LECCIÓN 30
¿Wañusqas kausarimonqankuchu?
Familianchejmanta pillapis wañupojtin mayta llakikunchej, sonqonchejpis nanawanchej. Chayrayku Biblia nin wañoyqa uj enemigo kasqanta (1 Corintios 15:26). 27 leccionpi yachakorqanchej Jehovaqa wañuyta chinkachinanta. Jinapis, ¿imataj kanqa wañupunkuña chaykunawan? Jehovaqa nin wañusqasta kausarichimunanta wiñaypaj kausakunankupaj. ¿Jehovaj nisqan juntʼakonqapunichu? ¿Maypitaj kausarimonqanku, cielopichu chayri kay jallpʼapichu? Chay imasta kaypi yachakusun.
1. ¿Jehová Diosninchej munanchu wañusqasta kausarichimuyta?
Jehovaqa wañusqasta kausarichimuyta munan. Job sutiyoj runaqa chaymanta mana iskayrayarqachu. Pay Diosman nerqa: “[Sepulturapi kashajtiy] wajyamuwanki, noqataj uyarimusqayki”, nispa (Job 14:13-15 leey).
2. ¿Imaynapí yachanchej wañusqas kausarimunankutapuni?
Jesús kay jallpʼapi kashajtin, Dios payman atiyta qorqa wañusqasta kausarichimunanpaj. Chayrayku payqa 12 watayoj imillitata kausaricherqa, uj viudaj qhari wawantapis (Marcos 5:41, 42; Lucas 7:12-15). Lazarotapis kausarichillarqataj tawa diaña wañusqa kajtinpis. Jesusqa Jehovaman orakuytawan qhaparispa nerqa: “¡Lázaro! ¡Llojsimuy!”, nispa. “Wañusqa kasharqa chay Lazarotaj llojsimorqa” (Juan 11:43, 44). Kausashajta rikuspa familiaresnin, amigosninpis maytachá kusikorqanku.
3. ¿Wañusqa familiaresninchej, amigosninchej kausarimonqankuchu?
Biblia nin wañusqasta “Dios kausarichimunanta” (Hechos 24:15). Jesuspis nillarqataj: ‘Yuyarikunapaj sepulturaspi tukuy kajkunaqa kausarimonqanku’, nispa (Juan 5:28, 29, sutʼinchaynin). Chaywan nisharqa Diospa yuyayninpi kajkuna kausarimunankuta, may unayña wañupojtinkupis. Jesusqa kay jallpʼapi kashaspa wañusqasta kausaricherqa. ¿Kausarichimorqa chay runas cielopichu kasharqanku? Mana (Juan 3:13). Paykunaqa kay jallpʼapi kausakunankupaj kausarimusqankumanta kusisqa kasharqanku. Ñaupajta jinallataj Jesusqa tumpamantawan may chhika wañusqasta kausarichimonqa, paraisopi wiñaypaj kausakunankupaj.
ASTAWAN YACHAKUNA
Kaypi yachakusun wañusqas kausarimunankutapuni. Chantá yachakullasuntaj chayta yachay sonqochawasqanchejta, wañusqas kausarimunankuta suyakunapaj yanapawasqanchejta ima.
4. Jesusqa wañusqasta kausaricherqapuni
Kaypi yachakusun imaynatachus Jesús amigon Lazarota kausarichisqanta. Juan 11:14, 38-44 leeriychej, chantá VIDEOTA qhawariychej. Chaymantataj yachakojta tapuriy:
¿Imaynapí yachanchej Lázaro wañupusqantapuni? (39 versiculota qhawariy).
Kaypi piensarina, sichus Lázaro cieloman ripunman karqa chay, ¿kay jallpʼapi kausarimunanpaj Jesús a la fuerzachu cielomanta uraykuchimunman karqa?
5. Ashkhas kausarimonqanku
Salmo 37:29 leeriychej, chantá yachakojta tapuriy:
¿Kausarimojkuna maypitaj tiyakonqanku?
Jesusqa mana Jehovata sirvejkunallatachu kausarichimonqa, manaqa mana Jehovata rejsiyta aterqankuchu chaykunatapis. Hechos 24:15 leeriychej, chantá yachakojta tapuriy:
Wañusqas kausarimojtinku, ¿piwantaj tinkuyta munawaj?
Imaynatachus uj tata wawitanta sinchʼi puñuymanta rijchʼarichin, ajinallatataj Jesuspis wañusqasta rijchʼarichenqa.
6. Wañusqas kausarimunankuta yachayqa sonqochawanchej
Bibliapeqa Jairoj imillitan kausarimusqanmanta willan. Chayta leeriytaj llakiypi kajkunata sonqochan, kallpacharintaj. Imaynatachus Jesús kausarichisqanta yachanapaj Lucas 8:40-42, 49-56 leeriychej.
Jesusqa niraj Jairoj imillitanta kausarichishaspa, Jairoman nerqa: “Ama llakikuychu, creellaypuni”, nispa (50 versiculota qhawariy).
Wañusqas kausarimunankuta yachay, ¿familiaresninchejmanta pillapis wañupojtin yanapawasunmanchu?
Wañusqas kausarimunankuta yachay, ¿imaynatá yanapawasunman onqoyninchejpaj mana ima jampipis kajtin?
VIDEOTA qhawariychej, chantá yachakojta tapuriy:
¿Imataj uj imillitawan kasqa? Pay wañupusqantawan, ¿imataj tatasninta sonqocharqa, kallpacharqa ima?
WAKIN RUNAS NINKU: “Ni creenichu wañusqas kausarimunankuta”, nispa.
¿Imatá qan chaymanta yuyanki?
Ajinata nisojkunaman, ¿Bibliamanta ima versiculotataj rikuchiwaj?
¿IMASTÁ YACHAKUNCHEJ?
Kaypi yachakunchej Jehová may chhika wañusqasta kausarichimunanta, kausarichimuytataj munashasqanta, chaypaj Jesusman atiyta qosqanta ima.
Yuyarikunapaj
¿Dioswan Jesuswan wañusqasta kausarichimuyta munankuchu?
Kausarimojkuna, ¿maypitaj tiyakonqanku cielopichu chayri kay jallpʼapichu? ¿Imaraykú chayta ninki?
¿Imaraykutaj nisunman familiaresninchej, amigosninchej kausarimunankuta?
ASTAWAN YACHAKUNAYKIPAJ
Familiarninchej wañupojtin, ¿imataj mana anchata llakikunapaj yanapawasun? Chayta yachanaykipaj kayta leeriy.
“Familianchejpi pillapis wañupojtin” (¡Rijchʼariy!, 3 kaj 2018)
Familiarninchej wañupojtin, ¿Biblia yanapawasunmanchu llakisqa kashajtinchej? Chayta yachanaykipaj kay videota qhawariy.
¿Imataj wawitasta yanapanman uj familian, amigon chayri amigan wañupojtin? Chayta yachanaykipaj kay videota qhawariy.
¿Pikunataj cieloman riponqanku? ¿Pikunataj mana kausarimonqankuchu? Chayta yachanaykipaj kayta leeriy.
“¿Imatá Biblia nin kausarimuymanta?” (Chaytaqa Internetpi jw.org nisqapi tarinki)