Sonqoykita nanachisojtinku: Wakin kutisqa wajkuna contranchejpi imatapis ruwankuman

ICHÁ qanpis ajinapi rikukorqanki. Lindaqa suwakusqanta nispa tumpasqankumanta may phiñasqa kasharqa. Llakikunapaj jinataj, wakin hermanosninchejqa waj hermanos imatapis mana allinta ruwasqankurayku Diosmanta karunchakuyta qallarinku. ¿Qanpis ajinallapitajchu rikukorqanki?

¿Pillapis ‘tʼaqayta atiwasunmanchu Diospa munakuyninmanta’?

Uj hermano ima sajratapis ruwawajtinchejqa, ichapis mana perdonayta atillasunmanchu, imajtinchus suyanchej hermanonchejqa munakuwasqanchejrayku imatapis ruwananta (Juan 13:34, 35). Chayrayku mayqen hermanopis sonqonchejta nanachiwajtinchejqa mayta phiñakusunman, sonqo pʼakisqataj qhepakusunman (Salmo 55:12).

Bibliaqa niwanchej wakin kutis wajkuna contranchejpi ima sajratapis ruwanankuta (Colosenses 3:13). Pillapis ima sajrata ruwawajtinchejqa mayta phiñakusunman. ¿Imataj yanapawasunman mana phiñakunapaj? Bibliaj wakin yuyaychaykunasninpi tʼukuriy. Chay yuyaychaykunamanta kinsata qhawarina.

Tatanchej Jehovaqa tukuy imata qhawamushan. Jehovaqa tukuy imata qhawamushan, wajkuna sajrata ruwawasqanchejrayku sufrisqanchejtapis (Hebreos 4:13). Llakikojtinchejqa paypis llakikullantaj (Isaías 63:9). Payqa mana saqenchu wakin problemas chayri llakiykuna, manachayrí wakin hermanos paypa munakuyninmanta tʼaqanawanchejta (Romanos 8:35, 38, 39). Noqanchejpis Jehová jina ama saqenachu ni pi, nitaj imapis Diospa munakuyninmanta tʼaqanawanchejta.

Perdonayqa mana ninayanchu sajra ruwaykunata allinpaj qhaway. Pillapis contranchejpi sajrata ruwasqanta perdonaspaqa, mana nishanchejchu chay ruwawasqanchej allillan kasqanta. Jehovaqa juchata manapuni allinpajchu qhawan, jinapis juchata ruwaj perdonanapaj jina kajtenqa perdonan (Salmo 103:12, 13; Habacuc 1:13). Jehovaqa mana “wiñaypajchu” phiñakun, pay jina perdonananchejtataj munan (Salmo 103:9; Mateo 6:14).

Phiñakuspaqa ni imata tarisunchu. Uj llasa rumita makiykiwan patapi japʼishasqaykipi tʼukuriy. Ichapis uj ratota japʼiyta atillanki. Jinapis, ¿imataj kanman unayta chay rumita patapi japʼejtiyki? Ichapis uj horata chayri astawan japʼispaqa saykʼupuwaj. Chay rumeqa kasqan jinallapuni kakushan, jinapis unaytaña patapi japʼisqaykirayku aswan llasa kasqanta reparanki. Kikillantaj wajkunapaj phiñasqallapuni kaywanpis. Uj imitallamanta phiñakojtinchejpis, tiempo pasasqanman jinaqa mayta llakichiwasunman. Chayrayku Jehovaqa ama phiñasqallapuni kanata niwanchej, imajtinchus yachan imachus noqanchejpaj allin kasqanta (Proverbios 11:17).

“Jehovapunipis parlashawanman jina karqa”

¿Imataj Lindata yanaparqa manaña chay hermanapaj phiñasqallapuni kananpaj? Paytaqa yanaparqa imaraykuchus Biblia wajkunata perdonana kasqanta nisqanpi tʼukuriy (Salmo 130:3, 4). Payqa yuyarikorqa wajkunata perdonajtinchejqa, Jehovapis perdonanallawanchejtataj (Efesios 4:32–5:2). Bibliaj nisqan sonqonman chayasqanta yuyarikuspa, pay nin: “Jehovapunipis parlashawanman jina karqa”, nispa.

Tiempowantaj Lindaqa pipajchus phiñasqa kasharqa chay hermanata sonqomantapacha perdonarqa, kunantaj sumaj amigas kanku. Lindaqa Jehovata sirvishallanpuni. Jehová Diosqa munan qanpis wiñaypaj payta sirvinaykita.