Ashkha runasqa machachej ujyanasta wakin kutislla amigosninkuwan tomanku, wakintaj ni uj chhikata tomankuchu, wakintajrí machaykunankukama tomanku. ¿Imatá Biblia nin machachej ujyanasmanta? Chayta kaypi yachakusun.

1. ¿Machachej ujyanasta tomay juchachu?

Bibliaqa mana juchachanchu machachej ujyanasta uj chhikata tomayta. Astawanpis nin: “Vinotapis qon runaj sonqonta qhallallarichinanpaj”, nispa. Arí, Jehovaqa vinota qowanchej sonqota kusirichinapaj (Salmo 104:14, 15). Chantapis Bibliapeqa parlallantaj wakin Diospa kamachisnin machachej ujyanasta uj chhikata tomasqankumanta (1 Timoteo 5:23).

2. Machachej ujyanasta tomajkunapaj, ¿ima yuyaychaytaj Bibliapi tiyan?

Jehová Diosqa mana machaykuyllatachu juchachan, manaqa anchata tomaytapis (Gálatas 5:21). Biblia nin: “Anchata vinota tomajkunamanta ama ujninku kaychu”, nispa (Proverbios 23:20). Sapallanchej chayri wajkunawan machachej ujyanasta tomanchej chayqa, cuidakunanchej tiyan mana yuyayninchejta chinkachinanchejkama tomanapaj. Jina kanman chayqa imatapis ruwaykullasunman, chayri imatapis parlallasunman. Anchata tomayqa mana cuerponchejpaj allinchu, onqochiwasunman. Uj chhikata tomaytawan machaykunakamapuni tomanchej chayqa, allin kanman ni uj chhikata tomananchej.

3. Wajkuna tomaytachus manachus ajllasqankuta respetasqanchejta, ¿imaynatá rikuchisunman?

Sapa uj ajllananchej tiyan machachej ujyanasta tomaytachus manachus. Uj cristiano machachej ujyanasta uj chhikata tomananta ajllan chayqa, mana qhawaranachu tiyan. Mana tomananta ajllajtintaj mana tanqananchejchu tiyan tomananpaj (Romanos 14:10). Sichus machachej ujyanasta tomaspa wajkunata pantachej jina kanchej chayqa, aswan allin kanman mana tomananchej (Romanos 14:21 leey). Ajinamanta ‘wajkunaj allinninkuta maskʼasqanchejta rikuchinchej, manataj allinnillanchejtachu’ (1 Corintios 10:23, 24 leey).

ASTAWAN YACHAKUNA

4. Tomanatachus manachus ajllana

Jesús imatachus machachej ujyanasmanta yuyasqanta yachanapajqa, ñaupaj kutipi milagrota ruwasqanmanta parlarina. Juan 2:1-11 leeriychej, chantá yachakojta tapuriy:

• Kay leerisqanchejman jina, ¿Jesús juchacharqachu machachej ujyanasta tomayta?

• ¿Uj cristiano machachej ujyanasta uj chhikata tomayta ajllajtin qhawaranachu kanman? ¿Imaraykú chayta ninki?

Uj cristiano machachej ujyanasta uj chhikata tomayta ajllan chaypis, wakin kutisqa ichapis ajllanqa mana tomayta. Proverbios 22:3 leeriychej, chantá yachakojwan parlariy imaraykuchus mana tomanata:

• Autota manejana kajtin chayri waj herramientaswan trabajopi trabajana kajtin.

• Uj warmi onqoj kajtin.

• Doctor machachej ujyanasta mana tomanata niwajtinchej.

• Machachej ujyanasta uj chhikata tomarispa astawan tomayta munajtinchej.

• Leyesman jina mana tomana kajtin.

• Machachej ujyanasta tomayta saqej cristianowan kashajtinchej.

Uj matrimoniopi chayri uj fiestitapi machachej ujyanasta churanatachus manachus yachanapaj, ¿imapirajtaj ñaupajta piensarinanchej kanman? VIDEOTA qhawariychej.

VIDEO: ¿Uj fiestapi machachej ujyanasta churanachu kanman? (2:41)

Romanos 13:13; 1 Corintios 10:31, 32 leeriychej, chantá yachakojta tapuriy:

• Jehová Diosta kusichinapaj jina imatapis ajllanapaj, ¿imaspitaj ñaupajta piensarina kanman?

5. May chhikatachus tomanata ajllana

Machachej ujyanasta tomayta ajllanchej chayqa, yuyarikuna tiyan anchata tomayta Jehová juchachasqanta, uj chhikata tomaytataj mana. Oseas 4:11, 18 leeriychej, chantá yachakojta tapuriy:

• Anchata tomaj runa, ¿imaspitaj rikukunman?

¿Imataj yanapawasunman mana anchata tomanapaj? Kʼumuykukoj sonqo kay. Proverbios 11:2 leeriychej, chantá yachakojta tapuriy:

• ¿Imaraykutaj qhawarikunanchej tiyan machachej ujyanasta mashkhallatachus tomana kasqanta?

6. ¿Imataj yanapawasunman machachej ujyanasta saqenapaj?

VIDEO: Manaña machaj runa kayta munarqanichu (6:32)

• Videopi rikorqanchej chay runaj kausaynin, ¿imaynataj karqa anchata tomasqanrayku?

• ¿Machachej ujyanasta tomayta ujllapichu saqerqa?

• ¿Imataj yanaparqa machachej ujyanasta niña ujtawan tomananpaj?

1 Corintios 6:10, 11 leeriychej, chantá yachakojta tapuriy:

• ¿Machaykuy juchachu? ¿Imaraykú chayta ninki?

• Uj runa machachej ujyanasman qokuspa, ¿saqeyta atinmanchu?

Mateo 5:30 leeriychej, chantá yachakojta tapuriy:

• Jesusqa kay kikinchaywan yachachisharqa Diosta kusichinapaj kallpachakunata. Sichus machachej ujyanasta saqeyta munashanki chay, ¿imastataj ruwawaj?a

1 Corintios 15:33 leeriychej, chantá yachakojta tapuriy:

• ¿Anchata tomajkunawan masichakojtinchej imataj kanman?

¿IMASTÁ YACHAKUNCHEJ?

Kaypi yachakunchej, Jehová Diosqa machachej ujyanasta kusirikunapaj qowasqanchejta. Jinapis machaykuyta, anchata tomaytapis juchachasqanta.

Yuyarikunapaj

• ¿Imatá Biblia nin machachej ujyanasmanta?

• ¿Imajtintaj mana allinchu anchata tomay?

• Wajkuna tomaytachus manachus ajllasqankuta respetasqanchejta, ¿imaynatá rikuchisunman?

ASTAWAN YACHAKUNAYKIPAJ

¿Imapitaj jóvenes piensarinanku tiyan tomanankutachus manachus ajllashaspa? Chayta yachanaykipaj kay videota qhawariy.

¿Machaykuspa imapí rikukuwaj? (2:31)

Machachej ujyanasta mashkhatachus tomanata yachanapaj, ¿imastaj yanapawasunman? Chayta yachanaykipaj kayta leeriy.

“¿Imatá ruwawaq alcoholman manaña qukunaykipaq?” (Torremanta Qhawaj, 1 de julio de 2010)

¿Cristianos brindankuchu? Chayta yachanaykipaj kayta leeriy.

“Leejkunaj tapuyninku” (La Atalaya, 15 de febrero de 2007)

Uj runata tomayta saqenanpaj imachus yanapasqanta yachanaykipaj “Alcohol lata karqani” nisqata leeriy.

“Bibliaqa cambianankupaj yanaparqa” (La Atalaya, 1 de mayo de 2012)

Mana tukuychu kikinta vistikunchej, nitaj kikintachu kʼachanchakunchej. Jinapis Biblia yuyaychasqanman jina ruwaspaqa gustawasqanchej ropata churakusun, Jehovatapis kusichisun. Imaynatachus chayta ruwanata yachakuna.

1. ¿Biblia yanapawasunmanchu maychus kajta vistikunapaj?

Bibliapi niwanchej ‘maychus kajta pʼachallikunata, wajkunata jatunpaj qhawaspa, allin yuyaywantaj’. Chantapis ropanchejqa llimphu kanan tiyan “Diosta tukuy sonqo yupaychaj” runaspata jina (1 Timoteo 2:9, 10). ‘Maychus kajta pʼachallikuspaqa’, Jehovata jatunchanapaj jina vistikunchej, peinakunchej ima. Chaytataj sutʼita rikunchej congregacionpi. ‘Wajkunata jatunpaj qhawasqanchejrayku’, mana wajkunaj sajra munayninkuta rijchʼarichinapaj jinachu, nitaj wajkunawan qhawachikunapaj jinachu vistikunchej. “Allin yuyaywan” vistikusqanchejraykutaj, mana ima ropatapis churakullanchejchu chay moda kasqanrayku. Chantapis ‘Diosta yupaychajkuna’ jina vistikunchej, ajinamanta cheqa Diosta yupaychasqanchejta wajkuna reparanankupaj (1 Corintios 10:31).

2. ¿Imaraykutaj wajkunata jatunpaj qhawaspapuni vistikuna tiyan?

Tukuy ajllayta atinchej ima ropatachus churakunata. Jinapis piensarina tiyan vistikusqanchejmanta imatachus ninankupi. Chantapis mayta kallpachakunchej vistikusqanchejwan ni pita phiñachinapaj. Biblia nin: “Runa masinchejpa allinninta maskʼana, ajinamanta kallpachasqa kanankupaj”, nispa (Romanos 15:1, 2 leey).

3. ¿Imaynatachus vistikusqanchej wajkunata yanapanmanchu?

Maymanchus rinanchej kashan, imatachus ruwananchej kashan chayman jina vistikunchej. Jinapis tantakuykunaman, predicacionman rinapajqa sumajta qhawarina tiyan ima ropatachus churakunata. Imajtinchus mana munanchejchu runas ropanchejta rikuspa, mana uyarinawanchejta. Astawanpis munanchej Jehovata rejsiyta munanankuta. Ajinamanta ‘Salvawajninchejpa yachachiyninta jatunpaj qhawachisun’ (Tito 2:10).

ASTAWAN YACHAKUNA

4. Jehovata jatunchanapaj jina vistikuna

Imaynatachus vistikunata sumajta qhawarikuna tiyan. Salmo 47:2 leeriychej, chantá yachakojta tapuriy:

• Jehovaj sutinpi parlasqanchejrayku, ¿imaynatataj vistikunanchej kanman?

• ¿Imaraykutaj allintapuni vistikuna tiyan tantakuykunaman rinapaj, predicacionman rinapajpis?

5. Ima ropatachus churakunata sumajta ajllana

VIDEOTA qhawariychej.

VIDEO: “Tukuy imata ruwaychej Dios jatunchasqa kananpaj” (10:18)

Ropanchej ashkha qolqe valejtinpis chayri pisilla valejtinpis llimphitu kanan tiyan, imatachus ruwashanchej, maymanchus rishanchej chaypaj jina. 1 Corintios 10:24; 1 Timoteo 2:9, 10 leeriychej, chantá yachakojwan parlariy imaraykuchus mana allinchu kasqanmanta:

• Imayna ropallayojpis purinanchej.

• Matʼi ropayoj, chayri ancha juchʼuy ropayoj, manachayri wajkunaj sajra munayninkuta rijchʼarichinapaj jina ropayoj purinanchej.

Cristianosqa manaña Moisespa Leyninta juntʼananchejchu tiyan. Jinapis chay Leyqa yanapawanchej Jehovata jatunchanapaj jina vistikunapaj. Deuteronomio 22:5 leeriychej, chantá yachakojta tapuriy:

• ¿Imaraykutaj mana allinchu kanman qharis warmi jina vistikunanku chayri warmis qhari jina vistikunanku?

1 Corintios 10:32, 33; 1 Juan 2:15, 16 leeriychej, chantá yachakojta tapuriy:

• Imaynatachus vistikusqanchej chayri kʼachanchakusqanchej, waj runasta chayri hermanosta phiñachejtin, ¿imatá ruwana kanman?

• Lugarniykipi runas, ¿imaynatá pʼachallikunku chayri kʼachanchakunku?

• Imayna ropatachus churakusqankumanta, ¿mayqenkunatataj uj cristiano mana churakunmanchu? ¿Imaraykutaj chayta ninki?

¿IMASTÁ YACHAKUNCHEJ?

Kaypi yachakunchej Jehovata, waj runastapis respetasqanchejrayku maychus kajta vistikunata, kʼachanchakunata ima.

Yuyarikunapaj

• ¿Imaraykutaj Jehová munan allinta vistikunata?

• ¿Ima yuyaychaykunataj yanapawanchej imaynatachus vistikunata yachanapaj?

• Imaynatachus vistikusqanchej, ¿imaynatá wajkunata yanapanman?

ASTAWAN YACHAKUNAYKIPAJ

¿Imatá rikuchin imaynatachus vistikusqanchej? Chayta yachanaykipaj kayta leeriy.

“Imayna vistisqachus kasqanchejta rikuspa, ¿imatá runas yuyankuman?” (Chaytaqa Internetpi jw.org nisqapi tarinki)

Niraj uj tatuajeta ruwachikushaspa, ¿imapitaj ñaupajta piensarinanchej tiyan? Chayta yachanaykipaj kayta leeriy.

“¿Imatá Biblia nin tatuajesta ruwachikunamanta?” (Chaytaqa Internetpi jw.org nisqapi tarinki)

Imaynatachus vistikunata yachanaykipaj kayta leeriy.

“Imaynatachus pʼachallikusqanchej, ¿Diosta jatunchanchu?” (Torremanta Qhawaj, septiembre de 2016)

¿Imataj uj warmita yanaparqa wajkuna imaynatachus vistikusqankuta jatunpaj qhawananpaj? Chayta yachanaykipaj kayta leeriy.

“Imaynatachus vistikunamanta yuyasqayta mana cambiayta atillarqanichu” (¡Despertad!, 22 de diciembre de 2003)