¿Imaraykutaj Jesuspa wañuyninta yuyarinchej?

1, 2. ¿Imatataj Jesús 14 nisán 33 watapi ruwarqa? (Patapi kaj dibujota qhawariy.)

KAY 14 nisán 33 watapi Jesús, yachachisqasnin ima, Jerusalenpi Pascuata ruwarqanku, 1.500 watas ñaupajta israelitas Egiptoj atiyninmanta kacharichisqa kasqankuta yuyarikuspa. Chay chʼisitaj killa juntʼa kasharqa. Jesusqa, 11 apostolesninwan waj cenata ruwallarqataj. Chaytataj yachachisqasnin wañuyninta yuyarikuspa aswan qhepaman ruwananku karqa (Mat. 26:1, 2).a

² Jesusqa Diosman graciasta qoytawan, mana levadurayoj tʼantata apostolesninman jaywarqa, nerqataj: “Mikhuychej”, nispa. Chantá vino copatañataj oqharerqa, Diosman graciasta qoytawan, nerqa: “Kaymanta tukuyniykichej ujyaychej”, nispa (Mat. 26:26, 27). Chantá niña imatapis mikhorqankuchu, chay chʼiseqa yuyarikunapaj jinapuni karqa, imaraykuchus Jesús ashkha imasta apostolesninman yachacherqa.

3. ¿Ima tapuykunamantaj kutichisunchej?

³ Ajinata Jesús, wañuyninta yuyarinapaj tantakuyta ruwarqa, nisunman ‘Señorpa cenanta’ (1 Cor. 11:20). ¿Imaraykutaj Jesuspa wañuyninta yuyarikunchej? ¿Ima ninayantaj tʼanta, vino ima? ¿Imaynatá Jesuspa wañuyninta yuyarinapaj wakichikusunman? ¿Pikunataj tʼantata mikhunanku, vinota ujyananku tiyan? Jehová sumaj kausayta apamunanta nisqanmanta, ¿imaspitaj cristianos tʼukurinku?

¿IMARAYKUTAJ JESUSPA WAÑUYNINTA YUYARIKUNCHEJ?

4. ¿Jesús kausayninta qosqanrayku imataj kanqa?

⁴ Adanqa tukuy runasman, juchata, wañuyta ima saqewanchej (Rom. 5:12). Chaymantataj mana sapallanchejmanta kacharichikuyta, nitaj wajkunatapis kacharichiyta atinchejchu, kausayninchejta salvanapajqa Diosman mana pagayta atinchejchu (Sal. 49:6-9). Jesustajrí juntʼa kausayninta qospa, yawarninta jichʼaspa ima rantiwarqanchej. Arí, payqa noqanchejrayku wañorqa, Diospa ñaupaqenmantaj yawarninwan yaykorqa. Chayrayku juchamanta, wañuymanta ima kacharichisqa kayta, wiñaypaj kausakuyta ima atinchej (Rom. 6:23; 1 Cor. 15:21, 22).

5. 1) ¿Imaynatá yachanchej Jehová, Jesús ima munakuwasqanchejta? 2) ¿Imaraykú Jesuspa Wañuyninta Yuyarinapaj tantakuyman rinapuni tiyan?

⁵ Jehovaqa, Churinta noqanchejrayku qospa munakuyninta rikuchiwarqanchej (Juan 3:16). Jesuspis kausayninta noqanchejrayku qospa munakuyninta rikuchillawarqanchejtaj. Payqa “yanapaj maestro jina, NM” kashaspaña, runasta mayta munakoj (Pro. 8:30, 31). Imastachus Jehová, Jesús ima noqanchejrayku ruwasqankumanta agradecekusunchej chayqa, Jesuspa Wañuyninta Yuyarinapaj tantakuyman risunchej. Ajinamanta kay kamachiyta kasukusunchej: “Kaytataj ruwaychej noqamanta yuyarikunaykichejpaj” (1 Cor. 11:23-25).

¿IMA NINAYANTAJ TʼANTA, VINO IMA?

6. ¿Ima ninayantaj tʼanta, vino ima Jesuspa Wañuyninta Yuyarinapaj tantakuypi?

⁶ Jesusqa wañuyninta yuyarinapaj tantakuyta ruwashaspa, tʼantata mana cuerponmanpunichu tukucherqa, nitaj vinotapis yawarninmanpunichu. Astawanpis pay nerqa: “Kayqa cuerpoywan ninakun”, “kayqa ‘tratopaj yawarniywan’ ninakun, chaytaj ashkha runasrayku jichʼasqa kanqa”, nispa. Chaywantaj sutʼita rikucherqa tʼanta mana cuerponpunichu, nitaj vinopis yawarninpunichu kasqanta (Mar. 14:22-24, NM).

7. Jesuspa Wañuyninta Yuyarinapaj tantakuypi, ¿ima ninayantaj mana levadurayoj tʼanta?

⁷ Jesusqa wañuyninta yuyarinapaj tantakuyta ruwashaspa, Pascuamanta puchoj mana levadurayoj tʼantata yachachisqasninman jaywarqa (Éxo. 12:8). Bibliapi levaduraqa juchawan, ismuywan ima ninakun (Mat. 16:6, 11, 12; Luc. 12:1). Chayrayku mana levadurayoj tʼantaqa Jesuspa mana juchayoj cuerponwan ninakorqa (Heb. 7:26). Kay tiempopipis Jesuspa Wañuyninta Yuyarinapaj tantakuypi tʼantaqa mana levadurayoj.

8. Jesuspa Wañuyninta Yuyarinapaj tantakuypi, ¿ima ninayantaj vino?

⁸ Jesús yachachisqasninman jaywasqan vinoqa yawarninwan chayri kausayninwan ninakorqa, kunanpis Jesuspa Wañuyninta Yuyarinapaj tantakuypi vinoqa chayllawantaj ninakun. Jesusqa Jerusalenmanta jawapi kaj Gólgota nisqa cheqapi yawarninta jichʼarqa, “ashkha runaspa juchasninku pampachasqa kanampaj” (Mat. 26:28; 27:33). Jesuspa wañuyninta may jatunpaj qhawasun chayqa, sapa wata wañuyninta yuyarinapaj tantakuyman risunchej.

¿IMAYNATÁ WAKICHIKUSUNMAN?

9. 1) ¿Imaynatá yanapawanchej Jesús niraj wañupushaspa imastachus ruwasqanmanta leey? 2) ¿Imaynatá qan qhawanki Jesuspa wañuyninta?

⁹ Diospa Palabranta sapa pʼunchay ukhunchana folletopi rikhurej versiculosta leesunchej chayqa, Jesús niraj wañupushaspa imastachus ruwasqanpi tʼukurisunchej. Ajinamantataj Señorpa Cenanpaj wakichikusunchej.b Uj hermana nerqa: “Jesuspa Wañuyninta Yuyarinapaj tantakuytaqa mayta suyakuyku, imaraykuchus sapa wata aswan sumaj noqaykupajqa. Chaywanpis tatay wañupojtinraj, Jesuspa wañuyninta may valorniyojpaj qhawarqani. [...] Noqaqa ima versiculoschus Jesuspa wañuyninmanta parlasqanta sumajta yachaj kani, wajkunamanpis sutʼinchaj kani. Tatay wañupusqanmanta may llakisqa kashasparaj repararqani Jesuspa wañuynenqa may valorniyojpuni kasqanta, uj suyakuyta qowasqanchejta ima, chaytaj mayta sonqochawarqa”, nispa. Chay tantakuypaj wakichikushaspaqa, imaynatachus Jesuspa wañuynin juchamanta, wañuymanta ima kacharichiwasqanchejpi tʼukurinchej.

10. ¿Imataj yanapallawasunmantaj Jesuspa Wañuyninta Yuyarinapaj tantakuypaj wakichikunapaj?

¹⁰ Jesuspa Wañuyninta Yuyarinapaj tantakuypajqa, wakichikullasunmantaj astawan willaj rispa. Ichá chay killas precursores auxiliares kasunman. Tukuy runastataj chay tantakuyman wajyarinachej. Arí, Jehovamanta, Jesusmanta, qhepaman imachus kananmanta ima willaspa kusiyta tarisunchej (Sal. 148:12, 13).

11. ¿Imaraykú Biblia nin Corintomanta wakin cristianos mana respetollawan Señorpa Cenanpi tʼantata mikhusqankuta, vinota ujyasqankuta?

¹¹ Chantapis imatachus apóstol Pablo Corintomanta qotuchakuyman qhelqasqanpi tʼukurinachej (1 Corintios 11:27-34 leey). Pabloqa rikucherqa pillapis “mana allinta unanchaspalla”, nisunman mana respetowan tʼantata mikhoj, vinota ujyajqa, “Señorpa cuerponmanta, yawarninmantawan juchachasqa” kananta. Chayrayku uj ajllasqa cristianoqa niraj tʼantata mikhushaspa, niraj vinota ujyashaspa ima sumajta qhawarikunan tiyan, kausayninta Dios allinpajchus qhawasqanta, manachus. Mana qhawarikuspaqa, “juchachasqa kananpaj mikhun, ujyantaj”. Corintomanta wakin cristianosqa mana allintachu kausakusharqanku. Ichapis wakenqa niraj Señorpa Cenan ruwakushajtin chayri ruwakushajtinña ashkhata mikhoj kanku chayri ujyaj kanku, chayraykutaj ichapis chay tantakuypi puñusqas jina kasharqanku. Chayta ruwaspaqa Señorpa Cenanta pisipaj qhawasqankuta rikucherqanku, chayraykutaj Jehová mana allinpajchu qhawarqa tʼantata mikhusqankuta, nitaj vinota ujyasqankutapis.

12. 1) ¿Imawantaj Pablo kikincharqa Jesuspa Wañuyninta Yuyarinapaj tantakuyta, chantá imatá ajllasqa cristianosman yuyaycharqa? 2) Uj ajllasqa cristiano juchallikuspa, ¿imatá ruwanan tiyan?

¹² Pabloqa Jesuspa Wañuyninta Yuyarinapaj tantakuyta mikhunawan kikincharqa. Chayman wajyarisqa kajkunamantaj nerqa: “Mana atinkichejchu Señorpa copanmanta ujyashaspa, supaykunaj copanmantapis ujyayta. Nillataj atinkichejchu Señorpa mikhunanmanta mikhushaspa, supaykunaj mikhunanmantapis mikhuyta”, nispa (1 Cor. 10:16-21). Uj ajllasqa cristiano juchallikuspaqa ancianospa yanapayninta maskʼanan tiyan (Santiago 5:14-16 leey). Sonqomantapacha pesachikun chayqa Señorpa Cenanpi tʼantata mikhuyta, vinota ujyayta ima atin. Chayta ruwaspataj chay tantakuyta mana pisipajchu qhawasqanta rikuchin (Luc. 3:8).

13. ¿Imaraykú Diosmanta mañakunanchej tiyan ima suyakuytachus qowasqanchejta yachanapaj?

¹³ Jesuspa Wañuyninta Yuyarinapaj tantakuypaj wakichikushaspa, ima suyakuytachus Jehová qowasqanchejta yachanapaj allin kanman tʼukurinanchej, Jehovamanta mañakunanchej ima. Pillapis ajllasqa cristiano kasqanta mana sutʼita yachanchu chayqa, mana tʼantata mikhunanchu, nitaj vinotapis ujyananchu tiyan. Imaraykuchus chayta ruwaspaqa Jesuspa wañuyninta pisipaj qhawachishanman. Chantá, ¿imaynatá yachasunman tʼantata mikhunanchejchus, vinota ujyananchejchus manachus kasqanta?

¿PIKUNATAJ TʼANTATA MIKHUNKU, VINOTAPIS UJYANKU?

14. Jesuspa Wañuyninta Yuyarinapaj tantakuypi tʼantata mikhojkunapaj, vinota ujyajkunapaj, ¿ima ninayantaj mosoj trato?

¹⁴ Jesuspa Wañuyninta Yuyarinapaj tantakuypi tʼantata mikhojkuna, vinota ujyajkunaqa mosoj tratomanta kasqankuta sutʼita yachanku. Jesusqa vinomanta parlaspa nerqa: “Kay copaqa mosoj tratomin, yawarniypi ruwasqa”, nispa (1 Cor. 11:25). Jehovaqa profeta Jeremiasnejta israelitaswan Leypa tratonta ruwasqanpa cuentanmanta uj mosoj tratota ruwananta nerqa (Jeremías 31:31-34 leey). Jehovataj chay mosoj tratota ajllasqa cristianoswan ruwarqa (Gál. 6:15, 16). Chay trato valorniyoj kasqantaj Jesús yawarninta jichʼasqanwan rikuchikorqa (Luc. 22:20). Chay mosoj tratomanta allinyachejtaj Jesús, cheqa sonqo ajllasqa cristianostaj janaj pachapi paywan khuska kanqanku (Heb. 8:6; 9:15).

15. 1) ¿Pikunawantaj uj Reinopaj trato ruwakorqa? 2) ¿Imatataj japʼenqanku ajllasqa cristianos cheqa sonqollapuni kaspa?

¹⁵ Ajllasqa cristianosqa yachanku paykunawan uj Reinopaj trato ruwakusqanta (Lucas 12:32 leey). Chay tratotaqa Jesús ruwarqa cheqa sonqo yachachisqasninwan, pikunachus paywan khuska ñakʼarerqanku (Fili. 3:10). Chay trato ruwakusqanraykutaj, cheqa sonqo ajllasqa cristianosqa Jesuswan khuska wiñaypaj janaj pachamanta kamachimonqanku (Apo. 22:5). Chayrayku paykuna Señorpa Cenanpi tʼanta mikhuyta, vinota ujyayta ima atinku.

16. Imatachus Romanos 8:15-17 versículos niyta munasqanta sutʼinchay.

¹⁶ Señorpa Cenanpeqa, tʼantata mikhuyta, vinota ujyayta ima atinku, pikunamanchus Diospa wawasnin kasqankuta espíritu santo sutʼinchan chaykunalla (Romanos 8:15-17 leey). Pabloj qhelqasqanpeqa “Tatáy, Tatáy” nisqa rikhurin. Chaytaj rijchʼakun uj wawa “tatáy, tatáy” nispa, tatanta munakusqanrayku, jatunpaj qhawasqanrayku ima parlapayasqanwan. Chayta nispataj Pablo rikuchiyta munarqa ajllasqa cristianos ‘Diospa espiritunwan’ ajllasqa kasqankumantapacha Jehovaj qayllanpi kasqankuta. Diospa espiritonqa ajllasqa kajkunaman ‘sutʼinchan Diospa wawasnin kasqankuta’. Paykunaqa mana kay Jallpʼapi kausakuytachu suyakushanku, astawanqa wañupunankukama cheqa sonqollapuni kaspa Cristowan khuska herenciata japʼinankumanta mana iskayrayankuchu. Kunanqa, ‘espíritu santowan’ 144.000 ajllasqasmanta pisillaña kay Jallpʼapi kashanku (1 Juan 2:20; Apo. 14:1). Ajllasqa cristianos Jehovaj qayllanpi kasqankurayku niyta atinku: “Tatáy Tatáy”, nispa.

AGRADECEKUNA WIÑAY KAUSAYTA DIOS QOYTA MUNAWASQANCHEJMANTA

17. ¿Imatá ajllasqa cristianos suyakushanku, chantá imaynatá yachanku ajllasqa kasqankuta?

¹⁷ Ajllasqa cristiano kanki chayqa, mañakushaspa sapa kutichá janaj pachaman ripuyta suyakushasqaykimanta Jehovaman willarinki. Bibliaj nisqantaj qanpajqa may sumajpuni. Sutʼincharinapaj, Jesús novianwan casarakunanmanta Bibliapi leespa, qanmanta parlashasqanta yachanki, Cristoj ‘novianmanta’ kanayki pʼunchay chayamunantataj suyakushanki (2 Cor. 11:2; Juan 3:27-29; Apo. 21:2, 9-14). Bibliapi, Dios wawasninta munakusqanta nejtin, ‘qanmanta parlashasqanpi’ tʼukurinki. Ajllasqa cristianospaj yuyaychaykunata tarejtiykitaj, Diospa espiritun tanqasunki kasukunaykipaj, sonqoykipitaj ninki: “Kayqa noqapajpuni”, nispa. Ajinamanta Diospa espiritun sutʼinchasunki janaj pachaman ripuyta suyakushasqaykita.

18. ¿Imatataj waj ovejasmanta kajkuna suyakushanku, chantá imaspitaj tʼukurinku?

¹⁸ ‘Waj ovejasmanta’, “may chhika” runasmanta ujnin kanki chayqa kay Jallpʼapi kausakuyta suyakushanki (Apo. 7:9; Juan 10:16). Wiñaypajtaj uj paraisopi kausakuyta munanki, imaynachus kausay kananmanta Bibliapi leespa tʼukuriytaj mayta gustasunki. Familiaykiwan, amigosniykiwan ima allinta kausakunayki pʼunchay chayamunantataj mayta suyakushanki. Munankitaj yarqhay, wajchayay, ñakʼariy, onqoy, wañuy ima chinkananta (Sal. 37:10, 11, 29; 67:6; 72:7, 16; Isa. 33:24). Wañupoj familiaresniykiwan tinkuytapis mayta suyakushanki (Juan 5:28, 29). Jehovaman maytachá agradecekunki chay sumaj suyakuyta qosusqanmanta. Jesuspa Wañuyninta Yuyarinapaj tantakuypi mana tʼantata mikhuspapis, nitaj vinota ujyaspapis, chay tantakuyman rispaqa Jehová rantinawanchejpaj Churinta kachamusqanmanta may agradecesqa kasqaykita rikuchinki.

¿CHAY TANTAKUYMAN RINKICHU?

19, 20. 1) Ima suyakuyniyoj kaspapis, ¿imatá ruwananchej tiyan? 2) ¿Imaraykú Jesuspa Wañuyninta Yuyarinapaj tantakuyman rinanchejpuni tiyan?

¹⁹ Tukuy cheqa sonqo runas wiñaypaj kausakuyta atinchej, wakinkuna janaj pachapi, wakinkunataj kay Jallpʼapi. Chaypajqa Jehovapi, Jesuspi, rantiwasqanchejpi ima creenanchej tiyan. Jesuspa Wañuyninta Yuyarinapaj tantakuypeqa mayqenchus suyakuyniyki kasqanpi, Jesuspa wañuynin mayta yanapasusqanpi ima tʼukurinki. Kay viernes 3 de abril de 2015 watapi, inti yaykupusqantawan may chhika runas pachantinpi Jehovaj testigosninpa Tantakuna Wasisninkupi, waj lugarespi ima Señorpa cenanta ruwanqanku.

²⁰ Chay tantakuyman rispaqa, Jesús noqanchejrayku kausayninta qosqanmanta astawan agradecekunki. Chay tantakuypi umallirichikusqanta uyarisqaykitaj, waj runasman munakuyniykita rikuchinaykipaj, Jehová munakuwasqanchejta, aswan qhepaman imatachus ruwananta ima wajkunaman willanaykipaj tanqasonqa (Mat. 22:34-40). Chay tantakuymanqa riypuni.