Diosqa kusiywan qojta munakun

¿Imayna regalotataj kusisqa japʼikunki? ¿Munakuywan jaywasojtinkuchu chayri qʼasa sonqolla jaywasojtinkuchu? Munakuywan jaywasusqankuta, ¿icharí? Tukuypis imayna sonqowanchus imatapis qoriwasqanchejta reparanchej. Astawanraj Diosninchejqa. Apóstol Pablo, imatachus kay 2 Corintios 9:7 nisqanta qhawarina.

¿Imaraykutaj Pablo chayta qhelqarqa? Payqa, Corintomanta hermanosta Judeapi hermanosta yanapanankupaj kallpachasharqa, pikunachus may pisisqas kasharqanku. Corintomanta hermanosta, ¿munajta mana munajtachu qonankupaj tanqasharqa? Mana. Astawanpis pay nerqa: “Sapa uj churachun sonqompi yuyasqanman jina, mana llakikuspa, nitaj kamachisqa jinachu, imaraykuchus Diosqa munakun pichus kusiywan qojta”, nispa. Kay yuyaychayta astawan ukhuncharina.

“Sapa uj churachun sonqompi yuyasqanman jina.” Pablo nisqanman jina, cheqa cristianoqa sonqon tanqasqanrayku qon. Chantapis, hermanosta yanapananpaj ñaupajmanta wakichikun. Bibliata ukhunchaj runa, nin: “Yuyasqanman jina” nisqa rimayqa, griego qallupi imatachus ruwanapi ñaupajmanta tʼukuriy niyta munan. Chayrayku uj cristianoqa, hermanosnin imaspichus pisichikusqanpi tʼukurin, chantá imaynatachus yanapananta qhawarin (1 Juan 3:17).

“Mana llakikuspa, nitaj kamachisqa jinachu.” Apóstol Pabloqa, cristianosman mana llakikuspa, nitaj kamachisqa jinachu qorinankuta yuyaycharqa. Bibliamanta sutʼinchaj uj libro nisqanman jina, llakikuspa qojqa, “qolqenta kacharinan kasqanmanta phutikun”. Kamachisqa jinalla qojtaj, tanqasqa jinalla qon. Pipis ajinata imallatapis qoriwajtinchej, ¿manacharí kusiywanchu japʼikusunman?

“Diosqa munakun pichus kusiywan qojta.” Pablo nisqaman jina, qoriyta munajqa, kusiywan chayta ruwanan tiyan. Chantapis imayna sonqowanchus qorisqanchejqa, kusisqa kanapaj yanapawanchej (Hechos 20:35). Kusiywanchus manachus qosqanchejtataj, tukuy reparayta atinku. Uj runa kusisqa kajtenqa, sonqonpitaj, uyanpitaj sutʼi yachakun. Chayrayku uj regalota kusiywan qojqa, japʼikojpa sonqon ukhukamapuni chayan, Diostataj kusichin.

Apóstol Pabloj nisqanqa, imayna sonqowanchus uj cristiano qonan kasqanta rikuchiwanchej. Tiemponchejta, kallpanchejta chayri kapuyninchejta qoshaspaqa, munasqanchejrayku, kusiywantaj qona. Arí, wajkunata, astawanraj pisichikojkunata yanapaspa kusisqa kasqanchejrayku qonachej. Jinata qorejtinchejqa, aswan kusisqa kasunchej. Diostaj astawan munakuwasun, imaraykuchus payqa, “kusiywan qojta” munakun.