Llakiykuna: “May chhika llakiyniyoj” kanchej

TUKUYPIS llakiykunasniyojpuni kanchej, Diospa kamachisninpis. Uj salmista nerqa ‘llakiykuna sinchʼita phutichisqanta’ (Salmo 94:19). Jesuspis nillarqataj, qhepa pʼunchaykunapeqa “kay kausaypa llakiykunasninwan” Diosta mana sirviyta atinallanchejta (Lucas 21:34). Qanpis ichá llakisqa kashanki qolqeyki pisiyasqanrayku, familiaykipi problemas kasqanrayku chayri onqosqa kasqaykirayku. ¿Imaynatá Jehová yanapasunkiman?

“Sumaj ateyqa Diosmanta” jamun

Llakiykunata atipanapajqa yanapata necesitanchej. Apóstol Pablo nerqa, “may chhika llakiyniyoj” kasqanchejta, ‘imatachus ruwananchejta mana yachasqanchejta’, “urmachisqa” kasqanchejta ima. Jinapis nillarqataj ‘mana llakiywan atipachikusqanchejta’, ‘ñaupajman rillasqanchejtapuni’, “manataj tukuchisqachu” kasqanchejta. ¿Imataj llakiykunata aguantanapaj yanapawanchej? Tukuy atiyniyoj Diosmanta jamoj ‘sumaj atiy’ (2 Corintios 4:7-9).

¿Diosmanta jamoj sumaj atiyta japʼisqaykita yuyarikunkichu? Ichá uj discurso yanapasorqa Jehová mayta munakususqanta reparanaykipaj. Ichá sumaj kausay kananta runasman willasqayki creeyniykita sinchʼiyacherqa. Tantakuykunapis, runasman willaypis llakiykunata atipanapaj kallpata qowanchej, sonqonchejtataj tiyaykuchin Jehovata kusiywan sirvinapaj.

“Jehová Diosta allinta rejsiychej, reparaychejtaj imayna kʼachachus kasqanta”

Jehovaqa munan Gobiernonta ñaupajta maskʼananchejta, payta yupaychaypi ruwanasninchejtapis juntʼanallanchejtapuni (Mateo 6:33; Lucas 13:24). Jinapis ichá llauchʼiyashanki onqosqa kasqaykirayku, familiapi problemas kasqanrayku chayri amigosniyki, familiaresniyki churanakususqankurayku. Chayri ichá trabajorayku tantakuykunaman mana riyta atishallankichu. Chay tukuy imaswantaj mayta saykʼuwaj. Ajinapi rikukuspataj, ichá yuyawaj Jehová ashkha imasta mañawasqanchejta.

Jehovataj chayta yachan, chayrayku atisqallaykita ruwanaykita munan. Payqa yachan llakisqa, saykʼusqataj kashajtinchej tiempota necesitasqanchejta (Salmo 103:13, 14).

Imaynatachus Jehová Eliasta yanapasqanpi tʼukuriy. Uj kuti Eliasqa may llakisqa kasharqa, mayta manchikusqanraykutaj chʼinnejman ayqekorqa. ¿Imaynatá Jehová payta yanaparqa? ¿Pantasqa kasqantachu nerqa? Ruwayninta juntʼaj, ¿usqhayllata kutinantachu nerqa? Mana. Astawanpis iskay kutispi uj angelta kacharqa allillanmanta rijchʼarichinanpaj, mikhunatataj jaywananpaj. Eliastaj 40 diasninmanpis llakisqallapuni kasharqa. ¿Imatawantaj Jehová ruwarqa yanapananpaj? Ñaupajtaqa payta jarkʼayta atisqanta rikucherqa, chantá ‘uj kʼacha parlaywan’ sonqocharqa. Chaymantataj yuyaricherqa mana sapallanchu kashasqanta, manaqa ashkha runasraj payta yupaychashasqankuta. Ajinamanta Eliasqa kallpachasqa karqa profeta jina llankʼanallanpajpuni (1 Reyes 19:1-19). ¿Imatá chaymanta yachakunchej? Jehovaqa Elías llakisqa kashajtin pacienciakorqa, khuyakorqataj. Payqa kikillanpuni, qantapis Eliasta jina yanapasuyta munan.

Ñaupajta Jehovata yupaychashaspa imastachus ruwayta aterqanki chayta, ama kikinchaychu imastachus kunan ruwasqaykiwan. Atipanakuspi correj runa ashkha killasta chayri watasta mana correspaqa, mana chay ratopachachu ñaupajta jina correyta atin. Chaypajqa pisimanta pisi, watejmanta yachaykukunan tiyan. Cristianospis correj runas jinallataj kanchej. Imastachus Diosta yupaychaypi ruwayta munasqanchejmantaj yachaykukunanchej tiyan (1 Corintios 9:24-27). ¿Imastataj ruwayta munashanki? ¿Uj tantakuyman riypichu tʼukurishanki? Jina kajtenqa chayta ruwanaykipaj Jehovamanta yanapata mañakuy. Diosta yupaychaypi kallpata japʼisqaykiman jinataj, sutʼita rikunki Jehová “imayna kʼachachus kasqanta” (Salmo 34:8). Jehovata munakusqaykirayku pisi imasllata ruwajtiykipis, Jehovaqa chay ruwasqaykita may valorniyojpaj qhawan. Chayta ama qonqaychu (Lucas 21:1-4).

“Necesitasqay yanapata qowarqa”

Kay yachaqanaj qallariyninpi June sutiyoj hermanamanta parlarerqanchej. ¿Imaynatá Jehová payta yanaparqa? Pay nin: “Jehovaj yanapayninta mañakullarqanipuni. Uj kuti ñojchʼay willariwarqa llajtaypi uj jatun tantakuy kananta. Chay tantakuymantaj uj diata rerqani. ¡May sumajpuni karqa Diospa llajtanwan ujtawan kayqa! Chay jatun tantakoyqa necesitasqay yanapata qowarqa. Kunanqa watejmanta Jehovata yupaychashani, aswan kusisqataj kani. Yachakorqani mana karunchakunaychu kasqanta, hermanospa yanapayninkutataj necesitasqayta. Mayta kusikuni tiempo kashajtillanraj kutinpusqaymanta”, nispa.