¿Yuyarikunkichu?
¿Kay killasmanta Torremanta Qhawaq revistasta ñawirirqankichu? ¿Kay tapuykunaman kutichiyta atiwaqchu?
• ¿Imaynatataq yachakusunman sumaqta ‘llimphuchasqa parlayta’, nisunman Diosmanta chiqa kaqta, munayninmanta ima, yachakuyta? (Sof. 3:9.)
Imaynatachus juk qallupi sumaqta parlayta yachanapaq ruwanchik, kikillantaq ‘llimphuchasqa parlayta’, yachanapaqpis ruwana 1) allinta uyarina, 2) chay simipi sumaqta parlaqkunamanta yachakuy, 3) Yuyayniykita sumaqta wakichiy, Bibliap 66 libritosmanta sutisninta chayri Bibliap pʼitisninta yuyayniykipi japʼispa, 4) sapa kuti yuyarikuy yachakusqaykita, 5) ñawirisqaykipi tʼukuriy, 6) chiqa kaq yachachiyta, “imaynatachus wak simipi parlakusqanta, qillqakusqanta ima”, kikinta yachakuy, 7) yachakullaypuni, 8) ima pʼunchaykunachus yachakunaykita wakichiy, chantá 9) llimphu parlayta yachakusqaykita parlallaypuni (15/8, páginas 21-25).
• ¿Imaynapitaq, matrimonio ‘kimsanchasqa chʼankullajina’?
Kay “kinsanchasqa chʼankullaqa”, casarasqasmanta parlanapaq kikinchakun, nisunman qusa, warmi, Jehová ima, kimsanchasqa chʼankullajina kasqankuta, Jehovataq aswan sumaq kaq chʼankulla (Ecl. 4:12). Qhariwarmi astawan Diosmanta japʼikuptinkuqa, chʼampaykunata atipanankupaq, kusisqataq kawsakunankupaq aswan kallpachasqas kanku (15/9, página 16).
• Kay Hebreos 6:1, 2 pʼitikunapi, “makista umaman churanamanta parlasqan”, ¿ima ninayantaq?
Kaypiqa mana ancianos sutichasqa kanankumantachu parlachkan, manaqa, Diospa espiritunmanta atiyta japʼisqankumanta parlachkan (Hech. 8:14-17; 19:6) (15/9, página 32).
• ¿Imaynatataq ancianos hermanosninkuta jatunpaq qhawasqankuta rikuchinku?
Paykunaqa, mana kamachillankuchu, manaqa yachachisqankumanjinapuni ruwanku, wakin kamachiykunata imaraykuchus jinata kamachisqankutapis, sutʼinchallankutaq (15/10, página 22).
• Israelitas juk tuqnuwan michisqankumanta, ¿imatataq ancianos yachakunkuman?
Ñawpa tiempo israelitas ovejasta michiqkunaqa, jatun tuqnuwan michiq kanku. Chantá ovejasta corralman qhatiykuchkaspa chayri lluqsichimuchkaspa, chay ‘tuqnuwan’ yupaq kanku, jinamanta tukuyninku kachkasqanta yachanankupaq (Sal. 23:4). Kay tiempopi ancianospis ñawpaq tiempopi michiqkunajina, Diospa tropanta yanapanankupaq sumaqta riqsinanku tiyan (15/11, página 9).