Jesusqa 70 yachachisqasninta willajta kachan

Jesuswan yachachisqasninwanqa, 32 wata tukukuyta Chʼujllas fiestapaj Jerusalenman rerqanku. Chay fiesta pasaytataj ichapis Jerusalén qayllallapi quedakorqanku. Chaypachaqa Jesús bautizakusqanmanta kinsa wata jinaña kasharqa (Lucas 10:38; Juan 11:1). Jesús wañuchisqa kananpajtaj, 6 killasllaña faltasharqa. Chay sojta killaspi Jesusqa Judeapi, Jordán mayu chimpapi kaj Pereapi ima astawan predicarqa. Chay lugaresmanta runaspis Diospa Gobiernonmanta yachanankupaj. Imaraykuchus Jesusqa pisi tiempollata chay lugarespi willanan karqa.

Payqa 30 watamanta Pascua fiesta pasayta, uj mashkha killasta Judeapi predicarqa. Galileaman ripushaspataj, Samariapi predicarqa. 31 watamanta Pascua fiestapitaj, Jerusalenpi judíos Jesusta wañuchiyta munarqanku. Chayrayku Jesusqa Galileaman willaj riporqa. Chaypitaj wata partiyojta willarqa. Ajinamanta chaypi ashkha runasqa yachachisqasninman tukorqanku. Chantapis Jesusqa, Galileapi apostolesninman yachacherqa runasman willayta. Chantá paykunata willajta kacharqa, kaytataj kamacherqa: “Willamuychej: ‘Cielopi kaj Gobiernoqa qayllapiña kashan’, nispa” (Mateo 10:5-7). Chantá Jesuswan yachachisqasninwanqa, Chʼujllas fiestapaj Jerusalenman kuterqanku. Jerusalenpitaj, Jesusqa yachachisqasninwan yanapachikorqa Judeapi runasman willananpaj.

Chaypi willananpajqa 70 yachachisqasninta ajllarqa, iskaymanta iskaytaj willajta kacharqa. Paykunaqa Judeapi Diospa Gobiernonmanta willarqanku. Chaypi “cosechanaqa ashkha” karqa, “oqharejkunarí pisilla” karqanku (Lucas 10:2). Jesusqa yachachisqasninman nerqa, ñaupaqenta rinankuta, may lugaresmanchus pay rinan karqa, chaykunaman. Chay 70 yachachisqasnintaj onqosqasta sanoyachinanku karqa, Jesús jinataj willananku karqa.

Jesusqa paykunata nerqa wasimanta wasi willamunankuta. Chantá paykunaman kamacherqa, imaynatachus uj wata ñaupajta 12 apostolesninman kamacherqa, ajinata. Pay nerqa: “Mayqen wasiman yaykuspapis ñaupajtaqa chaypi tiyakojkunata napaykuychej: ‘Allin kausay kachun qankunapaj’, nispa. Sichus chay wasipi pillapis allinta kausakuyta munanman chayqa, allin kausay paypaj kanqa napaykusqaykichejman jina”, nispa. Chantá, ¿imamantataj Jesuspa yachachisqasnin willananku karqa? Paykunaqa “Diospa Gobiernonqa qayllaykamunña” nispa willananku karqa (Lucas 10:5-9).

Chantapis Jesusqa, yachachisqasninman nerqa mana tukuychu willasqankuta uyarinankuta. Jinapis runasman willaspaqa, ashkha runaspa sonqonkuta wakichinkuman karqa Jesusmanta yachakuyta munanankupaj.

Chay 70 yachachisqasqa Diospa Gobiernonmanta willaytawan, Jesusman kusisqa kutimorqanku. Paykunataj nerqanku: “Señor, supaykunapis kasuwayku sutiykipi paykunata kamachejtiykoqa”, nispa. Jesuspis chayta uyarispa maytachá kusikorqa. Pay nerqa: “Noqa rikuniña Satanasta rayo jina cielomanta urmaykamushajta. Qankunaman atiyta qorqaykichej katarista, alacranestapis sarunaykichejpaj”, nispa (Lucas 10:17-19).

Jesús chay imasta sarunankuta nispaqa, nisharqa ima problema kajtinpis atipayta atinankuta. Jesusqa yachachisqasninman nillarqataj, aswan qhepaman Satanás cielomanta wijchʼuchikamunanta. Chantá Jesús nerqa: “Ama kusikuychejchu supaykuna kasusojtiykichejqa, astawanpis kusikuychej cielopi sutiykichej qhelqasqa kasqanmanta”, nispa (Lucas 10:20). Ajinamanta Jesusqa 70 yachachisqasninta yanaparqa, imamantachus astawan kusikunanku kasqanta reparakunankupaj.

Jesusqa may kusisqa kasharqa, Tatantataj jatuncharqa yachachisqasninwan tʼukuna imasta ruwasqanmanta. Chantá yachachisqasninman nerqa: “Kusisqa kanku imastachus rikusqaykichejta rikojkunaqa. Noqa niykichej: Imastachus qankuna rikusqaykichejtaqa ashkha profetas, reyespis rikuyta munarqanku, manataj rikorqankuchu. Imastachus uyarisqaykichejtapis uyariyta munarqanku, manataj uyarerqankuchu”, nispa (Lucas 10:23, 24).