Munasqa tatamama:

Wawasqa waynayachkasqankurayku chayri sipasyachkasqankurayku, wakin kuti iskaychakunku, manchachikunku ima, imaynatachus ñawpaq kutipi bicicletata apaykachayta manchachikunku ajinata. Tatasqa, mayta munaspapis, wawasninku mana ajina sientekunankupaq ni imata ruwayta atinkumanchu. Chaywanpis tatasqa wawasninkuta yanapayta atinkuman, imaynatachus juk tata, wawitanta, bicicletamanta mana urmananpaq japʼispa yanapan, ajinata. Arí, tatamama: qamkunalla wawasniykichikta yanapayta atiwaqchik, allin runasman tukunankupaq.

Chaywanpis kayta ruwayqa, mana atikullanchu. Wawaykiqa, qaynalla mayta parlaq yuqallitu karqa, kunantaq, ni piwan parlayta munanchu, qamwan parlananpaqtaq mayta kallpachakunayki tiyan. Kikillantaq imillitaykiwanpis, qaynalla qamkunamanta ni imapaq kacharikuqchu, kunantaq, qamkunawan puriytapis pʼinqakun.

Chaywanpis, wawasniykichik ajinata tikrakuchkasqankumanta ama anchata llakikuychikchu. Imaraykuchus Diospa Palabranpi, qamkunapaq, wawasniykichikpaq ima, sumaq yuyaychaykunata tariyta atinkichik.

Kay libroqa, waynaspata, sipaskunapta ima, tapukuyninkuman Bibliap yuyaychaykunasninwan kutichin (4, 5 paginasta qhawariy). Chaywanpis kay libroqa mana ñawirinallapaqchu, manaqa, kay urapi sutʼinchakuchkanjina, wawasniykichikta yanapananpaq.

1) Ñawiriq ruwananpaq. Kay librop achkha yachaqanasninpi, waynata chayri sipasta, imatachus yuyasqanta qillqananta nin. Chaymanta jukninqa sutikun: “Saqra ruwayman tanqachkasuptinku kayta ruwawaq”, nisqa (132, 133 paginasninpi), kaytaq wawasniykita yanapanqa reparanankupaq wakin kutipi, ima chʼampaykunapichus rikukunankuta, chaypi rikukuspataq imatachus ruwanankuta. Astawanpis kay librop sapa rakʼiyninpa tukukuyninpi, “Tʼukurisqaykimanjina”, nisqa rikhurin. Chaypitaq, wawayki ñawirisqanmanta imatachus tʼukurisqanta qillqayta atinqa.

2) Yuyasqankumanta parlarinankupaq. Kay libropiqa, “¿Imaynatá tatasniywan qhariwarmijina puñuykuymanta parlariyman?”, nisqa rikhurillantaq (63, 64 paginasninpi). Sapa yachaqanap tukukuyninpi, “Qhawasqaykimanjina”, nisqapi achkha tapuykuna rikhurin. Chay tapuykunataq, wawasniykichikta yachakusqankumanta mana yuyarinallankupaqchu yanapanqa, manaqa, qamkunawan parlarinankupaqpis yanapallanqataq. Chantá sapa yachaqanapi “¡Ruwayta qallariy!” nisqata tarillankichiktaq, chaypitaq kay tapuy rikhurin: “Kay yachaqanamanta, ¿imatá tatayta chayri mamayta tapuyta munani?”. Kay tapuyqa, wawasniykichikta, qamkunamanta yuyaychayta mañakunankupaq yanapanqa.

Chaywanpis, wawasniykichik imatachus yuyasqankuta kay libropi qillqanankuta munaspaqa, imatachus qillqasqankuta mana ñawirinaykichikta ninaykichik tiyan. Chayta ruwaptiykichikqa, ichá paykunallataq imatachus qillqasqankuta willasunqachik.

Sapa juk kay libroyuq kanaykichikta, yachachisqantataq sumaqta riqsinaykichikta munayku. Ñawirichkaspaqa, imaynatachus waynuchu chayri sipas kachkaspa ñakʼarisqaykichikta, manchachikusqaykichikta, iskaychasqas kasqaykichikta ima yuyarikuychik. Atikuptinqa, imatachus wayna chayri sipas kachkaspa ruwasqaykichikmanta wawasniykichikman willariwaqchik, ajinamanta paykuna qamkunapi astawan atienekunqanku. Chantá, parlapayasuptiykichik, allinta uyariychik. Wawasniykichikwan parlanaykichikpaq kallpachakullaychikpuni, qallariypi mana parlayta munaptinkupis. Mana creenapaqjina kaptinpis, wawasqa tatasninkup yuyaychasqankuta astawan jatunpaq qhawanku.

Ñuqaykupaqqa, kay libropi qamkunaman Diospa yuyaychasqanta chayachimuyqa, may kusiy. Mayta munayku, kay libro familiaykichikpi kusisqa kawsakunaykichikpaq yanapasunaykichikta.

Qillqaqkuna