Armagedón maqanakuy: ¿maykʼajtaj kanqa?

“Mana yupay atinata tukuy nacionesmanta, ayllusmanta, runasmanta, tukuy parlaykunamantawan [...] jatun ñakʼariy tiempomanta llojsimojkuna[ta rikorqani].” (APOCALIPSIS 7:9, 14).

JALLPʼAQA, Armagedón maqanakuy qallarinanpaj wakichisqa kashan. ¿Imaynatá chayta yachanchej?

Kay tiempopeqa, ashkha runas Jehová Diosta yupaychashanku, kamachiykunasninman jinataj kausakushanku. Paykunaqa, tukuy nacionesmanta, tukuy ayllusmanta, tukuy parlaykunamantawan kanku, Diospa yanapayninwantaj ujchasqas kausakunku. Chaytaj Jehovamanta sutʼinchajkunallapi rikukun (Juan 13:35).

Pisi tiempomantawan, Satanasqa, supaykunasninwan, Jehová Diospa ujchasqa llajtanwan churanakuyta qallarenqa (Ezequiel 38:8-12; Apocalipsis 16:13, 14, 16). ¿Imaraykutaj chayta ninchej? Bibliaqa, Armagedón nisqa maqanakuy qayllata, ima profeciaschus juntʼakunanta rikuchiwanchej, chay profeciasmanta ashkha profeciastaña juntʼakojta rikushanchej.

Profecías kay tiempopi juntʼakushanku

Discipulosqa, Jesusta, ¿imaynatá runas yachanqanku maykʼajchus “kay pachaj tukukuynin[...]” kananta?, nispa taporqanku (Mateo 24:3). Imaschus qhepaman kananta Jesús nerqa: “Uj nación waj naciompa contranta oqharikonqa, uj reinopis waj reinoj contranta; jinallataj kanqa yarqhaykuna, sinchʼi jallpʼa ikhakuykuna ima kaynejpi, jaqaynejpi”, nispa. Chantá nillarqataj: “Chaywampis chay tukuy imasqa nanaykunaj qallariynillanraj”, nispa (Mateo 24:7, 8). Apóstol Pabloqa, chay pʼunchaykunata ‘qhepa pʼunchaykuna’ kasqanta nerqa, sutʼincharqataj “manchay sajra pʼunchaykuna” kananta (2 Timoteo 3:1). ¿Manachu kaykuna Bibliaj profeciasnin juntʼakushasqankuta rikuchin?

¿Imaraykutaj qhepa pʼunchaykuna manchay sajra pʼunchaykuna kanan karqarí? Imajtinchus apóstol Juanqa, kay Jallpʼapi Kuraj Supaypaj, supaykunasninpaj ima “pisi tiempollaña” kananta nerqa, sajra ruwaykunata ruwanankupaj. Chantapis Kuraj Supay “manchay phiñasqa” kananta nillarqataj (Apocalipsis 12:7-12). ¿Manachu Jallpʼantinpi runastapis manchay phiñasqasta, manchay sajrasta rikunchej?

Chantá Jesusqa, kay sajra pʼunchaykunapi “[Diospa] reinomanta evangelio tukuynejpi willasqa kanqa, tukuy runas yachanankupaj; chaypachamá tukukoyqa jamonqa”, nispa nillarqataj (Mateo 24:14). Jehovamanta sutʼinchajkunaqa, Diospa Reinonmanta allin willaykunata 235 kuraj suyuspi, llajtaspi ima willashanku, chaytataj 500 kuraj qalluspi ruwashanku. Chantapis Bibliamanta Torremanta Qhawaj, ¡Despertad!, revistasta ima orqhonku, kay revistasqa Jallpʼantinpi tukuy runaman chayan. Bibliatapis pachaj qallusmanta astawan orqhonku. Reinomanta willayninkutaj, runa munasqanman jina qolqeta churasqanwan ruwakun. Jesús, Diospa Reinomanta evangelio tukuynejpi willasqa kanqa nisqan, ¿juntʼakushanchu?

Chantapis Bibliaqa, Jehová Dios, enemigosninwan niraj maqanakushajtin imaschus rikukunanta nin. Kinsa profecías juntʼakunanku kashan, chayta ukhuncharina.

Kay profecías juntʼakonqankuña

Uj kaj profecía. Bibliaqa, kay pachamanta kamachejkuna runaj chʼampayninkuta allinchayta yuyashajtinku, “tukuy imapis allillan; ni imamanta llakikuna kanchu”, nispa nenqanku. Chaywanpis chayta nisqankutawan, astawan llakiykunalla rikukonqa (1 Tesalonicenses 5:1-3).

Iskay kaj profecía. Wakin kamachejkunaqa, kay pachamanta religioneswan churanakuyta qallarenqanku. Bibliaqa, kay pachamanta kamachejkunata, phiña animalwan kikinchan, llulla religionestataj phiña animalpa patanpi tiyasqa kashaj warmiwan kikinchan (Apocalipsis 17:3, 15-18). Kay phiña animal, nisunman kay pachamanta kamachejkuna, llulla religionesta chinkachejtinku, Diospa munayninta juntʼanqanku mana reparakuspalla.

Apóstol Juan kayta nillantaj: “Chay chunka wajras, phiña animalpi rikorqanki, chaykunaqa phisu warmita chejnispa, sapanta qʼalallata saqerpayanqanku. Aychanta mikhonqanku, ninawantaj ruphachenqanku. Ajina kanqa, imaraykuchus Diosqa sonqonkuman churanqa paypa munayninta ruwanankupaj”, nispa (Apocalipsis 17:16, 17).

Kinsa kaj profecía. Llulla religionesta chinkachiytawan, Satanasqa, kay pachamanta kamachejkunata Diospa llajtanpa contranpi maqanakunankupaj tanqanqa (Apocalipsis 7:14; Mateo 24:21).

¿Yanapasonqachu?

Bibliata manaraj sumajtachu ukhunchashanki chayqa, ichapis kay kinsa profecías juntʼakunanta mana creeyta atillankichu. Chaywanpis pisi tiempomantawan juntʼakunanpipuni atienekuyta atinchej. Imaraykuchus Bibliaj ashkha profeciasninña juntʼakun, chaytaj kay kinsa profeciaspis juntʼakunanta rikuchiwanchej.a

¿Imaynatá Jehovamanta sutʼinchajkuna, “Tukuy Atiyniyoj Diospa chay jatun pʼunchayni[n]” qayllitapi kasqanta, mana manchachikunankuta ima yachanku? ¿Manachu tiempochakuwaj chaymanta yachakunaykipaj? Pikunatachus Jehová jarkʼanqa, chaykunawan kanaykipaj, imatachus ruwanaykita Bibliapi rikuchisunankuta niy (Apocalipsis 16:14). Imatachus yachakusqaykeqa, aswan qhepaman imachus kananta mana manchachikunaykipaj yanapasonqa.

[Sutʼinchaynin]

[8 paginapi sutʼinchaynin]

Jehovamanta sutʼinchajkuna willashasqanku, ¿uj profecía juntʼakushasqantachu nisunman?