Ichá qanpis Rogelio jinallataj yuyanki, chayri ichá ninki:

• Satanasqa mana kanchu, runaj sonqonpi sajra kajlla.

• Satanasqa kanpuni. Jinapis runaj kausayninman mana satʼikunchu.

• Satanasqa uj atiyniyoj espíritu, runastataj munayninta ruwachiyta atin.

Ashkha runas Satanasmanta tukuy imata yuyanku. Jinapis, ¿imaraykú yachananchej kanman pichus Satanás kasqanta? Kaypi tʼukuriy, Satanás mana kanchu nisunman chayqa, kanpuni nejkuna chʼaukiyachikushanku. Satanás kan chaypis, runaj kausayninman mana satʼikunchu nisunman chayqa, payta manchachikojkuna qhasillata ñakʼarishanku. Kaypi tʼukurillaytaj Satanás runasta munayninta ruwachishan chayqa, ichá mana yuyallanchejpischu imayna sajrapunichus kasqanta.

¿Satanás sonqonchejpi sajra kajllachu? Kanpuni chay, ¿manchachikunachu tiyan? ¿Imaynatá jarkʼakusunman? Biblia imatachus chay tapuykunaman kutichisqanta qhawarina.

Ashkha runasqa Satanás chayri Supay, sonqonchejpi sajra kajlla kasqanta yuyanku. Bibliataj sutʼinchan Satanasqa Jesuswan, Dioswan ima parlasqanta, chaymanta astawan parlarina.

SATANASQA JESUSWAN PARLARQA

Jesús bautizakusqantawan, Satanasqa kinsa kutikama pruebaman churarqa. Ñaupajtaqa rumista tʼantaman tukuchinanta nerqa, Diospa atiyninwan paypa allinnillanpaj imatapis ruwananpaj. Chantá uj torre patamantañataj wijchʼuykukunanta nerqa, runas payta jatunpaj qhawanankupaj. Chaymanta, ‘qonqorikuspachus yupaychawanki chayqa, kay Jallpʼapi tukuy kaj llajtasta qosqayki’, nispañataj nerqa. Jesustaj mana kasuta ruwarqachu, astawanpis Bibliaj nisqasninwan kuticherqa (Mateo 4:1-11; Lucas 4:1-13).

¿Sonqonpi sajra kajwanchu Jesús parlasharqa? Mana. Bibliaqa sutʼinchan noqanchej jina pruebaman churasqa kajtinpis ni jaykʼaj juchallikusqanta (Hebreos 4:15). Biblia nin: “Cristoqa mana jaykʼajpis juchallerqachu, nitaj llulla parlaypis simimpi tarikorqachu”, nispa (1 Pedro 2:22). Arí, Jesusqa mana sonqonpi sajra kajwanchu parlasharqa, imajtinchus payqa mana juchayoj, Diosmantaj cheqa sonqo karqa. Chayrayku nisunman Satanaswanpuni parlashasqanta.

Chay parlarisqankoqa Satanás kasqantapuni rikuchin. Chaymanta astawan sutʼincharina.

• Nerqanchej jina, Satanasqa Jesusman tukuy llajtasta qonanta nerqa, sichus pay yupaychanman karqa chayqa (Mateo 4:8, 9). Jesusqa mana sapallanchu parlasharqa, astawanpis Satanás atiyniyoj kasqanta nerqa.

• Satanasqa Jesusta pruebaman churaytawan, “pisi tiempota chinkarerqa” (Lucas 4:13). Satanás runaj sonqonpi sajra kajlla kanman chayqa, nichá Jesuswan parlayta tukuytawan ripunmanchu karqa. Payqa kanpuni, Jesuspa enemigontaj.

• Chaymantataj Mateo 4:11 versiculopi ángeles jamuspa Jesusta kallpachasqankuta nin. Chay versiculoqa rikuchiwanchej ángeles kasqankutapuni. Chayrayku nisunman Satanaspis kallasqantataj.

SATANASQA DIOSWAN PARLARQA

Bibliaqa rikuchin Satanasqa iskay kutipi Dioswan Jobmanta parlasqanta. Jobqa Diospa cheqa sonqo kamachin karqa. Satanastaj Jobta sumajtapis rejsinman jina Diosman nerqa: “¿Payqa qhasichu ima nisqaykitapis cheqanta ruwashan?”, nispa. Chaywan Diosta nisharqa tukuy imata qosqanraykulla Jobwan munachikushasqanta. Chayrayku Jehovaqa, Satanasta saqellarqa Jobpa tukuy kapuyninta, wawasninta ima qhechunanta, cuerpontapis nanaykuchinanta.a Satanás llullakusqanqa sutʼi karqa, imajtinchus Jobqa mayta ñakʼarispapis, Jehovaman cheqa sonqollapuni karqa. Chayraykutaj ashkha bendicionesta japʼerqa (Job 1:6-12; 2:1-7).

¿Sonqonpi sajra kajwanchu Jehová parlasharqa? Mana. Imaraykuchus Bibliaqa “Diospa ñannenqa cheqanmin” kasqanta nin (2 Samuel 22:31). Nillantaj “Santo, Santo, Santo, Tukuy Atiyniyoj Señor Dios” kasqanta (Apocalipsis 4:8). Santo palabraqa llimphu, juchamanta tʼaqasqataj niyta munan. Chayrayku nisunman Jehová ni ima sajrayoj kasqanta.

Chaywanpis wakin runasqa, Job ni jaykʼaj kausasqanta yuyanku. Satanás Jehovawan parlasqantapis uj cuentolla kasqanta ninku. Chayta yuyaspaqa pantallankutaj, imajtinchus Bibliaj wakin versiculosnenqa Job kasqantapuni sutʼinchan. Santiago 5:7-11 versiculosqa Job jina pruebaspi sinchʼita sayajtinchej Jehová bendecinawanchejmanta parlashan. Satanás, Jobta ñakʼarichisqan uj cuentolla kanman karqa chayqa, chay versiculospa nisqan qhasilla kanman. Chantapis Ezequiel 14:14, 20 versiculosninpi Noemanta, Danielmanta Jobmanta ima parlallantaj, paykunatataj cheqan runas kasqankuta nin. Chaytaj rikuchiwanchej Job kasqantapuni, ñakʼarichejnin Satanaspis kallasqantataj.

Rikunchej jina Bibliaqa Satanás kasqantapuni sutʼinchan. Chayrayku ichá tapurikunchej: “¿Satanás ñakʼarichiwasunmanchu?”, nispa.

¿IMASTATAJ SATANÁS RUWASHAN?

Kaypi tʼukuriy. Sichus tiyakunchej chayman ashkha suwas chayamunkuman chayqa, callespi puriyta mayta manchachikusunman, runaspis sajra imasta ruwankuman. Kunantaj tʼukuriy sichus Satanás, supaykunasnin ima, Diospa contranpi oqharikorqanku chaykuna noqanchejwan khuska kashankuman chayqa, ¿imatá ruwashankuman? Chayta yachanapajqa, imatachus sapa pʼunchay noticiaspi uyarisqaykipi tʼukuriy.

• ¿Reparankichu runas sajra ruwaykunata pisiyachiyta munaspapis mana atisqankuta?

• Tatasman mana allin rijchʼajtinpis, películas, takiykuna, waj kusirikunapaj imaspiwan, layqerio imasllawanña chajrusqa kasqanta, ¿reparankichu?

• Runas kay Jallpʼanchejta jarkʼayta munaspapis, ¿manachu astawan phiriykushanku?

• ¿Reparankichu runasqa tanqasqa jina sajra kajta ruwashasqankuta, chaytaj chinkayman apashasqanta?

¿Pitaj chay tukuy imamanta juchayoj kanman? Bibliaqa nin: “Chay jatun sierpe jawaman wijchʼusqa karqa; chayqa chay unay ñawpa katari, pichus sutichasqa Kuraj Supay, Satanastaj. Payqa llullakuspa kay pachapi kaj chhika runasta pantachin. Payta, sajra angelesnintawan kay pachaman wijchʼumorqanku. [...] Ay, kay pacha jallpʼa patapi, mama qocha patapipis tiyakojkunamanta, imaraykuchus Kuraj Supayqa manchay phiñasqa qankunaman uraykʼamun, yachaspa paypaj pisi tiempollaña kasqanta”, nispa (Apocalipsis 12:9, 12). Rikunchej jina kay Jallpʼaqa uj sajra espirituj makinpi kashan, chaytaj Satanás.

Chayrayku chay sajra espiritumanta jarkʼakuyta munanchej. ¿Imaynatá chayta ruwasunman? Qhepan yachaqana kay tapuyman kutichenqa.

Satanasqa chay gas jina, mana rikuyta atikullanchu, runasta sajra ruwaykunaman tanqashasqanpis mana reparayta atikullanchu. Jinapis mana manchachikunanchejchu tiyan. Diosqa Satanasmanta jarkʼakunapaj ashkha yanapasta qowanchej. Chaykunamanta parlarina.

Ajllayta atinchej. Santiago 4:7 nin: “Kuraj Supaypa contranta sinchʼita sayaychej, paytaj qankunamanta ayqenqa”, nispa. Satanás atiyniyoj kajtinpis munayninta mana ruwachillawasunmanchu. Sinchʼita sayajtinchejqa, pay noqanchejmanta karunchakonqa (1 Pedro 5:9). Jesús kinsa kutita pruebaman churasqa kajtinpis sinchʼita sayarqa, Satanastaj paymanta karunchakorqa (Mateo 4:11). Noqanchejpis Jesús jina ruwasunman.

Diosman qayllaykuyta atinchej. Santiago 4:8 nin: “Diosman astawan qayllaykuychej”, nispa. Arí, Jehovaqa payman qayllaykunanchejta munan, chaypajtaj Bibliata leerina tiyan (Juan 17:3). Diosmanta astawan yachakuspa, astawan munakusun, astawantaj sirviyta munasun. (1 Juan 5:3). Jehová chay kallpachakusqanchejta rikuspa, Santiago 4:8 versiculoj tukukuyninpi nisqanman jina ‘Dios qayllamuwasunchej’.

Dios jarkʼayta munawanchej. Proverbios 18:10 nin: “[Jehovaj] sutenqa uj jarkʼachasqa torre jina; cheqan runasqa chaypi pakakuspa, waqaychasqa kanku”, nispa. Chayqa mana niyta munanchu Diospa sutinta oqharejtinchej, ima llakiyninchej chinkapunanta, astawanqa niyta munan sutinta jatunpaj qhawajkuna, ima ratollapis jarkʼananta mañakuyta atisqankuta.

Bibliaj sumaj yachachiynin. Hechos 19:19 versiculopi uj sumaj yachachiyta tarinchej chaypi nin: “Ashkha yatiristaj librosninkuta tantaykuspa apamorqanku, tukuypa rikunantataj ruphaykucherqanku. Chay ruphachisqankutaj phishqa chunka waranqa qolqe valesqa”, nispa.a Éfeso llajtamanta runasqa cristiano kayta munaspa, ni ima layqa ruwaykunawan chhapukuyta munarqankuchu. Chayrayku may valorniyoj yatiri librosninkuta kanaykorqanku. Chay ruwasqankutaj mayta yachachiwanchej. Imajtinchus Jallpʼaqa layqa ruwaykunawan juntʼa kashan. Wakin imasqa allillan rijchʼakojtinpis, layqa ruwaykunawan chajrusqa kasqankurayku supaykunata wajyanman. Chayrayku chay tukuy ima may valorniyoj kajtinpis, ni imarayku jallchʼakunachu tiyan (Deuteronomio 18:10-12).

Kay revistaj ñaupaj kaj yachaqananpi Rogeliomanta parlarqanchej. Payqa 50 watasniyoj kashaspaña Satanás kasqantapuni cuentata qokorqa, ¿imaynapí chayta yacharqa? Pay nin: “Bibliata leeyta qallarerqani, repararqanitaj Satanás kasqantapuni. Chaytaj Satanasmanta jarkʼakunaypaj yanapawarqa”, nispa.

¿Satanaspa sajra ruwaykunasnin chinkananta munawajchu? Bibliaqa Satanás tumpamantawan “azufrewan larwashaj nina qochaman wijchʼuykusqa” kananta nin (Apocalipsis 20:10). Kay azufrewan larwashaj nina qochaqa, mana uj larwashaj nina qochapunichu. Ninaqa Satanasta mana ruphayta atinmanchu, payqa uj espíritu. Chayrayku azufrewan larwashaj nina qochaqa Satanás wiñaypaj chinkaynillanwan ninakun. Arí, Satanás wiñaypaj chinkanqa, Diosta munakojkunapajtaj may kusiy kanqa.

Chay tiempo chayamunankama Jehovamanta, munayninmanta ima yachakullaypuni.b Ajinata ruwaspaqa, uj pʼunchay “¡Satanás manaña kanchu niyta atisun!”.