallapitaj nin: “Diospa Palabranqa kawsayniyoj, atiyniyojtaj”, nispa (Hebreos 4:12). Kay libroqa yanapawasunman allinta kausakunapaj, Diosta, munayninta ima rejsinapaj (1 Timoteo 4:8; Santiago 4:8).

Kausayninchejpi yanapawanchej. Bibliapeqa ashkha yuyaychaykuna tiyan, kausayninchejpi, waj imaspipis yanapanawanchejpaj.

• Wajkunawan allinta kausakunapaj (Efesios 4:31, 32; 5:22, 23, 25, 28, 33).

• Mana onqonapaj, kusisqa kanapajtaj (Salmo 37:8; Proverbios 17:22).

• Llimphu kausayniyoj kanapaj (1 Corintios 6:9, 10).

• Mana qhella kanapaj (Proverbios 10:4; 28:19; Efesios 4:28).a

Asia nisqamanta Vicent chantá Annalou qhariwarmi repararqanku, Bibliaj yuyaychasqan yanapananpaj jina kasqanta. Paykunaqa casarakuytawan ashkha qhariwarmis jinallataj mana yachaykukuyta atillarqankuchu, nitaj parlarikuytapis. Jinapis, Bibliapi leesqankuman jina kausakuyta qallarerqanku. Vicent nin: “Bibliapi leesqayqa qhariwarmi kausayniypi chʼampaykunata atipanaypaj yanapawarqa. Chayman jina ruwayqa kusisqa kausakunaykupaj yanapawayku”, nispa. Annalou nillantaj: “Bibliata leesqaykoqa mayta yanapawarqayku. Kunanqa kusisqa kani, iskayniykutaj imatapis ruwayta munayku”, nispa.

Diosta rejsinapaj yanapawanchej. Vicent nillanpuni: “Bibliata leesqayrayku Jehovaman astawan qayllaykuni”, nispa. Chay nisqanqa rikuchin, Biblia, Diosta rejsinanchejpaj yanapawasqanchejta. Ajinamanta mana yuyaychasqallanchu yanapawasun, manaqa Diospis amigonchej kanqa. Chantapis Palabranpi yachakusun sumaj kausaymanta parlasqanta, maypichus kusisqas wiñaypajtaj kausakusunchej (1 Timoteo 6:19). Chaytaqa Bibliallapi niwanchej.

Bibliata leeyta qallarinkipacha, yachaykukunkitaj chayqa, allinta kausakunki, Diostataj sumajta rejsinki. Jinapis leeshaspa ashkha imastaraj yachayta munawaj. Chay pasajtintaj Etíope runamanta mayta yachakuwaj, payqa 2.000 watas ñaupajta kausakorqa. Chantapis Diospa Palabranmanta ashkha imasta yachayta munarqa. Chayrayku Jesuspa yachachisqan Felipe ajinata tapojtin: “Entiendenkichu imatachus leesqaykita? nispa. Chay runataj kuticherqa: Imaynamantataj entiendesaj, mana pipis sutʼinchawajtinri?”, nispa.b Chaymanta chay runaqa Felipe yanapananta saqerqa, pichus sumaj yachachej karqa (Hechos 8:30, 31, 34). Qanpis Bibliamanta astawan yachakuyta munanki chayqa, Internetpi jw.org nisqapi kaj formulariota juntʼachiwaj chayri kay revistapi rikhurej direccionman qhelqawaj. Chantapis Jehovaj testigosninwan parlarillawajtaj chayri maypichus tantakunku chayman riwaj. Biblia mana kapusojtenqa, kunanpacha maskʼakuwaj leenaykipaj, jinamanta kausayniykipi mayta yanapasonqa.