Bibliap 47 kaq libron: 2 Corintios
Qillqaq: Pablo
Maypitaq qillqakurqa: Macedoniapi
Maykʼaqtaq qillqakuyta tukukurqa: ichapis, 55 watapi
ICHAPIS 55 watamanta paray tiempo tukukuchkarqa, cosecha tiempotaq qallarichkarqa. Corinto qutumanta wakin ruwaykuna apóstol Pablota llakichillachkarqankupuni. Pablo ñawpa kaq cartanta qillqasqanmanta manaraq achkha killa pasarqachu. Titota Corintoman kacharqankuña, Judeamanta santo hermanospaq qullqita tantananpaq, chaytapis corintios, Pablop ñawpa kaq cartanta ñawirispa imatachus nisqankuta yachananpaq, rinman karqa (2 Cor. 8:1-6; 2:13). ¿Imatataq Pablop cartanmanta nirqanku? Corinto qutumanta, Pablop qillqasqanta kasukuspa, ruwayninkumanta pesachikurqanku, kutirikurqanku ima, ¡Pablotaq chayta yachaspa mayta kusikurqa! Pablo Macedoniapi kachkaptin, Titoqa kay allin willaykunawan chayarqa, chaykunata uyarispa apostolpa sunqunpi conrintios hermanosninpaq may jatun munakuy karqa (7:5-7; 6:11).
2 Jinamanta Pabloqa watiqmanta paykunaman qillqarqa. Kay iskay kaq cartaqa sunquman chayanapaqjina karqa, kallpayuq kʼamiriykunatataq rikuchirqa. Kay cartataqa Macedoniamanta qillqakurqa, ichapis Titollataq chayta apanman karqa (9:2, 4; 8:16-18, 22-24). Pabloqa Corinto qutupi “may sumachaj apostoles” rikhurisqankumanta llakikurqa, chayrayku paykunaman qillqarqa, ‘llulla apóstoles, pantachispa trabajaqkuna’ kasqankuta rikuchirqa (11:5, 13, 14). Chay musuq qutu urmananpaqjina kachkarqa, Pablo apóstol kasqanmantataq mana allintachu parlachkarqanku. Chayrayku, kay 2 Corintios cartaqa paykunata sumaqta yanaparqa.
3 Pablo jinata nirqa: “Kaywanqa kinsa kutitaña wakichikuni qankunata watukoj jamunaypaj”, nispa (2 Cor. 12:14; 13:1). Payqa ñawpa kaq cartanta qillqachkaspa paykunata watukurikuq rinanpaq wakichikurqa, chaywanpis Pablo mana riyta atisqanrayku, paykunaqa mana ‘qʼasa sunqu qhipakurqanku’ (1 Cor. 16:5; 2 Cor. 1:15). Jinamanta Pabloqa ñawpa kaq risqanpi paykunawan juk kutillata karqa, 18 killasta, 50 watamanta 52 watakama, chay risqanpitaq Corintopi cristiano qututa sayarichirqa (Hech. 18:1-18). Aswan qhipamantaq Pabloqa, Corinto qutuman munakuywan waturikamurqa. Greciapi kimsa killata qhipakusqanpi, ichapis 56 watapi, juk chhika tiempollatapis Corintopi karqa, chaymantataq Romanos cartata apachinman karqa (Rom. 16:1, 23; 1 Cor. 1:14, 15).
4 Pablop, iskay kaq Corintios cartan, ñawpa kaq Corintios cartanwan, wak cartasninwan ima, Diospa yuyaychasqanpuni kasqanta yachakun. Kay cartaqa watiqmanta Corinto qututa aswan qayllamanta qhawarinanchikpaq yanapawanchik, jinamanta Dios yuyaychasqanmanjina Pablo qillqasqanqa, corintiostajina ñuqanchiktapis yanapawasunchik.
IMAYNATATAQ YANAPAWANCHIK
18 ¡Pabloqa kay 2 Corintios cartawan, Diosmanta runaman willananchikpaq sumaqta kallpachawanchik! Imaynatachus chayta ruwasqanta qhawana. Akllasqa cristianoqa, Diospa sumaq wakichisqa runa, mana Diospa Palabranta ranqhaspa puriq runachu, manaqa tukuy sunqunwan llamkʼaq runa. Payqa mana juk documentowanchu allinta rikuchikun, manaqa sumaq ruwayninwan. Diosmanta runaman willay may sumaq kaptinpis, payqa mana jatunchakunchu. Diospa kamachisninqa, pantaq runas kaspapis, runasman willayninkumanta qhapaq kayninku tʼuru vasospi kapun, tukuy rikunankupaq chay sumaq atiyqa Diosmanta jamun. Diospa kamachin kayqa may sumaqpuni, ‘Cristop sutinpi kachawasqanchikrayku’ kʼumuykukuq runas kananchik tiyan. ¡May jatun Diospa khuyakuyninqa! ¡Pablo willasqanqa sumaqpuni, “qankunata mañayku ama qhasipajchu kananta Diospa qhasilla kʼacha yanapayninta japʼisqaykichejqa”! (2:14-17; 3:1-5; 4:7; 5:18-20; 6:1.)
19 Pablo ruwasqanqa kikinta ruwananchikpaq sumaqpuni kachkan. Qallarinapaq payqa, Hebreo Qillqakunata allinpaq qhawarqa, allintataq sutʼincharqa, payqa sapa kuti chaykunamanta uqharirqa, yachachirqa, chaymanjinataq ruwarqa (2 Cor. 6:2, 16-18; 7:1; 8:15; 9:9; 13:1; Isa. 49:8; Lev. 26:12; Isa. 52:11; Eze. 20:41; 2 Sam. 7:14; Ose. 1:10). Chantapis payqa, qutumanta anciano kaspa hermanosmanta mayta dakukurqa, jinatataq nirqa: “Noqaqa may kusiywan tiyapuwasqanta tukuchisaq, kawsayniytapis tukuchillasaqtaq qankunarayku”, nispa. Payqa hermanosninta yanapaspa kawsayninta tukurqa, chaytataq qillqasqanpi sutʼita rikukun (2 Cor. 12:15; 6:3-10). Payqa yachachispa, kʼamirispa, Corinto qututa chiqanyachispa ima, mana saykʼurqachu. Mana laqhawan chhaqrukunanchikpaq sumaqta willariwanchik, jinata nispa: “Ama yananchakuychejchu uj yugollapi Diospi mana creejkunawan”. Pablo paykunata anchata munakusqanrayku, yuyayninkuta mana chʼichichanankuta munarqachu, “Evatapis katariqa chʼawkiyarqa, ajinata”, chayrayku sunqumantapacha paykunaman nirqa: “Qankuna kikiykichej qhawarikuychej, yachanaykichejpaj creeypi sinchʼitachus sayashankichej, chayrí manachus, chayta”. “Diosqa munakun pichus kusiywan qojta”, nispa chiqa cristianosjina sunqumantapacha kapuyninchikmanta qunanchikpaq kʼamiriwanchik, payllataq Diosman mayta agradecekurqa mana willay atina tukuy imasta qusqanmanta. Pablo corintios hermanosta mayta munakusqanrayku, paykunaqa sunqunpi qillqasqajina kachkarqanku. Pablo hermanosninpaq mana saykʼuspa llamkʼasqanqa, ancianos kikinta ruwanankupaq sumaqmanta yachachin. ¡Ñuqanchikpaqpis, Pablo ruwayninwan yachachisqanqa may sumaqpuni! (6:14; 11:3; 13:5; 9:7, 15; 3:2.)
20 Apóstol Pabloqa, Jehová “khuyakoj Tata, tukuy imapi sonqochaj Diostaj” kasqanta, nispa, ñakʼarichkaspa maypichus chiqamanta kallpata, sunquchakuyta ima, tarinanchikta sutʼita rikuchiwanchik. “Payqa sonqochawanchej tukuy llakiyninchejpi” sinchita sayananchikpaq, jinamanta salvakuspa musuq pachaman yaykunanchikpaq. Pablo juk sumaq suyaymanta parlaspa, nirqa: “tiyapuwanchej uj wasi Diospa ruwasqan janaj pachapi wiñaypaj; chayqa mana runaj makimpa ruwasqanchu”, nispa, chantapis nillarqataq: “Ajinaqa Cristopi kaj runaqa mosoj runañamin; ñawpa kawsayqa tukukapun, mosoj kawsaytaj chayamun”. Iskay kaq Corintios cartaqa, pikunachus janaqpacha Reinopi Pablojina kamachiqkunata, sumaq willaykunawan kallpachan (1:3, 4; 5:1, 17).