-
Sumaj willaykuna tukuynejpi willakushanWiñaypaj kusisqa kausakuy. Bibliata estudiay
-
-
LECCIÓN 21
Sumaj willaykuna tukuynejpi willakushan
Jehová Diosqa tumpamantawan jallpʼantinmanta tukuy llakiykunata chinkachenqa Gobiernonnejta. Chay sumaj willaytaqa tukuyman willananchej tiyan. Jesuspis discipulosninman kamacherqa chayta willamunankuta (Mateo 28:19, 20). Kaypi yachakusun Jehovaj testigosnin chayta kasukunaykupaj imastachus ruwashasqaykuta.
1. Mateo 24:14 versiculopi nisqan, ¿kay tiempopi juntʼakushanchu?
Jesús nerqa: “Diospa Gobiernonmanta sumaj willaykunapis jallpʼantinpi willakonqa”, nispa (Mateo 24:14). Chay nisqantaj juntʼakushan. Chay sumaj willaykunataqa Jehovaj testigosnin jallpʼantinpi willashayku. Willaykutaj 1.000 kuraj parlaykunapi. Chayta ruwanaykupaj mayta kallpachakuyku, sumajtataj wakichikuyku. Chaytaj ruwakun Jehovaj yanapaynillanwan.
2. ¿Imaynasmantá runasman predicayku?
Ñaupa tiempomanta cristianos jina “wasimanta wasi” willayku (Hechos 5:42). Ajinata ruwaspaqa ashkha runasman Diosmanta willariyku. Wakin kutis runasta wasinkupi mana tariyta atillaykuchu. Jinapis maypichus ashkha runas kanku chaypi predicayku. Runasmanqa maypi kashaspapis willariykupuni Jehovamanta, imatachus ruwananmanta ima.
3. ¿Pikunataj predicananku tiyan?
Sumaj willaykunataqa tukuy cheqa cristianos predicananku tiyan. Jehovaj testigosnintaj chayta ruwanaykupaj maytapuni kallpachakuyku. Atisqaykuman jina predicayku runas salvakunankuta munasqaykurayku (1 Timoteo 4:16 leey). Chayta ruwanaykupajqa mana pagachikuykuchu, imaraykuchus Biblia nin: “Mana pagaspalla japʼerqankichej, qoshaspaqa amallataj pagachikuychejchu”, nispa (Mateo 10:7, 8). Mana tukuy runaschu uyariwajtiykupis predicallaykupuni. Chayta ruwaspaqa Jehovata kasukuyku, kusichiykutaj.
ASTAWAN YACHAKUNA
Kaypi yachakusun Jehovaj testigosnin mundontinpi predicashasqaykuta, imaynatachus Jehová yanapashawasqaykutapis.
Tukuynejpi predicashayku: A) Costa Rica, B) Estados Unidos, C) Benín, D) Tailandia, E) Yap (Micronesia), F) Suecia.
4. Tukuy runasman predicanaykupaj kallpachakuyku
Jehovaj testigosnenqa maypi kashaspapis, tukuy runasman predicanaykupaj mayta kallpachakuyku. VIDEOTA qhawariychej, chantá yachakojta tapuriy:
¿Jehovaj testigosnin imasta ruwasqankutaj tʼukuchisunki?
Mateo 22:39; Romanos 10:13-15 leeriychej, chantá yachakojta tapuriy:
¿Imaraykutaj Jehovaj testigosnin predicaj kasqayku?
¿Predicajkunata Jehová Dios allinpajchu qhawan? (15 versiculota qhawariy).
5. Dioswan khuska llankʼayku
Ashkha runasman chayanaykupaj Jehová Dios yanapashawasqaykuta reparayku. Nueva Zelandapi uj hermano predicasqanmanta parlarina. Hermanonchej Paul uj tarde wasimanta wasi willarishasqa, chaypitaj uj señorata tarisqa. Chay señoraqa chay diallataj Diospa sutinta oqharispa mañakusqa, pillapis Diosmanta yacharichinanta. Chay mañakusqanmanta kinsa horanmantaj hermanonchej Paul chay señoraj wasinman chayasqa.
1 Corintios 3:9 leeriychej, chantá yachakojta tapuriy:
¿Jehová Diospunichu runasman willanaykupaj yanapashawaykuman?
Hechos 1:8 leeriychej, chantá yachakojta tapuriy:
¿Imaraykutaj Jehovaj yanapayninta necesitanchej runasman willamunapaj?
Astawan yachanaykipaj
Chaupi semana tantakuyniykupi yachachikun imaynatachus runasman predicanata. Chay tantakuyniykuman rerqankiña chay, ¿imataj astawan gustasorqa Jehová ajinata wakichiwasqaykumanta?
6. Diosta kasukusqaykurayku predicayku
Ñaupa tiempopi cristianostaqa enemigosninku jarkʼayta munarqanku niña predicanankupaj. Jinapis paykunaqa leymanta valekuspa sumaj willaykunata willallarqankupuni (Filipenses 1:7). Kay tiempopipis Jehovaj testigosnenqa kikillantataj ruwayku.a
Hechos 5:27-42 leeriychej, chantá yachakojta tapuriy:
Churanakuwajtinchejpis, ¿imaraykutaj predicanallapuni kasqa? (29, 38, 39 versiculosta qhawariy).
ICHÁ WAKIN TAPUSONQANKU: “¿Imaraykutaj Jehovaj testigosnin wasimanta wasi predicanku?”, nispa.
Ajinata tapusojkunaman, ¿imatá kutichiwaj?
¿IMASTÁ YACHAKUNCHEJ?
Kaypi yachakunchej Jesusqa runasman willamunata kamachiwasqanchejta. Yachakullanchejtaj tukuynejpi willamunallapajpuni Jehová yanapawasqanchejta.
Yuyarikunapaj
¿Imaynasmantá runasman willayku?
¿Imaraykutaj Jehovaj testigosnin predicayku?
¿Runasman sumaj willaykunata predicay kusichiwasunmanchu? ¿Imaraykú chayta ninki?
ASTAWAN YACHAKUNAYKIPAJ
¿Imaynatataj jatuchaj llajtaspi predicayku? Chayta yachanaykipaj kay videota qhawariy.
Suyunkumanta ayqekamoj runasman, ¿testigos willankuchu? Chayta yachanaykipaj kay videota qhawariy.
Suyunkumanta ayqekamojkunaman Bibliamanta yachachiyku (5:59)
Uj hermana tukuy atisqanta predicaspa kusisqa kasqanta nin. Paymanta astawan yachanaykipaj kay videota qhawariy.
Jehovaj testigosnenqa tribunalespi atipanku predicanallankupajpuni. Chaymanta astawan yachanaykipaj kayta leeriy.
“Reinomanta willajkuna tribunalesman chayanku” (Diospa Reinonqa kamachishanña, 13 yachaqana)
a Jehová Dios kamachiwanchej runasman willamunata. Chayrayku Jehovaj testigosnenqa predicanaykupaj mana autoridadesmantarajchu permisota mañakuyku.
-
-
Bautismoman chayanaykipaj kallpachakuyWiñaypaj kusisqa kausakuy. Bibliata estudiay
-
-
LECCIÓN 23
Bautismoman chayanaykipaj kallpachakuy
Jesús nerqa cristiano kanapajqa bautizakuna kasqanta (Mateo 28:19, 20 leey). Chayrayku kaypi yachakusun bautismomanta, bautismoman chayanapaj imastachus ruwanamantapis.
1. ¿Imaynatá bautizakuna tiyan?
Bautizakushajtinchej tukuy cuerponchej yaku ukhuman chinkaykunan tiyan. Jesusta Jordán mayupi Juan bautizashajtin, tukuy cuerponta yaku ukhuman chinkaykucherqa. Biblia nin: ‘Yakumanta llojsimorqa’, nispa (Marcos 1:9, 10). Bautizay palabraqa griegopi niyta munan “chʼultiy”, nisunman yaku ukhuman chinkaykuchiy.
2. ¿Imatataj rikuchinchej bautizakuspa?
Bautizakuspaqa rikuchinchej Jehovallataña sirviyta munasqanchejta. Niraj bautizakushaspaqa Diosman kausayninchejta jaywapuna. Uj mañakuypi Diosman nina payta wiñaypaj sirvinanchejta, payllata yupaychananchejta, munaynintataj ruwananchejta. Chantapis noqanchej kikin ajllanchej Jesús jina kausakuyta. Jesús nerqa: “Sichus pipis qhepayta jamuyta munan chayqa, pay kikinta chejnikuchun, [qhepaytataj] jamullachunpuni”, nispa (Mateo 16:24). Jehovaman kausayninchejta qopuspa, bautizakuspa ima, payman astawan qayllaykunchej, wajkunawan khuskataj payta sirvinchej.
3. ¿Imastataj ruwananchej tiyan bautismoman chayanapaj?
Bautismoman chayanapajqa Jehovataraj rejsina tiyan, paypitaj creena tiyan (Hebreos 11:6 leey). Diosta astawan rejsisun, paypitaj astawan creesun chayqa, payta astawan munakusun. Chaytaj paymanta runasman willarinapaj tanqawasun, Bibliaj nisqantapis kasukunapaj yanapawasun (2 Timoteo 4:2; 1 Juan 5:3). ‘Imastachus Jehovata yupaychajkuna ruwanku chayta ruwaspañaqa’, kausayninchejta payman jaywapusun, bautizakusuntaj (Colosenses 1:9, 10).a
ASTAWAN YACHAKUNA
Kaypi yachakusun Jesús imaynatachus bautizakusqanta, uj runa bautismoman chayananpaj imatachus ruwanantapis.
4. Jesús bautizakusqanmanta yachakuna
Imaynatachus Jesús bautizakusqanmanta astawan yachanapaj Mateo 3:13-17 leeriychej, chantá yachakojta tapuriy:
¿Jesusta wawitallaraj kashajtinchu bautizasqanku?
¿Imaynatá Jesusta bautizasqanku, umallanmanchu yakuwan chʼajchuykusqanku?
Jesusqa bautizakuytawan imatachus Jehová Dios kamacherqa chayta ruwayta qallarerqa. Lucas 3:21-23; Juan 6:38 leeriychej, chantá yachakojta tapuriy:
Jesús bautizakuytawan, ¿imatataj ruwayta qallarisqa?
5. Bautismoman chayanapaj kallpachakuna
Jehová Diosman kausayninchejta qopuyta, bautizakuytapis ichá manchachikunchej. Jinapis Jehová Diosmanta astawan yachakullasunpuni, paytataj astawan rejsisun chayqa, bautizakuyta mana manchachikusunchu. Bautismoman chayanankupaj imatachus wakin runas ruwasqankuta yachanapaj, VIDEOTA qhawariychej.
Juan 17:3; Santiago 1:5 leeriychej, chantá yachakojta tapuriy:
¿Imatataj ruwana kasqa bautismoman chayanapaj?
Niraj bautizakushaspaqa Jehovaman uj oracionpi ninchej payta sirviyta munasqanchejta. Ajinamanta payman kausayninchejta qopunchej.
Jehová Diosman kausayninchejta qopusqanchejtaqa bautizakuspa rikuchinchej.
6. Bautizakuspaqa Diospa llajtanman yaykunchej
Diospa llajtanpeqa uj familia jina ujchasqa kanchej. Maymanta kaspapis Jehová Diosta yupaychanchej, Bibliaj nisqanman jinataj kausakunchej. Salmo 25:14; 1 Pedro 2:17 leeriychej, chantá yachakojta tapuriy:
¿Bautizakuspaña imaynatataj Diospa ñaupaqenpi kausakunanchej tiyan? Chanta, ¿imaynatataj hermanoswan kausakunanchej tiyan?
WAKIN RUNAS NINKU: “Bautizakunaypaj niraj wakichisqachu kashani”, nispa.
¿Qanpis ajinallatatajchu yuyanki? ¿Imaraykutaj allin kanman bautizakunaykipaj kallpachakunayki?
¿IMASTÁ YACHAKUNCHEJ?
Kaypi yachakunchej cristiano kanapaj bautizakuna kasqanta. Bautismoman chayanapajtaj Jehovapi creena, kamachisqanta kasukuna, kausayninchejtataj payman qopuna.
Yuyarikunapaj
¿Imaynatá bautizakuna kasqa? ¿Imaraykutaj bautizakunchej?
¿Jehovaman kausayninchejta qopuywan bautizakuywan kikinchu?
Niraj Jehovaman kausayninchejta qopushaspa, niraj bautizakushaspa ima, ¿imastataj ruwana tiyan?
ASTAWAN YACHAKUNAYKIPAJ
¿Imaynatá bautizakuna tiyan? ¿Ima niytá munan bautizakuy? Chayta astawan yachanaykipaj kayta leeriy.
“¿Imataj bautismo?” (Chaytaqa Internetpi jw.org nisqapi tarinki)
¿Imastataj bautismoman chayanapaj ruwana? Chayta yachanaykipaj kayta leeriy.
“Jehová Diosta munakoyqa, bautizakunaykipaj yanapasonqa” (Torremanta Qhawaj, marzo de 2020)
Uj runataqa Bibliata estudiay yanaparqa bautismoman chayananpaj. Paymanta astawan yachanaykipaj kayta leeriy.
“Cheqa kajta sapallaymanta tarinayta munarqanku” (Torremanta Qhawaj, 1 de febrero de 2013)
¿Imaynatá bautismoman chayanaykipaj kallpachakuwaj? Chayta yachanaykipaj kayta leeriy.
“¿Bautizakunayñachu tiyan?” (Waynaspata sipaskunapta tapukuyninku, iskay kaq libro, 37 yachaqana)
a Uj runa waj religionpi bautizasqaña chayqa, testigo kananpaj watejmanta bautizakunan tiyan. Imaraykuchus chay religionninpeqa Bibliamanta mana cheqatachu yachacherqanku (Hechos 19:1-5 chantá 13 leccionta leeriy).
-