Tantakuyniykuman waqyariyku

MAYPICHUS Jehovamanta sutʼinchaqkuna tantakunku chayniqta maykʼaqllapis pasarqanki chayqa, ichá tapurikurqanki: “¿Imatá tantakuyninkupi ruwankurí?, nispa. ¿Yacharqankichu kay tantakuykunaman tukuypis jamuyta atisqankuta? Arí, tukuy munaqkuna kay tantakuykunaman jamuyta atinku.

Ichapis manaraq kay tantakuykunaman jamuchkaspaqa, imapaqchus tantakusqaykuta, imatachus tantakuyniykupi ruwasqaykuta, kay tantakuykunaman ñawpaq kutipi jamuqkuna imatachus nisqankuta ima, yachayta munanki.

‘Tukuy runasta tantay’

Unay tiempomantapacha runasqa, Jehovata yupaychanankupaq, paymanta yachakunankupaq ima, tantakuq kanku. Yaqha kimsa waranqa wata ñawpaqta Diosqa, Israelpi kay kamachiyta churarqa: “Tukuy runas tantakamunanku tiyan, qharis, warmis, wawas, llajtasniykichejpi tiyakoj forasteros ima, kay leymanta leejta uyarinankupaj, Señorniykichej Tata Diosta jatunchayta yachaqakunankupaj, manchachikuspa chay leypi tukuy nisqanman jina”, nispa (Deuteronomio 31:12). Chay tantakuypiqa, machu runasta, waynuchusta, sipaskunata ima, Diosta yupaychanankupaq, kasukunankupaq ima, yachachiq kanku.

Aswan qhipamantaq chiqa cristianosqa, Diosta yupaychanankupaq tantakuytaqa, allinpaq qhawaq kanku, chayrayku apóstol Pablo jinata qillqarqa: “Purajmanta kallpachanakuspa yanaparinakunachej, munanakuypi kawsananchejpaj, allin ruwaykunata ruwananchejpajtaj. Chaypajqa Diosta yupaychana tantakuytaqa ama saqeychejchu, imaynatachus wakin saqenku, ajinata. Astawanqa kallpachanakuspa ujkuna ujkunata sonqosninchejta oqharinakuna, astawampis Señorpa jamunan pʼunchay qayllapiña kasqanta reparaspa” (Hebreos 10:24, 25). Kaypi tʼukuriy; familiapi kaqkuna astawan khuska kaspaqa, ¿astawancharí jukchasqas kawsakunku? Jinallataq Diospa kamachisninwanpis; Diosta yupaychanankupaq tantakuspaqa, astawan jukchasqas kanku.

Kay tiempopipis Jehovamanta sutʼinchaqkunaqa, Tantakunapaq Wasiykupi semanapi iskay kutita tantakuyku, pachantinpitaq kikin yachachiykunamanta yachakuyku. Kay tantakuykunataq Bibliap yuyaychasqanta allinpaq qhawananchikpaq, japʼiqananchikpaq, yachakusqanchikmanjina kawsakunanchikpaq ima, wakichikun. Kay tantakuyman jamuqkunaqa, niraq tantakuy qallarichkaptin, tantakuy tukukuptin ima, ‘kallpachanakunankupaqjina’ parlapayanakunku (Romanos 1:12). ¿Imayna sapa tantakuy wakichisqa kachkan?

Bibliamanta urqhusqa umallirichiy

Jehovamanta sutʼinchaqkunap juknin tantakuyninqa, sábado chayri domingo pʼunchaypi ruwakun, chay tantakuypitaq juk hermano tukuy jamuqkunapaq juk discursota qun. Diospa Churin Jesuspis, Urqupi Bibliap yuyaychasqanmanjina juk discursota qurqa (Mateo 5:1; 7:28, 29). Apóstol Pablopis, Atenaspi juk discursota qullarqataq (Hechos 17:22-34). Kunan tiempopipis kay tantakuypiqa jamuqkunata yanapanaqpajina sumaq discursosta qukun.

Kay tantakuyqa, Canten alabanzas a Jehová, nisqa libromanta juk takinata takispa qallarikun.a Pikunachus takinankupaq sayaykuyta munaqkunaqa, sayaykuyta atinkuman. Chantá juk hermano Diospa bendicionninta mañakuytawan, wak hermano kimsa chunka minutosllapi uyariqkunapaq juk discursota qun (“Tukuypaq sumaq umallirichiykuna”, nisqa recuadrota ñawiriy). Umallirichiqqa, uyariqkunata paywan khuska Bibliamanta pʼitikunata maskʼanankuta, ñawirinankuta ima nin. Bibliayki kapusuptinqa, kay tantakuyman apamuwaq chayri tantakuy manaraq qallarichkaptin mayqin hermanomantapis Bibliata mañarikuwaq.

Torremanta Qhawaq revistamanta yachaqanapaq

Tukuypaq umallirichiy tukukusqantawantaq, Torremanta Qhawaq revistamanta yachaqanapaq tantakuy qallarin. Chaypitaq Torremanta Qhawaq revistamanta juk yachaqanata juk horapi tapuykunawan ukhunchakun. Jinamanta kay tantakuypi kaqkunaqa, apóstol Pablop tiemponmanta bereanosjina ruwanku, pikunachus “Diospa Palabranta tukuy sonqo japʼikorqanku” ukhuncharqankutaq (Hechos 17:11).

Kay tantakuyqa, juk takiywan qallarin, Torremanta Qhawaq revista mana kapusuptintaq juk hermano jaywasunqa. Kunallanraq kay: “Padres, eduquen a sus hijos con amor”, “No devuelvan mal por mal a nadie” chantá, “Pronto acabará todo el sufrimiento”, nisqa yachaqanasta ukhuncharqayku. Kay tantakuypi juk yachaqanata tapuykunawan ukhunchakuptinpis, munaqkunalla kutichiyta atinku, chaypaqtaq ñawpaqmantapacha yachaqanata, Bibliap pʼitikunasninta ima ñawirinku. Chantapis kay tantakuyqa juk takiywan, juk mañakuywan ima tukuchakun (Mateo 26:30; Efesios 5:19).

Bibliamanta Yachaqanapaq

Jehovamanta sutʼinchaqkunaqa, semanapi wak pʼunchay tantakullaykutaq, chay tantakuytaq juk hora tawa chunka phichqayuq minutospi ruwakun, kimsapitaq tʼaqasqa kachkan. Ñawpaq kaqqa, Bibliamanta Yachaqanapaq tantakuy nisqa sutichakun, kaytaq iskay chunka phichqayuq minutospi ruwakun, chaywanpis kay tantakuyqa Bibliata sumaqta riqsinapaq, yachakusqanchikmanjina kawsanapaq, Jesuspa astawan sumaq discipulosnin kanapaq ima, ruwakun (2 Timoteo 3:16, 17). Torremanta Qhawaq revistamanta yachaqanapaq tantakuypijina, Bibliamanta Yachaqanapaq tantakuypiqa juk yachaqanata tapuykunawan ukhunchakun, chay tapuykunamantaq munaqkunalla kutichiyta atinku. Chay yachaqanataq juk folletomanta, chayri juk libromanta urqhukun, kaykunatataq Jehovamanta sutʼinchaqkuna urqhunku.

Chaywanpis ichá tapukunki: “¿Imaraykutaq mana Bibliallatachu ñawirinkichik?, nispa. Unay tiempomanta Diospa kamachisninpis mana Diospa Palabrallantachu ñawiriq kanku. Biblia nin: “Diospa leynin qhelqasqa librota, leesqankutataj allinta sutʼinchaspa runasman entiendecherqanku”, nispa (Nehemías 8:8). Arí, kay qhipa wataspipis, Bibliap profeciasninta sumaqta riqsinapaq, “Las profecias de Isaias”, “Las profecias de Daniel”, “Apocalipsis” nisqa librota ima ukhuncharqayku.

Diosmanta Parlayta Yachanapaq tantakuy

Bibliamanta Yachaqanapaq tantakuy tukukuptintaq, Diosmanta Parlayta Yachanapaq tantakuy qallarin, kay tantakuytaq kimsa chunka minutospi tukukun, ‘allin yachachiq’ kanankupaqtaq hermanosta yanapan (2 Timoteo 4:2). ¿Maykʼaqllapis Diosmanta, chayri Bibliamanta, juk amigoyki chayri wawayki, mana kutichiyta atinaykipaqjina juk tapuyta ruwasurqachu? Kay tantakuyqa, mana kutichiyta atinapaqjina tapuykunata, Biblia nisqanmanjina kutichinapaq yanapawanchik. Jinamanta profeta Isaiasjina niyta atinchik: “Tukuyta Kamachej Tata Diosqa yachayniyojkunaj parlayninkuta qowarqa, chaytaqa saykʼusqasman parlaspa paykunata kallpachanaypaj”, nispa (Isaías 50:4).

Kay tantakuyta qallarinapaqqa, juk hermano chay semanapaq Bibliamanta juk tʼaqata chayri astawan tʼaqasta ñawirisqaykumanta juk discursota qun, chantá tantakuypi kaqkunata, chay tʼaqasta ñawirisqanku imaynatachus kawsayninkupi yanapasqanmanta parlarinankuta mañan. Chay tukukuptinkamataq, wak hermano, Bibliata 4 minutospi ñawirin, chantá juk hermana 5 minutospi Bibliamanta juk yachaqanata imaynatachus sutʼinchanata rikuchin, chantá wak hermana chayri juk hermano jinallatataq ruwan.

Sapa juk hermano discursonta tukuptinqa, juk wakichisqa hermano, Benefíciese de la Escuela del Ministerio Teocrático nisqa librowan imastachus allinta ruwasqanta sutʼinchan, chantá imastachus astawan allinta ruwanan kasqanmanta sapallanpi yuyaychan.

Kay tantakuyqa, Bibliamanta sumaq yachachiq kanankupaq, sumaqta ñawiriyta, parlayta, sutʼinchayta ima yachanankupaq tukuy hermanosta yanapan. Kay tantakuy tukukuptinkamataq, Willayta Yachanapaq Tantakuy juk takiywan qallarin.

Willayta Yachanapaq tantakuy

Kay tantakuypi wakichisqa hermanosqa, discursosta quspa, imaynatachus Reinomanta willana kasqanta rikuchispa, wakichisqa hermanosta tapurispa, tapuykunata ruwaspa ima, Bibliap yachachiykunasninta imaynatachus sutʼinchana kasqanta yachachinku. Jesuspis, niraq discipulosninta willaq kachachkaspa, imaynatachus willananku kasqanta paykunaman yachachirqa (Lucas 10:1-16). Jinamanta discipulosninqa sumaqta willayta atirqanku, may kusiywantaq Jesusman imaynachus paykunata risqanmanta willarqanku (Lucas 10:17). Biblia nisqanmanjinataq discipulosqa, paykunapura imaynachus willaypi risqanmanta willanakuq kanku (Hechos 4:23; 15:4).

Kay tantakuy 30 minutospi ruwakunanpaq imaynachus wakichisqa kachkasqanqa, Reinomanta Willayninchik hojitapi rikhurin. Kunallanraq “Jehovata yupaychaq familiakuna”, “Imaraykutaq kutillanchikpuni”, “Imitemos a Cristo en nuestro ministerio” nisqa yachaqanasta ukhuncharqayku. Kay tantakuyqa juk takiywan, juk mañakuywan ima, tukuchakun.

Kay tantakuykunaman jamuqkunap nisqanku

Jehovamanta sutʼinchaqkunaqa, tantakuyninkuman jamuqkuna kusisqas ripunankuta munanku. Sutʼincharinapaq; Andrewqa, Jehovamanta sutʼinchaqkunamanta, runas mana allintachu parlasqankuta uyarisqa. Chayrayku, ñawpaq kutillataraq tantakuyninkuman rispa tʼukuchkaq qhipakusqa, nintaq: “Jehovamanta sutʼinchaqkunap juknin tantakuyninkuman risqaymanta mayta kusikurqani, imaraykuchus tukuypis kʼachamanta parlapayawarqanku”, nispa. Canadá suyumanta juk sipas Ashel sutiyuq nin: “Chay tantakuyqa japʼiqayta atinaypaqjina sumaq wakichisqa karqa”, nispa.

Brasil suyupi, Jehovamanta sutʼinchaqkunaqa, Joseta tantakuyninkuman waqyarirqanku, saqra runa pay kasqanta yachaptinkupis, pay nin: “Tantakuypi kaqkunaqa, imayna runachus kasqayta yachaspapis munakuywan parlapayawarqanku”, nispa. Japonmanta Atsushi sutiyuq nin: “Jehovamanta sutʼinchaqkunap tantakuyninkuman ñawpaq kuti risqaypiqa llakisqajina karqani, chaywanpis chay tantakuypi kaqkunaqa, kusisqa kanaypaq yanapawayta munasqankuta reparqani”.

Tantakuyniykuman jamunaykipaq waqyariyku

Rikunchikjina tantakuyniykuman jamuspa kusiyta tarinki. Jehová Diostataq astawan allinta riqsinki, paytaq allinniykipaq yachachisunqa (Isaías 48:17).

Jehovamanta sutʼinchaqkunap tantakuyninkuman, mana qullqita pagaspalla yaykuyta atinki. ¿Munawaqchu maykʼaqllapis jamuyta? Chayrayku tantakuyniykuman waqyariyku.