Waj amigostawan ruwakuna
¿Imaraykú?
Mana allinpaj qhawasqanchej runasmanta karunchakuspaqa, astawan paykunata sajra ñawiwan qhawasunman. Noqanchej jina kajkunalla amigosninchej chaytaj, ichá yuyasunman yuyasqanchej, sientesqanchej, imatachus ruwasqanchej ima cheqan kasqanta.
Biblia niwanchej
“Qankunapis sonqoykichejta noqaykupaj jatunta kichariychej” (2 CORINTIOS 6:13).
¿Ima niyta munan? Sonqonchej nispaqa parlashan imatachus sientesqanchejmanta. Noqanchej jina kajkunallawan allinta kausakusun chayqa, mana saqesunchu wajkuna amigosninchej kanankuta. Chayrayku kallpachakunanchej tiyan mana noqanchej jina kajkunawanpis amigos kanapaj.
¿Imaynatá yanapawanchej waj amigostawan ruwakuy?
Pillatapis allinta rejsispaqa, entiendenchej imaraykuchus mana noqanchej jinachu wakin imasta ruwasqanta. Paywan masichakuspataj, manaña waj runata jinachu qhawanchej. Aswan allinpajtaj qhawanchej, kusikojtinpis kusikunchej, llakikojtintaj llakikunchej.
Nazaré sutiyoj warmimanta parlarina. Payqa waj llajtayoj runasta manaña chejnikorqachu. Pay nin: “Paykunawan khuska trabajarqani. Paykunaqa mana runas willawarqanku jinachu kasqanku. Waj culturayoj runaswan amigos ruwakuspaqa, manaña paykunata qhawaranchejchu, astawanqa munakunchej, allinpajtaj qhawanchej”, nispa.
¿Imatá ruwasunman?
Waj suyumanta chayri waj parlayta parlaj runaswan parlarinapaj kallpachakuna. Ichapis kayta ruwasunman:
Kausayninkumanta willarinawanchejta nisunman.
Noqanchejwan mikhurinankupaj wajyarisunman.
Kausayninkumanta willarishawasqanchejta allinta uyarina, reparanataj imachus paykunapaj importante kasqanta.
Imaspichus chay runas kausayninkupi rikukusqankuta yachaspaqa, paykunata entiendesun, manañataj paykunamanta sajrata yuyasunchu.