38 YACHAQANA
¿Imatá kawsayniywan ruwasaq?
“Yachaywasillapiraq yachakuchkaspaqa, imachus astawan qhipaman kananmanta mana llakikuqchu kani. Chaywanpis yachaywasipi yachakuyta tukunaypaq pisi tiempollaña kachkaptin, tatasniyta qullqiywan yanapanaypaq juk llamkʼayta maskʼanay kasqanta reparakurqani.” (Álex)
KARU llaqtaman autopi riyta munasqaykipi tʼukuriy. Ñawpaqtaqa, mayqin ñantachus rinayki kasqanta, allin kanman juk mapapi allinta qhawarinayki. Kawsayniykipi imatachus aswan qhipaman ruwayta munasqaykita akllachkaspaqa, kikillantataq ruwanayki kanman. Michaelqa ajina kasqanta nin; payqa Jehovamanta sutʼinchaqkunap juknin sucursalninkupi llamkʼan, nintaq: “Diospaqqa tukuy imaymanamanta llamkʼayta atinki”. Chaywanpis ichá tapukunki: “¿Imaynamantá Diospaq llamkʼayman?”, nispa. Michael nin: “Chayta yachanaykipaqqa, imaynasmantachus Diospaq llamkʼayta munasqaykita, sutʼita yachanayki tiyan”, nispa.
Imaynatachus Diospaq llamkʼayta munasqaykita juntʼanaykipaq kallpachakuy. Imatapis mana allinta wakichikuspa ruwanki chayqa, mana allinchu risunqa. Chayrayku kawsayniykipi imatachus ruwayta akllachkaspaqa, wakkunawan yuyaychachikunayki allin kanman. Jinamanta Proverbios 4:26 pʼiti yuyaychasqanmanjina ruwanki, chaypi nin: “Maymanchus chakiyki sarushan chaytaqa allinta qhawakuy”, nispa. Wak Bibliataq kay pʼitipi nin: “Purinaykita allinta tanteay”, nispa (Diospa Simin Qelqa).
Aswan qhipamanqa, ima religionniyuqchus kayta, imapichus llamkʼayta, casarakuytachus manachus, wawasniyuq kaytachus manachus ima, akllanayki kanqa. Allinta akllanaykipaqtaq, imatachus kawsayniykipi ruwayta munasqaykita, sutʼita yachanayki tiyan. Ruwasuq Diosmantataq yuyarikunayki tiyan.
“Ruwasoj Diosmanta yuyarikuy”
Chiqamanta kusisqa kayta munanki chayqa, yachayniyuq kamachiq Salomón nisqanta kasukuy, pay nirqa: “Wayna kashaspa, pichus Ruwasoj Diosmanta yuyarikuy”, nispa (Eclesiastés 12:1). Kaytaq ninayan, kawsayniykipi ima ruwaytapis akllanayki kaptinqa, Diosta kusichinapaqjina akllanayki kasqanta.
¿Imaraykutaq? Imaraykuchus Apocalipsis 4:11 nin: “Señor Diosniyku, qanllamin jatunchanapaj jina kanki, may sumajpaj jina qhawana, tukuy atiyniyojtaj, imaraykuchus qanmin tukuy kaj chhikata ruwarqanki; munayniykirayku ruwasqa karqanku, kakushankutaj”, nispa. Kay pʼitiqa, janaqpachapi, Jallpʼapi kaqkuna ima, Diosman manu kachkasqanchikta nin. Qampis, ¡maytachá Jehovaman pachis ninki, ‘kawsayta, samayta, tukuy imastawan qususqanmanta’! (Hechos 17:25.) Chayraykutaq, Diosman agradecekusqaykita rikuchiyta munanki.
Jehovamanta sutʼinchaq achkha waynasqa, chayta ruwanku. Ruwaqninkuman agradecekusqankuta rikuchinku, paypaq astawan llamkʼaspa. Qhawariy qampis imaynasmantachus Diospaq astawan llamkʼayta atisqaykita.
Precursorjina llamkʼaspa. Ajinamanta willaq astawan lluqsinki. Bibliamanta sapa kuti yachachispataq, Bibliamanta sumaq yachachiqman tukunki.
Maypichus willaqkuna necesitakun chayman rispa. Ichá maypichus Diospa Reinonmanta willaqkuna necesitakun chayman ripuwaq. Chayri, wak qallupi parlayta yachakuwaq, suyuykipi chayri wak suyupi chay qallupi willaq hermanosta yanapanaykipaq.a
Misionerojina llamkʼaspa. Precursorjina Diospaq sumaqta llamkʼachkanki chayqa, manataq mana jampiyta atina unquywanchu kachkanki chayqa, Escuela de Galaad nisqaman riyta atiwaq, maypichus Diosmanta may kusisqa, sunqu juntʼasqa ima wak suyupi willanaykipaq wakichisunqanku.
Betel wasipi llamkʼaspa. Jehovamanta sutʼinchaqkunap juknin sucursalninkupi llamkʼayta atiwaq. Wakin sucursalespiqa, Biblia yuyaychasqanmanjina wakichisqa publicacionesta ruwanku, chaykunatataq tukuyniqman apachinku.
Siervo internacionaljina llamkʼaspa. Wak llaqtasman riyta atinki, Tantakunapaq Wasista, Jatun Tantakuykunapaq Wasista, sucursalesta ima ruwaypi yanapanaykipaq.
Escuela de Entrenamiento Ministerial nisqaman rispa. Soltero kachkaspa siervo ministerial chayri anciano kanki chayqa, kay Escuelaman riyta atinki qutuchakuypi imaynatachus astawan allinta llamkʼayta, yachachiyta ima yachanaykipaq. Yachakusqaykitawankamataq, ichá wak suyuman kachasunkuman.
Precursor kayta munasqaykita, ¿imaynatá juntʼawaq?
Precursorjina llamkʼayqa, may sumaq, imaraykuchus achkha bendicionesta apamun. Chaywanpis niraq precursorjina llamkʼayta qallarichkaspa sumaqta tʼukuriy. Tapurikuy: “¿Imallapipis llamkʼanaypaq wakichisqachu kachkani?”, nispa.
Susanaqa, precursora kayta munasqanrayku, precursora kayta atinanpaqjina juk llamkʼayta maskʼakurqa. Pay nin: “Precursora kayta atinaypaqjina, imatachus necesitasqallayta rantikunaypaqjina ima, juk llamkʼayta maskʼakurqani”, nispa.
Chayrayku Susanaqa, yachaywasillapiraq kachkaspa, precursora kayta atinanpaqjina juk llamkʼayta yachakurqa, nintaq: “Precursorajina llamkʼayta mayta munarqani. Chaytataq kawsayniypi ñawpaqman churarqani. Mayta kusikuni chayta akllasqaymanta”, nispa.
Wakkunawan yuyaychachikuy
Autopi mana riqsisqa ñanta richkaspaqa, ichá maynintachus rinayki kasqanta pillatapis tapurinayki kanqa. Jinallataq kawsayniykipi imatachus ruwayta akllachkaspaqa, wakkunawan yuyaychachikunayki kanqa. Sumaq yuyaychaykunata japʼikunki chayqa, ‘ima ruwanaykitapis’ sumaqta wakichinki (Proverbios 20:18).
Tatasniykiwan yuyaychachikunaykiqa, may allin. Chaywanpis, Diospa yuyaychasqanmanjina kawsaqkuna cristianospis yuyaychallasunkumantaq. Betelpi llamkʼaq juk wayna Roberto sutiyuq nin: “Qutuchakuyniykimanta chayri wak qutuchakuymanta sumaq wakichisqa cristianosjina, imallatapis allinta akllay”, nispa.
Jehovapis allin ruwaykunata akllanaykita, kusisqa kanaykita ima munan. Chayrayku, imatachus aswan qhipaman ruwayta munasqaykita akllachkaspaqa, paymanta yanapata mañakuy “imachus [paypa] munaynin kasqanta” reparanaykipaq (Efesios 5:17). Kay Proverbios 3:5, 6 nisqanmanjinapuni ruway: “Tukuy sonqoykiwan Tata Diospi atienekuy; ama qampa yachasqallaykipeqa atienekuychu. Tukuy ima ruwasqaykipi Tata Diosmantaqa yuyarikuy. Paymin cheqan ñanta pusasonqa”.
Astawan yachakunaykipaq kay DVD Los jóvenes preguntan...¿Qué haré con mi vida?, nisqata qhawariy, kaytaq 30 simispi urqhukun
[Sutʼinchaynin]
a Kay 164 paginata ñawiriy.
BIBLIAMANTA
“Chayta ruwaytawan, allinta qhawariychej, Chantá rikunkichej, imaynatachus noqa janaj pacha ventanasta kicharispa, may chhika bendicioneswan juntʼachimusqaykichej, chayta.” (Malaquías 3:10)
JUK YUYAYCHAY
Achkha watastaña precursorjina llamkʼaq hermanowan parlariy. Tapuriytaq Diospaq astawan llamkʼananpaq imachus tanqasqanta, ima tʼinkastachus japʼisqanta ima.
¿YACHARQANKICHU?
Imaynatachus juk radio waqananpaq corrienteta necesitan, ajinallatataq ñuqanchikpis Diospaq llamkʼananchikpaq, espíritu santota necesitanchik (Hechos 1:8).
¡RUWAYTA QALLARIY!
Diospa Reinonmanta willaspa astawan kusiyta tariyta munasqayrayku, kay hermanomanta chayri kay hermanamanta yanapata mañakusaq... ․․․․․
Kay yachaqanamanta, ¿tatayta chayri mamayta tapuyta munani ? ․․․․․
QHAWASQAYKIMANJINA
● ¿Ima ruwaykunatataq sumaqta ruwayta yachanki?
● Imatachus ruwayta atisqaykiwan, ¿imaynatá Jehová Diosta yupaychawaq?
● ¿Imaynamantataq Diospaq astawan llamkʼayta munanki?
[313 paginapi sutʼinchaynin]
Tatasniyta may jatunpaq qhawani, imaraykuchus wakin kuti pisi qullqiyuq kaspapis, achkha watastaña Diospa Reinonmanta sunqu kʼajaywan willachkanku. Chantapis Diospaq astawan llamkʼanaypaq kallpachawankupuni.” (Jarrod)
[314 paginapi recuadro]
Raqhaykunaykipaq ruwanaykipaqtaq
Ima ruwaykunatachus ruwayta munasqay
Ima ruwaykunatachus ruwayta munasqaykita chayman raqhaykuy. Chantá maypichus puntitos rikhurin chaypi, imatachus atisqaykimanjina ruwayta munasqaykita qillqay.
Willaypi
□ Kunanmantapacha sapa killa ․․․․․ horastawan willasaq
□ Sapa killa ․․․․․ publicacionesta runaman saqisaq
□ Imapichus creesqayta Bibliawan sumaqta sutʼinchasaq
□ Sapa killa ․․․․․ kutita Bibliamanta yachakuyta munaqkunaman kutisaq
□ Juk runallamanpis Bibliamanta yachachiyta qallarisaq
Kaykunatawan ruwayta munani: ․․․․․
Bibliamanta yachakuypi
□ Bibliamanta ․․․․․ paginata sapa pʼunchay ñawirisaq
□ Tantakuykunapaq sumaqta wakichikusaq
□ Bibliamanta kay yachachiykunata astawan ukhuncharisaq: ․․․․․
Qutuchakuypi
□ Sapa tantakuypi juk kutillatapis tapuykunaman kutichisaq
□ Mayqin machitu hermanotachus astawan riqsiyta munani, paywan parlarisaq
□ Juk machitu hermanota, chayri juk unqusqa hermanota watukuq risaq
Kaykunatawan ruwayta munani: ․․․․․
Kaytataq kay pʼunchaypi qillqarqani ․․․․․
Kay paginata, 6 killamanta watiqmanta ñawiriy. Kaypi qillqasqaykimanjina mana ruwachkasqaykita, chayri astawan ruwayta atisqaykita rikuspataq, imatachus ruwayta atisqaykita qillqay.
[312 paginapi dibujo/foto]
Imaynamantachus Diospaq llamkʼayta munasqaykita sutʼita yachaspaqa, mana qhasi imaspaq kallpachakunkichu