Hermanosta yanapanapaj llankʼana

1, 2. 1) ¿Ima llakiypitaj Judeapi tiyakoj cristianos rikukorqanku? 2) ¿Imaynatá paykunata yanapakorqa?

KAY 46 wata chaynejta Judeapi jatun yarqhay karqa. Mikhunaqa may valesqa karqa, chaypi tiyakoj Cristoj yachachisqasnintaj, ni pisi mikhunata rantikunallankupajpis alcanzachikorqankuchu. Chayrayku mana yarqhayllapichu rikukusharqanku, manaqa wañuy patapiña. Chaywanpis Jehovaqa cheqa sonqo kamachisninta yanapanman karqa, chay kutikamataj ni mayqen cristiano rikusqachu Jehová ajinata yanapasqanta. ¿Imataj karqa?

² Antioquía llajtamanta (Siria) judío cristianos, mana judío cristianos imaqa Jerusalenmanta, Judeamanta ima hermanosninkumanta llakikusqankurayku yanapanankupaj qolqeta tantarqanku. Chaymantataj Bernabetawan, Saulotawan ajllarqanku, chay tantasqanku qolqeta Jerusalenmanta ancianosman apanankupaj (Hechos 11:27-30; 12:25 leey). Judeamanta hermanosqa, Antioquiamanta hermanos ajinata yanapasqankumanta, ¡may kusisqachá kasharqanku!

3. 1) ¿Imaynamantá Diospa llajtan Antioquiamanta cristianos jina ruwan? (“Hermanosta mayta yanapakun” nisqa recuadrotawan qhawariy.) 2) ¿Ima tapuykunatá kay yachaqanapi ukhuncharisun?

³ Chay kutipi cristianos, waj lugarmanta hermanosninkuman yanapata apachisqankoqa, ñaupaj kutirayku qhelqasqa karqa. Kunanpis Antioquiamanta hermanos jinallataj, waj lugarpi tiyakoj hermanosninchejta yanapanchej, llakiypi rikukusqankuta yachaytawankama.a Hermanosta yanapanapaj llankʼaywan, Diospa llajtanpi waj ruwaykunawan imapichus kikin kasqanta entiendenapajqa, kinsa tapuykunaman kutichina: ¿Imaraykutaj wajkunata yanapayta Diosta sirviywan kikinchanchej? ¿Imaraykutaj hermanosta yanapanapaj llankʼanchej? ¿Imaynatá noqanchejtapis yanapawanchej?

¿Imaraykutaj wajkunata yanapayta Diosta sirviywan kikinchanchej?

4. ¿Imatataj Pablo cristianospa ruwayninkumanta Corintiosman sutʼincharqa?

⁴ Apóstol Pabloqa Corintiosman iskay kaj cartanpi, cristianospa ruwayninkumanta parlan. Chay carta ajllasqa cristianospaj kajtinpis, “waj ovejas[manta]” kajkunata yanapallantaj (Juan 10:16). Pablo sutʼinchasqanman jinaqa, iskay ruwaykunata juntʼananchej tiyan. Ujnenqa runasman willay, yachachiy ima, nisunman Dioswan “allinyakuna kasqanta parla[sqanchej]” (2 Cor. 5:18-20; 1 Tim. 2:3-6). Ujnintaj hermanosta yanapanapaj llankʼasqanchej, Pabloqa llakiypi kaj hermanosman “yanapata” apanamanta parlarqa (2 Cor. 8:4). Chay iskaynin ruwaykunapajqa griego parlaypi diakonía palabrallata churakorqa. ¿Imaraykutaj kikin palabrallata churakorqa?

5. ¿Imaraykutaj Pablo iskay ruwaykunapaj kikin palabrallata oqharerqa?

⁵ Pabloqa kikin palabrallata chay iskaynin ruwaykunapaj oqharispa, hermanosta yanapanapaj llankʼayqa, qotuchakuypi ruwaykunawan ujlla kasqanta nisharqa. Aswan ñaupajta kayta sutʼincharqa: “Evangeliopeqa imaymana sirviykuna tiyan; chaywampis uj Señorllata sirvinchej. [...] Imaymana ruwaykuna tiyan; chaywanpis [...] tukuy imasta ruwanapaj atiyta qoj Espiritoqa ujlla”, nispa (1 Cor. 12:4-6, 11). Chay ruwaykunataj Diosta yupaychanapaj kasqanta nerqab (Rom. 12:1, 6-8). Chayraykuchá Pabloqa “hermanosta yanapanapaj” tiempochakoj (Rom. 15:25, 26).

6. 1) Pablo sutʼinchasqanman jina, ¿imaraykutaj hermanosta yanapay, Diosta yupaychaywan uj ruway jinalla? 2) Imaynatachus Jallpʼantinpi hermanosta yanapanapaj llankʼakusqanmanta sutʼinchay (“Jatun llakiy kajtin” nisqa recuadrota qhawariy, 214 paginapi).

⁶ ¿Imaraykutaj hermanosta yanapay, Jehovata yupaychaywan uj ruway jinalla? Pabloqa Corintomanta hermanos chayta entiendenankupaj, llakiypi kajkunata cristianos yanapasqankoqa, “Cristoj evangelionta kasusqa[nkurayku]” kasqanta nerqa (2 Cor. 9:13). Nisunman cristianosqa Cristoj yachachiykunasninman jina ruwayta munaspa, hermanosninkuta yanapanku. Ajinamanta, Pablo nisqanman jinaqa “Diospa qhasilla kʼacha yanapaynin” hermanosta yanapasqankupi rikukun (2 Cor. 9:14; 1 Ped. 4:10). Chayrayku 1976 watapi 1 junio killamanta Torremanta Qhawaj revistapi, hermanosta yanapanapaj llankʼaymanta parlaspa kayta nerqa: “Ni jaykʼaj yuyanachu Jehová Dios, ni Churin Jesucristopis chay ruwayta pisipaj qhawasqankutaqa”, nispa. Arí, hermanosta yanapanapaj llankʼaspaqa, Diosta yupaychashanchej (Rom. 12:1, 7; 2 Cor. 8:7; Heb. 13:16).

¿Imaraykutaj hermanosta yanapanapaj llankʼanchej?

7, 8. ¿Imaraykutaj hermanosta yanapanchej? Sutʼinchay.

⁷ ¿Imaraykutaj hermanosta yanapanapaj llankʼanchej? Pabloqa, Corintiosman iskay kaj cartanpi chaymanta parlarqa (2 Corintios 9:11-15 leey). Chay versiculospi Pabloqa, “yanapata hermanosman” qospa kinsa imasta ruwasqanchejta nerqa. Chaykunamanta parlarina.

⁸ Uj kaj: yanapasqanchejqa Jehovata jatunchan. Chay phishqa versiculospi Pabloqa, hermanos Jehovaman agradecekusqankumanta parlarqa. Pablo kaykunata nerqa: “Diosman graciasta qonankupaj” “Diosman graciasta qollankutaj” nispa (11, 12 versículos). Chantapis wajkunata yanapaspa, cristianos imaynatachus “Diosta jatuncha[sqankumanta]” parlarqa. “Diospa qhasilla kʼacha yanapaynin[mantapis]” allinta parlallarqataj (13, 14 versículos). Tukuchananpajtaj kayta nerqa: “Diosman graciasta qona”, nispa (15 versículo; 1 Ped. 4:11).

9. ¿Imaynatá wajkunata yanapasqanchej runaspa yuyasqankuta tijrachin? Sutʼinchay.

⁹ ¿Imatataj kay tiempopi Jehovaj kamachisnin wajkunata yanapaymanta yuyanku? Pablo jinallataj yuyanku Jehovata jatunchasqanta, yachachisqankutapis allinpi qhawachisqanta (1 Cor. 10:31; Tito 2:9, 10). Arí, hermanosta yanapasqanchejta rikojkunaqa Jehovamanta, Testigosninmantapis pantasqanta yuyasqankuta tijrachinkuman. Sutʼincharinapaj, sinchʼi wayra pasasqantawan imachus kasqanta qhawarina. Uj warmeqa chay lugarpi tiyakorqa, wasi punkunpitaj uj letrero churasqa kasharqa, nerqataj: “Jehovaj testigosnin ama takamuychejchu”, nispa. Uj pʼunchaytaj wasinpa chimpanpi runas uj wasita allinchashasqankuta rikorqa. Payqa ashkha pʼunchaykunata chaypi llankʼajkunata qhawarqa, uj pʼunchaytaj chimpaspa pikunachus kasqankuta tapurerqa. Jehovaj testigosnin kasqankuta yachaspataj, tʼukulla qhepakorqa, nerqataj: “Pantasqata qankunamanta yuyasharqani”, nispa. Chaymantataj chay warmeqa punkunpi churasqan letrerota orqhorparqa.

10, 11. 1) ¿Imastaj rikuchin, hermanosninchejta mana imamanta pisichikunankupaj yanapasqanchejta? 2) ¿Hermanosta yanapaypi llankʼajkunapaj ima publicaciontaj tiyan? (“Uj sumaj yanapa” nisqa recuadrota qhawariy.)

¹⁰ Iskay kaj: hermanosninchejta ni imamanta pisichikunankupaj yanapanchej (2 Cor. 9:12 qallariynin). Hermanosninchejtaqa pisichikojtinku mayta yanapayta, sonqochayta ima munanchej. ¿Imaraykú? Qotuchakuymanta hermanos uj cuerpo jinalla kasqanchejrayku. Chayrayku “sichus ujnin ima nanasqa kanman chayqa, tukuyninku nanachikunku chay ujwan khuska” (1 Cor. 12:20, 26). Ashkha Testigosqa, hermanosninkuta munakusqankurayku, khuyakusqankuraykutaj imallapis kajtin, ruwanasninkuta saqespa chay rato herramientasninkuta oqhariykukuspa yanapaj rinku (Sant. 2:15, 16). Sutʼincharinapaj, Japón suyupi 2011 watapi mama qocha yaku wasaykorqa (tsunami). Estados Unidosmanta sucursaltaj, Estados Unidospi Comités Regionales de Construcción nisqaman cartata apacherqa, wakin “wakichisqa hermanos” Tantakuna Wasista watejmanta ruwaypi yanapakoj rinankupaj. ¿Imatá hermanos ruwarqanku? Semanasnillanman 600 hermanos jina yanapaj riyta munasqankuta nerqanku, Japonman avionpi rinankupajpis paykuna pagakunankuta. Estados Unidospi sucursalqa “tʼukunapaj jina” kasqanta nerqa. Japonmanta uj hermano, waj suyumanta hermanota imaraykuchus chayman risqanta tapojtin, kayta nerqa: “Japonmanta hermanosniykuwanqa uj cuerpo jinalla kayku, llakiyninkoqa llakichillawaykutaj”, nispa. Hermanosqa runa masinkuta munakusqankurayku, hermanosninkuta yanapanankupaj kausayninkutapis wañuypataman churankuc (1 Juan 3:16).

¹¹ Mana Testigo kajkunapis, ruwasqanchejmanta agradecekullankutaj. Sutʼincharinapaj, 2013 watapi Arkansas llajtapi (Estados Unidos) uj jatun llakiy karqa. Chayman Testigos usqhayllata yanapakoj risqankumanta, uj periodicopi ajinata willakorqa: “Ima llakiypajpis, imaynachus Jehovaj testigosnin llankʼanankupaj wakichisqa kashasqankoqa, uj sumaj ruwaypuni”, nispa. Arí, Pablo nerqa jina, hermanosninchej llakiypi rikukojtinkoqa pisichikusqankumantapis astawanraj juntʼachinchej.

12-14. 1) ¿Imaraykutaj hermanosta cristiano ruwanasninkuman kutinankupaj yanapananchej tiyan? 2) ¿Imatataj wakin hermanos nerqanku cristiano ruwanasninkuman kutiy sumajpuni kasqanmanta?

¹² Kinsa kaj: llakiypi tarikoj hermanosta cristiano ruwanasninkuman kutinankupaj yanapanchej. ¿Imaraykú chayta ruwanapuni tiyan? Imaraykuchus Pablo nerqa jina, yanapasqa kajkunaqa “may chhikata Diosman graciasta” qonku (2 Cor. 9:12 tukukuynin). Cristiano ruwanasninkuman kutispa, Jehovaman agradecekusqankoqa may sumajpuni (Fili. 1:10). Kay 1946 watamanta Torremanta Qhawaj revistapi nerqa, hermanos qolqeta tantasqankuta Pablo allinpaj qhawasqanta. Imaraykuchus, pisichikoj hermanosqa yanapata japʼerqanku, jinamantataj Jehovamanta willanallankupajpuni kallpachasqas karqanku. Kay tiempopipis kikillantataj yanapayta munanchej, imaraykuchus hermanosqa watejmanta willaspa, mana runa masillankutachu sonqochanku, manaqa paykunapis sonqochakullankutaj (2 Corintios 1:3, 4 leey).

¹³ Wakin hermanosqa yanapasqa kaspa chayta repararqanku. Imajtinchus watejmanta Diosmanta willaj riyta aterqanku, jinamantataj sonqochakorqanku. Uj hermano nerqa: “Familiaypajqa runasman willaj riy, may sumajpuni karqa. Runa masiykuta yanapaspa, llakiykunamanta samarikorqayku”, nispa. Uj hermanataj nerqa: “Diospaj llankʼaspaqa ima llakiypichus rikukushasqaymanta qonqaporqani. Nitaj manchachikorqanichu”, nispa. Waj hermanapis nillarqataj: “Ashkha imasta mana allinchayta atejtiykupis, Diosmanta willayqa noqata, familiayta ima kallpachawarqayku. Wajkunaman mosoj pachamanta parlarispaqa, Dios tukuy imata mosojyachinanpi astawan atienekorqayku”, nispa.

¹⁴ Ajina llakiypi rikukojkunaqa, usqhayllata watejmanta tantakunanku tiyan. Kiyoko sutiyoj hermana, pichus 60 watayoj jina karqa, mama qocha yaku wasariykamusqanrayku sayashaj qhepakorqa. Imachus kananta mana yachaspataj mancharisqa kasharqa. Jinallapi uj anciano autonpi tantakuyninkuta ruwanankuta nerqa. Chay hermana yuyarikun: “Anciano, warmin, waj hermana, noqa ima autopi tantakorqayku. Noqallayku tantakojtiykupis, chay llakiymantaqa qonqaporqani. Sonqoypis tiyaykorqa. Chaypi repararqani tantakuykunaqa, may sumajpuni kasqanta”, nispa. Waj hermanataj chay jina llakiykuna pasayta tantakuykunaman risqanmanta, kayta nerqa: “Tantakuykunaqa maytapuni yanapawarqa”, nispa (Rom. 1:11, 12; 12:12).

Hermanosta yanapasqanchejqa wiñaypaj kanqa

15, 16. 1) ¿Imatataj Pablo sutʼincharqa hermanosta yanapanapaj llankʼaymanta parlashaspa? 2) ¿Imaynatataj kunanpis yanapawanchej?

¹⁵ Pabloqa hermanosta yanapanapaj llankʼaymanta parlashaspa, Corintopi hermanosman sutʼincharqa paykuna, waj cristianospis chay llankʼaypi yanapakusqankurayku yanapasqa kanankuta. Pablo nerqa: “Paykunataj [Jerusalenmanta judío cristianos pikunachus yanapasqa karqanku] mañapusonqachej Diosmanta tukuy sonqo munakuywan, Diospa qhasilla kʼacha yanapaynin qankunapi kasqanrayku”, nispa (2 Cor. 9:14). Arí, judío cristianosqa Corintopi hermanospaj, jinallataj mana judío kajkunapajpis Diosmanta mañapunkuman karqa, jinamantataj munakuyninku astawan wiñanman karqa.

¹⁶ Pabloj nisqan cheqapuni kasqanmanta parlaspa, 1946 watapi 15 abril killamanta Torremanta Qhawaj revistapi, nerqa: “Diospa tʼaqasqa llajtanmanta kajkunaqa, waj lugaresmanta hermanosta yanapaspa astawan ujchasqa kanku”, nispa. Hermanosta yanapanapaj llankʼajkunaqa, ajinapuni kasqanta reparanku. Maypichus yaku juntʼaykorqa chaypi yanapakoj anciano, kayta nerqa: “Kay llankʼayqa hermanosniywan aswan ujchasqa kanaypaj yanapawarqa”, nispa. Waj hermanataj yanapasqankumanta agradecekuspa, jinata nerqa: “Hermanosninchejwan kayqa Paraisopiñapis kashasunman jina”, nispa (Proverbios 17:17 leey).

17. 1) ¿Imaynamantá Isaías 41:13 nisqan cheqapuni kasqan rikukun hermanosta yanapakojtin? 2) ¿Imaynatá chay ruway Jehovata jatunchan, ujchasqa kanapajtaj yanapawanchej? Wakinmanta parlariy. (“Hermanos Jallpʼantinpi yanapanku” nisqa recuadrotawan qhawariy.)

¹⁷ Maypichus llakiykuna tiyan chayman hermanos yanapaj rejtinkoqa, chay llakiypi tarikoj hermanos sutʼita rikunku Jehová kayta nisqan cheqapuni kasqanta: “Noqaqa paña makiykimanta japʼisoj Señorniyki Tata Dios kani, niykitaj: Ama manchachikuychu; noqa yanapasqayki”, nispa (Isa. 41:13). Uj jatun llakiymanta salvakoj hermana, kayta nerqa: “Chay jina jatun llakiypi mana yanapajniyoj jina rikukorqani, chaywanpis Jehová yanapawarqa. Hermanospis maytapuni yanapawarqanku”, nispa. Jatun llakiy karqa chaypi tiyakoj iskay ancianos, qotuchakuyninkumanta ajinata nerqanku: “Jallpʼa ikhakuy kasqanrayku sinchʼi ñakʼariy karqa, Jehovataj hermanosnejta yanapawarqayku. Waj lugarespi hermanos yanapasqankumantaqa uyarillaj kayku, kunantaj noqaykupuni rikuyku”, nispa.

¿Qanpis yanapakuwajchu?

18. ¿Imatataj ruwawaj wajkunata yanapaypi llankʼanaykipaj? (“Imatachus ruwananta yachananpaj yanaparqa” nisqa recuadrotawan qhawariy.)

¹⁸ ¿Wajkunata yanapaspa llankʼayta munawajchu? Tantakuna Wasista ruwaypi yanapakojkunamanta chayman rinankupaj ajllakun. Chayrayku qotuchakuyniykimanta ancianosmanta uj solicitudta mañakuwaj. Uj anciano pichus unaytaña chaykunapi yanapakun, ajinata nin: “Ni jaykʼaj jatun llakiy kan chayman sapallaykimanta riychu, chaymanta comisión riyta atisqaykita nisojtillan rinayki tiyan”, nispa. Ajinamanta, chay llankʼayqa sumajta ruwakonqa.

19. ¿Imaraykutaj nisunman hermanosta yanapajtinchej Cristoj yachachisqasnin kasqanchej sutʼi rikukusqanta?

¹⁹ Hermanosta yanapanapaj llankʼaspaqa, “purajmanta munanakuychej” nisqa kamachiyta kasukunchej. Chay jinamantataj, Cristoj yachachisqasnin kasqanchejta rikuchinchej (Juan 13:34, 35). Ashkha hermanos chay llankʼaypi yanapakushanku, Diospa Reinonman cheqa sonqollapuni kajkunata yanapaspataj, Jehovata jatunchanku. ¡Chayqa may sumajpuni!