Wakin runasqa Diosta mana munakuyta atillankuchu, mana rejsiy atina, karupi, sajra kasqanta ima yuyasqankurayku. Kay urapi nisqankuta qhawariy.

• Italiamanta Marco nin: “Diosmanta yanapata mañakuspapis, may karupi kasqanta yuyaj kani. Mana rejsiy atina, mana sonqoyojtaj”, nispa.

• Guatemalamanta Rosa nin: “Diosta sirviyta munarqani, chaywanpis mana taripay atinapis kanman jinata qhawaj kani. Pantanallanchejta suyasqanta yuyaj kani. ‘Nichá sonqoyojpis’ nej kani”, nispa.

• Canadamanta Raimunda nin: “Imillitallaraj kashaspa, Dios castiganawanchejpaj pantasqallanchejta qhawasqanta yuyarqani. May karupi kasqanta yuyaj kani. Runasmanta mana llakikoj presidentepis kanman jinata qhawarqani”, nispa.

¿Jinatachu qanpis yuyanki? ¿Nichu Dios munakunapaj jina? Cristianosqa unaymantapachaña chay tapuyta ruwakunku. Tʼukurinallapaj, kay 500-1500 watas chaynejpi, casi ni pipis Diosmanta mañakojchu. ¿Imaraykú? Diosta manchachikusqankurayku. Unay tiempomanta qhelqaj, Will Durant nerqa: “¿Imaynatá uj juchasapa runa, mana taripay atina, manchachej Diosmanta mañakunmanri?”, nispa.

¿Imarayku runas Diosmanta ajinata yuyanku? ¿Imatá Biblia Diosmanta yachachin? Cheqa kajta yachayqa, Payta munakunaykipaj yanapasonqa.

RUNASPA NISQANKU:

“Dios sutiyojpunichus manachus kasqantaqa, manaraj sutʼita yachaykuchu. Sutiyoj kanman chaypis, imachus kasqanta mana yachasunmanchu.” (Profesor David Cunningham, Theological Studies libronpi.)

BIBLIAJ YACHACHISQAN:

Dios nerqa: “Ñoka Jehová cani, chayka sutiymin”, nispa (Isaías 42:8, Quechua de Cuzce). Jehová suti hebreopi, “Pay Imachus Necesitakusqanman Tukun” niyta munan.

Jehovaqa sutinta oqharinanchejta munan. Biblia nin: “Sutinta jatunchaychej. Imatachus ruwasqasninta runasman willamuychej, yuyarichiychejtaj sutenqa may jatun kasqanta” (Isaías 12:4).

Jesusqa Diospa sutinta oqharej, discipulosninmanpis rejsicherqa. Uj kuti, Tatanmanta mañakushaspa nerqa: “Paykunaman sutiykita rejsicherqani”, nispa. ¿Imaraykutaj chayta ruwarqa? Jesusllataj nin: “Ima munakuywanchus munakuwarqanki, chay munakuy sonqonkupi kanampaj, noqataj paykunapi”, nispa (Juan 17:26).

¿IMARAYKUTAJ YACHANA TIYAN?

Uj yachayniyoj runa, Walter Lowrie sutiyoj, qhelqarqa: “Diospa sutinta mana yachajqa, mana payta rejsinchu. Nitaj Diosta munakuyta atinmanchu, imajtinchus paypajqa mana rikukoj kallpalla”, nispa.

Victorqa sapa semana iglesianman rej, nitaj Diosmanta imatapis yacharqachu. Pay nin: “Diospa sutin Jehová kasqanta yachachiwajtinku, rejsinachiwankumanpis jina karqa. Paymanta parlajllata uyarej kani. Sutinta yachaspataj, payta rikushaymanpis jina karqa. Chaymantapacha amigoyta jina qhawani”, nispa.

Jehovaqa, “paypa sutinta jatunchajkuna[man]” qayllaykun, nintaj: “Imaynatachus uj tataqa payta sirvej wawanta khuyan, ajinallatataj noqapis paykunata khuyasaj”, nispa (Malaquías 3:16, 17). Chantapis Diosqa, sutinta oqharejkunata bendecin. Biblia nin: Jehovaj “sutinta oqharispa Diosnimpaj rejsikapojqa salvasqa kanqa” (Romanos 10:13).

RUNASPA NISQANKU:

Kay Diccionario Enciclopédico Quechua-Castellano del Mundo Andino jinata nin: “Santísima Trinidad, Yaya, Churi, Espíritu Santo, kinsa waj waj personas kaspa, uj sapalla Dios kanku”, nispa. Enciclopedia Libre Santísima Trinidad nisqanman jinataj, católicos, evangelistas, waj iglesiaspiwan chay yachachiypi creenku.

BIBLIAJ YACHACHISQAN:

Jesusqa Diospa Wawan, nitaj jaykʼajpis Tatanwan kikin kasqanta nerqachu. Astawanpis nerqa: “Dios Tataman rishani [...], imaraykuchus payqa noqamanta kuraj”, nispa (Juan 14:28). Ujnin yachachisqanmanpis nerqa: “Tatayman, Tataykichejman, Diosniyman, Diosniykichejmantaj wicharishani”, nispa (Juan 20:17).

Espíritu santoqa mana uj Dioschu. Ñaupa cristianosqa, “espíritu santowan juntʼasqa karqanku”. Jehovapis nerqa: “Tukuy runasman espirituyta qosaj”, nispa (Hechos 2:1-4, 17). Arí, espíritu santoqa Diospa kallpan, manataj Dios kikinchu.

¿IMARAYKUTAJ YACHANA TIYAN?

Bibliamanta yachaj católicos Karl Rahner, Herbert Vorgrimler ninku: Trinidad yachachiytaqa, “ni Dios sutʼinchawajtinchejpis entiendeyta atisunmanchu”, nispa. Mana rejsiy chayri mana entiendey atina runatataj, mana munakuyta atisunmanchu. Chayrayku Trinidad yachacheyqa, Diosmanta karunchawanchej.

Marco, pimantachus ñaupaj yachaqanapi parlarqanchej, jinallatataj yuyan. Pay nin: “Chay yachacheyqa, Dios mana rejsichikuyta munasqanta yuyachiwaj. Chayraykutaj ni jaykʼaj rejsinayta, karupitaj kasqanta yuyaj kani”, nispa. Chaywanpis “Diosqa mana karupichu kashan sapa ujninchejmanta” (Hechos 17:27). Chantapis mana runasmanta pakakunchu, astawanpis imaynachus kasqanta sutʼita rejsichikun. Chayrayku Jesús nerqa: “Ñoqayku[...] pitachus reqsisqaykuta yupaychayku”, nispa (Juan 4:22, Diospa Simin Qelqa).

Marco nillanpuni: “Dios mana kinsa uyayojchu kasqanta entiendespaqa, qayllaykuyta aterqani”, nispa. Arí, Jehovaqa uj kʼata Dios, rejsiytataj atisunman. Jinata qhawaspaqa munakuyta atisun. Biblia nin: “Mana munakojrí Diosta mana rejsinchu, imaraykuchus Diosqa munakuymin”, nispa (1 Juan 4:8).

RUNASPA NISQANKU:

“Sajra runas wañupojtinku, almasninkoqa infiernoman ripunku. Chaypitaj ‘nina larwaypi’ wiñaypaj ñakʼarinku” (Catecismo de la Iglesia Católica).

BIBLIAJ YACHACHISQAN:

Salmo 146:4 runamanta nin: “Samayninku tukukun, jallpʼamantaj tukupunku; chaypacha yuyayninkupi tukuy wakichikusqanku chinkapun”, nispa. Wañusqas jallpʼallaña kajtinku, ¿nina larwaypi ñakʼarinkumanchu?

Griego qallupi Gehena nisqata, ashkha qhechua Bibliaspi “nina larway infierno” nisqaman tijrachinku. Chaywanpis chay palabraqa, mana wiñaypaj nina larwaypi ñakʼariymantachu parlan. Manaqa wiñaypaj wañuywan ninakun, maymantachus kausarimuy niña kanchu (Mateo 5:29). Bibliaqa “azufrewan larwashaj nina qochaman[ta]” parlallantaj (Apocalipsis 20:10). Chaywanpis Bibliallataj sutʼinchan: “Chay nina qochamá iskay kaj wañoyqa” (Apocalipsis 20:14; 21:8). Arí, mana runasta wiñaypaj qʼolachinapaj lugarchu, manaqa iskay kaj wañuy, wiñaypaj kasqanta niyta munan.

¿IMARAYKUTAJ YACHANA TIYAN?

Diosta sajrata jina qhawayqa, paymanta karunchawanchej. Mexicomanta Rocío nin: “Juchʼuy kashajtiy, sajra runas infiernopi qʼolakusqankuta yachachiwarqanku. Chayrayku Diosta manchachikoj kani, nitaj kʼacha kasqanta creejchu kani. Phiñalla, sajrataj kasqanta yuyaj kani”, nispa.

Rocioqa Diosmanta, wañusqasmanta ima Bibliapi cheqanta yachaspa, niña jinata yuyarqachu. Pay nin: “Dios allinninchejta munasqanta, munakuwasqanchejta, kʼachataj kasqanta yachaspaqa, llasa qʼepimanta jina samarerqani. Kunanqa tatayta jina qhawani, pichus wawasninta munakun, allinninkutataj maskʼan”, nispa (Isaías 41:13).

Ashkha runas, infiernota manchachikusqankuraykulla iglesiaman rinku. Diostaj mana ajinata sirvinanchejta munanchu. Jesús nerqa: “Diosniykitaqa munakunki tukuy sonqoykiwan”, nispa (Marcos 12:29, 30). Dios cheqan kajtapuni ruwasqanta entiendespaqa, jamoj juiciosnin cheqanpuni kananpi atienekusun. Jobpa amigon Eliú jinataj nisun: “Ama yuyallaychejpischu Tukuy Atiyniyoj Diosqa ima sajratapis ruwasqanta, chayri ima mana cheqan kajtapis”, nispa (Job 34:10).

Uj kutipi, Jesús Tatan Jehovamanta Jerusalenpi parlasharqa. Chaypitaj tiemponmanta religionta kamachejkuna pantasqa kasqankuta sutʼiman orqhorqa (Juan 8:12-30). Chantapis Diosmanta yachakusqanchej, cheqachus manachus kasqanta imaynatachus reparanata sutʼincharqa. Jesús nerqa: “Nisqayman jinachus sayankichej chayqa, cheqatapuni yachachisqasniy kankichej. Cheqa kajta rejsinkichej, chay cheqa kajtaj kacharichisonqachej”, nispa (Juan 8:31, 32).

¿Imaynatá uj yachachiy ‘cheqa kasqanta’ yachawaj? Jesuspa ‘nisqanman jinachus’ manachus kasqanta reparay. Imallatapis Diosmanta nisojtinku, tapurikuy: “¿Jesuspa, Bibliaj nisqanwan kikinchu?”, nispa. Apóstol Pablota uyarejkuna jina ruway. Paykunaqa, yachakusqanku cheqachus manachus kasqanta yachanapaj, Diosmanta Qhelqasqawan kikincharqanku (Hechos 17:11).

Marco, Rosa, Raimundapis chayta ruwarqanku. Bibliata Jehovaj testigosninwan ukhuncharqanku. ¿Imatá chay yachakusqankumanta ninku?

Marco: “Yachachiwaj kayku chay hermanoqa, ima tapukusqaykumanpis Bibliawanpuni kutichiwaj kayku. Warmiywan pisimanta pisi Jehovata munakuyta qallarerqayku, noqaykupis astawan ujchaykukorqayku”.

Rosa: “Qallariypeqa Biblia runaj yachachiynillan kasqanta yuyaj kani. Maypichus yuyasqankuman jinalla Diosmanta sutʼinchakun. Chaywanpis pisimanta pisi tukuy tapuykunasniypa kutichiykunasninta tarerqani. Kunanqa Jehová kasqantapuni creeni, paypitaj atienekuni”.

Raimunda: “Diosmanta mañakorqani payta rejsinaypaj yanapanawanta. Pisi tiemponmantaj qosaywan khuska Bibliamanta yachakuyta qallarerqayku. ¡Chaypimá Jehovamanta cheqa kajta yachakorqayku! Imayna Dioschus kasqanta yachaspaqa, mayta kusikorqayku”.

Bibliaqa Diospa Palabran, paypa yuyaychasqantaj. Chayrayku Diosmanta cheqan kajta sutʼinchawanchej, kʼacha kaykunasnintapis rejsichiwanchej. Chantapis Dios kʼacha kayninpi imastachus “qowasqanchejta” willawanchej (1 Corintios 2:12). Qanpis, Biblia imatachus Diosmanta, munayninmanta, qhepaman ruwananmanta ima nisqanta yachakuwaj. Internetpi kay www.jw.org/qu nisqaman yaykuspa, Bibliamanta yachachisunaykupaj qhelqamuwayku. Chayrí mayqen Jehovaj testigonllawanpis parlariy. Ajinata ruwaspaqa, Diosninchej munakunapaj jinapuni kasqanta yachanki.