-
¿Imatá Biblia nin qhariwarmi jina puñuykuymanta?Wiñaypaj kusisqa kausakuy. Bibliata estudiay
-
-
LECCIÓN 41
¿Imatá Biblia nin qhariwarmi jina puñuykuymanta?
Ashkha runasqa pʼenqakunku qhariwarmi jina puñuykuymanta parlayta. Jinapis Diospa Palabranqa qhariwarmi jina puñuykuymanta sutʼita, mana pʼenqachinawanchejpaj jinataj parlawanchej. Chay nisqantaj kausayninchejpi yanapawanchej. Jehovaqa yachan imachus allinninchejpaj kasqanta, imaraykuchus pay ruwawarqanchej. Chayrayku yachachiwanchej payta kusichinapaj imaynatachus kausakunata, wiñaypaj kusisqa kausakunapaj imatachus ruwanatapis.
1. ¿Imatá Jehová nin qhariwarmi jina puñuykuymanta?
Jehová Diosqa qhariwarmi jina puñuykuyta munanapaj ruwawarqanchej. Jinapis payqa munan uj qhariwan uj warmiwan casarasqa kaspalla qhariwarmi jina puñuykunankuta. Ajinamanta qhariwarmi kajkunaqa wawasniyoj kayta atinku. Chantapis purajmanta munanakusqankuta rikuchinakuyta atinku. Chayrayku Bibliapi niwanchej: “Kusikuytaj warmiykiwan, piwanchus joven kashaspa casarakorqanki chaywan”, nispa (Proverbios 5:18, 19). Jehová Diosqa munan casarasqa cristianos qhariwarmi kausayninkuta jatunpaj qhawanankuta, ajinamanta ni jaykʼaj qhenchachakuy juchapi urmanankupaj (Hebreos 13:4 leey).
2. ¿Imataj khuchichakuy jucha?
Bibliaqa nin: “Khuchichakojkunaqa, [...] manapuni Diospa Gobiernonta herenciata jina japʼenqankuchu”, nispa (1 Corintios 6:9, 10). Bibliata qhelqajkunaqa khuchichakuy juchamanta parlaspa pornéia palabrata oqharerqanku. Chay palabratataj oqharikun: 1) Mana casarasqa kaspalla khuchichakuymanta parlanapaj.a 2) Qharipura chayri warmipura khuchichakusqankumanta parlanapaj. 3) Animaleswan khuchichakuymanta parlanapaj. ‘Khuchichakuy juchapi’ mana urmaspaqa Jehovata kusichinchej, noqanchejpis kusisqa kausakunchej (1 Tesalonicenses 4:3).
ASTAWAN YACHAKUNA
Kaypi yachakusunchej khuchichakuy juchapi mana urmanapaj imatachus ruwanata. Chantá yachakullasuntaj llimphu kausayniyoj kaspa kusisqa kausakunata.
3. Khuchichakuy juchamanta ayqena
Diosta kasukoj José sutiyoj runaqa, mana khuchichakuy juchapi urmarqachu. Génesis 39:1-12 leeriychej, chantá yachakojta tapuriy:
¿Imaraykutaj José khuchichakuy juchapi mana urmayta munarqachu? (9 versiculota qhawariy).
¿José allintachu ruwarqa? ¿Imaraykutaj chayta ninki?
¿Imatá jóvenes ruwankuman khuchichakuy juchapi mana urmanankupaj? VIDEOTA qhawariychej.
Jehová Diosqa munan khuchichakuy juchamanta ayqenanchejta. 1 Corintios 6:18 leeriychej, chantá yachakojta tapuriy:
¿Imastaj tanqawasunman khuchichakuy juchapi urmanapaj?
¿Imatá qan ruwawaj khuchichakuy juchamanta ayqenaykipaj?
4. Khuchichakuy juchapi mana urmanapaj kallpachakuna
Wakin kutisqa khuchichakuy juchapi urmanapaj tanqasqa kasunman. VIDEOTA qhawariychej, chantá yachakojta tapuriy.
Videopi rikorqanchej chay hermano, ¿imastataj ruwarqa yuyasqanwan ruwasqanwan warminta mana wasanchananpaj?
Diostapuni kasukuyta munaj cristianospis, allin imaspi yuyanankupaj mayta kallpachakunanku tiyan. Qanpis kikillantataj ruwanaykipaj mayta kallpachakuwaj. Filipenses 4:8 leeriychej, chantá yachakojta tapuriy:
¿Ima allin imaspitaj yuyananchej tiyan?
Bibliata leey, Diosta yupaychaypi ashkha imasta ruway, ¿yanapawasunmanchu mana khuchichakuy imaspi yuyanapaj? ¿Imaraykú chayta ninki?
5. Jehovaj kamachiykunasnenqa allinninchejpaj
Jehovaqa yachan imachus allinninchejpaj kasqanta. Chayrayku payqa niwanchej yuyayninchejpi, ruwayninchejpi ima llimphus kananchejta, imaraykutajchus chayta ruwanatapis. Proverbios 7:7-27 leeriychej, chantá VIDEOTA qhawariychej. Chaymantataj yachakojta tapuriy.
¿Imata ruwasqanraykutaj uj joven khuchichakuy juchaman tanqasqa karqa? (Proverbios 7:8, 9 versiculosta qhawariy).
Proverbios 7:23, 26 nisqanman jina khuchichakuy juchapi urmaspa llakiypi rikhurinchej. Chayrayku, ¿ima llakiykunamantataj jarkʼakunchej mana chay juchapi urmaspa?
Khuchichakuy juchapi mana urmaspa, ¿ima bendicionestataj aswan qhepaman japʼisun?
Qharipura chayri warmipura casarayta Biblia juchachasqanrayku, runasqa yuyanku Jehová mana munakuyniyojchu kasqanta. Jinapis Jehová Diosqa may munakuyniyoj, chayrayku munan tukuy runas wiñaypaj kusisqa kausakunata. Chaypajtaj kamachisqasninta kasukuna tiyan. 1 Corintios 6:9-11 leeriychej, chantá yachakojta tapuriy:
Kaypi leerisqanchejman jina, ¿qharipura chayri warmipura qhariwarmi jina puñuykusqallankutachu Dios juchachan?
Diosta kusichinapajqa tukuy kausayninchejta cambiananchej tiyan. Chayta ruwanapaj kallpachakusqanchejtaj mana qhasipajchu. Salmo 19:8, 11 leeriychej, chantá yachakojta tapuriy:
Jehovaj kamachiykunasnin, ¿allinninchejpajpunichu kasqa? ¿Imaraykutaj chayta ninki?
Jehovaqa ashkha runasta yanaparqa kamachisqasninta kasukunankupaj, qantapis yanapasunkiman.
WAKIN RUNAS NINKU: “Iskay runas munanakunku chayqa, qhariwarmi jina puñuykunankoqa mana juchachu”, nispa.
¿Ajinachu kanman, imatá qan yuyanki?
¿IMASTÁ YACHAKUNCHEJ?
Kaypi yachakunchej Jehovaqa qhariwarmi jina puñuykuyta munanapaj ruwawasqanchejta. Yachakullanchejtaj uj qhariwan uj warmiwan, casarasqa kaspalla qhariwarmi jina puñuykuspa kusikunankuta.
Yuyarikunapaj
¿Imasmanta parlanapajtaj pornéia palabrata oqharikun?
¿Imastataj ruwana tiyan mana khuchichakuy juchapi urmanapaj?
¿Jehovaj kamachiykunasninta kasukuy yanapawanchejpunichu?
ASTAWAN YACHAKUNAYKIPAJ
¿Allinchu kanman uj qhariwan uj warmiwan mana casarakuspalla tiyakunanku? Chayta yachanaykipaj kayta leeriy.
“¿Imatataj Biblia nin tantalla tiyakunamanta?” (Chaytaqa Internetpi jw.org nisqapi tarinki)
¿Imatá Biblia nin qharipura chayri warmipura qhariwarmi jina puñuykunankumanta? Chayta yachanaykipaj kayta leeriy.
“¿Qharipura chayri warmipura kakuy juchachu?” (Chaytaqa Internetpi jw.org nisqapi tarinki)
¿Qhariwarmi jina puñuykuymanta imatachus Biblia nisqan yanapawanchejchu? Chayta yachanaykipaj kayta leeriy.
“¿Sexo oral juchapunichu?” (Chaytaqa Internetpi jw.org nisqapi tarinki)
¿Imataj uj runata cambiananpaj yanaparqa? Chayta yachanaykipaj “Mana pisipajchu qhawawarqanku” nisqata leeriy.
“Bibliaqa cambianankupaj yanaparqa” (La Atalaya, 1 de abril de 2011)
a Khuchichakuy jucha nispaqa parlashallanchejtaj wakin runas jispʼanasninkuta chʼonqanakusqankumanta, sikinkunejta khuchichakusqankumanta, jispʼanasninkuta llankhanakuspa masturbanakusqankumanta ima.
-
-
¿Imatá Biblia nin soltero kaymanta, casado kaymanta?Wiñaypaj kusisqa kausakuy. Bibliata estudiay
-
-
LECCIÓN 42
¿Imatá Biblia nin soltero kaymanta, casado kaymanta?
Wakin lugaresmanta runasqa yuyanku kusisqa kanapajqa casarakunapuni kasqanta. Jinapis solterospis casadospis llakiyniyoj kanchej. Bibliaqa nin soltero kaypis casado kaypis may sumaj kasqanta.
1. ¿Imatá Biblia nin soltero kaymanta?
Biblia nin: “Casarakojqa, allinta ruwan. Mana casarakojtajrí aswan allintaraj ruwanqa”, nispa (1 Corintios 7:32, 33, 38 leey). ¿Imaraykutaj ‘mana casarakojkuna aswan allintaraj ruwanku’? Imaraykuchus mana casados jinachu warminkumanta chayri qosankumanta llakikunanku tiyan. Chantapis solterosqa imatachus ruwayta paykunallamanta ajllayta atinku. Chayrayku wakenqa Jehovapaj astawan llankʼayta munaspa waj lugaresman predicaj ripunku, Jehovaman qayllaykunankupajpis aswan tiempoyoj kanku.
2. ¿Imatá Biblia nin casado kausaymanta?
Casadospis, soltero kajkuna jinallataj wakin imasta ruwayta atinku. Biblia nin: “Aswan allin iskay ukhu kayqa, ujlla kanamantaqa”, nispa (Eclesiastés 4:9). Chayqa ajinapuni casados Bibliaj nisqanta kasukojtinku. Leyesman jina civilmanta casarakojkunaqa, ninakunku munanakunankuta, respetanakunankuta, cuidanakunankuta ima. Ajinamanta casadosqa mana manchachikuspa kausakunku, tantalla tiyakojkunawanrí mana ajinachu. Chantapis casadosqa wawasta aswan sumajta uywayta atinku.
3. ¿Imaynatá casados kausakunanku tiyan?
Jehovaqa munan qosawan warmiwan munanakunankuta, wañupunankukamataj khuska kanankuta. Chayrayku payqa ñaupaj qhariwarmita casarachishaspa nerqa: “Qhareqa tatanta, mamantawan saqespa, warminman ujchaykukonqa”, nispa (Génesis 2:24). Casadosqa ujninku qhenchachakojtillan divorciakuyta atinkuman. Jinapis Jehovaqa mana juchayoj qosata chayri warmita saqen ajllananta divorciakunantachus manachus (Mateo 19:9).a Jehovaqa mana munanchu cristianos iskay warmiyoj chayri iskay qosayoj kanankuta (1 Timoteo 3:2).
ASTAWAN YACHAKUNA
Kaypi yachakusun solteros chayri casados kaspapis imatachus ruwanata kusisqas kausakunapaj, Jehovatapis kusichinapaj.
4. Solterosqa Jehovapaj astawan llankʼayta atinku
Jesuspajqa soltero kay uj regalo jina karqa (Mateo 19:11, 12). Mateo 4:23 leeriychej, chantá yachakojta tapuriy:
Soltero kasqanrayku, ¿imastataj Jesús ruwayta aterqa?
Solteros kajkunaqa Jehová Diosta sirvispa kusisqa kayta atinku Jesús jina. VIDEOTA qhawariychej, chantá yachakojta tapuriy.
Solterospis solteraspis, ¿imastataj astawan ruwayta atinku?
Astawan yachanaykipaj
Bibliaqa mana niwanchejchu ima edadpichus casarana kasqanta. Jinapis niwanchej ‘tʼika jina joven kayninchej’ pasanantaraj suyakunata. Imaraykuchus chay edadpeqa qhariwarmi jina puñuykuyta astawan munanchej (1 Corintios 7:36).
5. Sumajta ajllana piwanchus casarakunata
Piwanchus casarakunataqa sumajtapuni ajllananchej tiyan, chay ajllasqanchejqa tukuy kausayninchejpaj. Mateo 19:4-6, 9 leeriychej, chantá yachakojta tapuriy:
Solterospis solteraspis casarakuyta munaspa, ¿imaspitaj ñaupajta piensarinanku tiyan?
Biblia willawanchej imaynachus uj sumaj qosa, uj sumaj warmi kanan kasqanta. Chantapis uj cristianoqa Jehovata yupaychajllawan casarakunan tiyan.b 1 Corintios 7:39; 2 Corintios 6:14 leeriychej, chantá yachakojta tapuriy:
Sichus uj cristiano casarakuyta munashan chay, ¿imaraykutaj Jehovata yupaychajllawan casarakunan tiyan?
Sichus uj cristiano Jehovata mana yupaychajwan casarakunman chay, ¿Jehová allinpajchu qhawanman? ¿Imaraykú chayta ninki?
Uj torotawan uj burrotawan yugoman wataykojtinchej iskayninku ñakʼarinku. Ajinallataj uj cristianowanpis, Jehovata mana yupaychajwan casarakuspa llakiypi rikukun.
6. Jehová jina casado kausayta qhawana
Unay tiempopi israelitasqa paykunallapi yuyasqankurayku imallamantapis warminkumanta divorciakoj kanku. Malaquías 2:13, 14, 16 leeriychej, chantá yachakojta tapuriy:
¿Imaynatá Jehová qhawan mana qhenchachakuy kajtillan divorciakojtinku?
Qhenchachakuy juchapi urmay, divorciakuypis mana juchayoj qosata chayri warmita mayta llakichin, jinallataj wawastapis.
VIDEOTA qhawariychej, chantá yachakojta tapuriy.
Qhariwarmi kausaypi qosa chayri warmi mana Jehovata yupaychanchu chay, ¿imatá ruwanman Diosta yupaychaj qosa chayri warmi kusisqa kausakunankupaj?
7. Casadosqa Jehovaj kamachiykunasninta kasukunanku tiyan
Wakin casadospaj Jehovaj kamachiykunasninta kasukuy mana atikullanchu.c Jinapis kasukunankupaj kallpachakonqanku chayqa, Jehová mayta bendicenqa. VIDEOTA qhawariychej.
Hebreos 13:4 leeriychej, chantá yachakojta tapuriy:
¿Casados kajkuna atinkumanchu Dios kamachisqanman jina kausakuyta? ¿Imaraykú chayta ninki?
Jehová Diosqa munan cristianos leyesman jina civilmanta casaranankuta, divorciakuspataj leyesman jina divorciakunankuta. Chaytataj tukuynejpi ruwakun leyesman jina. Tito 3:1 leeriychej, chantá yachakojta tapuriy:
¿Imaraykutaj uj qhariwan uj warmiwan autoridadespa leyesninkuman jina casarakunanku tiyan? ¿Leyesman jinachu casarasqa kashanki?
ICHÁ WAKIN TAPUSONQANKU: “¿Imapaj casaraymanri? Chanta, ¿imapaj matrimonio papel sirviwanqari?”, nispa.
Ajinata tapusojtinku, ¿imatá niwaj?
¿IMASTÁ YACHAKUNCHEJ?
Kaypi yachakunchej soltero kaypis, casado kaypis sumaj kasqanta. Yachakullanchejtaj solterospis casadospis Jehovaj munayninman jina kausaspa kusisqa kayta atisqankuta.
Yuyarikunapaj
¿Solteros kajkuna imastataj astawan ruwayta atinku?
¿Imaraykutaj uj cristiano Jehová Diosta yupaychajllawan casarakunan tiyan?
Biblia nisqanman jina, ¿ima kajtillantaj casados divorciakuyta atinku?
ASTAWAN YACHAKUNAYKIPAJ
¿Ima niytá munan ‘Señorllapi casarakuy’? Chayta yachanaykipaj kayta leeriy.
Rejsinakunamanta, casarakunamanta ima yachakunaykipaj, iskay hermanaspa kausayninkumanta videota qhawariy.
Jehovaqa uj hermanota imatachus saqesqanmanta mayta bendicerqa. Paymanta astawan yachanaykipaj kay videota qhawariy.
¿Imapitaj uj cristiano ñaupajta piensarinan tiyan niraj divorciakushaspa chayri separakushaspa? Chayta yachanaykipaj kayta leeriy.
“Diospa ujchasqantaqa, ama pipis tʼaqachunchu” (Torremanta Qhawaj, diciembre de 2018)
a Separakuymanta, kay libroj tukukuyninpi “Sutʼinchaykuna” nisqapi 4 kaj sutʼinchayninta leeriy.
b Waj lugarespeqa tatas ajllanku warmi wawanku chayri qhari wawanku piwanchus casarakunanta. Chay kutispi tatasqa sumajta qhawarinku wawankuwan casarakonqa chay qhari chayri chay warmi Jehovata munakunchus manachus chayta. Cristiano tatasqa mana qolqeyoj kajtachu, nitaj may rejsisqa kajtachu qhawanku wawankuwan casarachinankupaj.
c Sichus mana casarakuspa tantalla piwanpis tiyakushanki chayqa, qan ajllanayki tiyan paywan casarakuytachus chayri saqepuytachus.
-