Ancianos, Gedeonmanta yachakuychej

1. Kay 1 Pedro 5:2 nisqanman jina, ¿ima sumaj cargotataj ancianos japʼinku?

JEHOVÁ ancianosta churan munasqa ovejitasninta cuidanankupaj. Paykunaqa mayta agradecekunku Jehová chay cargota paykunaman qosqanmanta, ‘allin michejkuna’ kanankupajtaj kallpachakunku (Jer. 23:4; 1 Pedro 5:2 leey). May sumajpuni ajina ancianos congregacionespi kasqanqa.

2. ¿Ima chʼampaykunaspitaj wakin ancianos rikukunku?

² Ancianosqa ruwanasninkuta juntʼashaspa, ashkha chʼampaykunapi rikukunku. Paykunaqa congregacionpi kaj hermanosta cuidanankupaj mayta trabajanku. Tonymanta parlarina, payqa Estados Unidosmanta. Reparakorqataj aswan llampʼu sonqo kananta, nitaj ima ruwaytapis japʼikunallanta. Tony nin: “Coronavirus onqoy qallarishajtin, ashkha trabajo karqa predicacionta, reunionestapis wakichinapaj, noqataj ima ruwaytapis japʼikullaj kani. Mayta kallpachakojtiypis waj ruwanas kajrajpuni. Tiemponmantaj niña tiempoy karqachu Bibliata leenaypaj, sapallaypi estudianaypaj, orakunaypajpis”. Kosovomanta Ilir sutiyoj ancianomantañataj parlarina. Pay tiyakoj chaypeqa guerras kaj, nitaj atillarqachu Diospa llajtan nisqanman jina ruwayta. Pay nin: “Sucursal niwarqa ancha chʼajwas kan chaypi tiyakoj hermanosta yanapanayta, noqataj manchachikorqani. Mana manchachikuspa yanapakoyqa mana atinapaj jinallachu karqa. Chantapis imatachus niwasqankoqa mana allinchu rijchʼawarqa”, nispa. Asiamanta Tim sutiyoj uj misionerotaj, mana atillarqachu tukuy ruwanasninta juntʼayta. Pay nin: “Wakin kutisqa manchay saykʼusqa kasharqani hermanosta cuidanaypaj”, nispa. Ajinapi rikukuspa, ¿imatá ancianos ruwankuman?

3. ¿Imajtintaj allin kanman Gedeonmanta tukuy yachakunanchej?

³ Ancianosqa mayta yachakunkuman juez Gedeonmanta (Heb. 6:12; 11:32). Payqa Diospa llajtanta cuidaj, ovejitasta jinataj michej (Jue. 2:16; 1 Cró. 17:6). Kay llakiy tiempospipis, ancianosqa Gedeón jinallataj Diospa llajtanta cuidananku tiyan (Hech. 20:28; 2 Tim. 3:1). Chayrayku Gedeón llampʼu sonqo, kʼumuykukoj sonqo, kasukoj kasqanmanta, aguantasqanmantapis mayta yachakunkuman. Noqanchejpis Gedeonmanta yachakullasunmantaj ancianospa ruwasqankuta sapa día jatunpaj qhawayta, tukuy sonqotaj paykunata yanapayta (Heb. 13:17).

LLAMPʼU SONQO KAYTA, KʼUMUYKUKOJ SONQO KAYTAPIS MANA ATILLAJTINCHEJ

4. ¿Imaynamantá Gedeón rikucherqa llampʼu sonqo kasqanta, kʼumuykukoj sonqo kasqantapis?

⁴ Gedeonqa llampʼu sonqo, kʼumuykukoj sonqotaj karqa.b Uj angelqa payta nerqa Jehovaqa israelitasta madianitaspa makinkumanta kacharichinanpaj ajllasqanta. Chayta nejtin Gedeonqa kʼumuykukoj sonqowan kuticherqa: “Familiayqa Manasés ayllu ukhupi familiasmanta aswan juchʼuy. Noqataj tataypa familian ukhupeqa mana imapischu kani”, nispa (Jue. 6:15). Gedeonqa yuyarqa mana chaypaj jinachu kasqanta. Jehovatajrí yacharqa chayta ruwayta atinanta, yanapayninwantaj chayta ruwarqapuni.

5. ¿Ima kutispitaj ancianos llampʼu sonqo kayta, kʼumuykukoj sonqo kaytapis mana atillankumanchu?

⁵ Ancianosqa tukuy atisqankuta kallpachakunku llampʼu sonqospuni, kʼumuykukoj sonqospuni kanankupaj (Miq. 6:8; Hech. 20:18, 19). Mana jatunchakunkuchu imastachus sumajta ruwayta yachasqankumanta, imastañachus ruwasqankumantapis. Pantajtinku chayri imapis mana allin llojsejtin, mana yuyankuchu ni imapaj valesqankuta. Jinapis wakin kutisqa mana llampʼu sonqos kayta, nitaj kʼumuykukoj sonqos kaytapis atillankumanchu. Ichapis uj ancianoqa ashkha ruwanasta japʼikullanman, chaymantataj reparakunman mana tukuynintachu juntʼayta atisqanta. Wakin kutisqa imatapis allinta ruwasqanmanta mayta felicitankuman, wakin kutistaj imatapis mana allintachu ruwasqanta ninkuman. Chay kutispi, ¿imaynatá Gedeonpa kausaynin ancianosta yanapanman?

6. ¿Imaynatá ancianos Gedeón jina llampʼu sonqos kankuman? (Fototawan qhawariy).

⁶ Yanapachikuychej. Pichus llampʼu sonqo kajqa, reparakun mana tukuy imatachu ruwayta atisqanta. Gedeonqa llampʼu sonqo kasqanrayku wajkunawan yanapachikorqa (Jue. 6:27, 35; 7:24). Allin yuyayniyoj ancianospis kikillantataj ruwanku. Tonymanta parlarinallapuni. Pay nin: “Manaña atishaspapis ima trabajotapis japʼikullaj kani, juchʼuymantapacha ajinata yachachiwasqankurayku. Chayrayku Familiapi Diosta Yupaychanapaj tantakuyniykupi llampʼu sonqo kaymanta parlarerqayku, warmiytataj tapurerqani imatachus yuyasqanta. Chantapis jw.org paginapi Jesús jina wajkunata wakichina, paykunapitaj atienekuna nisqa videota qhawarerqani”, nispa. Tonytaqa wajkunawan yanapachikuyta qallarisqanrayku may sumaj rerqa. Pay nin: “Congregacionpeqa tukuy imapis sumajta ruwakushan. Kunantaj aswan tiempoyoj kani Jehovaman astawan qayllaykunaypaj”, nispa.

7. ¿Imaynatá ancianos Gedeón jina ruwankuman mana allintachu ruwasqankuta nejtinku? (Santiago 3:13).

⁷ Wajkuna imatapis mana allintachu ruwasqaykichejta nisojtiykichej ama phiñakuychejchu. Chayta ruwaytaj wakin kuteqa ichapis mana atikullanmanchu. Chaypipis Gedeonpa kausaynenqa ancianosta mayta yanapallanmantaj. Payqa yacharqa pantaj runa kasqanta. Chayrayku Efraín ayllumanta kajkuna paywan siminakojtinku mana phiñakorqachu (Jue. 8:1-3). Astawanpis kʼumuykukoj sonqo karqa, paykunata uyarerqa, chantapis kʼachallamanta phiñakuyninkuta thasnucherqa. Yachayniyoj ancianosqa Gedeón jina kanku. Pipis imata nejtin sumajta uyarinku, llampʼu sonqowantaj kutichinku (Santiago 3:13 leey). Ajinamanta congregacionpi allin kausay kananpaj yanapakunku.

8. ¿Imatá ancianos ruwananku tiyan wajkuna alabajtinku? Sutʼinchariy.

⁸ Jehovallata jatunchaychej. Madianitasta atipasqanmanta Gedeonta alabajtinku, payqa Jehovata alabanankuta nerqa, mana paytachu (Jue. 8:22, 23). ¿Imaynamantá ancianos Gedeón jina ruwankuman? Imata ruwajtinkupis Jehovatapuni jatunchaspa (1 Cor. 4:6, 7). Sichus uj ancianota sumajta yachachisqanmanta felicitanku chayqa, payqa ninman yachachisqanqa Diospa Palabranmanta jamusqanta, tukuypis Jehovaj llajtan yachachiwasqanchejrayku ashkha imasta yachakusqanchejta. Ancianosqa sapa kuti tapurikunanku tiyan yachachisqankuwan Jehovatachus jatunchashasqankuta chayri paykunallachus jatunchachikusqankuta. Timothy sutiyoj hermanomanta parlarina. Anciano kayta qallarishajtin mayta gustaj discursay. Pay nin: “Discursosniyta qallarinaypaj, kikinchaykunata churanaypajpis manchaytañataj wakiykuchikoj kani. Chayrayku hermanosqa noqallata alabawaj kanku, manataj Jehovatachu, nitaj Bibliatachu”, nispa. Tiempowan Timothyqa reparakorqa payllata mana jatunchanankupajqa waj jinamanta yachachinan kasqanta (Pro. 27:21). Chayrayku, ¿imaynataj rerqa? Pay nin: “Kunanqa hermanos niyta yachawanku discursoyqa uj problemankuta atipanankupaj, uj pruebata aguantanankupaj, chayri Jehovaman astawan qayllaykunankupaj yanapasqanta. Chayta niwasqankumanta astawan kusikuni, ñaupaj wataspi noqallata alabawasqankumanta nisqaqa”.

KASUKUYTA, MANA MANCHACHIKUYTAPIS MANA ATILLAJTINCHEJ

9. ¿Ima kutispitaj Gedeón mana atillarqachu kasukuyta, mana manchikuytapis? (Tapapi dibujota qhawariy).

⁹ Jehová Gedeonta juez kananpaj churasqantawan, payqa mana atillarqachu kasukuyta, mana manchachikuytapis. Tatanpataqa Baalpaj uj altarnin tiyaporqa, Jehovataj kamacherqa chayta thuñinanta. Chayta ruwayqa wañuy patapi rikukunanpaj jina karqa (Jue. 6:25, 26). Aswan qhepamantaj Gedeonqa ashkha soldadosta tantarqa, Jehovataj iskay kutispi nerqa chay soldadosninta pisiyachinanta (Jue. 7:2-7). Chaymantataj Jehová kamachisqanman jina, chaupi tutata enemigoj campamentonman yaykuykorqa (Jue. 7:9-11).

10. ¿Ima kutispitaj uj anciano mana kasukuyta atillanmanchu?

¹⁰ Ancianosqa ‘kasukunapaj wakichisqa’ kananku tiyan (Sant. 3:17). Uj anciano kasukuyta yachan chayqa imatachus Biblia nisqanta, Diospa llajtan nisqantapis tukuy sonqo ruwan. Ajinamantataj wajkunapis paymanta yachakuyta atinku. Jinapis wakin kutisqa mana atillankumanchu kasukuyta. Ichapis ashkha kamachiykunata japʼinkuman chayri chay kamachiykuna usqhayllata cambianman. Chayraykutaj mana atillankumanchu chayman jina ruwayta. Wakin kutistaj ichapis yuyankuman uj kamacheyqa mana allinchu kaspa jinasqanta. Chayri ichapis ancianosta ninkuman uj imata ruwanankuta, chayta ruwajtinkutaj presochasqa kankuman. Ajinaspi rikukuspa, ¿imatá ancianos ruwankuman Gedeón jina kasukunankupaj?

11. ¿Imataj ancianosta yanapanman kasukunankupaj?

¹¹ Kamachiykunata sumajta qhawaykuriychej, chayman jinataj ruwaychej. Diosqa Gedeonta kamacherqa imaynatachus tatanpa altarninta thuñinanta, maynejpichus Jehovapaj uj altarta ruwapunanta, ima uywatachus jaywanantapis. Gedeontaj chʼinmanta chayta kasukorqa. Kay tiempomanta ancianospis Jehovaj llajtanmanta kamachiykunata japʼinku cartasnejta, willaykunanejta, waj imasnejtapis. Chay kamachiykunataj allinninchejpaj kanku, Jehovaman qayllaykunanchejpajpis yanapawanchej. Ancianostaqa mayta munakunchej Jehovaj llajtan nisqanman jinapuni imatapis ruwasqankumanta. Ajinata kasukusqankoqa tukuy congregacionta yanapan (Sal. 119:112).

12. Diospa llajtan imatapis waj jinamanta ruwakunanta nejtin, ¿imaynatá ancianos Hebreos 13:17 nisqanman jina ruwankuman?

¹² Cambiosman tukuy sonqo yachaykukuychej. Jehovaqa Gedeonta nerqa casi tukuy soldadosninta wasinkuman kachapunanta (Jue. 7:8). Chay kutipi ichá pay yuyarqa: “¿Chayta ruwanaypunichu kanman? ¿Allinchu llojsinman?”, nispa. Jinapis Gedeonqa kasukorqa. ¿Imaynatá ancianos Gedeón jina ruwanku? Diospa llajtan imatapis waj jinamanta ruwakunanta nejtin, chayman jina ruwaspa (Hebreos 13:17 leey). Kay 2014 watapi Diospa llajtanta kamachejkunaqa Tantakuna Wasista, Jatun Tantakuna Wasistapis ruwakunanpaj waj jinamantañataj qolqeta apaykachakunanta nerqanku (2 Cor. 8:12-14). Pasaj wataspi Diospa llajtanqa congregacionesman qolqeta mañaj salonesta ruwanankupaj. Chaymantataj kutichipoj kanku. Kunantaj mundontinmanta tukuy congregaciones qolqesitunkuta churanku. Chaywantaj maypichus necesitakun chaypi salones ruwakun, ruwakushan chay salonpi kaj hermanos pisi qolqellata churajtinkupis. José sutiyoj ancianoqa chayta yachaytawan, mana allinchu kasqanta yuyarqa. Pay nerqa: “Chayqa waj lugarespichá allin kanman, kaypeqa mana. Ni uj salonllapis ruwakonqachu”, nispa. Jinapis Diospa llajtan nisqanman mana churanakorqachu. ¿Imajtintaj ajinata ruwarqa? Pay nin: “Yuyarikorqani imatachus Proverbios 3:5, 6 nisqanta, Jehovapi atienekunay kasqanta. Rikorqanitaj tukuy imapis allin llojsisqanta. Mana ashkha salonesllachu ruwakorqa, manaqa noqaykupis yachakorqayku qolqesituykuwan yanapakuyta. Ajinamanta pisichikojkunata yanapanapaj”.

13. 1) ¿Imamantá Gedeón mana iskayrayarqachu? 2) ¿Imatá ancianos ruwankuman Gedeón jina kanankupaj? (Fototawan qhawariy).

¹³ Jehová Diospa munayninta mana manchikuspa ruwaychej. Gedeonqa manchachikuspapis, kausaynin wañuy patapi kajtinpis Jehovata kasukorqapuni (Jue. 9:17). Jehová paywan kashasqanta yachaspa, Gedeonqa ni tumpitata iskayrayarqachu llajtanta jarkʼananpaj Jehová yanapananmanta. Jehovata yupaychajta mana saqewanchejchu chay lugarespi tiyakoj ancianosqa Gedeón jina ruwanku. Paykunaqa carcelpi wisqʼachikunanku kajtinpis, tapuykachasqas kananku kajtinpis, trabajonkumanta wijchʼuchikunanku kajtinpis, maqachikunanku kajtinpis mana manchachikuspa tukuy imata ruwanku reuniones, predicacionpis kanallanpajpuni.c Ancianosqa manchay ñakʼariy tiempopi Diospa llajtanpa nisqanman jina ruwananku kanqa mana manchachikuspa, kausayninku wañuy patapi kajtinpis. Ichapis chay kamachiykunaqa imaynatachus juchachana willayta willanamanta kanqa, jatuchaj granizos jina. Chayrí ichapis chay kamachiykunaqa kanqa, Magogmanta Gog chinkachiyta munawajtinchej imatachus ruwananchej kasqanmanta (Eze. 38:18; Apo. 16:21).

AGUANTAY MANA ATIKULLAJTIN

14. ¿Imajtintaj Gedeón madianitasta mana qhatiykuyta atillarqachu?

¹⁴ Gedeonqa Israelpi juez kasqanrayku sinchʼita trabajarqa. Tutan madianitaswan maqanakushajtinku, madianitasqa ayqekorqanku, Gedeontaj Jezreel ura pampasmantapacha Jordán mayukama qhatiykorqa. Chay mayu kantusqa khishkarara monteschá karqa (Jue. 7:22). Chaypi, ¿imatá Gedeón ruwarqa? Payqa qhatiykullarqapuni. Gedeonwan 300 soldadosninwan saykʼusqa kashajtinkupis, mayuta pasaspa qhatiykullarqankupuni. Madianitasta taripaytawantaj atipaykorqanku (Jue. 8:4-12).

15. ¿Imapitaj wakin kutis ancianos rikukunku?

¹⁵ Wakin kutis ancianosqa may saykʼusqas kashanku congregacionpi kaj hermanosta, familiankuta ima cuidaspa. Chay kutispi, ¿imaynatá Gedeón jina ruwankuman?

16, 17. 1) ¿Imaynapí Gedeón enemigosninta atiparqa? 2) ¿Imamantataj ancianos mana iskayrayanankuchu tiyan? (Isaías 40:28-31; fototawan qhawariy).

¹⁶ Jehová kallpata qosunaykichejpi atienekuychej. Chayta Gedeón ruwarqa, Jehovataj yanaparqapuni (Jue. 6:14, 34). Uj kutipi Gedeonwan soldadosninwanqa, chakipi qhatiykorqanku iskay madianita reyesta. Paykunaqa camellosninkupi montasqasina ayqekusharqanku (Jue. 8:12, 21). Jehovaj yanapayninwantaj paykunata qhatiykullarqankupuni, taripaytawantaj atipaykorqanku. Kunan tiempopipis ancianosqa Jehovapi atienekunkuman. “Payqa mana jaykʼajpis saykʼunchu, nitaj kallpanpis tukukunchu”. Jehovaqa kallpata qonqapuni necesitajtinku (Isaías 40:28-31 leey).

¹⁷ Kunanqa Mateomanta parlarina. Payqa Comité de Enlace con los Hospitales nisqapi yanapakun. ¿Imataj payta yanapan aguantananpaj? Pay nin: “Filipenses 4:13 nisqanman jinapuni Jehovaj kallpanta japʼerqani. Saykʼusqa kaspa, niñataj ni imata ruwayta atisqayta yuyaspa Jehovamanta kallpata mañakuni hermanosniyta yanapanallaypajpuni. Chay kutispi reparani aguantanaypaj Jehová kallpata qowasqanta”, nispa. Ancianospis Gedeón jinallataj ima kajtinpis tukuy imata ruwanku hermanosta munakuywan cuidanankupaj. Jinapis llampʼu sonqos kananku tiyan, reparakunankutaj tiyan mana tukuy imatachu ruwayta atisqankuta. Ancianosqa yachanku Jehová mañakuyninkuta uyarinanta, kallpatataj qonanta ñaupajman rinallankupajpuni (Sal. 116:1; Fili. 2:13).

18. ¿Imaynatá ancianos Gedeón jina ruwankuman?

¹⁸ Ancianosqa mayta yachakunkuman Gedeonmanta. Paykunaqa llampʼu sonqos, kʼumuykukoj sonqostaj kananku tiyan niraj ima ruwaytapis japʼikushajtinku, mana allintachu ruwasqankuta nejtinku chayri felicitajtinku. Chantapis kasukuyta yachananku tiyan, nitaj manchachikunankuchu tiyan, astawanraj tukukuy pʼunchay qayllamushasqanrayku. Ima kajtinpis, Jehová kallpata qonanpipuni atienekunanku tiyan. Paykunataqa mayta munakunchej, ‘jatunpajtaj qhawanchej’ sinchʼita trabajasqankurayku (Fili. 2:29).